ཟླ་8ཚེས་7ཉིན་ནས་བཟུང་། ཀན་སུའུ་ལན་ཀྲོའུ་གྲོང་ཁྱེར་ཡུས་ཀྲུང་རྫོང་སོགས་སུ་བསྟུད་མར་དྲག་ཆར་བབས་པའི་རྐྱེན་གྱིས་ཆུ་ལོག་གི་གནོད་འཚེ་ཐོན་ཡོད་པ་དང་། ཚེས་8ཉིན་གྱི་ཆུ་ཚོད་18དང་སྐར་མ་50བར་སླེབས་དུས། གནོད་འཚེའི་ཁྲོད་མི་10རྐྱེན་ལམ་དུ་ཤོར་བ་དང་མི་33དང་འབྲེལ་བ་ཆད་ཡོད།
གནོད་འཚེ་ཐོན་རྗེས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་གིས་ཚད་མཐོའི་མཐོང་ཆེན་གནང་བ་དང་འབྲེལ་མཛུབ་སྟོན་གལ་ཆེན་ཡང་གནང་སྟེ། ཀན་སུའུ་ལན་ཀྲོའུ་གྲོང་ཁྱེར་ཡུས་ཀྲུང་རྫོང་སོགས་སུ་བསྟུད་མར་དྲག་ཆར་བབས་པ་ལས་ཐོན་པའི་ཆུ་ལོག་གི་གནོད་འཚེའི་ཁྲོད་མི་སྣ་ཤི་རྨས་ཚབས་ཆེན་བྱུང་བ་རེད། མིག་སྔའི་ཁ་ཚ་དགོས་གཏུག་གི་ལས་དོན་ནི་ཐབས་བརྒྱ་ཇུས་སྟོང་ངང་འབྲེལ་བ་ཆད་པའི་མི་སྣ་འཚོལ་སྐྱོབ་བྱེད་དགོས་པ་དང་། ཉེན་ཁ་འཕྲད་པའི་མང་ཚོགས་གནས་སྤོ་བཀོད་སྒྲིག་བྱེད་དགོས་པ། མི་སྣ་འཆི་རྨས་འབྱུང་ཚད་ཉུང་དུ་གཏོང་གང་ཐུབ་བྱེད་དགོས་པ། འཕྲིན་གཏོང་དང་འགྲིམ་འགྲུལ་གང་མགྱོགས་སླར་གསོ་བྱེད་དགོས་པ་བཅས་ཡིན། ཉེ་ཆར་གནམ་གཤིས་ཤིན་ཏུ་ངན་པ་བསྟན་མང་བ་སོགས་ཀྱི་གནས་ཚུལ་ལ་དམིགས་ནས། ས་ཁུལ་ཁག་དང་འབྲེལ་ཡོད་སྡེ་ཚན་ཁག་གིས་སྣང་མེད་དང་ལྷོད་གཡེང་གི་བསམ་བློ་མཐའ་གཅིག་ཏུ་ཁྱད་བསད་བྱས་ཏེ། ཉེན་ཁའི་ཉེན་ཟོན་སྔོན་བརྡ་གཏོང་རྒྱུར་ཤུགས་སྣོན་རྒྱག་པ་དང་། མངོན་མེད་རྐྱེན་ངན་ཞིབ་བཤེར་བཅོས་སྒྲིག་ལ་ཤུགས་སྣོན་རྒྱག་པ། འཕྲལ་སྡོམ་ལས་རེས་དང་ལྟ་སྲུང་ལ་ཤུགས་སྣོན་རྒྱག་པ་བཅས་བྱས་ཏེ། དམིགས་ས་ཡོད་པའི་སྒོ་ནས་འབྲུབ་འགོག་གེགས་སེལ་གྱི་ལས་དོན་ཁག་ལེགས་པར་བསྒྲུབས་ནས། མང་ཚོགས་ཀྱིས་བདེ་འཇགས་ངང་འབྲུབ་ཆུ་རྒྱས་པའི་དུས་ཚོད་སྐྱེལ་ཐུབ་པའི་འགན་ལེན་བྱེད་དགོས་ཞེས་བསྟན་གནང་ཡོད།
ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་མཆན་བཀོད་མཛུབ་སྟོན་གནང་ནས། འབྲེལ་བ་ཆད་པ་དང་ཉེན་ཁ་འཕྲད་པའི་མི་སྣ་གྲལ་བཤེར་དང་འཚོལ་སྐྱོབ་གང་མགྱོགས་བྱེད་པ་དང་། ནུས་ཤུགས་ཡོད་རྒུས་ཉེན་སེལ་རོགས་སྐྱོབ་བྱེད་པ། འཕྲིན་གཏོང་དང་འགྲིམ་འགྲུལ་སོགས་གནོད་སྐྱོན་ཐེབས་པའི་སྒྲིག་བཀོད་གང་མགྱོགས་ཉམས་གསོ་བྱེད་པ། གནོད་འཚེ་ཕོག་པའི་མང་ཚོགས་དུས་ཐོག་ཏུ་གནས་སྤོ་བཀོད་སྒྲིག་བྱེད་དགོས། མིག་སྔ་ནི་སྔར་བཞིན “ཟླ་བདུན་པའི་ཟླ་སྨད་དང་ཟླ་བརྒྱད་པའི་ཟླ་སྟོད”ཀྱི་འབྲུབ་འགོག་གི་འགག་རྩའི་དུས་སུ་གནས་ཡོད་པས། རྒྱལ་ཁབ་འབྲུབ་འགོག་ཐན་འགོག་སྤྱི་ཁྱབ་ཅུས་ཀྱིས་ས་གནས་ཁག་དང་འབྲེལ་ཡོད་ཕྱོགས་ཁག་ནས་དོགས་ཟོན་སྔར་བས་ཆེ་རུ་གཏོང་རྒྱུ་དང་འགན་འཁྲི་དོན་འཁྱོལ་བྱ་རྒྱུར་མཛུབ་ཁྲིད་བྱས་ཏེ། ཆར་ཆུ་དང་ཆུ་ལོག་གི་གནས་ཚུལ་ལ་ལྟ་ཞིབ་ཚད་ལེན་དང་ཉེན་ཟོན་སྔོན་བརྡ་གཏོང་བ་དང་གནོད་འཚེ་སྔོན་འགོག་དང་གནོད་འཚེར་ཁ་གཏད་གཅོག་རྒྱུར་ཤུགས་སྣོན་བརྒྱབ་སྟེ། མི་སྣ་འཆི་རྨས་འབྱུང་ཚད་ཉུང་དུ་གཏོང་གང་ཐུབ་བྱེད་དགོས་ཞེས་བསྟན་ཡོད།
ཞི་ཅིན་ཕིང་གི་མཛུབ་སྟོན་གལ་ཆེན་དང་ལི་ཆང་གི་བླང་བྱ་ལྟར། འཕྲལ་སྡོམ་དོ་དམ་པུའུ་ཡིས་ལས་དོན་ཚོགས་ཆུང་ས་གནས་ས་ཐོག་ཏུ་འཚོལ་སྐྱོབ་ལས་དོན་ལ་མཛུབ་ཁྲིད་བྱེད་པར་མངགས་ཡོད་པ་དང་། ཀན་སུའུ་ཞིང་ཆེན་ཨུ་ལྷན་གྱི་འགན་འཁུར་བློ་མཐུན་གཙོ་བོས་ས་གནས་ས་ཐོག་ཏུ་ཉེན་སྐྱོབ་གནོད་སེལ་ལས་དོན་ལ་བཀོད་གཏོང་དང་བཀོད་འདོམས་བྱེད་བཞིན་ཡོད། མིག་སྔར། ལས་དོན་ཁག་ཛ་དྲག་དང་གོ་རིམ་ལྡན་པའི་ངང་སྤེལ་བཞིན་ཡོད།
