2006ལོ་ནས་བཟུང་། རང་རྒྱལ་གྱིས་དབུས་ཤར་ས་ཁུལ་དུ་ཞི་བདེ་སྲུང་སྐྱོང་གི་དཔུང་སྡེ་ཐོག་མ་སྟེ་ལེ་པ་ནོན་དུ་བསྐྱོད་པའི་ཞི་བདེ་སྲུང་སྐྱོང་དཔུང་སྡེ་མངགས་ནས་ལེ་པ་ནོན་གྱི་ལྷོ་རྒྱུད་ས་ཁུལ་དུ་བཀོད་སྒྲིག་བྱས། ཁོང་ཚོས་འགན་འཁུར་གཙོ་བོ་ནི་ས་འོག་འབར་མདེལ་དང་འབར་རྫས་མེད་པར་བཟོ་བ་དང་། ལས་གྲྭ་འཛུགས་སྐྲུན་སྲུང་སྐྱོང་། སྨན་བཅོས་སྲོག་སྐྱོབ་སོགས་བྱ་རྒྱུ་དེ་ཡིན། མིག་སྔར། ཀྲུང་གོའི་ཞི་བདེ་སྲུང་སྐྱོང་དཔུང་སྡེ་ནི་ནུས་མང་བཟོ་སྐྲུན་དམག་གི་ཡན་ལག་རུ་ཁག1དང་། འཛུགས་སྐྲུན་བཟོ་སྐྲུན་དམག་གི་ཡན་ལག་རུ་ཁག1དང་། སྨན་བཅོས་ཡན་ལག་རུ་ཁག1བཅས་ལས་གྲུབ་ཡོད། ཉེ་དུས། ལེ་པ་ནོན་དང་དབྱི་སི་རལ་དབར་གྱི་གདོང་ཐུག་ཛ་དྲག་ཏུ་ཕྱིན་པ་དང་བསྟུན་ནས། ལེ་པ་ནོན་དུ་ཞི་བདེ་སྲུང་སྐྱོང་གི་ལས་འགན་སྒྲུབ་བཞིན་པའི་ཀྲུང་གོའི་ཁག22པའི་ལེ་པ་ནོན་དུ་བསྐྱོད་པའི་ཞི་བདེ་སྲུང་སྐྱོང་དཔུང་སྡེའི་བདེ་སྡུག་ལའང་རྒྱལ་དམངས་ཀྱིས་དོ་ཁུར་གནང་བཞིན་འདུག
ལེ་པ་ནོན་དུ་བསྐྱོད་པའི་ཀྲུང་གོའི་ཁག22པའི་ཞི་བདེ་སྲུང་སྐྱོང་གི་འཛུགས་སྐྲུན་བཟོ་སྐྲུན་དམག་ཡན་ལག་རུ་ཁག་གི་ཆབ་སྲིད་ལས་དོན་ཚོགས་ཆུང་གི་ཙུའུ་ཀྲང་ཧོ་ལུའེ་ཡིས། ན་ནིང་ཕ་ལེ་སི་ཐན་དང་དབྱི་སི་རལ་དབར་གྱི་གདོང་ཐུག་བྱུང་རྗེས། ང་ཚོས་བདེ་འཇགས་ཀྱི་ཉེན་ཁ་ཆེར་ཁུར་ཏེ་འགན་ནུས་བརྗེ་རེས་བྱས་ནས“ཐིག་སྔོན”ལས་གྲྭའི་ཨར་སྐྲུན་དང་མི་ཆོས་རིང་ལུགས་ཀྱི་རོགས་སྐྱོར་སོགས་ཀྱི་ཞི་བདེ་སྲུང་སྐྱོང་གི་ལས་འགན་བསྒྲུབས་པ་ཡིན། ང་ཚོའི་ལེ་པ་ནོན་དུ་བསྐྱོད་པའི་ཞི་བདེ་སྲུང་སྐྱོང་འཛུགས་སྐྲུན་བཟོ་སྐྲུན་དམག་གི་ཡན་ལག་རུ་ཁག་གི་ངོས་ནས་བརྗོད་ན། འདི་གར་སླེབས་པའི་ཉིན་དང་པོ་ནས་བཟུང་ཉེན་བརྡའི་སྒྲ་དང་། མེ་མདའི་སྒྲ། འབར་མདེལ་གྱི་སྒྲ་སོགས་རྣ་བར་རྒྱུན་མི་ཆད་པར་གྲགས་ཡོང་བ་དང་། མེ་ཤུགས་འཕུར་མདའ་དང་མི་མེད་གནམ་གྲུའི་འགྲོ་འོང་ཡང་རྒྱུན་མི་འཆད་པར་བྱེད་ལ། དམག་འཐབ་གནམ་གྲུས་རྟག་ཏུ་མགོ་ཐོག་ནས་འཇིགས་སྐུལ་གྱི་སྒྲ་གཏོང་བ་ཡིན། ང་ཚོའི་སྒར་ཁུལ་དང་ཆེས་ཐག་ཉེ་བའི་འབར་གས་འབྱུང་གནས་ནི་ང་ཚོའི་དབར་དང་སྤྱི་ལེ1ཀྱང་ཟིན་མེད་པས་མདེལ་ཧྲུག་སྒར་ཁུལ་དུ་ལྷུང་ཞིང་། ང་ཚོའི་ཞི་བདེ་སྲུང་སྐྱོང་གི་དཔོན་དམག་ཚང་མས་ལས་འགན་སྒྲུབ་སྐབས་སམ་ཡང་ན་སྒར་ཁུལ་གང་དུ་གནས་རུང་ཚང་མས་འགོག་སྲུང་ཡོ་ཆས་གྱོན་ནས་ཐོན་སྲིད་པའི་དམག་འཐབ་དང་འཇིགས་སྐུལ་འཇབ་རྒོལ་སོགས་ཀྱི་ཉེན་ཁའི་གནས་ཚུལ་ལ་དུས་དང་རྣམ་པ་ཀུན་ཏུ་ཁ་གཏད་གཅོག་དགོས་པའི་བླང་བྱ་བཏོན་ཡོད། གཞན་ཡང་ང་ཚོས་དམག་གྲབས་བཟའ་བཅའ་དང་། སྨན་བཅོས་ཡོ་བྱད། འཕྲིན་གཏོང་སྒྲིག་ཆས། ཉིན་མཁོའི་དངོས་རྫས་སོགས་རིགས6ཡི་འགོག་སྲུང་འགན་ལེན་དངོས་རྫས1000ལྷག་ཙམ་མང་དུ་བཏང་ཡོད། མིག་སྔའི་བར་རུ་མི་ཚང་མར་ལས་གནས་སུ་ཡོད་ལ་གནས་ཚུལ་ཡང་བཟང་པོ་ཡོད་ཅེས་བཤད། ལེ་པ་ནོན་དུ་བཅའ་སྡོད་མཉམ་འབྲེལ་རྒྱལ་ཚོགས་ཀྱི་དཔུང་སྡེའི་མགྲིན་ཚབ་པས། ལེ་པ་ནོན་དང་དབྱི་སི་རལ་དབར་གྱི་གདོང་ཐུག་དེ་གནོད་འཚེ་ཕོག་པའི་ས་ཁུལ་གྱི་གདོང་ཐུག་ཏུ་འགྱུར་ཉེན་ཡོད་ཅེས་བརྗོད། ས་གནས་དེ་གའི་དུས་ཚོད་ཚེས12ཉིན། ལེ་པ་ནོན་དུ་བཅའ་སྡོད་མཉམ་འབྲེལ་རྒྱལ་ཚོགས་ཀྱི་གནས་སྐབས་དཔུང་སྡེའི་མགྲིན་ཚབ་པ་ཐའེ་ནེན་ཏིས་སྨྱན་སྦྱོར་གྱི་བཅར་འདྲི་དང་ལེན་བྱེད་སྐབས། ཉེ་དུས་དབྱི་སི་རལ་གྱི་དམག་དཔུང་གིས་ལེ་པ་ནོན་དུ་བཅའ་སྡོད་མཉམ་འབྲེལ་རྒྱལ་ཚོགས་ཀྱི་དཔུང་སྡེར་འཇབ་རྒོལ་ཐེངས་མང་བྱས་པས་ཞི་བདེ་སྲུང་སྐྱོང་པར་རྨས་སྐྱོན་ཕོག་པར་མ་ཟད། ལེ་པ་ནོན་དུ་བཅའ་སྡོད་མཉམ་འབྲེལ་རྒྱལ་ཚོགས་ཀྱི་དཔུང་སྡེའི་སྒར་སར་ཡང་གཏོར་སྐྱོན་ཚབས་ཆེན་ཕོག་ཡོད་ཅེས་བརྗོད་པ་དང་། ཁོང་གིས་དབྱི་སི་རལ་དམག་དཔུང་དང་ལེ་པ་ནོན་གྱི་ཀྲེན་ཀྲུའུ་ཏང་གི་གདོང་ཐུག་དེ་གནོད་འཚེ་ཕོག་པའི་ས་ཁུལ་གྱི་གདོང་ཐུག་ཏུ་འགྱུར་ཉེན་ཡོད་ཅེས་ཐ་ཚིག་བསྒྲགས་པར་མ་ཟད། འབྲེལ་ཡོད་ཕྱོགས་ཁག་དང་རྒྱལ་སྤྱིའི་སྤྱི་ཚོགས་ཀྱིས་དེའི་ཐད་ཚད་མཐོའི་དོ་ཁུར་བྱེད་དགོས་པའི་འབོད་སྐུལ་ཡང་བྱས་ཡོད།
ཐའེ་ནེན་ཏིས་ད་དུང་། དབྱི་སི་རལ་དམག་དཔུང་གིས་ལེ་པ་ནོན་དུ་བཅའ་སྡོད་མཉམ་འབྲེལ་རྒྱལ་ཚོགས་ཀྱི་དཔུང་སྡེ“ཐིག་སྔོན”ཉེ་འགྲམ་གྱི་སྒར་ས་ཁག་གཅིག་ནས་ཕྱིར་འཐེན་བྱ་རྒྱུའི་རེ་བ་བཏོན་མོད། འོན་ཀྱང་ལེ་པ་ནོན་དུ་བཅའ་སྡོད་མཉམ་འབྲེལ་རྒྱལ་ཚོགས་ཀྱི་དཔུང་སྡེ་ཡིས་སྔར་གནས་བརྟན་སྲུང་བྱས་ནས། མཉམ་འབྲེལ་རྒྱལ་ཚོགས་ཀྱི་གྲོས་ཆོད་ལ་བརྩི་སྲུང་ཞུས་ཏེ་ལེ་པ་ནོན་དུ་བཅའ་སྡོད་མཉམ་འབྲེལ་རྒྱལ་ཚོགས་ཀྱི་དཔུང་སྡེའི་ནུས་པ་འདོན་རྒྱུའི་ཐག་བཅད་ཡོད་ཅེས་བརྗོད་པ་དང་། ཁོང་གིས་ད་དུང་མིག་སྔར་སྔར་བཞིན་འབྲེལ་གཏུག་བྱེད་པའི་བར་མཐོངས་ཡོད་པས་ལེ་པ་ནོན་དང་དབྱི་སི་རལ་ཕྱོགས་གཉིས་པོས་ཞི་བའི་ཐབས་ལམ་བརྒྱུད་གནད་དོན་ཐག་གཅོད་བྱ་རྒྱུའི་རེ་བ་ཡོད་ཅེས་ནན་བཤད་བྱས།
