ཚེས18ཉིན་ཧྥུ་ཅན་ཀྲང་ཀྲོའུ་གྲོང་ཁྱེར་གྱི“ཨོའུ་ཨའེ་ནད་འབུ་འགོག་བཅོས་ངོ་སྣུམ”(欧艾抑菌霜)དོན་རྐྱེན་ཐག་གཅོད་ལས་དོན་ཚོ་ཆུང་གིས“ཨོའུ་ཨའེ་ནད་འབུ་འགོག་བཅོས་ངོ་སྣུམ(欧艾抑菌霜)གྱི་དོན་རྐྱེན་ལ་བརྟག་དཔྱད་དང་ཐག་གཅོད་བྱས་པའི་སྐོར་ནས་བརྡ་སྦྱོར”བཏང་བ་རེད།
བརྡ་སྦྱོར་གྱི་ནང་དུ་མིག་སྔའི་ཐོན་རྫས་ལ་ཞིབ་བཤེར་ཚད་ལེན་བྱས་པའི་མཇུག་འབྲས་དང་བརྟག་དཔྱད་བྱས་པ་གཞིར་བཟུང་ན། ཨོའུ་ཨའེ་ཕྲུ་གུའི་（欧艾婴童）བདེ་སྐྱོང་མཁོ་ཆས་ཚད་ཡོད་ཀུང་སིས་ཐོན་རྫས་རྫུན་མ་ཐོན་སྐྱེད་དང་ཕྱིར་ཚོང་བྱས་པའི་ཉེས་པ་བསགས་ཡོད། སྤྱི་བདེ་ལས་ཁུངས་ཀྱིས་གྱོད་དོན་ལ་མྱུལ་ཞིབ་བྱས་པ་མ་ཟད། འབྲེལ་ཡོད་དོགས་ཡོད་ཉེས་ཅན་ལ་ཉེས་དོན་བཙན་ཤེད་ཀྱི་བྱ་ཐབས་སྤྱད་པ་དང་། འཕྲོད་བསྟེན་བདེ་ཐང་ལས་ཁུངས་ཀྱིས་ཁྲིམས་ལྟར་གྱོད་གཞི་དང་འབྲེལ་བ་ཡོད་པའི་ཁེ་ལས་ཀྱི《དུག་སེལ་ཐོན་རྫས་ཐོན་སྐྱེད་ཁེ་ལས་ཀྱི་འཕྲོད་བསྟེན་ཆོག་འཐུས་ལག་ཁྱེར》རྩིས་མེད་དུ་གཏོང་རྒྱུ་ཡིན་ལ། ཁྲོམ་རའི་ལྟ་སྐུལ་དོ་དམ་ལས་ཁུངས་ཀྱིས་ཁྲིམས་ལྟར་གྱོད་དོན་དང་འབྲེལ་བའི་ཁེ་ལས་ཀྱི་ཚོང་གཉེར་ལག་ཁྱེར་རྩིས་མེད་དུ་གཏོང་རྒྱུ་ཡིན་ཞེས་འཁོད་ཡོད།
བརྡ་སྦྱོར་གྱི་ནང་དུ་ད་དུང་ཀྲང་ཀྲོའུ་གྲོང་ཁྱེར་གྱིས་གྱོད་དོན་མྱུལ་ཞིབ་བྱེད་ཤུགས་མུ་མཐུད་དུ་ཆེ་རུ་བཏང་ནས། ཁྲིམས་ལྟར་མཐའ་གཅིག་ཏུ་གྱོད་གཞི་དང་འབྲེལ་བའི་ཁེ་ལས་དང་དེའི་འབྲེལ་ཡོད་མི་སྣར་ཞིབ་བཤེར་ཐག་གཅོད་ནན་མོ་བྱ་རྒྱུ་ཡིན་ཞེས་འཁོད་ཡོད།
རྩོམ་སྒྲིག་པ། བདེ་སྒྲོལ།
