ཀྲུང་གོའི་བོད་ལྗོངས་དྲ་བའི་འཕྲིན། ཟླ3པའི་ཚེས13ཉིན་གྱི་དགོང་མོར། བོད་རང་སྐྱོང་ལྗོངས་ཉིང་ཁྲི་གྲོང་ཁྱེར་རྫ་ཡུལ་རྫོང་ནགས་ཚལ་མེ་གསོད་རུ་ཁག་གི་བཀོད་འདོམས་དམག་དཔོན་གྱིས་བཀའ་ཐོས་རྗེས་འཕྲལ་མར་ཁྲག་ཤོར་རྨས་སྐྱོན་ཞིག་ལ་རིན་མེད་ཁྲག་འབུལ་བྱས་ཏེ“མི་དམངས་མེ་གསོད་ཀྱིས་མི་དམངས་ལ་བྱ་རྒྱུའི”དམ་བཅའ་ལག་ལེན་བསྟར་བ་རེད།
ཉིན་དེའི་དགོང་མོར། རྫ་ཡུལ་རྫོང་མི་དམངས་སྨན་ཁང་གིས་བསམ་ཡུལ་ལས་འདས་པའི་དོན་རྐྱེན་ལས་རྨས་སྐྱོན་ཕོག་པའི་མང་ཚོགས་ཞིག་ལ་སྨན་བཅོས་བྱས་ཤིང་། དེའི་རྐང་པར་རྨས་སྐྱོན་ཚབས་ཆེན་ཕོག་པའི་དབང་གིས་ཁྲག་ཤོར་དྲགས་པས་དྲན་པ་ཐོར་བ་དང་འཕྲལ་དུ་གཤགས་བཅོས་བྱེད་དགོས་པ་རེད། སྨན་ཁང་གི་ཁྲག་མཛོད་དང་བསྟུན་པའི་ཁྲག་རིགས་དང་ཁྲག་ཁུངས་གསོག་འཇོག་ལ་ཚད་ཡོད་པས་སྐྱོབ་བཅོས་ལས་དོན་ལ་ཚོད་བགམ་ཆེན་པོ་འཕྲད་ཡོད། ཉེན་ཁའི་དུས་སུ་སྨན་ཁང་གིས་རྫ་ཡུལ་རྫོང་ནགས་ཚལ་མེ་གསོད་རུ་འབྲིང་ལ་ཛ་དྲག་གི་རོགས་སྐྱོར་བྱས་པ་རེད།
ཁ་པར་འབྱོར་རྗེས་རྫ་ཡུལ་རྫོང་ནགས་ཚལ་མེ་གསོད་རུ་འབྲིང་གིས་འཕྲལ་མར་དམག་དཔོན་ཚང་མ་བསྡུ་རུབ་བྱས་ནས་ཁྲག་འབུལ་གྱི་ཆ་རྐྱེན་དང་མཐུན་པའི་མི་སྣ་གདམ་གསེས་བྱས་ནས་འཕྲལ་མར་སྨན་ཁང་དུ་བསྐྱོད་དེ་སྨན་དོན་མི་སྣར་གཞོགས་འདེགས་ཧུར་ཐག་བྱས་ཏེ་ཁྲག་ཤེད་ལྟ་ཞིབ་ཚད་ལེན་དང་ཁྲག་ཚགས་ཞིབ་དང་སྡེབ་རྒྱུ། ཁྲག་འདྲེན་བཅས་ལེགས་གྲུབ་བྱས་ཏེ་ནད་པར་མྱུར་སྐྱོབ་ཀྱི་དུས་ཚོད་རྩ་ཆེན་བརྩོན་ལེན་བྱས་པ་རེད།
