སྒྲོལ་དཀར་གྱིས་ཚོགས་རའི་ཕྱི་རུ་གསར་འགོད་པའི་བཅར་འདྲི་དང་ལེན་གནང་བཞིན་པ།
རྒྱལ་གཉེར་ནགས་རའི་ལས་བཟོ་བ་དཀྱུས་མ་དང་དམངས་གཉེར་ཁེ་ལས་ཀྱི་འབྲིང་རིམ་དོ་དམ་པ་ཞིག་ནས་ད་ཆ་རང་ཉིད་ཀྱིས་ལས་གཏོད་བྱེད་པའི་བར་དུ། རྒྱུ་ནོར་སྒོར་དུང་ཕྱུར་གཅིག་ལྷག་ཟིན་པའི་དམངས་གཉེར་ཁེ་ལས་པ་སྟེ། རྒྱལ་ཡོངས་སྲིད་གྲོས་ཀྱི་ཨུ་ཡོན་སྒྲོལ་དཀར་གྱིས་མི་ཚེའི་མྱོང་བའི་ཁྲོད“འཇོན་ཐང་ཇི་ཙམ་ཆེ་ན་འགན་འཁྲི་དེ་ཙམ་གྱིས་ལྕི་བ་ཡོད”ཅེས་པར་ཡིད་ཆེས་བརྟན་པོ་གནང་གི་ཡོད།
ལས་གཏོད་བྱེད་འགོ་ཚུགས་མ་ཐག སྒྲོལ་དཀར་གྱིས་རང་གི་འཇོན་ཐང་འཕེལ་རྒྱས་གཏོང་བ་དེ་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་ཀའི་སྤྱི་ཡོངས་དང་ཟུང་འབྲེལ་དམ་ཟབ་བྱས་ཏེ། ཐུན་མོང་ཕྱུག་འགྱུར་གྱི་ལམ་བུར་གོམ་སྟབས་བརྟན་པོས་བསྐྱོད་པ་རེད།
ད་ཆ། སྒྲོལ་དཀར་གྱིས་བོད་རང་སྐྱོང་ལྗོངས་བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཞོན་པ་དང་བོད་རང་སྐྱོང་ལྗོངས་གཞོན་ནུ་ཁེ་ལས་པའི་ཚོང་ཚོགས་ཀྱི་ཚོགས་གཙོ་སོགས་ཀྱི་གོ་གནས་གཅིག་ལྕོགས་སུ་འཁུར་བཞིན་ཡོད་ལ། ལྷག་པར་དུ་རྒྱལ་ཡོངས་སྲིད་གྲོས་ཀྱི་ཨུ་ཡོན་ལ་བདམས་ཐོན་བྱུང་རྗེས་སུ། སྒྲོལ་དཀར་གྱིས་ཁེ་ལས་དང་། གྲོང་གསེབ། མཐོ་རིམ་སློབ་གྲྭ་བཅས་སུ་རྟོག་ཞིབ་དང་བརྟག་ཞིབ་གནང་བར་ཕེབས་ཏེ། སྔ་རྗེས་སུ་མཐོ་རིམ་སློབ་གྲྭའི་སློབ་ཐོན་སློབ་མའི་ལས་ཞུགས་དང་ཚོང་གཉེར་ཁོར་ཡུག་ལེགས་སུ་གཏོང་བ་སོགས་ཀྱི་གནད་དོན་སྐོར་ནས་རྒྱལ་ཡོངས་ཚོགས་འདུ་གཉིས་ལ་གྲོས་གཞི་དང་གྲོས་འགོ་ཐེངས་མང་པོར་ཕུལ་ཡོད། སྒྲོལ་དཀར་གྱིས་ཐུན་མོང་ཕྱུག་འགྱུར་ལ་སྐུལ་འདེད་གཏོང་བའི་གཙོ་གནད་ནི་གྲོང་གསེབ་ཕྱོགས་ཡོངས་ནས་དར་རྒྱས་ལ་སྐུལ་འདེད་གཏོང་བར་ཐུག་ཡོད་པའི་ངོས་འཛིན་གནང་བཞིན་ཡོད་ཅིང་། ཁོང་གིས“འགན་འཁྲི་བསྒྲུབས་ནས་བརྟག་ཞིབ་བྱེད་རིང་ལ། ང་ལ་བོད་ལྗོངས་ཀྱི་ཞིང་ཞོར་ཐོན་རྫས་ལས་སྣོན་ཞིབ་ཚགས་དང་རིག་གནས་ཡུལ་སྐོར་མཉམ་འདྲེས་འཕེལ་རྒྱས་གཏོང་བར་མདུན་ལམ་ཆེན་པོ་ལྡན་ཡོད་པའི་མྱོང་ཚོར་ཟབ་མོ་བྱུང་། འདི་ནི་ཁྲོམ་རའི་དགོས་མཁོ་དང་ཁ་ཕྱོགས་ཡིན་པར་མ་ཟད། ཐུན་མོང་ཕྱུག་འགྱུར་ཡོང་བའི་གཞི་རྟེན་ནུས་ལྡན་ཞིག་ཀྱང་རེད། ད་ལོའི་རྒྱལ་ཡོངས་ཚོགས་འདུ་གཉིས་ལ་བོད་ལྗོངས་ཀྱི་གནས་ཚུལ་དང་ཟུང་འབྲེལ་བྱས་ཏེ་ཐབས་དང་ཇུས་བཏོན་ནས། སྤུས་ཚད་མཐོ་བའི་འགན་འཁྲི་སྒྲུབ་པའི་སྐོར་ཧུར་ཐག་ཞུ་གི་ཡིན”ཞེས་གསུངས།
