ཉེ་ཆར། ལྷ་སའི་དྲ་དམངས་ཀྲུའུ་ཆེ་གེ་མོས(འགྱུར་མིང)སྐད་འཕྲིན་གྲོགས་ཚོགས་སུ“བློ་མཐུན་ཚོ། ཁོང་ཚོས་ཚེས་25ནས་བཟུང་ལྷ་སར་བཀག་སྡོམ་བྱས་ནས་ཕྱིར་འགྲོ་ཆོག་པ་ལས་ཚུར་ཡོང་མི་ཆོག་ཅེས་བརྗོད་ཀྱི་འདུག”ཅེས་པའི་ཆ་འཕྲིན་རྫུས་མ་བསྐུར་བས། ཤུགས་རྐྱེན་ངན་པ་བཟོས་ཡོད་པ་རེད།
རིམས་ནད་ཐོན་རིང་། དྲ་རྒྱའི་དཀྲོག་གཏམ་ལ་རྡུང་རྡེག་ཚ་ནན་བཏང་ནས་སྤྱོད་གཙང་གཞུང་དྲང་གི་དྲ་རྒྱའི་ཁོར་ཡུག་ཅིག་གཏོད་ཆེད། ཉེ་ཆར། ལྷ་སའི་ཉེན་རྟོག་ཕྱོགས་ཀྱིས་ཆ་འཕྲིན་རྫུས་མ་བསྐུར་མཁན་ཀྲུའུ་ཆེ་གེ་མོ་བཟུང་བ་རེད། དེ་རྗེས། ཀྲུའུ་ཆེ་གེ་མོས་ཉེ་ཆར་ཏོག་གསར་གློ་ཚད་སྐོར་གྱི་དཀྲོག་གཏམ་གང་བྱུང་བཟོས་པའི་ཁྲིམས་འགལ་གྱི་དོན་དངོས་ངོས་ལེན་ཞུས་ཤིང་། མིག་སྔར། ལྷ་སའི་ཉེན་རྟོག་ཕྱོགས་ཀྱིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་བདེ་འཇགས་དོ་དམ་ཆད་གཅོད་སྲོལ་ཡིག》གི་དོན་ཚན་ཉེར་ལྔ་པ་གཞིར་བཟུང་། ཀྲུའུ་ཆེ་གེ་མོ་ཁྲིམས་ལྟར་སྲིད་འཛིན་བཀག་ཉར་ཉིན་ལྔ་བྱས་པ་རེད།
ཉེན་རྟོག་ཕྱོགས་ཀྱིས་དྲན་སྐུལ་བྱས་དོན། དྲ་རྒྱ་ནི་ཁྲིམས་མེད་ལུགས་མེད་ཀྱི་གནས་ཚུལ་སྤེལ་ཡུལ་ཞིག་མིན་པས། སྤྱི་དམངས་ཚང་མས་རང་རྟོགས་ཀྱིས་བཅའ་ཁྲིམས་དང་ཁྲིམས་སྲོལ་ལ་བརྩི་སྲུང་དང་ཡ་རབས་ཚུལ་ལྡན་གྱི་སྒོ་ནས་རང་ཉིད་ཀྱི་སྐད་ཆར་འགན་འཁུར་དགོས་པ་ལས་དཀྲོག་གཏམ་བཟོ་མི་རུང་བ་དང་། དཀྲོག་གཏམ་ལ་ཡིད་ཆེས་མི་བྱེད་པ། དཀྲོག་གཏམ་བརྒྱུད་བསྒྲགས་མི་བྱེད་པ་བཅས་བྱས་ནས། ཐུན་མོང་ཐོག་དྭངས་གཙང་གི་དྲ་རྒྱའི་ཁོར་ཡུག་ཅིག་གཏོད་དགོས། དཀྲོག་གཏམ་བཟོ་བ་དང་དཀྲོག་གཏམ་བརྒྱུད་བསྒྲགས་ཀྱི་བྱེད་སྤྱོད་ལ་སྤྱི་བདེ་ལས་ཁུངས་ཀྱིས་ཁྲིམས་ལྟར་ཞིབ་བཤེར་ཐག་གཅོད་མཐའ་གཅིག་ཏུ་བྱ་རྒྱུ་རེད། རིམས་འགོག་གི་དུས་སུ། རྒྱ་ཆེའི་མི་དམངས་མང་ཚོགས་ཀྱིས་གཞུང་ཕྱོགས་ནས་ཆ་འཕྲིན་ཤེས་རྟོགས་དང་དེ་ལ་ཡིད་ཆེས་ཀྱིས་རང་ངོས་འགོག་སྲུང་ཡག་པོ་བྱས་ཏེ། རིམས་ནད་ལ་འགོག་རྒོལ་བྱེད་པའི་སྤྱི་ཡོངས་ཀྱི་རྣམ་པར་རང་རྟོགས་ངང་སྲུང་སྐྱོང་བྱེད་དགོས། ང་ཚོས་ལག་གདང་སྦྲེལ་བ་དང་ཕྱར་བ་གྲུ་འདེགས་བྱས་ན། དཀའ་ངལ་དང་རིམས་ནད་ལས་རྣམ་པར་རྒྱལ་ཐུབ་ངེས་རེད།
རྩོམ་སྒྲིག་པ། བདེ་སྒྲོལ།
