ད་ལོ་ནི་ཁ་གཏད་བོད་སྐྱོར་བྱས་ནས་ལོ30འཁོར་བའི་ལོ་ཞིག་རེད། བོད་རང་སྐྱོང་ལྗོངས་ཏང་ཨུད་རྩ་འཛུགས་པུའུ་ཡིས་ཟླ་བཞི་རིང་གྲ་སྒྲིག་ཞིབ་ཚགས་བྱས་པ་བརྒྱུད། རྒྱལ་ཡོངས་ཀྱི་ཁ་གཏད་བོད་སྐྱོར་བྱས་ནས་ལོ30འཁོར་བའི་གྲུབ་འབྲས་འགྲེམས་སྟོན་ཉིན་ཤས་གོང་ལྷ་ས་གྲོང་ཁྱེར་དུ་གཟབ་རྒྱས་ངང་གཉེར་བ་རེད།
ཤེས་རྟོགས་བྱུང་བར་གཞིགས་ན། “རྒྱལ་ཡོངས་ཀྱི་ཁ་གཏད་བོད་སྐྱོར་བྱས་ནས་ལོ30འཁོར་བའི་གྲུབ་འབྲས་འགྲེམས་སྟོན”ནི་བོད་རང་སྐྱོང་ལྗོངས་ཏང་ཨུད་ཀྱིས་གཙོ་གཉེར་བྱས་པ་དང་བོད་རང་སྐྱོང་ལྗོངས་ཏང་ཨུད་རྩ་འཛུགས་པུའུ་ཡིས་གཉེར་འགན་འཁུར་ཡོད། འགྲེམས་སྟོན་གྱི་ས་ངོས་རྒྱ་ཁྱོན་ལ་སྨི་ངོས་གྲུ4000ཟིན་པ་དང་། འགྲེམས་ཁུལ་གཙོ་བོར་ཁྱམས་རིམ་དང་། ཀྲུང་དབྱང་གི་ཐུགས་ཁུར། བརྟན་ལྷིང་ལ་དམིགས་པ། འཕེལ་རྒྱས་ལ་དམིགས་པ། སྐྱེ་ཁམས་ལ་དམིགས་པ། མཐའ་སྟོབས་ལ་དམིགས་པ། “ཚོགས་སྒྲིག་རྣམ་པའི”བོད་སྐྱོར་གྱི་གསར་གཏོད་དང་ལག་ལེན་བཅས་ཁག7ཚུད་ཡོད་པ། རོགས་སྐྱོར་ཚན་པའི་འགྲེམས་ཁུལ་དུ། ཀྲུང་དབྱང་པུའུ་ཨུད་དང་། རོགས་སྐྱོར་ཞིང་ཆེན་དང་གྲོང་ཁྱེར། ཀྲུང་དབྱང་ཁེ་ལས་བཅས་ཡོད།
མདུན་ཁྱམས་ཀྱི་འགྲེམས་སྟོན་ནི་ཉམས་དོད་ཅིང་། ལྕགས་རི་རིང་པོ་བརྗིད་ཆགས་ལ་ཡར་ཀླུང་གཙང་པོ་དྲག་ཏུ་རྒྱུག བར་ཁྱམས་ན་ཇོ་མོ་གླང་མའི་དཔེ་དབྱིབས་ཤིག་ཡོད་པ་དང་མཐའ་འཁོར་དུ་མེ་ཏོག་ཚོམ་བུ་རབ་ཏུ་བརྒྱན་ཡོད་པ་དེ་ནི་བོད་ལྗོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་དམ་ཟབ་བྱས་ཏེ་འབད་བརྩོན་ཆེན་པོས་རྩེ་མོར་སྙེག་པ་མཚོན། ཁྱམས་རིམ་དུ་བསྟན་པ་ནི་རྒྱལ་ཡོངས་ཀྱི་ཁ་གཏད་བོད་སྐྱོར་བྱས་ནས་ལོ30འཁོར་བའི་ཆེད་དོན་པར་གཞི་སྐར་མ8ཡོད་པ་ཞིག་རེད། གཡས་ཕྱོགས་ཀྱི་འབུར་བརྐོས་ལས་ཁུང་ཧྥན་སེན་གྱིས་ཚབ་གནང་བའི་བོད་སྐྱོར་ལས་བྱེད་པ་དང་ཤེས་ལྡན་པས་ཏང་ཀྲུང་དབྱང་གི་འབོད་སྐུལ་དང་ལེན་ཞུས་ནས་བོད་སྐྱོར་བྱ་གཞག་ནང་ཞུགས་པ་མཚོན་པ་དང་། གཡོན་ངོས་ཀྱི་འབུར་བརྐོས་ལས་དུས་རབས་གསར་པའི་བོད་ལྗོངས་ཀྱི་རྨང་གཞིའི་སྒྲིག་བཀོད་འཕེལ་རྒྱས་ཀྱི་གྲུབ་འབྲས་གལ་ཆེན་མངོན་པ་དང་མི་རིགས་ཁག་གི་མི་དམངས་ཀྱིས་གླུ་ལེན་གར་འཁྲབ་ཀྱིས་བདེ་སྐྱིད་དང་མཛེས་སྡུག་ལྡན་པའི་འཚོ་བ་གསར་པར་བསྔགས་པ་མཚོན་གྱི་ཡོད།
ད་ཐེངས་ཀྱི་འགྲེམས་སྟོན་ནི་ཡུལ་དངོས་ཀྱི་འགྲེམས་སྟོན་བྱས་པ་དང་དུས་མཚུངས་ད་དུང་དྲ་ཐོག་གིVRའགྲེམས་སྟོན་ཡང་བྱས་པ་རེད། གཞན་ཡང་བོད་སྐྱོར་ཞིང་ཆེན་དང་གྲོང་ཁྱེར17སྒྲིག་འཛུགས་བྱས་ནས་བོད་སྐྱོར་གྱི་ཚོང་ཟོག་དེ་དག་བོད་ལྗོངས་ཀྱི་སྤུས་ལེགས་ཐོན་རྫས་སུ་བསྒྱུར་བར་ཁེ་ལས30ལྷག་ཙམ་དང་ཐོན་རྫས360ལྷག་ཙམ་དང་འབྲེལ་བ་ཡོད་པ་དང་། དྲ་ཐོག་ཉོ་སྒྲུབ་དང་ཐད་གཏོང་ལས་སྟེགས་བཙུགས་ནས་རྒྱལ་ཡོངས་ལ་འགྲེམས་སྟོན་བྱས་པ་རེད། ངོ་སྤྲོད་བྱས་པར་གཞིགས་ན། ཕྱིས་སུ་གྲུབ་འབྲས་འགྲེམས་སྟོན་དེ་འཆར་གཞི་ཡོད་པའི་སྒོ་ནས་རིམ་བཞིན་ཕྱི་ཕྱོགས་ལ་སྒོ་མོ་འབྱེད་རྒྱུ་ཡིན་པ་རེད།།
རྩོམ་སྒྲིག་པ། སྣང་རྡོར།
