2024ལོའི་ཟླ7པར། ཀྲུང་དབྱང་འཐབ་ཕྱོགས་གཅིག་གྱུར་པུའུ་དང་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱིས་མཛུབ་ཁྲིད་བྱས་པ་དང་། ཀྲུང་གོའི་བོད་ལྗོངས་ཀྱི་རིག་གནས་སྲུང་འཕེལ་མཐུན་ཚོགས་དང་པེ་ཅིང་སེམས་མཐུན་མཉམ་གཏོད་སྤྱི་ཕན་ཐེབས་རྩ་ལྷན་ཚོགས་ཀྱིས་གཙོ་གཉེར་བྱས་པ། སི་ཁྲོན་ཞིང་ཆེན་ཨུ་ལྷན་འཐབ་ཕྱོགས་གཅིག་གྱུར་པུས་གཉེར་རོགས་བྱས་པ། ཀྲུང་གུང་དཀར་མཛེས་ཁུལ་ཨུད་དང་དཀར་མཛེས་ཁུལ་མི་དམངས་སྲིད་གཞུང་གིས་གཉེར་འགན་འཁུར་བ་བཅས་ཀྱི2024ལོའི“སེམས་མཐུན། ཀྲུང་གོའི་སེམས་པ་མཉམ་གཏོད”ཀྱི་དཀར་མཛེས་སུ་བསྐྱོད་པའི་སྤྱི་ཕན་བྱེད་སྒོ་ཆེ་གྲས་བདེ་བླག་ངང་གཉེར་ཞིང་། བྱེད་སྒོའི་སྤེལ་རིང་སྨན་བཅོས་ཆེད་མཁས་པ800ལྷག་ཙམ་དཀར་མཛེས་ཁུལ་གྱི་གྲོང་ཁྱེར་དང་རྫོང18དུ་བསྐྱོད་དེ་འོས་འགན་སྨན་བཅོས་དང་། སྐོར་སྐྱོད་སྨན་བཅོས། རིམས་ནད་གྲལ་བཤེར། གཤགས་བཅོས་རོགས་སྐྱོབ། སློབ་ཁྲིད་རྣམ་པའི་ནད་ཁང་བརྟག་དཔྱད། གཅེས་སེམས་ཞལ་འདེབས། རིག་གཞུང་འཆད་ཁྲིད། མི་སེར་གྱི་བདེ་ཐང་ཚན་རིག་ཁྱབ་གདལ་སོགས་ཚུད་པའི་རྣམ་པ་སྣ་ཚོགས་ཀྱི་བདེ་ཐང་རོགས་སྐྱོར་བྱེད་སྒོ་སྤེལ་ཡོད།
ཆིང་ཧྭ་སློབ་ཆེན་གྱི་ཞོར་གཏོགས་སྨན་ཁང་དང་པོའི་ཡོན་ཀྲང་གཞོན་པ་ཁྲག་རྩའི་ཕྱི་ནད་ཚན་ཁག་གི་ཀྲུའུ་རེན་སྨན་པ་ཧུའུ་ཁྲང་ནི་སྨན་བཅོས་ཆེད་མཁས་པ་ཚོགས་པའི་ཁོངས་མི་ཞིག་ཡིན་ཞིང་། གཤིས་ཀ་འཇམ་ལ་བག་ཆགས་པ་དང་རྟག་ཏུ་གད་མོ་འཚེར་འཚེར་ངང་སྡོད་པ་ནི་ཧུའུ་ཁྲང་གིས་མི་རྣམས་ལ་བཞག་པའི་ཐོག་མའི་བག་ཆགས་དེ་ཡིན། འོས་འགན་སྨན་བཅོས་བྱེད་རིང་ཁོང་གི་ཕུལ་དུ་བྱུང་བའི་སྨན་བཅོས་ལག་རྩལ་དང་། ནད་པ་དང་དང་བླངས་པར་ཐུགས་ཁུར་ཆེ་ལ་ངང་རྒྱུད་རིང་བ། སྨན་བཅོས་ཚན་རྩལ་གསར་ཤོས་ལ་འཚོལ་ཞིབ་ལྷོད་མེད་དང་སྤྱི་ཕན་བྱེད་སྒོར་ཞུགས་འདོད་ཆེ་བ་བཅས་ལས་གསར་འགོད་པར་བག་ཆགས་ཟབ་མོ་བཞག་ཡོད།
ཧུའུ་ཁྲང་གིས་ཀྲུང་གོའི་བོད་ལྗོངས་དྲ་བའི་གསར་འགོད་པའི་བཅར་འདྲི་དང་ལེན་བྱེད་བཞིན་པ།
“སེམས་མཐུན”མཉམ་གཏོད་ཀྱི་སྤྱི་ཕན་སྟོབས་ཤུགས་དང་ལས་འབྲེལ་ཐེངས་གསུམ་བྱུང་བ།
“ད་ཐེངས་ནི‘སེམས་མཐུན’སྤྱི་ཕན་བྱེད་སྒོར་ཞུགས་ཐེངས་གསུམ་པ་ཡིན། ཐེངས་གོང་མ་གཉིས་ནི་བོད་ལྗོངས་ཆབ་མདོ་དང་ཅང་ཤིས་ཝུའུ་ཡོན་གྱི་བདེ་ཐང་རོགས་སྐྱོར་བྱེད་སྒོ་ཡིན”ཞེས་ཧུའུ་ཁྲང་གིས་བཤད། ད་ཐེངས་ཀྱི2024ལོའི“སེམས་མཐུན། ཀྲུང་གོའི་སེམས་པ་མཉམ་གཏོད”ཀྱི་དཀར་མཛེས་སུ་བསྐྱོད་པའི་སྤྱི་ཕན་བྱེད་སྒོའི་ཁྲོད་ཧུའུ་ཁྲང་དཀར་མཛེས་ཁུལ་དཔལ་ཡུལ་རྫོང་དུ་ཡོང་ཡོད་ལ། པེ་ཅིང་སྨན་བཅོས་ཆེད་མཁས་པ་ཚོགས་པའི་རྒྱ་གྲམ་དམར་རྟགས་ཚོགས་པ་བཅུ་གསུམ་པའི་ལག་བསྟར་ཚོགས་གཙོ་ཡང་རེད། རིམ་བཞིན་གཏིང་ཟབ་ངང་ཞུགས་པ་ལས་ཁོང་གིས་པེ་ཅིང་སེམས་མཐུན་མཉམ་གཏོད་སྤྱི་ཕན་ཐེབས་རྩ་ལྷན་ཚོགས（གཤམ་དུ“སེམས་མཐུན་ཐེབས་རྩ་ལྷན་ཚོགས”ཞེས་བསྡུ་རྒྱུ）ལ་ཤེས་རྟོགས་དེ་བས་མང་བ་བྱུང་བ་དང་ཆབས་ཅིག“སེམས་མཐུན། ཀྲུང་གོའི་སེམས་པ་མཉམ་གཏོད”ཀྱི་སྤྱི་ཕན་བྱེད་སྒོར་ངོས་འཛིན་དེ་བས་གཏིང་ཟབ་ཀྱང་བྱུང་ཡོད།
ཧུའུ་ཁྲང་གིས་ངོ་སྤྲོད་བྱས་པར་གཞིགས་ན། ཁོང་གནས་སའི་ཆིང་ཧྭ་སློབ་ཆེན་ཞོར་གཏོགས་སྨན་ཁང་དང་པོས་ལོ་མང་རིང་ལྷན་སྐྱེས་སྙིང་ནད་དང་ལྷག་དོན་དུ་རྙོག་འཛིང་ཆེ་བའི་ལྷན་སྐྱེས་སྙིང་ནད་སྐྱོབ་བཅོས་ལས་ལ་གཞོལ་ཡོད་ལ། སེམས་མཐུན་ཐེབས་རྩ་ལྷན་ཚོགས་དང་མཉམ་ལས་ལོ་བཅུ་ལྷག་ཙམ་བྱས་ནས། ལོ་ལྟར་ཐེབས་རྩ་ལྷན་ཚོགས་ཀྱིས་སྒྲིག་འཛུགས་བྱས་པའི་སྤྱི་ཕན་བྱེད་སྒོར་ཞུགས་ཀྱི་ཡོད། ཕྱོགས་གཉིས་པོས་མཉམ་ལས་བྱས་ཏེ་གཤགས་བཅོས་ཀྱི་ཆ་རྐྱེན་དང་མཐུན་པའི་ལྷན་སྐྱེས་སྙིང་ནད་ཕོག་པའི་བྱིས་པ་གྲལ་བཤེར་ཐུབ་རྗེས་པེ་ཅིང་དུ་སྨན་རིན་མི་དགོས་པར་སྨན་བཅོས་བྱེད་པར་ཁྲིད་ཀྱི་ཡོད།
ཧུའུ་ཁྲང་གིས་ནད་པར་བརྟག་དཔྱད་བྱེད་བཞིན་པ།
“སེམས་མཐུན། ཀྲུང་གོའི་སེམས་པ་མཉམ་གཏོད”ཀྱི་སྤྱི་ཕན་བྱེད་སྒོའི་ལྟ་ཚུལ་སྐོར་གླེང་སྐབས་ཧུའུ་ཁྲང་གིས་མྱོང་ཚོར་ཟབ་མོའི་ངང“2008ལོར་བྱེད་སྒོ་དེ་སྤེལ་ཚུན། ‘སེམས་མཐུན’ཞེས་པའི་སྤྱི་ཕན་རྣམ་གྲངས་དེ་ལོ་བཅུ་དྲུག་སྤེལ་ཡོད། སྒྲིག་འཛུགས་ཨུ་ལྷན་གྱིས་རྣམ་གྲངས་དེ་ཧ་ཅང་ཡག་པོ་བསྒྲུབས་ཡོད་ལ། ངས་བལྟས་ན་དེའི་མིང་དང་འདྲ་བར་གོ་དོན་གཉིས་ལྡན་པ་སྟེ། གཅིག་ནས་སྲིད་གཞུང་དང་སྤྱི་ཚོགས་ལས་རིགས་ཁག་གི་གཅེས་སེམས་མི་སྣས་ཕྱར་བ་གྲུ་འདེགས་ཀྱིས་རང་རྒྱལ་གྱི་བདེ་ཐང་བྱ་གཞག་ལ་སེམས་ནུས་ལེགས་སྐྱེས་སུ་ཕུལ་བ་ཞིག་ཡིན་པ་དང་། གཉིས་ནས་བྱེད་སྒོ་དེར་རྒྱལ་ཡོངས་ས་གནས་ཁག་གི་སྨན་བཅོས་ཆེད་མཁས་པ་གཅིག་སྡུད་ཀྱིས་ནུས་ཚད་ཆེན་པོ་ཞིག་གྲུབ་པ་མ་ཟད། ནུས་ཚད་དེ་རྒྱལ་ཡོངས་ས་གནས་ཁག་དང་ལྷག་པར་དུ་མཐའ་མཚམས་དང་མི་རིགས་ས་ཁུལ་དུ་བརྒྱུད་སྤྲོད་བྱེད་པ་ཞིག་རེད”ཅེས་བཤད།
ས་གནས་ས་ཐོག་ཏུ་བརྟག་དཔྱད་བྱས་ཏེ་ནད་པའི་གནས་ཚུལ་ཕྱོགས་ཡོངས་ནས་ཤེས་རྟོགས་བྱས་པ།
ཟླ7པའི་ཚེས6ཉིན་གྱི་ས་སྲོད་ཙམ་དུ། ཧུའུ་ཁྲང་གནས་སའི“སེམས་མཐུན། ཀྲུང་གོའི་སེམས་པ་མཉམ་གཏོད”ཀྱི་དཀར་མཛེས་སུ་བསྐྱོད་པའི་དཔལ་ཡུལ་རྫོང་གི་སྨན་བཅོས་ཆེད་མཁས་པ་ཚོགས་པ་ཉིན་གང་རིང་ལམ་ལ་བཞུད་རྗེས་དཔལ་ཡུལ་རྫོང་དུ་འབྱོར་ཞིང་། དེ་རྗེས་ཀྱི་ཉིན་བདུན་གྱི་རོགས་སྐྱོར་བྱེད་སྒོའི་ནང་། ཧུའུ་ཁྲང་གིས་སྔ་རྗེས་སུ་དཔལ་ཡུལ་རྫོང་དུས་རབས་གསར་པའི་ཤེས་དཔལ་ལག་ལེན་ཐང་ཆེན་དང་། རྫོང་མི་དམངས་སྨན་ཁང་། ཁྲོམ་ཐར་ཡུག་ཁུལ་ཨ་ཚབ་གྲོང་རྡལ། ཧོར་སྤོ་ཞང་ལྟེ་བའི་སློབ་ཆུང་སོགས་སུ་འོས་འགན་སྨན་བཅོས་བྱས་པ་དང་འབྲེལ། རྫོང་མི་དམངས་སྨན་ཁང་དུ་སླེབས་ཡོད་པའི་ས་གནས་དེ་གའི་སྨན་དོན་མི་སྣ་དང་མེ་གསོད་རུ་མིར་ཁྲག་རྩའི་ཕྱི་ནད་ཚན་ཁག་བརྗོད་དོན་གཙོ་བོར་བྱས་པའི་བདེ་ཐང་ཚན་རིག་ཁྱབ་གདལ་གྱི་འཆད་ཁྲིད་ཀྱང་བྱས་པ་རེད། བྱེད་སྒོ་སྤེལ་རིང་གི་ཐུགས་རྗེ་ཆེ་ཞུ་བའི་སྐད་ཆ་རེ་རེ་དང་། དྲིན་ཚོར་གྱི་སེམས་པ་མཚོན་པའི་ཁ་བཏགས་རེ་རེ། དགའ་སྤྲོའི་འཛུམ་མདངས་རེ་རེ་བཅས་ལས་ནད་པ་ཚོའི་དྲིན་ཚོར་གྱི་སེམས་པ་ཚད་མེད་མཚོན་ལ། ཧུའུ་ཁྲང་དང་དཀར་མཛེས་དཔལ་ཡུལ་དབར་གྱི་འབྲལ་ཐབས་མེད་པའི་བརྩེ་སེམས་ཟབ་མོ་ཡང་མཚོན་ཡོད། “ཁྲོམ་གཞུང་དུ་མང་ཚོགས་དང་འཕྲད་སྐབས་ཁོང་ཚོས་ང་ཚོ་པེ་ཅིང་ནས་ཡོང་བའི་འོས་འགན་བྱེད་མཁན་སྨན་པ་ཡིན་པ་ཤེས་ནས་དགའ་བསུ་ཆེན་པོ་ཞུས་པ་མ་ཟད། དགའ་སྤྲོའི་ངང་ང་ཚོར་འཚམས་འདྲི་ཡང་བྱེད་ཀྱི་འདུག་པས་དྲོ་སྐྱིད་ལྡན་པའི་ཚོར་སྣང་ཞིག་ཡོང་གི་འདུག”ཅེས་བཤད།
ཧུའུ་ཁྲང་གིས་ནད་པའི་བརྙན་རིས་ལ་བརྟག་དཔྱད་བྱེད་བཞིན་པ།
པེ་ཅིང་གི་ཆེད་མཁས་པས་རིན་མེད་ངང་འོས་འགན་སྨན་བཅོས་བྱེད་ཀྱི་ཡོད་པ་ཐོས་རྗེས། ནད་པ་མང་པོ་ཞིག་ཞོགས་པ་སྔ་པོ་ནས་འོས་འགན་སྨན་བཅོས་བྱ་ཡུལ་དུ་གྲལ་བསྒྲིགས་ནས་སྒུག་བཞིན་ཡོད་པ་དང་། ནད་པ་མང་ཤོས་ཀྱི་དུས་སུ་སྨན་པ་གཅིག་གིས་ཉིན་གཅིག་ལ་འོས་འགན་སྨན་བཅོས་བྱེད་ཚད་མི་ཐེངས་བརྒྱ་ལྷག་ཙམ་ཟིན་གྱི་ཡོད། ནད་པ་འབོར་ཆེན་དང་སྤེལ་རེས་གཏིང་ཟབ་བྱས་པ་བརྒྱུད། ཧུའུ་ཁྲང་གིས་རུས་ཚིགས་ནད་དང་སྙིང་ཀླད་ཁྲག་རྩའི་ནད་སོགས་ས་གནས་དེ་གའི་རྒྱུན་མཐོང་ནད་རིགས་དང་དེ་བཞིན་ནད་ཕོག་པའི་རྐྱེན་རྩ་ལའང་ཕྱོགས་ཡོངས་ནས་ངོས་འཛིན་ཐུབ་ཡོད། ཁོང་གིས་ནད་བརྟག་ནན་ཏན་བྱས་རྗེས། ནད་བསྟུན་སྨན་རྫས་སྤྲོད་པ་ཕུད། ད་དུང་ངང་རྒྱུད་རིང་པོས་ནད་པར་བདེ་ཐང་བདེ་སྲུང་གི་གྲོས་འགོ་ཡང་འདོན་གྱི་ཡོད། ཐ་ན་གོ་བརྡ་མི་འཕྲོད་པའི་དབང་གིས་སྐད་སྒྱུར་དང་བླངས་པ་བརྒྱུད་ནད་པ་དང་འབྲེལ་གཏུག་བྱེད་དགོས་ཀྱང་ཁོང་གིས་སྔ་བར་ཕྱི་གསུམ་དུ་སུན་སྣང་སྤུ་ཙམ་ཡང་མི་བྱེད་པར་འཛུམ་དམུལ་དམུལ་ངང་སྨན་བཅོས་བྱེད་ཀྱི་ཡོད།
ཧུའུ་ཁྲང་གིས་བདེ་ཐང་ཚན་རིག་ཁྱབ་གདལ་གྱི་འཆད་ཁྲིད་བྱེད་བཞིན་པ།
ད་ཐེངས་ཀྱི་བྱེད་སྒོར་པེ་ཅིང་ནས་དཔལ་ཡུས་བར་སྤྱི་ལེ་ཉིས་སྟོང་ལྷག་ཙམ་བརྒལ་ནས་བདེ་ཐང་རོགས་སྐྱོར་བྱས་པ་དེས་ཧུའུ་ཁྲང་ལ་ཕན་པ་ཆེན་པོ་ཐོབ་ཅིང་། ཁོང་གིས“ང་ཚོས་ནད་པ་དང་ཉེ་བཅར་གྱིས་ཁོང་ཚོ་འཚོ་བ་སྐྱེལ་སར་བསྐྱོད་ཚེ་གཞི་ནས་ནད་པ་མི་འདྲ་བའི་འཚོ་བའི་ཁོར་ཡུག་དང་ས་ཁུལ་མི་འདྲ་བའི་སྨན་བཅོས་ཐོན་ཁུངས་ཀྱི་གནས་ཚུལ་ཕྱོགས་ཡོངས་ནས་ཤེས་རྟོགས་ཐུབ་ལ། ཁོང་ཚོའི་སྨན་བཅོས་ཀྱི་དགོས་མཁོ་དམིགས་སའི་རང་བཞིན་ལྡན་པའི་ངང་སྐོང་ཐུབ”ཅེས་བཤད།
སྨན་ཁང་ནས་ཐོན་ཏེ་ནད་པ་དེ་བས་མང་བ་རོགས་སྐྱོབ་ཐུབ་རྒྱུའི་རེ་བ་ཡོད།
“སེམས་མཐུན། ཀྲུང་གོའི་སེམས་པ་མཉམ་གཏོད”ཀྱི་བྱེད་སྒོ་ཕུད། ཧུའུ་ཁྲང་གིས་ད་དུང་ཀུའེ་ཀྲོའུ་དང་ཡུན་ནན་སོགས་ཞིང་ཆེན་དང་གྲོང་ཁྱེར་དུ་བསྐྱོད་དེ་ཆིང་ཧྭ་སློབ་ཆེན་ཞོར་གཏོགས་སྨན་ཁང་དང་པོའམ་ཡང་ན་འབྲེལ་ཡོད་སྒྲིག་གཞི་གཞན་དག་གིས་སྒྲིག་འཛུགས་བྱས་པའི་སྤྱི་ཕན་སྨན་བཅོས་བྱེད་སྒོར་ཐེངས་མང་ཞུགས་མྱོང་ཡོད། སྤྱི་ཕན་བྱེད་སྒོའི་ནང་ཞུགས་འགོ་ཚུགས་པའི་རྒྱུ་མཚན་སྐོར་གླེང་སྐབས་ཁོང་གིས་དེ་ནི་དང་ཐོག་སེམས་བཟང་གི་སྐུལ་མ་ཐེབས་པས་རེད་ལ“‘སེམས་མཐུན’ལྟ་བུའི་ལས་སྟེགས་འདི་རིགས་ཀྱིས་ཆེད་མཁས་པ་ཚོའི་སྟོབས་ཤུགས་གཅིག་ཏུ་བསྡུས་ནས་དོན་སྙིང་ལྡན་པའི་བྱ་བ་དེ་འདྲ་བསྒྲུབས་པ་མཐོང་སྐབས་ང་ཡང་ཁོང་ཚོའི་ཁྲོད་ཀྱི་ཁོངས་མི་ཞིག་ཏུ་འགྱུར་བའི་གོ་སྐབས་བྱུང་བར་གཟི་བརྗིད་ཆེན་པོ་སྐྱེ་ཡི་འདུག སྨན་པ་ཞིག་ཡིན་པའི་ངོས་ནས་ང་ཚོས་དུས་ཚོད་མང་པོ་ཞིག་སྨན་ཁང་དུ་སྨན་བཅོས་བྱེད་ཀྱི་ཡོད་ལ། བརྟག་དཔྱད་བྱེད་ཐུབ་པའི་ནད་པའི་གྲངས་འབོར་ཡང་ཚད་ཡོད་རེད། ལས་སྟེགས་དེ་བས་ཆེ་བ་བརྒྱུད་ས་ཁུལ་མི་འདྲ་བར་བསྐྱོད་ནས་ནད་པར་སྨན་བཅོས་བྱེད་ཐུབ་པ་མ་ཟད། ད་དུང་པེ་ཅིང་གི་སྨན་བཅོས་འདུ་ཤེས་དང་སྨན་བཅོས་ལག་རྩལ་གསར་ཤོས་ས་ཁུལ་མི་འདྲ་བའི་སྨན་བཅོས་སྒྲིག་གཞིར་ཁྱབ་གདལ་བཏང་ནས་ནད་པ་དེ་བས་མང་བར་རིམ་བཞིན་རོགས་རམ་བྱེད་ཐུབ”ཅེས་བཤད།
ཧུའུ་ཁྲང་གིས་ས་གནས་དེ་གའི་སྨན་དོན་མི་སྣར་རོགས་ཁྲིད་བྱེད་བཞིན་པ།
ད་ཐེངས་ཀྱི་བྱེད་སྒོར་སྨན་བཅོས་བྱས་པའི་ནད་པའི་ཁྲོད་ཧུའུ་ཁྲང་ལ་བག་ཆགས་ཟབ་ཤོས་བཞག་མཁན་ནི་ལོ59ལ་སླེབས་པའི་ནད་པ་ཞིག་ཡིན་ཞིང་། ནད་པ་འདིར་ལོ་ཉི་ཤུའི་སྔོན་ལ་སྟབས་མ་ལེགས་པར་རླངས་འཁོར་གྱི་དོན་རྐྱེན་བྱུང་སྟེ་སྒལ་གཞུང་དང་། རྩིབ་རུས། སོག་རུས། སྒྲོག་རུས་སོགས་ཚུད་པའི་ལུས་ཡོངས་སུ་རུས་ཆག་མང་པོ་བྱུང་ཡོད། སྐབས་དེར་དུས་ཐོག་ཏུ་གཤགས་བཅོས་མ་བྱས་པས་ནད་རོ་མང་པོ་ཞིག་ལུས་ཡོད། ལོ་ཉི་ཤུ་སོང་རྗེས་པེ་ཅིང་གི་སྨན་པ་དཔལ་ཡུལ་དུ་འོས་འགན་སྨན་བཅོས་བྱེད་པར་ཡོང་གི་ཡོད་པ་ཐོས་རྗེས་འོས་འགན་སྨན་བཅོས་བྱ་ཡུལ་དུ་སྨན་བཅོས་བྱེད་པར་ཡོང་ཡོད། ཁོང་གིས“སྤེལ་རེས་བྱེད་རིང་། ནད་པས་སྨན་བཅོས་ཧུར་ཐག་བྱེད་འདོད་ཡོད་པ་ཚོར་བྱུང་། འོན་ཀྱང་ཡུན་རིང་སོང་ཟིན་པས་རྨ་ཆུང་གཤགས་བཅོས་བྱེད་ཐབས་ཀྱིས་སྨན་བཅོས་བྱེད་དཀའ་ལ་སྨན་བཅོས་ཀྱི་ཉེན་ཁ་ཡང་ཧ་ཅང་ཆེན་པོ་ཡོད། ང་ཚོའི་བྱེད་སྒོ་བརྒྱུད་མི་སེར་དེ་བས་མང་བ་ཞིག་ལ་ཤུགས་རྐྱེན་ཐེབས་ནས། ཁོང་ཚོས་ནད་གཞི་རྙིང་པ་ཆགས་ཚེ་མི་སྒེར་དང་ཁྱིམ་ཚང་གི་དཔལ་འབྱོར་ཐད་ཁུར་པོ་དང་སེམས་པའི་གནོན་ཤུགས་ལྕི་རུ་འགྲོ་སྲིད་པས། ནད་གཞི་གང་ཡིན་རུང་སྔ་ཙམ་ཤེས་རྟོགས་དང་། སྔ་ཙམ་བརྟག་དཔྱད། སྔ་ཙམ་སྨན་བཅོས་བཅས་བྱས་ཏེ་ནད་གཞི་ཇེ་སྡུག་ཏུ་མི་འགྲོ་བ་བྱ་རྒྱུའི་རེ་བ་ཡོད”ཅེས་བཤད། ནད་པ་དེའི་མྱོང་བ་དངོས་ལས་ཧུའུ་ཁྲང་ལ་བློ་ཕམ་ཆེན་པོ་བྱུང་ཡོད་ལ། མི་སེར་ཚོར་བདེ་ཐང་ཚན་རིག་ཁྱབ་གདལ་གྱི་བྱེད་སྒོ་མུ་མཐུད་སྤེལ་བའི་ཁོང་གི་ཆོད་སེམས་ཀྱང་དེ་བས་བརྟན་དུ་ཕྱིན་ཡོད།
ཧུའུ་ཁྲང་གིས་ནད་པར་ནད་གཞིའི་གནས་ཚུལ་གསལ་འགྲེལ་བྱེད་བཞིན་པ།
ཟླ7པའི་ཚེས13ཉིན་གྱི་ཉིན་དགུང་། དཔལ་ཡུལ་གྱི་འོས་འགན་སྨན་བཅོས་བྱེད་སྒོ་ཕུན་སུམ་ཚོགས་པོའི་ངང་ལེགས་གྲུབ་ཟིན་པའི་པེ་ཅིང་གི་སྨན་བཅོས་ཆེད་མཁས་པ་ཚོ་སླར་ཡང་པེ་ཅིང་དུ་ལོག་པའི་ལམ་ལ་ཆས་ཏེ་གེ་སར་གནམ་ཐང་དུ་འབྱོར་ཡོད། དུས་ཡུན་གཟའ་འཁོར་གཅིག་རིང་གི་ལས་བྲེལ་ཆེ་བའི་འོས་འགན་སྨན་བཅོས་བྱེད་མཇུག་འགྲིལ་བའི་མཚམས་འདིར་ཆེད་མཁས་པ་ཚོས་གསོ་རླུང་མི་འདང་བ་དང་། དཀའ་སྡུག་དང་ངལ་དུབ་ཆེ་བ་དག་སྔ་ས་ནས་བརྗེད་དེ་གྲུབ་འབྲས་ལྗིད་ཏིག་ཏིག་དང་གྱེས་མི་ཕོད་པའི་སེམས་པ་དང་བཅས་དཀར་མཛེས་ནས་བྲལ་ཡོད། གླེང་མོལ་བྱེད་རིང་གསར་འགོད་པས་ཧུའུ་ཁྲང་ལ“ཡོན་ཀྲང་ཧུའུ་ལགས། སླད་ཕྱིན་སླར་ཡང་དཔལ་ཡུལ་དུ་སྨན་བཅོས་བྱེད་སྒོ་སྤེལ་ཚེ་ཁྱེད་ད་དུང་ཡོང་འདོད་ཡོད་དམ”ཞེས་དྲིས་པར། ཁོང་གིས་ཚིག་ཐག་ཆོད་པོས“ཡོང་འདོད་ལོས་ཡོད། དཔལ་ཡུལ་མི་དམངས་ཀྱི་བབ་ཆགས་དང་སེམས་རྩ་འཁོལ་པོ་དེ་ངས་ནམ་ཡང་བརྗེད་མི་སྲིད”ཅེས་ལན་བཏབ།
