ས་གནས་དེ་གའི་དུས་ཚོད་ཚེས23ཉིན། ཁ་ན་ཏའི་སྨྱན་སྦྱོར་གྱིས་གནས་ཚུལ་སྤེལ་བ་ལྟར་ན། ཚེས22ཉིན་ཁ་ན་ཏའི་མོང་ཐེ་ལིར་གྲོང་ཁྱེར་ལྟེ་གནས་སུ་བྱང་ཆིངས་ལ་ངོ་རྒོལ་དང་ཕ་ལེ་སི་ཐན་ལ་ངག་ཐོག་རོགས་སྐྱོར་བྱེད་པའི་རྒོལ་གཏམ་གྱི་བྱེད་སྒོ་སྤེལ་བ་དང་། ས་སྲོས་ཙམ་ལ་རྒོལ་གཏམ་གྱི་བྱེད་སྒོ་དེ་རིམ་བཞིན་དྲག་པོའི་གདོང་ཐུག་ཏུ་གྱུར།
མོང་ཐེ་ལིར་ཉེན་རྟོག་ཕྱོགས་ཀྱིས་བཤད་སྟངས་ལྟར་ན། རྒོལ་གཏམ་བྱེད་སྒོ་དེ་ས་གནས་དེ་གའི་དུས་ཚོད་ཚེས22ཉིན་གྱི་ཕྱི་དྲོ་ནས་འགོ་ཚུགས་པ་དང་། ས་སྲོས་ཙམ་ལ་རྒོལ་གཏམ་བྱེད་སྒོ་དེ་དྲག་པོའི་གདོང་ཐུག་ཏུ་རིམ་གྱིས་གྱུར། རྔམ་སྟོན་པ་ཁག་གཅིག་གིས་ཁྲོམ་གཞུང་དུ་དབྱི་སི་རལ་གྱི་ཙུང་ལི་ནེ་ཐ་ཉི་ཡ་ཧུའུ་ཡི་འདྲ་པར་མེར་བསྲེགས་པ་དང་། དེར་མ་ཟད་ཁ་ན་ཏའི་ཉེན་རྟོག་ཕྱོགས་དང་གདོང་ཐུག་བྱུང་། ཉེན་རྟོག་ཕྱོགས་ཀྱིས་ཝ་སི་སོགས་བྱ་ཐབས་སྤྱད་ནས་རྒོལ་གཏམ་གཏོང་མཁན་ཕྱིར་འབུད་བྱས་པ་རེད། ཉུང་མཐར་ཡང་མི་གསུམ་འཛིན་བཟུང་བྱས་ཡོད།
རྒོལ་གཏམ་གཏོང་བའི་བྱེད་སྒོ་སྤེལ་ཉེར་ཡོད་པའི་མཚམས་སུ། བྱང་ཆིངས་ཀྱི་ཁོངས་མིའི་རྒྱལ་ཁབ་དང་དེའི་མཉམ་ལས་རོགས་ཟླའི་འཐུས་མི300ལྷག་ཙམ་མོང་ཐེ་ལིར་ལོ་འཁོར་གྱི་ཚོགས་འདུར་ཞུགས་བཞིན་ཡོད་པ་དང་། ཚོགས་འདུ་དེ་ཟླ11པའི་ཚེས22ནས་ཚེས25ཉིན་བར་འཚོགས་ཤིང་། ཨུ་རུ་སུ་དང་ཡུག་རེན་གྱི་གདོང་ཐུག་དང་གནམ་གཤིས་འགྱུར་ལྡོག་སོགས་ཀྱི་གནད་དོན་ལ་གྲོས་བསྡུར་བྱས་པ་རེད།
དེའི་ཐད་ཁ་ན་ཏའི་ཙུང་ལི་ཐེ་ལུའུ་ཏུའོ་ཡིས་སྤྱི་ཚོགས་འབྲེལ་བའི་སྨྱན་སྦྱོར་སྟེགས་བུXཡི་ཐོག་རྩོམ་ཡིག་སྤེལ་ནས“མདང་དགོང་ང་ཚོས་མོང་ཐེ་ལིར་ཁྲོམ་གཞུང་དུ་མཐོང་བའི་གནས་ཚུལ་དེ་ནི་ཧང་སངས་དགོས་པ་ཞིག་རེད། ང་ཚོས་ཡིའུ་ཐའེ་ལ་ངོ་རྒོལ་དང་། འཇིགས་སྐུལ། གཏུམ་སྤྱོད་བཅས་ཀྱི་བྱ་སྤྱོད་གང་ནས་མཐོང་རུང་ཚང་མར་ངེས་པར་དུ་རྒོལ་གཏམ་གཏོང་དགོས”ཞེས་བཤད།
