ཞོགས་པའི་ཉི་གཞོན་གྱི་འཛུམ་ཞལ་ལྷུག་པོར་གྲོལ་ནས་མངའ་རིས་ས་ཁུལ་སྒེར་རྩེ་རྫོང་མ་མིག་ཞང་རྒོད་ཚང་གྲོང་ཚོའི་རྩྭ་ཐང་དུ་འཕྲོས་ཤིང་། ལམ་ལམ་དུ་འཚེར་བའི་ཉི་འོད་འོག་ཏུ་འབྲོང་ཚ་བརྒྱ་ལྷག་ཙམ་བག་ཕེབས་ངང་རྩྭ་ཟ་སྐབས་ཞོལ་རྩིད་རིང་པོ་དག་ཀྱང་གཡོ་བཞིན་མཆིས། འབྲོང་ཚ་དེ་དག་ནི་སྤྱིར་བཏང་གི་ནོར་གནག་ལས་གཟུགས་བོངས་ཆེ་ཞིང་། རྩིད་པ་ནས་འོད་ཆེམ་ཆེམ་དུ་འཕྲོ་བཞིན་འདུག
རྩྭ་ཆུ་གང་བཟང་དུ་སྐྱས་སྤོ་བ་ནས་འབྱོར་ཕྱུག་ལྡན་པའི་ཁྱིམ་གཞིས་བར་གྱི་འགྱུར་ལྡོག
སྒེར་རྩེ་རྫོང་རྒོད་མོ་ཞང་སེང་རྡོ་གྲོང་ཚོའི“དམིགས་བསལ་ཐོན་ལས་གསར་པའི”ཁོངས་སུ་གཏོགས་པའི་འབྲོང་ཚ་ཡིས་འབྲོག་པའི་འཚོ་བ་སྐྱེལ་སྟངས་ལ་རིམ་གྱིས་འགྱུར་བ་གཏོང་བཞིན་མཆིས། ཉེ་ཆར་སེང་རྡོ་གྲོང་ཚོའི་ཏང་ཀྲི་པུའི་ཧྲུའུ་ཅི་བསོད་ནམས་བཀྲ་ཤིས་ཀྱིས་བཅར་འདྲི་དང་ལེན་བྱེད་སྐབས། ཁྱད་ལྡན་ཐོན་ལས་དེའི་འཕེལ་རྒྱས་སྐོར་གྱི་གཏམ་རྒྱུད་ལྷུག་པོར་གླེང་། བསོད་ནམས་བཀྲ་ཤིས་ཀྱིས་ངོ་སྤྲོད་བྱས་དོན“ང་ཚོའི་གྲོང་ཚོ་ནི་མི་རབས་ནས་མི་རབས་འབྲོག་ལས་ལ་བརྟེན་ནས་འཚོ་ཐབས་བྱེད་པའི་སྲོལ་རྒྱུན་གྱི་འབྲོག་ལས་རྐྱང་པའི་གྲོང་ཚོ་ཞིག་རེད། སྔོན་མ་ཚང་མས་དབྱར་དུས་རུ་བ་རྩྭ་ཆུ་བཟང་སར་སྐྱས་སྤོ་བ་དང་དགུན་དུས་ལྷས་རར་སྡོད་ཀྱི་ཡོད། འདི་གར་འབྲོང་མང་པོ་ཡོད་པས་རང་བྱུང་ཁོར་ཡུག་ཁྲོད་འབྲི་དང་འབྲོང་བསྡེབས་རྗེས་འབྲོང་ཚ་ཡོང་གི་ཡོད། དེ་ལ་གཞན་གྱིས་བསྡུར་ཐབས་བྲལ་བའི་ལྷན་སྐྱེས་ཀྱི་གཞི་རྒྱུ་དམིགས་བསལ་བ་ཞིག་ལྡན་པས། དེ་ནི་རྩིད་པ་ནག་ལ་མཐུག་པོའི་འོག་ཏུ་སྐྱེ་སྟོབས་ཀྱི་གསོན་ཤུགས་དེ་བས་རྒྱས་པའི་ཚེ་སྲོག་ཅིག་ཡིན། “སྲོལ་རྒྱུན་གྱི་ནོར་གནག་ནི་སྐྱེ་འཚར་འགོར་བ་དང་ཡོང་སྒོའང་དེ་ཙམ་མེད། དང་ཐོག་འབྲོང་ཚར་དགེ་མཚན་མང་པོ་ཡོད་པ་ཐོས་སྐབས། ང་ཚོར་ཡང་ཚོད་ལྟ་ཞིག་བྱས་ནས་ལམ་བུ་གསར་པ་ཞིག་འཚོལ་བའི་བསམ་བློ་འཁོར་བྱུང”ཞེས་བསོད་ནམས་བཀྲ་ཤིས་ཀྱིས་འདས་དོན་ལ་དྲན་གསོ་བྱེད་བཞིན་དུ་བརྗོད། འོན་ཀྱང་འབྲོང་ཚ་ཐོག་མར་མཐོང་སྐབས་གྲོང་མི་མི་ཉུང་བ་ཞིག་གི་སེམས་ལ་འདི་གསོ་ཁག་པོ་ཞིག་མེད་དམ་སྙམ་ཡང་། རིགས་གཅིག་མཁས་ཅན་གྱི་ཚོགས་པས་ཆེད་མངགས་ཞིབ་འཇུག་བྱས་པའི་ཁར་ལོ་མང་པོའི་ལག་ལེན་ཁྲོད་ནས་ར་འཕྲོད་བྱུང་རྗེས། ད་གཟོད་ཚང་མའི་སེམས་ཁྲལ་རིམ་བཞིན་བསལ་བ་རེད།
ད་ཆ་འབྲོང་ཚའི་ལེགས་ཆ་དལ་གྱིས་མངོན་ཞིང་། དེའི་རྒྱུད་པ་འཚར་ལོངས་ཡོང་ཚད་ཡུལ་དེའི་ནོར་གནག་ལས་ཧ་ཅང་མགྱོགས་པ་དང་། ཤ་སྤུས་དག་པ་དང་འོ་མའང་མངོན་གསལ་དོད་པོས་མང་བ་ཡོད། “དེ་སྔ་གཡག་འབྲིང་ཁ་ཞིག་བཙོངས་ན་སྒོར8000རག་གི་འདུག ད་ཆ་འབྲོང་ཚའི་ཕ་ཕྱུགས་གཅིག་ལ་སྒོར་ཁྲི1.5རག་གི་ཡོད་པས་གཡག་གཅིག་རང་ནས་སྒོར7000འཐོལ་པ་ཡོང་གི་འདུག”ཅེས་བསོད་ནམས་བཀྲ་ཤིས་ཀྱིས་དེ་ལྟར་རྩིས་བརྒྱབ་ནས་བརྗོད།
ཚན་རྩལ་ལས་ནོར་གནག་དེ་འབབ་འཕར་གསེར་གྱི་ལྡེ་མིག་ལ་གྱུར་པ།
སྒེར་རྩེ་རྫོང་འབྲོང་ཚ་གསོ་སྤེལ་ར་བར་སྐྱོད་སྐབས། ར་བའི་འགན་འཁུར་བ་པ་རྡོར་གྱིས་གཟན་ཁང་གི་སྒོ་ཕྱེ་བ་དང་། “སྤུས་ལེགས་གཟན་རྩྭ་འདི་དག་ནི་དགུན་དུས་འབྲོང་ཚར་ལྟོ་སྣོན་སྟེར་བྱེད་རེད། ཆེད་མངགས་ལོ་ཚད་མི་འདྲ་བར་གཞིགས་ནས་བཀོད་སྒྲིག་བྱས་ཡོད”ཅེས་ཁོང་གིས་གྱང་ལྡེབས་ཀྱི་གཟན་ཆག་སྦྱོར་སྡེབ་རེའུ་མིག་སྟོན་པ་དང་། དེར་བེའུ་དང་། འབྲི ཕ་ཕྱུགས་བཅས་ཀྱི་འཚོ་བཅུད་ཀྱི་བསྡུར་གྲངས་བཀོད་ཡོད།
ཉེ་བའི་ལོ་ཤས་རིང་། འབྲོང་ཚར་ཚན་རིག་ཞིབ་འཇུག་ཟམ་མི་ཆད་པར་བྱས་པ་དང་བསྟུན་ནས། དེའི་རིན་གོང་ཡང་ཇེ་མཐོར་སོང་བཞིན་ཡོད། གྲངས་གཞི་ལས་མངོན་པར། འབྲོང་ཚའི་ཤ་ཐོན་ཆེ་ཆུང་དང་། ཚིལ་མང་ཉུང་། སྤུས་ཀ་ཡག་ཉེས། ཤའི་ནང་འདུས་པའི་འཚོ་བཅུད་སོགས་ཚང་མ་ནོར་གནག་ལས་ལེགས་པ་དང་། དེའི་རྩིད་པ་སོགས་ཀྱི་སྤུས་ཀ་དེ་འཁེལ་འཐག་གི་ཐོན་རྫས་མང་པོ་ཞིག་གི་ཚད་ལྡན་མ་བཅོས་རྒྱུ་ཆའི་རེ་བ་དང་ཡང་ཡོངས་སུ་མཐུན་ཡོད།
ཐོན་ལས་ཀྱིས་ས་མཐོར་རེ་བ་གསར་པ་སྦྱིན་པ།
“ན་ནིང་ལོ་མཇུག་ཏུ་མངའ་རིས་ས་ཁུལ་ཞིང་ལས་ཐོན་ཟོག་ཚོང་འདུས་ཐོག་ང་ཚོ་སེང་རྡོ་གྲོང་ཚོའི་ཆེད་ལས་མཉམ་ལས་ཁང་གིས་འབྲོང་ཚའི་ཤ་བཙོངས་པ་ཁོ་ནར་འབབ་འཕར་སྒོར་ཁྲི55ལྷག་ཙམ་བྱུང”“ང་ཚོས་ད་དུང་འབྲོང་ཚའི་ཤ་ལྷ་སར་ཡང་བཙོངས་པ་ཡིན། དེའི་ཤ་སྤུས་དག་པས་ཚང་མས་ཧ་ཅང་དགའ་པོ་བྱེད་ཀྱི་འདུག”ཅེས་བསོད་ནམས་བཀྲ་ཤིས་ཀྱིས་དགའ་ཚོར་ཆེན་པོས་དེ་ལྟར་བརྗོད། 2024ལོར་སྒེར་རྩེ་རྫོང་གི་འབྲོང་ཚའི་ཐོན་ལས་ལ“རྒྱལ་ཡོངས་ཀྱི་གྲགས་ཁྱད་ལེགས་གསར་བཞིའི་ཞིང་ལས་ཐོན་ཟོག”དང“སྐྱེ་ཁམས་ཐོན་ཡུལ་གྱི་སྲུང་སྐྱོང་ཐོན་རྫས”གཉིས་ཀའི་ཁས་ལེན་དཔང་འདོན་ཐོབ་པ་དེ་ལས་ཐོན་རྫས་དེའི་སྤུས་ཚད་དང་སྐྱེ་ཁམས་ཀྱི་རིན་ཐང་གཉིས་ཀར་རྒྱལ་ཁབ་རིམ་པའི་ཁས་ལེན་ཐོབ་པ་མཚོན་གྱི་ཡོད། ཐོན་ལས་འཕེལ་རྒྱས་བཏང་བས་མི་སེར་ལ་ཕན་པ་ཐོབ་ཅིང་། སྒེར་རྩེ་རྫོང་གིས་འབྲོག་ལས་རྒྱུད་བཟང་གི་ཁ་གསབ་སྲིད་ཇུས་ལག་ལེན་བསྟར་ནས་རྒོད་མོ་ཞང་དང་། དུང་མཚོ་ཞང་། སྒེར་རྩེ་གྲོང་རྡལ། བྲག་པོ་ཞང་། ཤན་ཆེན་ཞང་བཅས་སུ་སྤུས་ལེགས་ཀྱི་འབྲོང་ཚའི་ཕ་ཕྱུགས་མགོ་གྲངས506ཁྱབ་གདལ་བཏང་བ་དང་དེར་མ་རྩ་སྒོར་ཁྲི202.4བཏང་ཡོད། མིག་སྔར་འབྲོང་ཚའི་རྒྱུད་བཟང་ཁྱབ་ཚད་རྒྱུན་མཐུད་མང་དུ་འགྲོ་བཞིན་ཡོད་པ་དེས་སྒེར་རྩེ་རྫོང་གི་ཞང་བཞི་དང་གྲོང་རྡལ་གཅིག་དང་། སྲིད་འཛིན་གྲོང་ལྷན28 དུད་ཚང156 མཉམ་ལས་ཁང9བཅས་ལ་ཕན་པ་ཐོབ་ཡོད། “ཉེ་བའི་ལོ་ཤས་རིང་། སྒེར་རྩེ་རྫོང་གིས་འབྲོག་ལས་ཐོན་ལས་འཕེལ་རྒྱས་ལ་མཐོང་ཆེན་བྱས་ཏེ་སྲིད་གཞུང་གིས་སྔ་རྗེས་སུ་སྒོར་དུང་ཕྱུར1.35བཏང་ནས་སྒེར་རྩེ་རྫོང་གི་སྤུས་ལེགས་འབྲོང་ཚ་རྒྱུད་སྤེལ་གྱི་ཚན་རྩལ་དབུལ་སྐྱོར་ཐོན་ལས་རྣམ་གྲངས་ལག་ལེན་བསྟར་ཏེ། གསར་གཏོད་ལྟེ་གནས1དང་། རྒྱུད་སྤེལ་ས་ཚིགས2རྒྱུད་པ་སྲུང་སྐྱོང་ར་བ3བཅས་བསྐྲུན་ཡོད། ད་བར་རྫོང་ཡོངས་སུ་འབྲོང་ཚ་ལག་ཡོད་མགོ་གྲངས4521ཟིན་ཡོད། འབྲོང་ཚ་མགོ་གྲངས་མང་པོ་ཡོད་པ་དེས་ཐོན་ལས་རྒྱུན་མཐུད་ཆོག་པའི་འཕེལ་རྒྱས་ཡོང་བར་རྒྱབ་རྟེན་བརྟན་པོ་ཞིག་བྱུང་ཡོད”ཅེས་པ་རྡོར་གྱིས་ངོ་སྤྲོད་བྱས།
