མདུན་ཤོག > ཆེད་སྒྲིག > 2025ལོའི་ཚོགས་ཆེན་གཉིས་ཀྱི་ཆེ་སྒྲིག། > པར་རིས་གསར་འགྱུར།

རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་བཀྲ་ཤིས་ཉི་མས་གསུངས་དོན།

2025-03-11

 

བཀྲ་ཤིས་ཉི་མ་ཡིས་གློག་ཤུགས་བདེ་འཇགས་ཡོ་བྱད་ལ་ཞིབ་བཤེར་བྱེད་བཞིན་པ། 

      བཀྲ་ཤིས་ཉི་མ་ནི་རྒྱལ་ཁབ་གློག་དྲ་ལྷ་ས་གློག་གཏོང་ཀུང་སིའི་རིམ་པ་བཞི་པའི་ལས་མི་ཞིག་ཡིན་ཞིང་། གློག་ཤུགས་ལས་དོན་གཉེར་ནས་ལོ30ལྷག་ཙམ་སོང་བ་དང་། སྔ་རྗེས་སུ“བོད་ལྗོངས་ཀྱི་ལག་རྩལ་པ”དང་བོད་རང་སྐྱོང་ལྗོངས་སྐབས་ལྔ་པའི་ངལ་རྩོལ་དཔེ་བཟང་བ་སོགས་ལ་བདམས། 2023ལོར་བཀྲ་ཤིས་ཉི་མ་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་འཐུས་མི་ལ་བདམས་པ་རེད།

      ལས་འགན་སྒྲུབ་པའི་ནུས་པ་ཆེ་རུ་གཏོང་ཆེད། བཀྲ་ཤིས་ཉི་མ་ཡིས་བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་སྒྲིག་འཛུགས་བྱས་པའི་ཆེད་དོན་བརྟག་ཞིབ་དང་། ཆེད་ལས་གསོ་སྦྱོང་། སྒྲོག་འགྲེལ་བྱེད་སྒོ་རེ་རེ་ལ་ལྟ་སྟངས་ནན་ཏན་འཛིན་པ་དང་། རང་འགུལ་ངང་འཐུས་མི་གཞན་དག་དང་སྤེལ་རེས་གཏིང་ཟབ་བྱས་ནས་གྲོས་འགོ་སློབ་སྦྱོང་དང་རྩོམ་འབྲི་བྱས་པ་རེད། ཕྱི་རོལ་དུ་བརྟག་དཔྱད་ཞིབ་འཇུག་བྱེད་པར་འགྲོ་ཐེངས་རེ་རེ་དང་། ཐ་ན་ཁྲོམ་གཞུང་དང་སྲང་ལམ་དུ་འགྲོ་ཐེངས་རེ་རེའང་ཁོང་གིས་ལྟ་ཞིབ་ཞིབ་ཕྲ་བྱེད་པ་དང་མང་ཚོགས་དང་སྤེལ་རེས་བྱེད་པ་དང་། དེའི་རྗེས་སུ་རྒྱུས་ལོན་བྱུང་བའི་གནད་དོན་གསར་པ་དང་བསམ་ཚུལ་གསར་པ་དེ་དག་ཟིན་བྲིས་སུ་བཀོད་པ་དང་འབྲེལ་བསམ་ཚུལ་དེ་དག་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་གྲོས་འགོར་བསྒྱུར་ཡོད།

      བཀྲ་ཤིས་ཉི་མ་ཡིས་གསར་འགོད་པར་ན་ནིང་རྒྱལ་ཡོངས་ཀྱི་ཚོགས་འདུ་གཉིས་སུ“བོད་ལྗོངས་ཀྱི་གློག་དྲ་གཙོ་བོ་དང་གློག་དྲ་ཕྲ་མོའི་འཕེལ་རྒྱས་ལ་སྐུལ་འདེད་མགྱོགས་པོ་གཏོང་རྒྱུའི་གྲོས་འགོ”བཏོན་པ་དང་། ཕྱོགས་སོ་སོས་ཐུན་མོང་ཐོག་འབད་བརྩོན་བྱས་པ་བརྒྱུད་བོད་ལྗོངས་ཀྱི་གྲོང་གསེབ་ཀྱི་གློག་དྲ་རིམ་སྤོར་ཡོང་བའི་རེ་བ་བྱེད་ཀྱི་ཡོད་ཅེས་གསུངས།

      རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་ཡིན་པའི་བཀྲ་ཤིས་ཉི་མས་དམངས་ཀྱི་སྐད་ཆར་ཉན་པ་དང་། དམངས་ཀྱི་གནས་ཚུལ་བརྟག་པ། དམངས་འདོད་ཤེས་པ། དམངས་ཀྱི་སེམས་ཁྲལ་སེལ་བ་བཅས་བྱེད་ཀྱི་ཡོད། 2024ལོའི་ཟླ9པར་བཀྲ་ཤིས་ཉི་མ་ཡིས་རྒྱུན་ལྡན་གྱི་འདྲི་རྩད་བརྟག་དཔྱད་བྱེད་པའི་བརྒྱུད་རིམ་ཁྲོད། ལྷ་ས་གྲོང་ཁྱེར་སྙེ་མོ་རྫོང་གྱང་ཉལ་གྲོང་ཚོ་རུ་དམའ་གནོན་སྐུད་ལམ་རྙིང་འགྱུར་གྱི་གནད་དོན་ཡོད་པ་ཤེས་རྟོགས་བྱུང་། ལྷ་སར་ལོག་རྗེས། བཀྲ་ཤིས་ཉི་མ་ཡིས་བསྒྱུར་བཀོད་ཇུས་གཞི་དང་གྲོས་འགོ་རྒྱལ་ཁབ་གློག་དྲ་ལྷ་ས་གློག་འདོན་ཀུང་སིར་ཕུལ་བ་དང་། ཀུང་སིའི་གུང་ཁྲན་ཏང་ཡོན་ཞབས་ཞུའི་རུ་ཁག་འབོད་སྐུལ་བྱས་ནས་སྙེ་མོ་རྫོང་གྱང་ཉལ་གྲོང་ཚོའི་དུད་ཚང172ཡི་དམའ་གནོན་སྐུད་ལམ་རྙིང་འགྱུར་བསྒྱུར་བཀོད་ལས་དོན་ལེགས་སྒྲུབ་བྱས་ནས་མང་ཚོགས་ཀྱིས་བདེ་འཇགས་དང་གློག་བརྟན་པོའི་ངང་སྤྱོད་རྒྱུར་འགན་ལེན་བྱས།

      འདས་ཟིན་པའི་ལོ་གཅིག་གི་ནང་དུ། བཀྲ་ཤིས་ཉི་མས་རྒྱལ་ཁབ་གློག་དྲ་ལྷ་ས་གློག་འདོན་ཀུང་སིའི་གུང་ཁྲན་ཏང་ཡོན་ཞབས་ཞུའི་རུ་ཁག་གི་སྣེ་ཁྲིད་དེ་སྡེ་ཁུལ་དང་གྲོང་ཚོར་བསྐྱོད་ནས་བཞུགས་མོལ་ཚོགས་འདུ་སྒྲིག་འཛུགས་བྱས་ཤིང་། མང་ཚོགས་ཀྱིས་གློག་ཤུགས་གནད་དོན་སྐོར་ལ་བཏོན་པའི་བསམ་འཆར་དང་གྲོས་འགོ་རྒྱ་ཁྱབ་ཏུ་བསྡུ་རུབ་བྱས་པ་དང་། འབྲེལ་ཡོད་ཆེད་མཁས་པ་གྲོང་ཚོར་གདན་འདྲེན་ཞུས་ནས་ལག་རྩལ་མཛུབ་ཁྲིད་བྱས་ཤིང་། ཐུན་མོང་ཐོག་ཐག་གཅོད་ཇུས་གཞི་གྲོས་བསྡུར་བྱས་པར་མ་ཟད་། གློག་རིན་སྲིད་ཇུས་དང་བདེ་འཇགས་ངང་གློག་སྤྱོད་པའི་ཐད་ལ་རྒྱ་བོད་སྐད་རིགས་གཉིས་ཀྱི་སྒོ་ནས་དྲིལ་བསྒྲགས་བྱས།

      ལས་འགན་སྒྲུབ་པའི་བརྒྱུད་རིམ་ནང་དུ། བཀྲ་ཤིས་ཉི་མས་རང་ཉིད་ཀྱི་ལས་ཀར་གཙོ་བོ་གཞོགས་ནས་བྱེད་སྒོ་གལ་ཆེན་གྱི་གློག་འགན་ལེན་དང་རྒྱུན་ལྡན་གྱི་གློག་འཁྲིད་ལས་དོན་ལེགས་པོར་སྒྲུབ། 2024ལོར་ཁོང་གནས་སའི་གློག་ལྡན་ལས་སྒྲུབ་གློག་སྲུང་འཛིན་གྲྭས་སྤུས་ཚད་མཐོ་བའི་སྒོ་ནས་གློག་སྲུང་ལས་འགན་ཁག424ལེགས་གྲུབ་བྱས་ཤིང་། དེའི་ནང་ཧ་ཅང་གལ་ཆེ་བའི་གློག་སྲུང་རྣམ་གྲངས189ཚུད་ཡོད། ད་ལོའི་དཔྱིད་གསར་དུས་ཆེན་གྱི་ལྷ་སའི་ཡན་ལག་ཚོགས་རར་བཀྲ་ཤིས་ཉི་མ་ནི་གློག་ཤུགས་ལས་རིགས་ཀྱི་འཐུས་མིའི་ངོས་ནས་ལེ་ཚན་ཕབ་ལེན་ནང་ཞུགས་པར་མ་ཟད། ད་དུང་གློག་འགན་ལེན་ལས་དོན་ནང་དུའང་ཞུགས་པ་རེད།

      “མི་དམངས་འཐུས་ཚོགས་ཀྱི་འཐུས་མི་ནི་ཏང་དང་རྒྱལ་ཁབ་ཀྱིས་མི་དམངས་མང་ཚོགས་དང་འབྲེལ་བ་བྱེད་པའི་ཟམ་པ་དང་འབྲེལ་ཐག་ལྟ་བུ་ཡིན་པས། ལས་འགན་གཟི་བརྗིད་ལྡན་པ་དང་འགན་འཁྲི་ལྕི་པོ་ཡོད” བཀྲ་ཤིས་ཉི་མས“རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་ཞིག་ཡིན་པའི་ངོས་ནས། ངས་མུ་མཐུད་ནས་བརྟག་དཔྱད་ཞིབ་འཇུག་ཡག་པོ་བྱས་ཏེ་མང་ཚོགས་ཀྱི་སེམས་ཀྱི་སྐད་ཆ་མང་ཙམ་ཉན་པ་དང་། མི་དམངས་མང་ཚོགས་ཀྱི་བསམ་ཚུལ་ཤེས་རྟོགས། བཅའ་ཁྲིམས་ཁྲིམས་སྲོལ་དང་སྲིད་ཇུས་ཡིག་ཆ་རྒྱུན་ཆད་མེད་པར་སློབ་སྦྱོང་བྱས་ཏེ། བོད་ལྗོངས་ཡོངས་ཀྱི་གློག་ཤུགས་འཕེལ་རྒྱས་གཏོང་ཆེད་གཏམ་བཤད་ཧུར་ཐག་སྤེལ་ནས་བོད་ལྗོངས་ཀྱི་མི་རིགས་ཁག་གི་མང་ཚོགས་ཀྱིས“གློག་སྤྱོད་ཐུབ་པ”ནས“གློག་ཡག་པོ་སྤྱོད་པའི”བར་འཕོ་འགྱུར་བྱུང་བར་མངོན་འགྱུར་བྱ་རྒྱུ་ཡིན་ཞེས་གསུངས།