ཀྲུང་གོའི་བོད་ལྗོངས་དྲ་བའི་འཕྲིན། ཟླ་དང་པོའི་ཚེས19ཉིན་གྱི་ཕྱི་དྲོར། བོད་རང་སྐྱོང་ལྗོངས་སྲིད་གྲོས་སྐབས་བཅུ་གཉིས་པའི་བོད་རང་སྐྱོང་ལྗོངས་ཨུ་ཡོན་ལྷན་ཁང་གི་ཚོགས་འདུ་ཐེངས་གསུམ་པས་ཚོ་ཆུང་བགོས་ནས་གྲོས་བསྡུར་བྱས་ཤིང་། ཨུ་ཡོན་རྣམས་ཀྱིས་འགོ་ཚུགས་མཛད་སྒོ་སྟེང་གསན་པའི་བྱ་བའི་སྙན་ཞུ་ཁག་དང་ཟུང་དུ་འབྲེལ་ནས་སོ་སོའི་མྱོང་ཚོར་བཤད་ཅིང་། སོ་སོའི་གྲོས་གཞི་དང་འབྲེལ་ནས་གྲོས་བསྡུར་བྱས་པ་རེད། ཚོ་ཆུང་གྲོས་བསྡུར་གྱི་ཡུལ་དངོས་སུ་བོད་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན། མངའ་རིས་ས་ཁུལ་སྒར་རྫོང་སློབ་འབྲིང་གི་དགེ་རྒན་ཆོས་སྒྲོལ་མ་ཡིས་དགེ་རྒན་གྱི་ཁུར་པོ་ཡང་དུ་གཏོང་བའི་འགན་འཁྲི་སྔར་བས་ལག་བསྟར་བྱས་ནས་སློབ་གསོ་སྐྱོན་བྲལ་དང་སྤུས་ཚད་མཐོ་བའི་སྒོ་ནས་འཕེལ་རྒྱས་འགྲོ་བར་རོགས་འདེགས་བྱེད་དགོས་པའི་བསམ་འཆར་བཏོན།
ཚོ་ཆུང་བགོས་ནས་གྲོས་བསྡུར་བྱེད་པའི་ཡུལ་དངོས།
སློབ་གསོ་འཕེལ་རྒྱས་སུ་གཏོང་དགོས་ན། དགེ་རྒན་ནི་རྩ་བ་ཡིན། 2019ལོར། ཀྲུང་གུང་ཀྲུང་དབྱང་གཞུང་དོན་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས《སློབ་གྲྭ་ཆུང་འབྲིང་དགེ་རྒན་གྱི་ཁུར་པོ་ཇེ་ཡང་དུ་བཏང་ནས་སློབ་གསོའི་སློབ་ཁྲིད་ཁོར་ཡུག་སྔར་ལས་ཡག་པོ་གཏོང་རྒྱུ་སྐོར་གྱི་བསམ་འཆར་འགའ》ཞེས་པ་པར་སྐྲུན་འགྲེམ་སྤེལ་བྱས་ཤིང་། ད་དུང་སློབ་གྲྭ་ཆུང་འབྲིང་གི་སློབ་གསོའི་སློབ་ཁྲིད་དང་འབྲེལ་མེད་ཀྱི་དོན་ཚན་དག་རེ་བ་ལྟར་ནན་གྱིས་ཚད་ལྡན་དང་གཙང་སེལ་བཟོ་བ་དང་། སློབ་གྲྭའི་དོ་དམ་དང་སློབ་གསོའི་སློབ་ཁྲིད་བར་གྱི་འབྲེལ་བ་མཐུན་སྦྱོར་ཡག་པོ་བྱེད་པ། སློབ་གྲྭ་ཆུང་འབྲིང་དགེ་རྒན་གྱི་ཁུར་པོ་ཇེ་ཡང་དུ་གཏོང་བའི་བྱ་བ་ནི་གལ་ཆེའི་གྲོས་རིམ་ཉིན་ཐོའི་ནང་དུ་བཀོད་པ་ནས་བཟུང་། ལོ་འདི་དག་གི་རིང་ལ། ས་གནས་ཁག་དང་རིམ་པ་ཁག་གི་སློབ་གསོའི་དོ་དམ་སྡེ་ཚན་གྱིས་སྲིད་ཇུས་ཀྱི་བྱེད་ཐབས་བསྟུད་མུར་བཏོན་པ་དང་། སྤྱི་ཚོགས་ལས་དོན་ཚད་ལྡན་ཅན་དུ་བཏང་བ་སློབ་རྭ་ནང་དུ་བསྐྱོད་པ་སོགས་བྱ་ཐབས་རབ་དང་རིམ་པ་ལ་གྲུབ་འབྲས་ངེས་ཅན་ཞིག་ཐོབ་ཡོད། འོན་ཀྱང་འཐབ་ས་དང་པོའི་དགེ་རྒན་གྱི་མྱོང་ཚོར་དངོས་ནས་བཤད་ན། ལས་ཀ་མང་བ་དང་འགན་འཁྲི་ལྕི་བའི་གནད་དོན་སྔར་བཞིན་གནས་ཡོད།
ཆོས་སྒྲོལ་མ་ཡིས། “ཤུལ་འཇོག་དོ་དམ”ཚད་ལས་བརྒལ་བ་དང་། སློབ་གྲྭའི་སྲིད་འཛིན་ལས་དོན་ལྕི་བ། དགེ་རྒན་གོ་མིང་ལམ་ལུགས་དང་མི་མཐུན་པ། ཁྱིམ་ཚང་དང་སློབ་གྲྭས་མཉམ་སྐྱོང་གི་འདུ་ཤེས་ཞན་པ་སོགས་གནད་དོན་གྱི་དབང་གིས་དགེ་རྒན་གྱིས་སློབ་ཚན་སློབ་ཁྲིད་ལ་ཞིབ་འཇུག་གཏིང་ཟབ་བྱེད་པར་དུས་ཚོད་མེད་པ། སློབ་གསོའི་སློབ་ཁྲིད་ཀྱི་སྤུས་ཚད་ལ་འགན་སྲུང་ནུས་ལྡན་ཐོབ་དཀའ་བ་སོགས་བྱུང་བ་རེད།
བོད་རང་སྐྱོང་ལྗོངས་སྲིད་གྲོས་ཨུ་ཡོན་ཆོས་སྒྲོལ་མ་ཡིས་གཏམ་བཤད་བྱེད་པ།
དགེ་རྒན་བྱ་བའི་ལས་འགན་ལྕི་ཞིང་གནོན་ཤུགས་ཆེ་བའི་གནད་དོན་ལ་དམིགས་ནས། ཆོས་སྒྲོལ་མ་ཡིས་སྲིད་འཛིན་ལས་དོན་ལ་རྟོག་ཞིབ་དང་རྩིས་ལེན་གྱི་ལས་རིམ་དང་ལམ་སྲོལ་ལེགས་གཏོང་དང་། སློབ་གྲྭའི་སྲིད་འཛིན་ལས་ཀའི་སྟོབས་ཤུགས་ཆེ་རུ་གཏོང་པ། དགེ་རྒན་གོ་མིང་དཔྱད་འདེམས་མ་ལག་འཐུས་སྒོ་ཇེ་ཚང་དུ་གཏོང་བ། དགེ་རྒན་ལ་བཀུར་བསྟི་དང་སློབ་གསོར་མཐོང་ཆེན་བྱེད་པའི་ཁོར་ཡུག་ཅིག་བཟོ་རྒྱུའི་བསམ་འཆར་བཏོན།
“སྔར་ལས་ཚན་རིག་ལུགས་མཐུན་དང་ཕྱོགས་ཡོངས་ནས་དྲང་གཞག་གི་གོ་མིང་དཔྱད་འདེམས་མ་ལགས་ཤིག་འཛུགས་དགོས་ཏེ། དཔྱད་འདེམས་བྱེད་པའི་བརྒྱུད་རིམ་ཁྲོད་དུ། ཕྱོགས་ཡོངས་ནས་དགེ་རྒན་གྱིས་སློབ་གསོའི་སློབ་ཁྲིད་ཁྱབ་ཁོངས་སུ་བཞག་པའི་གྲུབ་འབྲས་དང་། མི་སྣ་གསོ་སྐྱོང་ཐད་བླངས་པའི་གྲུབ་འབྲས། ཡུན་རིང་བོར་བསགས་པའི་དགེ་རྒན་གྱི་ཀུན་སྤྱོད་དང་སློབ་གསོའི་སློབ་ཁྲིད་ཀྱི་གདེང་འཇོག་སོགས་ཕྱོགས་མང་པོ་ནས་བསམ་བློ་གཏོང་དགོས་པ་ལས། ཚད་གཞི་ནི་དཔྱད་རྩོམ་སྤེལ་བའི་གྲངས་ཀ་དང་། དཔྱོད་དོན་ཞིབ་འཇུག སྤྱི་སྤྱོད་སློབ་ཚན་གྱི་གྲངས་ཚད། གཟི་བརྗིད་མཚན་སྙན་སོགས་ཙམ་མ་ཡིན་པར”ཆོས་སྒྲོལ་མ་ཡིས་གོ་མིང་དཔྱད་འདེམས་ཀྱི་ནུས་པ་འདོན་སྤེལ་བྱས་ནས། དགེ་རྒན་ཚོས་སློབ་གསོའི་སློབ་ཁྲིད་ཀྱི་བྱ་བར་དོ་སྣང་མང་ཙམ་བྱ་རྒྱུར་ཁྲིད་སྟོན་ཡག་པོ་བྱེད་པ་དང་། དགེ་རྒན་ཚོས་སློབ་གསོའི་སློབ་ཁྲིད་ཀྱི་སྤུས་ཚད་མཐོ་རུ་གཏོང་བའི་ནང་སྐྱེས་སྒུལ་ཤུགས་སྐུལ་སྤེལ་བྱེད་དགོས།
རྩོམ་སྒྲིག་པ། རིག་གྲོལ།
