ནང་དོན་གནད་བསྡུས། དཔྱད་རྩོམ་འདིའི་ནང་སྨན་སྦྱོར། ནུས་པ་ཕྱོགས་བསྡུས་ནང་བསྟན་པའི་སྨན་སྦྱོར་སོ་སོར་ཁོང་ཏུ་དབུལ་བའི་རྟ་ཇི་ལྟར་དགོས་ཚུལ་ཐད་རིག་གཞུང་གི་དགོངས་པ་གཞིར་བཟུང་ཞིང་སློབ་དཔོན་དམ་པའི་མན་ངག་གིས་ཟུར་བརྒྱན་ཏེ་དཔྱད་པ་ཞིབ་མོར་བྱས་ཡོད།
གནད་ཚིག སྨན་རྟ། སྨན་ནུས། རྐྱང་པ། ལྡན་འདུས།
[ཀྲུང་གོའི་དཔེ་དེབ་དབྱེ་རྟགས།]R289 [ཡིག་ཚང་མཚོན་བྱང་།]A [རྩོམ་གྱི་གོ་རིམ་ཨང་སྒྲིག]1674-0572(2018)01-0088-08
བརྩེ་ཆེན་ཟླ་བའི་འོད་དཀར་གྱིས། །
དུཿཁའི་ཚ་གདུང་བཅིལ་མཛད་ཅིང་། །
འགྲོ་ལ་ལུས་སེམས་བདེ་བའི་ཐབས། །
སྟོན་མཛད་སྨན་གྱི་བླ་མར་འདུད། །
གླེང་གཞི།
སྨན་སྦྱོར་ནུས་པ་ཕྱོགས་བསྡུས་ཕན་བདེའི་ལེགས་བཤད་ཅེས་པའི་གཞུང་འདི་ནི་1949ལོར་མཁས་དབང་མཁྱེན་རབ་ནོར་བུས་ཕྱོགས་བསྒྲིགས་མཛད་ཅིང་། སྔ་རབས་ལྕགས་རི་འགྲོ་ཕན་གླིང་གི་སྦྱོར་ཁོངས་ཀྱི་སྨན་སྦྱོར་ཡིན་ཞིང་། དུས་ད་ལྟའི་བར་སྨན་པ་ཆེ་ཆུང་ཚང་མས་ལག་ལེན་གྱི་རྨང་གཞི་ལྟ་བུ་ཞིག་ཏུ་ངོས་འཛིན་བཞིན་པ་མ་ཟད། དོན་ངོ་མར་ཡང་འདི་ཉིད་ནི་སྨན་སྦྱོར་ཐམས་ཅད་ཀྱི་ནང་ནས་རྒྱུན་དུ་སྤྱོད་བདེ་ཞིང་ཕན་ནུས་ཆེ་བ་མཐའ་དག་ཕྱོགས་གཅིག་ཏུ་བསྡུས་པའི་གཞུང་ཞིག་ཡིན་ལ། ནད་ཀྱི་ངོ་བོའི་ཐོག་ནས་དཔྱད་ནའང་བཞི་བརྒྱ་རྩ་བཞིའི་སྨན་གྱི་གཉེན་པོ་མཐའ་དག་འདིར་འདུས་ཞེས་བཤད་ནའང་ཐལ་དྲགས་པར་མི་སྣང་སྟེ། ནད་ཐམས་ཅད་རླུང་མཁྲིས་བད་ཀན་ལས་གྱུར་ལ་དེ་ཡང་ཚ་གྲང་གཉིས་སུ་འདུ་བའི་ཕྱིར་གཞུང་འདིའི་སྨན་སྦྱོར་རེ་རེ་བཞིན་དཔྱད་ན་ངོ་བོའི་སྒོ་ནས་ཚ་གྲང་གི་གཉེན་པོ་མ་འདྲེས་པ་སོ་སོར་ཕྱེས་ཡོད་ལ། གནས་ཀྱི་སྒོ་ནས་སྟོད་སྨད་བར་གསུམ་དང་། ཕྱི་ནང་གཉིས་སོགས་སྨན་གྱི་གཉེན་པོ་ཁག་ཇི་ལྟ་བ་བཞིན་ཕྲ་ཞིང་ཞིབ་པར་བསྡུས་ཡོད་དོ། །རྒྱུ་མཚན་དེ་བས་ན་གཞུང་འདིར་བསྡུས་པ་དག་ད་ལྟའི་ཆར་སྟབས་བདེ་ཞིང་ཕན་འབྲས་མངོན་གསལ་ཆེ་བའི་སྨན་སྣ་ཤ་སྟག་ཏུ་མངོན་ནོ །
དངོས་གཞི།
དེ་ཡང་སྨན་སྦྱོར་སོ་སོ་གཏོང་བའི་སྐབས་སྨན་ནུས་རྩར་འཁྲིད་པ་དང་། སྨན་ཁོང་དུ་དབུལ་བ། དེ་དང་ལྷན་དུ་སྨན་དེ་ཉིད་ཀྱི་ནུས་པར་རམ་འདེགས་བྱེད་པ་སོགས་ཀྱི་ཆེད་སྨན་རྟ་ནི་ཅིས་ཀྱང་གལ་ཆེ་བ་ཡིན། འོན་ཀྱང་གཉན་གྱི་བསྡོངས་ཟླ་ཤུགས་ཆེར་དར་བའི་དུས་འདིར་ཀོང་སྤྲུལ་རིན་པོ་ཆེ་སོགས་ངེས་པ་དོན་གྱི་ཚེ་རིག་འཛིན་པ་མང་པོས་མངར་གསུམ་གྱི་སྨན་རྟ་ཕྲིས་པ་ནས་བཟུང་། སྨན་རྟའི་སྐོར་ལ་བསམ་བློ་གཏོང་མཁན་ཇེ་ཉུང་དུ་ཕྱིན་ཞིང་། ལྷག་པར་དུ་སྨན་དང་སྨན་ཁང་ཚང་མ་ཚོང་ལས་ཅན་དུ་འགྱུར་བཞིན་པའི་དུས་འདིར་སྨན་པ་དང་ནད་པ་གཅིག་ལས་གཅིག་བྲེལ་ཞིང་། འགན་འཁུར་གྱི་བསམ་བློ་ཇེ་ཞན་དུ་ཕྱིན་པར་བརྟེན་སྨན་རྟའི་སྐོར་ལ་བསམ་བློ་གཏོང་མཁན་ནི་སྲིད་མཐའ་ཙམ་དུ་གྱུར། དེར་བརྟེན་གཞུང་འདིར་བསྟན་པའི་སྨན་རྣམས་ཀྱི་ཁོང་དུ་དབུལ་བའི་སྨན་རྟའི་སྐོར་ཅུང་ཟད་དཔྱད་པར་བྱ་བ་ལ། སྤྱིར་སྨན་རྟའི་གོ་དོན་ངེས་པར་བྱ་བ་དང། བྱེ་བྲག་སྨན་སྦྱོར་སོ་སོར་སྨན་རྟ་ཇི་ལྟར་གཏོང་བའི་ཚུལ་ཏེ་གཉིས་ཀྱི་སྒོ་ནས་གསལ་བར་བྱ་བ་སྟེ།
དང་པོ། སྤྱིར་སྨན་རྟའི་གོ་དོན་ངེས་པར་བྱ་བ།
1 སྨན་རྟ་ཞེས་པའི་ངེས་ཚིག
སྨན་དེ་ཉིད་སླེབས་པར་འོས་པའི་གནས་དེར་མྱུར་དུ་སླེབས་པར་བྱེད་པའི་རྟ་ལྟ་བུ་ཡིན་པའི་ཕྱིར་དེ་ལྟར་བརྗོད་པ་ཡིན་ཏེ། དེ་ཡང་གཅེས་བཏུས་སྣ་ཚོགས་གསལ་བའི་ལུང་འཇམ་མགོན་དགོངས་རྒྱན་དུ་དྲངས་པ་ལས། སྨན་རྟ་ཞེས་པ་རང་ཉིད་བགྲོད་པའི་གནས། །རྟ་ལ་ཞོན་ན་མྱུར་དུ་འབྱོར་བ་ལྟར། །སྨན་གྱི་ནུས་པ་མྱུར་དུ་ནད་ཀྱི་སྟེང་། །ཁྲིད་པར་བྱེད་པའི་མིང་ཡང་དེ་ལྟར་གྲགས། །①ཅེས་གསུངས་པ་ལྟར་རོ། །
2 སྨན་རྟ་སོ་སོར་ངོས་བཟུང་བ།
སྨན་རྟ་ཞེས་པ་འདི་ལ་གཉིས་ཡོད་དེ། སྨན་ནུས་རྩར་ཁྲིད་བྱེད་ཀྱི་སྨན་རྟ་དང་། སྨན་ཁོང་དུ་དབུལ་བའི་སྨན་རྟ་གཉིས་སོ། ། སྔ་མ་ནི་རླུང་མཁྲིས་བད་ཀན་གྱི་གཉེན་པོར་རིམ་པ་བཞིན་བུ་རམ་དང་། ཀ་ར། སྦྲང་རྩི་གསུམ་ཡིན་ལ། ཕྱི་མ་ནི་རིམ་པ་བཞིན་ཆང་དང་། ཆུ་བསིལ། ཆུ་སྐོལ་སོགས་ཡིན་ནོ། །
གཉིས་པ། བྱེ་བྲག་སྨན་སྦྱོར་སོ་སོར་སྨན་རྟ་ཇི་ལྟར་གཏོང་བའི་ཚུལ།
1 ཨ་གར་སོ་ལྔ།
རླུང་ཤས་ཆེ་བའི་ནད་ལ་གཏོང་སྐབས་འདོན་བཞི་དང་། ཆང་དང་། རུས་བཅུད་གསུམ་གྱི་སྨན་རྟས་འཕུལ་ལ། ཁྲག་རླུང་སྟོད་འཚང་ལ་ཀོ་བྱི་ཆུ་བརྡར་བྱས་པའི་ཁུ་བ། གཉན་དང་གདོན་ཤས་ཆེ་བར་གཏོང་སྐབས་ཨེ་ཏྲོས་ཏའམ་གུ་གུལ་ནག་པོའི་བསྐོལ་ཁུ། གྲུམ་བུ་ལ་གཏོང་སྐབས་མགྲིན་བཟང་མ་འཁྲུགས་པའི་མཚལ་སོགས་ཀྱི་རྟས་ འཕུལ་དགོས། གཞན་ཡང་། ཉམས་ཡིག་བརྒྱ་རྩའི་ལུང་འཇམ་མགོན་དགོངས་རྒྱན་དུ་དྲངས་པ་ལས། སྟོད་ཀྱི་རྣག་ལ་སྲོ་ལོ་དཀར་པོ་དང་། །པ་ཡག་རྩ་བ་སྟར་བུ་རྣམ་པ་གསུམ། །གཙོ་བོའི་སུམ་ཆ་བ་འོས་འཕུལ་ལ་བཏང་། །མི་ཡི་དབང་པོ་རྣམ་རྒྱལ་གྲགས་བཟང་ལུགས། །②ཞེས་ཀྱང་གསུངས་སོ། །
2 ཨ་གར་བཅོ་ལྔ།
ཁྲག་རླུང་ལ་གཏོང་སྐབས་ཀོ་བྱི་ཆུ་བརྡར་གྱི་ཁུ་བས་འཕུལ་བའམ་ཆང་དང་རུས་ཁུས་འཕུལ་ཡང་རུང་། ནད་ངོས་གསལ་པོ་མ་བྱུང་བར་ཆུ་སྐོལ་གྲང་གིས་འཕུལ་ཡང་རུང་ངོ་། །
3 ཀོ་བྱི་བཅུ་གསུམ།
ཆུ་སྐོལ་གྲང་དང་། འབམ་རིགས་གྱེན་ལོག་ལ་བྲག་ཞུན་བསྐོལ་ཁུས་ཀྱང་འཕུལ་ཆོག་པར་སྙམ་སྟེ། འབམ་རིགས་གྱེན་དུ་ལོག་པ་གཙོ་བོ་ངན་ཁྲག་ཡིན་པ་གང་ཞིག ཁྲག་ལ་བྲག་ཞུན་ཐང་གིས་འཕུལ་ཆོག་པའི་ཕྱིར་རོ། །
4 ཏིག་ཏ་བརྒྱད་པ།
འདི་ནི་མཁྲིས་ནད་ཚ་བའི་སྨན་ཡིན་པའི་ཕྱིར་སྐོལ་གྲང་གིས་འཕུལ་བ་ཉིད་ལེགས་པར་སེམས། འོན་ཀྱང་མེ་དྲོད་ཞན་པར་ཆུ་སྐོལ་གྱིས་འཕུལ་དགོས།
5 གསེར་མདོག་བཅུ་གཅིག
མཁྲིས་སྲིན་གྱི་སྨན་ཡིན་ལ་ཆུ་སྐོལ་ལམ་སྲིན་ཤས་ཆེ་ན་ཕུར་མོང་གི་བསྐོལ་ཁུས་ཀྱང་འཕུལ་ཆོག་གོ
6 གར་ནག་བཅུ་པ།
ཆུ་སྐོལ་གྱིས་འཕུལ་བ།
7 རྒ་ལོ་སྨན་དམར།
སྤྱིར་སྨན་འདི་ཆུ་སྐོལ་གྱིས་འཕུལ་ཆོག་རུང་། རིམས་མཇུག་གི་ལུད་པ་བཅོས་རྡུགས་པ་དག་ལ་སྨན་རྟ་ཆང་གིས་བྱས་ལ་གཏོང་དགོས་པར་གསུངས།
8 བདེ་བྱེད་སྙོམས་ལྡན།
སྤྱིར་ན་ཆུ་སྐོལ་གྱིས་འཕུལ་ཆོག་རུང་། བད་ཀན་སྨུག་པོ་ལ་འུ་སུའི་བསྐོལ་ཁུས་འཕུལ་ན་བཟང་།
9 ཟུར་ལུགས་ཟླ་ཤེལ་ཆེན་མོ།
ལྡན་འདུས་ཀྱི་ནད་རིགས་མཐའ་དག་གཏོང་བའི་གཉེན་པོ་ཡིན་པའི་ཕྱིར་ནད་རང་རང་གི་སྨན་རྟས་འཕུལ་བ་གལ་ཆེ་སྟེ། དེ་ཡང་། དུག་ཤས་ཡོད་སྐབས་བོང་ང་དམར་པོའི་ཐང་གིས་འཕུལ་ལ། སྤྱིར་སྨུག་པོ་ལ་འུ་སུ། སྨུག་པོ་རྡོལ་རལ་བྱུང་སྟེ་ཁྲག་ཏུ་འཁྲུ་བའམ་སྐྱུགས་པའི་སྐབས་གུར་གུམ་དང་དོམ་མཁྲིས། གབ་ཚད་སྐབས་ཆུ་སྐོལ་དྲོད་འཇམ་དང་། ཚད་རྙིང་ལ་གངས་ཆུ། འགྲམས་འཁྲུགས་འཐབ་པར་ཙན་དན་དམར་པོའི་ཁུ་བ་དང་ཧོང་ལེན་གྱི་ཁུ་བ། མ་ཞུ་བར་ཆ་མཉམ་བཞི་ཐང་ངམ་རྒྱམ་ཚའི་ཆིག་ཐང་། སྲིན་ལ་གླ་རྩིའམ་ཕུར་མོང་བསྐོལ་ཁུ། ཆུ་སེར་ལ་སེང་ལྡེང་གི་ཁུ་བ་སོགས་ཚུལ་བཞིན་བསྟེན་ན་ལྡན་འདུས་ཀྱི་ནད་རིགས་མཐའ་དག་འཇོམས་པའི་རྡོ་རྗེ་ལྟ་བུའོ། །གཞན་ཡང་ཆུ་སེར་གྱི་དུས་ཚོས་ཁུས་འཕུལ་དགོས་པའི་སྨན་ཡང་ཡོད་པར་ཤེས་པར་བྱ་སྟེ། མན་རྒྱུད་ལས། ཆུ་སེར་དུས་སུ་སྟབ་སེང་ཡུ་གུ་ཤིང་། །ཤེལ་ཏ་ཨ་བྱག་ཕོ་རོག་ནོར་བུ་དང། །བུ་རམ་སྦྱར་བ་ཚོས་ཁུས་འཕུལ་ལ་བཏང་། །③ཞེས་གསུངས་པ་དང་། ཆུ་བསིལ་གྱི་སྨན་རྟ་གཏོང་སྐབས་ཕོ་བའི་མེ་དྲོད་ལ་ངེས་པར་དུ་བརྟག་པ་གལ་ཆེ་སྟེ། མན་རྒྱུད་ལས། ཆུ་ཉིད་ཚ་བ་གཅོག་ཅིང་དང་ག་འབྱེད། །སྐྲངས་ཤོར་གདོན་དང་ཕོ་བ་ངན་ལ་དུག །④ཅེས་གསུངས་པའི་ཕྱིར་རོ། །
གཞན་ཡང་། མེས་པོའི་ཞལ་གདམས་ལས། ནད་གཞི་བསྟུན་ཏེ་རང་རང་སྨན་རྟ་ནི། བྱེད་ལས་ལ་བལྟོས་ནས་བཏགས་པ་སྟེ་ལག་ལེན་པོད་དམར་ལས། སྨན་ནུས་རྩར་འཁྲིད་བྱེད་རླུང་ནད་ལ་བུ་རམ་དང་། ཁྲག་མཁྲིས་ནད་ལ་བ་ཤ་ཀ བད་ཀན་ཆུ་སེར་ནད་ལ་སྦྲང་རྩིའོ། ཁོང་འཕུལ་མཚན་ཉིད་འཇོམས་བྱེད་རླུང་ནད་ལ་གར་ཆང་དང་། མཁྲིས་པའི་ནད་ལ་གངས་ཆུའམ་བསྐོལ་གྲངས། བད་ཀན་ནད་ལ་ཆུ་ཁོལ་ཚ་མོའོ་ཞེས་པའི་ལུང་འདི་ཡང་དྲངས་ཡོད་དོ། །⑤
10 སེ་འབྲུ་ཀུན་ཕན་བདེ་བྱེད།
སྤྱིར་ཆུ་སྐོལ་གྱིས་འཕུལ་ཆོག་ལ། སྨུག་པོ་རྒྱས་པའི་སྐབས་རུ་རྟའི་ཁུ་བས་འཕུལ་ལ། སྨུག་པོ་བྱེར་བ་ལ་ཕག་པའི་བཅུད་ལེན་ནམ་ཕག་ཁྲག་གིས་དབུལ། སྟོབས་འཕེལ་གྱི་ནད་ལ་བྱང་སེམས་དཀར་པོ་མཆོག་ཏུ་གསུངས་ཤིང་། ཁྲག་ནད་ཀུན་ལ་སྟར་བུ་ཁྱོར་གང་བསྡེབས་གསུངས་པས་འདིར་སྟར་བུའི་ཁུ་བའི་འཕུལ་ནའང་ཆོག་གམ་སྙམ་པས་དཔྱད།
11 དྭ་ལིས་བཅུ་དྲུག
ཆུ་སྐོལ་གྱིས་འཕུལ་ཡང་རུང་ལ། སྦྲང་རྩིའི་ཁུ་བའམ་བུ་རམ་གྱི་ཁུ་བས་འཕུལ་ན་སྨན་ནུས་མྱུར།
12 འབོལ་སྨན་བདུན་པ།
ཆུ་མདོག་ལྗང་དང་སེར་བ་སོགས་ཀྱི་སྐབས་ཆུ་སྐོལ་ལམ། ཡང་ན་ཨབྷི་དྲུག་ཐང་གིས་འཕུལ། ལྷག་པར་དུ་ཚ་ཆུ་ཤིན་ཏུ་འཐེམ་པའི་སྐབས་སུ་རྐྱང་པའི་སྦྱོར་བ་ཉིད་འུ་སྐྱུར་ཐང་གིས་འཕུལ་ན་བསྔགས་པ་ཡིན་ཏེ། ཕན་བདེ་ནོར་བུའི་བང་མཛོད་ལས། ཚ་ཆུ་ཤིན་ཏུ་འཐེམ་པ་ལ། །རྐྱང་པའི་སྦྱོར་བ་བསྔགས་པ་ཡིན། །འུ་སྐྱུར་ལྷ་མོའི་ཐང་གིས་འཕུལ། །⑥ཞེས་གསུངས་པ་ལྟར་དང་། ཡང་ན་ཚ་ཆུ་ལ་སྐྱུ་རུའི་ཐང་དང་། གྲང་ཆུ་ལ་ཉི་དགའི་ཐང་གིས་འཕུལ་ཡང་རུང་ངོ་། །
13 རྟ་ཟི་དམར་པོ།
གློ་ཚད་ལ་སྒོང་ཐོག་པའི་ཐང་གིས་འཕུལ་ལ། དེ་བཞིན་གྲེ་བ་འགགས་པ་ལ་སྤང་རྩི་དང་། གཉིད་འཐིབས་པ་ལ་བྱི་ཚེར་ཐང་། འཁྲུ་ནད་ལ་ཆུ་སྐོལ་ཚན་མོ། མཁྲིས་ཚད་ལ་བསྐོལ་གྲང་། རི་ཐང་མཚམས་སུ་ཀྱི་ལྕེ་སེར་ནག རླུང་ཚད་ཕལ་ཆེ་བར་ཆང་དང་། རིམས་ཚད་ལ་གངས་ཆུ་བཅས་ཀྱིས་འཕུལ་བའོ། །
14 སྤང་རྩི་བཅུ་གཉིས།
འདི་ཉིད་གཉན་དང་ཚ་བའི་སྨན་ཡིན་ཕྱིར་གུ་གུལ་ནག་པོའི་ཐང་ངམ་ཆུ་སྐོལ་གྲང་གིས་འཕུལ་དགོས་པ་ལྟར་སྣང་ཡང་། ཕན་བདེ་ནོར་བུའི་བང་མཛོད་ལས། གུང་གཉིས་ཆུ་སྐོལ་འཕུལ་ལ་བཏང་། །ཞེས་གསུངས་པས་ཆུ་སྐོལ་གྱིས་དབུལ་བར་བྱའོ། །⑦
15 གནམ་ལྕགས་ཐོག་མདའ།
འདི་ཉིད་སྲིན་ནད་ཡ་མ་དཀར་ནག་ཁྲ་གསུམ་སེལ་བྱེད་ཀྱི་སྨན་ཡིན་ཕྱིར་ཕུར་མོང་གི་ཐང་གིས་འཕུལ་དགོས་པ་ལྟར་སྣང་ཡང་། སྐབས་འདིར་བདུད་རྩིའི་སྨན་མཛོད་ལས་ཞིབ་པར་བཏགས་ལ་སྒ་སྐྱའི་ཐང་གིས་འཕུལ། །མགོ་སྲིན་ཡ་མའི་ནད་ལ་ཐེངས་སེལ་ཡིན། །⑧ཞེས་གསུངས་པ་ལྟར་སྒ་སྐྱའི་ཐང་གིས་དབུལ་བར་བྱའོ། །
16 ཕན་པ་ཀུན་ལྡན།
འདི་ཉིད་ལ་དམིགས་བསལ་གྱི་སྨན་རྟ་བསྟན་པ་མ་མཐོང་རུང་གཙོ་བོ་གཉན་དང་སྲིན་ལ་ཕན་པའི་སྨན་ཡིན་ཕྱིར་གུ་གུལ་ནག་པོའི་བསྐོལ་ཁུ་འམ་ཕུར་མོང་གི་བསྐོལ་ཁུ། ཆུ་བསྐོལ་གྲང་སོགས་སྨན་པ་སོ་སོས་ནད་བབས་ལ་དཔྱད་དེ་གཏོང་ བར་བྱའོ། །
གཤམ་དུ། སྨན་སྦྱོར་རྣམས་རེའུ་མིག་གི་ལམ་ནས་འགོད་པར་བྱ་བ།
མཇུག་བསྡུ་བ།
དེ་ལྟར་ཁུངས་ལྡན་གྱི་གཞུང་དང་མན་ངག་མང་པོར་གཞི་བརྟེན་ཅིང་། ལག་ལེན་དངོས་ཀྱི་མྱོང་བས་ཟུར་བརྒྱན་ཏེ་སྨན་ཁོང་དུ་དབུལ་བའི་རྟ་རྣམས་ཅུང་ཟད་ཁོལ་དུ་ཕྱུང་ཞིང་རེའུ་མིག་གི་ལམ་ནས་ལྟ་བདེ་བར་བྱས་པ་འདི་ལ་འགལ་འཁྲུལ་ནོངས་པའི་ཚོགས་ཅི་མཆིས་གཟུར་གནས་བློ་ལྡན་དག་གི་མདུན་དུ་བཤགས་སོ། །
འདི་འབད་དགེ་བའི་མ་གྱུར་འགྲོ་བ་རྣམས། །
འབྱུང་འཁྲུགས་ནད་ཀྱི་ཟུག་རྔུ་ལས་གྲོལ་ཅིང་། །
ལུས་སེམས་བདེ་དགའི་དཔལ་གྱིས་ཕྱུག་གྱུར་ནས། །
ཆོས་མཐུན་བྱ་བས་རྟག་ཏུ་འཚོ་གྱུར་ཅིག །
དཔྱད་གཞིའི་ཡིག་ཆ།
①②གོ་འཇོ་དབང་འདུས། ཟིན་ཏིག་བདུད་རྩི་ཐིགས་པའི་དཀའ་མཆན་འཇམ་མགོན་གུ་ཎ་མུ་དྲའི་དགོངས་རྒྱན། [ M] ཀྲུང་གོའི་བོད་རིག་པ་དཔེ་སྐྲུན་ཁང་། 2014ལོའི་ཟླ་བ7པར། ཤོག་ངོས། 28 27
③④གཡུ་ཐོག་ཡོན་ཏན་མགོན་པོ། གསོ་རིག་རྒྱུད་བཞི།[ M] བོད་ལྗོངས་མི་དམངས་དཔེ་སྐྲུན་ཁང་། 2009ལོའི་ཟླ་བ9པར། ཤོག་ངོས། 408 495
⑤ཉི་མ་ཚེ་རིང་། རྒྱུན་སྤྱོད་སྨན་སྦྱོར་ནུས་པ་ཕྱོགས་བསྡུས་ཀྱི་གསལ་འགྲེལ་མེས་པོའི་ཞལ་གདམས། བོད་ལྗོངས་གསོ་རིག་སློབ་ཆེན། ཤོག་ངོས།13
⑥⑦ཀརྨ་ངེས་ལེགས་བསྟན་འཛིན། ཕན་བདེ་ནོར་བུའི་བང་མཛོད། [ M] པེ་ཅིན། མི་རིགས་དཔེ་སྐྲུན་ཁང་། 2004ལོའི་ཟླ་བ7པར། ཤོག་ངོས།104 175
⑧ཨོ་རྒྱན་ཐེག་མཆོག ཟིན་ཏིག་མཛེས་རྒྱན་བདུད་རྩིའི་སྨན་མཛོད། [ M] ཀྲུང་གོའི་བོད་རིག་པ་དཔེ་སྐྲུན་ཁང་། 2014ལོའི་ཟླ་བ་7པར། ཤོག་ངོས། 358
རྩོམ་སྒྲིག་པ། བདེ་སྒྲོན།
