ལོ་གཅིག་ལྷག་གི་གོང་དུ་འགྱིག་རྫས་གཏན་འགོག་གི་བཀའ་རྒྱ་ནན་ཤོས་དངོས་སུ་ལག་ལེན་བྱེད་མགོ་བརྩམས་ཤིང་། དེས་རྒྱལ་ཡོངས་ཀྱི་བཟའ་བཏུང་ལས་རིགས་ཀྱིས་དབྱེ་འབྱེད་བྱེད་མི་ཐུབ་པའི་སྤོས་འགྱིག་གི་འཇིབ་སྦུག་སྤྱོད་མི་ཆོག་པ་གཏན་འབེབས་བྱས་ཡོད་པས། ཤོག་བུའི་འཇིབ་སྦུག་དེ་ཚབ་བྱེད་དུ་གྱུར། ཡིན་ཡང་གསར་འགོད་པས་རྒྱུས་ལོན་བྱུང་བ་ལྟར་ན། པེ་ཅིང་གི་བཟའ་བཏུང་ལས་རིགས་ཀྱི་ཁྲོམ་ར་ནས་ཤོག་སྦུག་མཐོང་དཀོན་པོར་གྱུར་ཡོད།
ཤོག་སྦུག་གི་གྲིབ་གཟུགས་ཤིག་ཀྱང་མཐོང་དཀའ་བ་དང་།
འདུས་འདྲེས་འོ་སྐྱུར་འཇིབ་སྦུག（聚乳酸吸管）ཚོང་ར་རུ་ཐོན་པ།
གསར་འགོད་པ་པེ་ཅིང་གི་ཁྲོམ་ར་ཞིག་ཏུ་མུ་འབྲེལ་བཏུང་བྱའི་ཚོང་ཁང་མང་པོར་ལྟ་སྐོར་དུ་ཕྱིན་པ་ལས་ཤེས་རྟོགས་བྱུང་བ་ལྟར་ན། དེ་སྔ་དར་ཆེ་བའི་ཤོག་སྦུག་མཐོང་དཀོན་པོར་གྱུར་ཡོད་དེ། PLAཞེས་པའི་འབྱེད་ཐུབ་སྦུ་གུ་ཞིག་དར་ཁྱབ་ཏུ་ཕྱིན་ཡོད་པ་དང་། འཇིབ་སྦུག་དེ་དག་གི་ཕྱིའི་ཐུམ་སྒྲིལ་སྟེང་དུPLAའཇིབ་སྦུག་ལ་འདུས་འདྲེས་འོ་སྐྱུར་འཇིབ་སྦུག་ཀྱང་ཟེར། དེ་ནི་མ་རྨོས་ལོ་ཏོག་དང་། གྲོ། ཞོག་ཁོག་སོགས་རྩི་ཤིང་ལས་བླངས་པའི་བསིང་ཕྱེ་ལས་བཟོས་ཤིང་ཡོངས་སུ་དབྱེ་འབྱེད་བྱེད་ཐུབ་པ་ཡིན་ཞེས་བཀོད་ཡོད།
གསར་འགོད་པས་བཏུང་བྱ་ཚོང་ཁང་ཞིག་ནས་རྒྱུས་ལོན་བྱུང་བ་ལྟར་ན། འདུས་འདྲེས་འོ་སྐྱུར་འཇིབ་སྦུག་གི་ཕྱི་ངོས་དང་། མཁྲེགས་ཚད་སོགས་སྤོས་འགྱིག་གི་འཇིབ་སྦུག་དང་ཧ་ཅང་འདྲ། ཚོང་ཁང་གི་ཞབས་ཞུ་བ་ཞིག་གིས་བརྗོད་པ་ལྟར་ན། སྦུ་གུ་དེ་ནི་དྲོད་ཚད་ཀླད་ཀོར་འོག་གི་10℃ནས་70℃བར་གྱི་ཁོར་ཡུག་ཁྲོད་བཀོལ་སྦྱོད་བྱེད་ཆོག་པ་དང་། དེས་བཏུང་བྱ་གྲང་མོ་དང་ཁོལ་མོ་གཉིས་ཀ་འཐུང་ན་ཆོག་གི་ཡོད། འཛད་སྤྱོད་པ་མང་ཆེ་བ་ཡང་ཤོག་སྦུག་ལས་འདུས་འདྲེས་འོ་སྐྱུར་འཇིབ་སྦུག་ལ་དགའ་པོ་ཡོད་པ་རེད།
བཏུང་བྱའི་སྤུས་རྟགས་ཀྱི་འགན་འཁུར་བ་ཞིག་གིས་ངོ་སྤྲོད་བྱས་པར་ལྟར་ན། སྤོས་འགྱིག་གི་མ་གནས་ནི་སྦུ་གུ་རྐང་རེར་སྐར་མ་5དང་6ཙམ་ཡིན་པ་དང་། ཤོག་སྦུག་གི་མ་གནས་ཧ་ལམ་སྐར་མ་7དང་8ཙམ་ཡིན། འོན་ཀྱང་འདུས་འདྲེས་འོ་སྐྱུར་འཇིབ་སྦུག་རྐང་རེར་ཧ་ལམ་སྒོར་ཟུར་1དང་སྐར་མ་2ནས་ཟུར1དང་སྐར་མ་3ཙམ་དགོས་ཀྱི་ཡོད་པ་རེད། མ་གནས་མཐོ་རུང་འཛད་སྤྱོད་པའི་འཛད་སྤྱོད་ཀྱི་ཉམས་མྱོང་ལ་བསམ་ནས་ཁོ་ཚོས་འཇིབ་སྦུག་མང་ཆེ་བ་འདུས་འདྲེས་འོ་སྐྱུར་འཇིབ་སྦུག་ལ་བརྗེས་ཡོད་པ་རེད།
རྒྱལ་ནང་གི་ཤོག་སྦུག་མངག་ཚོང་ཚད་ཆེས་ཆེར་ཇེ་ཉུང་དུ་ཕྱིན་པ།
ཐོན་སྐྱེད་སྒྲིག་ཆས་གོང་དམའ་པོ་བྱས་ནས་བཙོང་བཞིན་པ།
གསར་འགོད་པས་ཀྲེ་ཅང་གི་ཤོག་སྦུག་བཟོ་གྲྭ་ཞིག་ལས་མཐོང་བ་ལྟར་ན། བཟོ་གྲྭ་དེའི་འཕྲུལ་འཁོར་24ལས་འཕྲུལ་འཁོར་5མ་གཏོགས་བཀོལ་སྤྱོད་བྱེད་བཞིན་མེད་ཅིང་། ཐོན་སྐྱེད་ཀྱི་ལས་ལ་ཞུགས་ཡོད་པའི་ལས་དོན་མི་སྣ་ཡང་མི་གཉིས་གསུམ་ཙམ་ལས་མེད། ཐོན་སྐྱེད་མི་སྣ་ཞིག་གིས་གསར་འགོད་པར་ན་ནིང་ལོ་སྟོད་ནི་ང་ཚོས་མངགས་ཐོ་མང་ཤོས་ཀྱི་དུས་ཡིན་པ་དང་། འཕྲུལ་ཆས་ཚང་མས་ལས་བྱས་ཤིང་། ལས་དོན་མི་སྣ་རྣམས་ཀྱིས་ལས་རེས་མ་བྱས་ན་ཐོན་སྐྱེད་ཀྱི་འཆར་གཞི་ལེགས་གྲུབ་བྱེད་ཐུབ་ཀྱི་མེད། དེ་དུས་དང་བསྡུར་ན་ད་ཆ་ཧ་ཅང་ཁོམ་ཡོད་ཅེས་བརྗོད་ཆོག་ཅེས་བཤད།
ཀྲེ་ཅང་གི་ཤོག་བཟོས་ཐོན་རྫས་ཀུང་སི་ཞིག་གི་ཐོན་སྐྱེད་ཙུའུ་ཀྲང་ཐེན་རེན་ཚའེ་ཡིས། འཕྲུལ་འཁོར་དེའི་ཉིན་རེར་ཉུང་ཤོས་ལའང་སྦུ་གུ་རྐང་ཁྲི་བརྒྱད་དགུ་ཙམ་ཐོན་སྐྱེད་བྱེད་བཞིན་པ་དང་། བྲེལ་བ་ཆེ་ཤོས་ཀྱི་དུས་སུ་འཕྲུལ་འཁོར་གཅིག་མང་ཤོས་སུ་སྦུ་དུ་རྐང་ཁྲི་14རེ་ཐོན་སྐྱེད་བྱས་ཅེས་བརྗོད།
ཀྲེ་ཅང་གི་ཤོག་བཟོས་ཐོན་རྫས་ཀུང་སི་ཞིག་གི་སྤྱི་ཁྱབ་ཅིང་ལི་ཀྲོའུ་ཞའོ་ལིང་གིས། སྤྱི་ལོ་2020ལོའི་ཟླ་10པ་ནས་སྤྱི་ལོ་2021ལོའི་ཟླ་4པའི་བར་དང་། ཉིན་རེར་ཤོག་སྦུག་ས་ཡ་གསུམ་ནས་ས་ཡ་ལྔ་རེ་འཚོང་གི་ཡོད། དེ་ནས་PLA（འོ་སྐྱུར་སྡུད་སྦུག）ཐོན་ཞིང་འོ་ཇ་ཚོང་ཁང་གི་སྦྱིན་བདག་ཚོས་འཛད་སྤྱོད་པ་ཤོག་སྦུག་ལ་དེ་འདྲ་དགས་པོ་མི་འདུག་ཅེས་བརྗོད་ཅིང་། དེ་ནས་འཚོང་ཚད་ཇེ་དམའ་རུ་ཕྱིན་ཞེས་བརྗོད།
རྒྱལ་ནང་གི་ཤོག་སྦུག་གི་ཁྲོམ་ར་ལ་གློ་བུར་འགྱུར་ལྡོག་བྱུང་བ་དེས། ཀྲོའུ་ཞའོ་ལིན་གྱི་ཀུང་སི་དཀའ་ཁག་གི་གནས་སུ་ལྷུང་བར་བྱས། འོན་ཀྱང་ན་ནིང་ལོ་སྨད་དུ། རྒྱལ་སྤྱིའི་རིམས་ནད་གནས་ཚུལ་ཇེ་ལེགས་སུ་ཕྱིན་པ་དང་ཆབས་ཅིག ཁོང་མོས་ཕྱི་རྒྱལ་དུ་ཕྱིར་ཚོང་བྱེད་པའི་གླགས་རྙེད་པ་དང་། མིག་སྔར་ཁོང་ཀུང་སིས་ཐོན་སྐྱེད་བྱས་པའི་ཤོག་སྦུག་གི་བརྒྱ་ཆ་བདུན་ཅུ་ཕྱི་རྒྱལ་དུ་འཚོང་བཞིན་ཡོད། ད་ཆ་ཁོང་མོས་སྨྱུག་མས་བཟོས་པའི་ཤོག་སྦུག་ཅིག་ཞིབ་འཇུག་གསར་སྤེལ་བྱས་ནས་ཐོན་རྫས་ཀྱི་འགྲན་རྩོད་ནུས་པ་ཇེ་ཆེར་བཏང་ཡོད། འོན་ཀྱང་ཁོང་མོའི་ཉེ་འགྲམ་གྱི་ལས་རིགས་གཅིག་པའི་ཀུང་སི་མི་ཉུང་བ་ཞིག་གིས་སྔ་ས་ནས་སྒྲིག་ཆས་ཕམ་ཚོང་བྱེད་པ་དང་ཐོན་སྐྱེད་བྱེད་མཚམས་འཇོག་པའམ་ཡང་ན་ཐོན་སྐྱེད་གཞན་སྒྱུར་བྱས་ཟིན་པ་རེད།
ཨན་ཧུའེ་ཧྲུའུ་ཁྲེང་རྫོང་གི་སྨྱུག་མའི་བཟོ་རྩལ་ཐོན་རྫས་བཟོ་གྲྭ་ཞིག་གི་མགོ་འཛིན་སུའུ་ཧའོ་ཡིས། ང་ཚོས་ན་ནིང་ནས་ལས་རིགས་བསྒྱུར་ཡོད། ད་ལྟ་གྲི་དང་ཁེམ་བུ་ཐོན་སྐྱེད་བྱེད་སའི་བཟོ་ཁང་རྒྱ་ཆེར་གཏོང་དགོས་ཀྱི་ཡོད་པས། ངས་འཕྲུལ་ཆས་ཕམ་ཚོང་བྱེད་རྩིས་ཡིན་ཏེ། ཐོག་མའི་རིན་གོང་གི་བཅུ་ཆ་གཅིག་བྱས་ཀྱང་ཉོ་མཁན་དཀོན་ཞེས་བརྗོད།
སྤུས་ཚད་འགན་ལེན་དུས་ཡུན་ཐུང་ཞིང་ནུས་པ་ཇེ་ཞན་དུ་ཕྱིན་པ།
འདུས་འདྲེས་འོ་སྐྱུར་འཇིབ་སྦུག་བེད་མེད་དུ་འགྱུར་ཚད་མཐོ་བ།
ཤོག་སྦུག་བསྟུད་མར་ཕམ་བཤོལ་དང་། ལས་རིགས་ཁག་གིས་རེ་བ་ཆེན་པོ་བཅོལ་ཡོད་པའི་འདུས་འདྲེས་འོ་སྐྱུར་འཇིབ་སྦུག་དེའི་ཚབ་བྱེད་དུ་གྱུར་ནས། ཚོང་ར་རུ་གཞི་ཁྱོན་ཆེན་པོས་ཁྱབ་སྲིད་དམ། གསར་འགོད་པས་བཅར་འདྲི་ལས་རྒྱུས་ལོན་བྱུང་བ་ལྟར་ན། མིག་སྔའི་བར་འདུས་འདྲེས་འོ་སྐྱུར་འཇིབ་སྦུག་གི་ཁྲོམ་རའི་མཚོན་ཚུལ་ལ་ད་དུང་ཡང་མི་འདང་བའི་ཆ་ཡོད་པས། སླད་ཕྱིན་ད་དུང་ཕྱོགས་མང་པོའི་ཤུགས་རྒྱག་དགོས་ཀྱི་ཡོད་པ་རེད།
ཀྲེ་ཅང་དབྱི་ཝུའུ་ཡི་སྦུ་གུའི་ཁེ་ལས་ཀྱི་མཛོད་ཁང་ཞིག་ཏུ། ཁེ་ལས་ཀྱི་འགན་འཁུར་བ་ལི་ཨེར་ཆའོ་ཡིས་མཛོད་ཁང་གི་དོ་དམ་པ་དང་དུས་ལས་ཡོལ་བའི་འཇིབ་སྦུག་ཇི་ལྟར་ཐག་གཅོད་བྱེད་པའི་གནད་དོན་སྐོར་ལ་གྲོས་བསྡུར་བྱེད་བཞིན་ཡོད། འདི་ནི་ཁོ་ཚོས་སྤྱི་ལོ་2021ལོའི་ལོ་མགོར་ཐོན་སྐྱེད་བྱས་པའི་འདུས་འདྲེས་འོ་སྐྱུར་འཇིབ་སྦུག་སྐོར་ཞིག་ཡིན་ལ། སྤུས་ཀ་ཁག་ཐེག་བྱེད་པའི་དུས་ཡུན་བརྒལ་བས་དེའི་ནུས་པ་མར་ཆགས་ཡོད་དེ། ལག་པས་བཙིར་ཙམ་བྱས་པས་རྡུལ་དུ་འགྱུར་བའི་རྣམ་པ་མངོན་ཡོད། མཛོད་ཁང་འདིའི་ནང་བེད་མེད་ཀྱི་སྦུ་གུ་སྒམ་3000ཙམ་ལུས་ཡོད་ལ། གྱོང་གུན་དངོས་རྫས་ཀྱི་རིན་ཐང་ཕལ་ཆེར་ཁྲི་བཞི་བཅུ་ལྔ་བཅུ་ཙམ་ཡིན་པ་རེད།
ཀྲེ་ཅང་དབྱི་ཝུའུ་རྒྱུན་མཁོའི་དངོས་རྫས་ཚད་ཡོད་ཀུང་སི་ཞིག་གི་སྤྱི་གཉེར་ལི་ཨེར་ཆའོ་ཡིས། སྤྱི་ལོ་2021ལོའི་ལོ་གསར་གྱི་རྗེས་སུ། ང་ཚོས་རྒྱུན་ལྡན་གྱི་ཐོན་རྫས་ཏེ། དབྱེ་འབྱེད་ཐུབ་པའི་PLAའཇིབ་སྦུག་མང་ཙམ་བཟོས་པ་ཡིན། འོན་ཀྱང་སྤྱི་ལོ་2021ལོའི་ཟླ་3པའི་རྗེས་སུ། PLAའཇིབ་སྦུག་ཐོན་རྫས་ཧྲིལ་པོས་ཕྱིར་ཚོང་བྱེད་ཚད་མར་ཆག་པ་རེད།
ལི་ཨེར་ཆའོ་ཡིས་འདུས་འདྲེས་འོ་སྐྱུར་འཇིབ་སྦུག་གི་རིན་གོང་དེ་བས་མཐོ་བ་དང་ལྟ་སྐུལ་དོ་དམ་གྱིས་མི་འདང་བའི་གནས་ཚུལ་འོག བརྒྱུད་ཚོང་པ་ཁག་གཅིག་གིས་སླར་ཡང་སྤོས་འགྱིག་ཉོ་བའི་རྣམ་པ་སླར་གསོ་བྱས་ཡོད་ཅེས་བཤད་པ་རེད།
ཕུགས་ནས་བལྟས་ན། ལྟ་སྐུལ་དོ་དམ་ལ་སྐུལ་འདེད་དང་ཁོར་ཡུག་སྲུང་སྐྱོང་གི་འཛད་སྤྱོད་འདུ་ཤེས་ཇེ་ཟབ་ཏུ་ཕྱིན་པ་དང་། དེ་བཞིན་ལག་རྩལ་གྱིས་དབྱེ་འབྱེད་བྱེད་ཐུབ་པའི་སྦུ་གུའི་མ་གནས་ཇེ་ཆུང་དུ་གཏོང་བ་བཅས་དང་བསྟུན་ནས། འཇིབ་སྦུག་གི་འབྱུང་འགྱུར་ལ་སྔར་བཞིན་འཕེལ་རྒྱས་ཀྱི་བར་མཐོངས་ཆེན་པོ་ལྡན་ཡོད།
ཀྲུང་གོའི་སྤོས་འགྱིག་ལས་སྣོན་བཟོ་ལས་མཐུན་ཚོགས་ཀྱིས་སྤོས་འགྱིག་ཆེད་ལས་ཨུ་ལྷན་གྱི་དྲུང་ཆེ་ཝུང་ཡུན་ཤོན་གྱིས། སྤྱི་ལོ་2020ལོའི་སྐབས་སུ་འདུས་འདྲེས་འོ་སྐྱུར་འཇིབ་སྦུག་གི་རྒྱལ་ནང་གི་ཐོན་ནུས་ཏུན་ཁྲི་6ཙམ་ལས་མེད་པ་དང་། ད་ཆ་དེའི་ཐོན་ནུས་ཀྱིས་ཏུན་ཁྲི་15ལྷག་ཟིན་ཡོད། ཐོན་ནུས་འཕར་སྣོན་བྱུང་བ་དང་བསྟུན་ནས་འོ་སྐྱུར་གྱི་རིན་གོང་ཡང་མར་འབབ་སྲིད། ང་ལ་ཤོག་སྦུག་ཡང་ན་སྐྱེ་དངོས་དབྱེ་འབྱེད་སྤོས་འགྱིག་སྦུ་གུའི་སྤུས་གོང་བསྡུར་ཚད་ཇེ་མཐོར་འགྲོ་བ་དང་བསྟུན་ནས། བེད་སྤྱོད་བྱེད་ཚད་ཀྱང་རིམ་བཞིན་ཇེ་མཐོར་འགྲོ་ངེས་ཡིན་པའི་ཡིད་ཆེས་ཡོད་ཅེས་བརྗོད་པ་རེད།
རྩོམ་སྒྲིག་པ། བདེ་སྒྲོན།
