གཟའ་འཁོར་གོང་མར་ཀྲུང་དབྱང་དང་། ཞིང་ཆེན། རང་སྐྱོང་ལྗོངས། གྲོང་ཁྱེར་ཁག་སོ་སོའི་སྒྲིག་ཨུད་ལྟ་ཞིབ་ཨུ་ཡོན་ལྷན་གྱིས་མུ་མཐུད་དེ་རུལ་སུངས་ལ་ངོ་རྒོལ་བྱེད་པའི་ལས་དོན་ལ་ཤུགས་སྣོན་བརྒྱབ་ཡོད།
མཐོ་རིམ་དཔོན་རིགས་ངོས་ནས་བཤད་ན། ཀྲུང་དབྱང་སྒྲིག་ཁྲིམས་ཨུ་ཡོན་ལྷན་ཁང་གིས་ གཟའ་མཇུག་ལ་ངལ་གསོ་མ་བརྒྱབ་པར། སྤྱི་ཚེས་24ཉིན་གྱི་དགོང་མོའི་ཆུ་ཚོད་8པར་ཀྲུང་དབྱང་སྒྲིག་ཁྲིམས་ཨུ་ཡོན་ལྷན་ཁང་དང་རྒྱལ་ཁབ་ལྟ་ཞིབ་ཨུ་ཡོན་ལྷན་ཁང་གི་དྲ་ཚིགས་ཐོག་ཏུ་གནས་ཚུལ་ཡོངས་བསྒྲགས་བྱས་པ་ལྟར་ན། ཅང་སུའུ་ཞིང་ཆེན་ཏང་ཨུད་ཀྱི་རྒྱུན་ལས་ཨུ་ཡོན། སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཝང་ལི་ཁོ་(王立科)ལ་སྒྲིག་འགལ་ཁྲིམས་འགལ་ཚབས་ཆེན་གྱི་དོགས་གཞི་ཡོད་པ་དང་། རང་འགུལ་ངང་ནག་ཉེས་ངོས་ལེན་ཡར་ཞུ་བྱས་ཏེ་ཀྲུང་དབྱང་སྒྲིག་ཨུད་དང་རྒྱལ་ཁབ་ལྟ་ཞིབ་ཨུ་ཡོན་ལྷན་ཁང་གི་སྒྲིག་ཁྲིམས་ཞིབ་བཤེར་དང་ལྟ་ཞིབ་བརྟག་དཔྱད་དང་ལེན་བྱས་ཡོད་པ་རེད།
ཞིང་ཆེན་གྱིས་ལས་བྱེད་པར་དོ་དམ་བྱེད་པའི་ཕྱོགས་ནས་བཤད་ན། རྒྱལ་ཡོངས་ཁྱབ་ཁོངས་ནང་། བྱང་ཕྱོགས་ཧེ་ལུང་ཅང་བར་དང་། ལྷོ་ཕྱོགས་སུ་གོང་ཏུང་བར། ནུབ་ཕྱོགས་ཀན་སུའུ་བར། ཤར་ཕྱོགས་ཀྲེ་ཅང་བཅས་བར་གྱི་ཞིང་ཆེན་དང་རང་སྐྱོང་ལྗོངས། གྲོང་ཁྱེར་བཅས་ཁག་16གི་སྒྲིག་ཨུད་ལྟ་ཞིབ་ཨུ་ཡོན་ལྷན་ཁང་གིས་ཞིང་ཆེན་གྱིས་དོ་དམ་བྱེད་པའི་ལས་བྱེད་པ་མི་20ལ་ཞིབ་བཤེར་བྱས་པའི་གནས་ཚུལ་ཡོངས་བསྒྲགས་བྱས་ཡོད།
གཟའ་འཁོར་གོང་མའི་གཟའ་མཇུག་ཏུ་ད་ལོའི་མཐོ་རིམ་དཔོན་པོ་ཨང་བཅུ་བདུན་པར་ཞིབ་བཤེར་བྱས་པ།
སྤྱི་ཚེས་24ཉིན་གྱི་དགོང་མོ། འདི་ལོའི་མཐོ་རིམ་དཔོན་རིགས་ཨང་བཅུ་བདུན་པ་དང་། ཟླ་འདིའི་མཐོ་རིམ་དཔོན་རིགས་ཨང་གསུམ་པ་སྟེ་ཅང་སུའུ་ཞིང་ཆེན་ཏང་ཨུད་རྒྱུན་ལས་ཨུ་ཡོན། སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཝང་ལི་ཁོ་ལ་ཞིབ་བཤེར་བྱས་ཡོད། ཁོ་ནི་མཚོ་སྔོན་ཞིང་ཆེན་གྱི་འགོ་འཛིན་གཞོན་པ་ཝུན་གོ་ཏུང་(文国栋)གི་རྗེས་སུ། ད་ལོར་རང་ཉེས་ངོས་ལེན་བྱེད་མཁན་གྱི་མཐོ་རིམ་དཔོན་པོ་ཨང་གཉིས་པ་དེ་རེད། ཅང་སུའུ་ཞིང་ཆེན་ས་གནས་སྨྱན་སྦྱོར་གྱིས་གནས་ཚུལ་སྤེལ་བར་གཞིགས་ན། རང་འགུལ་ངང་རང་ཉེས་ངོས་ལེན་བྱས་པའི་ཉིན་གཉིས་ཀྱི་གོང་སྟེ་སྤྱི་ཟླ་10ཚེས་22ཉིན་ཝང་ལི་ཁོ་ད་དུང་ནན་ཅིང་དུ་ཉིན་དེ་རང་དུ་སྐོང་ཚོགས་བྱས་པའི་ཞིང་ཆེན་ཡོངས་ཀྱི་དམག་ཁོངས་ལས་ཕྱིར་ལོག་པའི་དམག་མིའི་ལས་དོན་ཚོགས་འདུར་ཞུགས་པ་མ་ཟད་གཏམ་བཤད་ཀྱང་སྤེལ་ཡོད་པ་རེད།
ལོ་འདི་ཚུན་དུ་ཐིང་རིམ་པའི་དཔོན་རིགས་ཞིབ་བཤེར་བྱེད་གྲངས་ཆེས་མང་བའི་གཟའ་འཁོར་གཅིག
མཐོ་རིམ་དཔོན་རིགས་ལ་རྡུང་རྡེག་བཏང་བ་མ་ཟད་ད་དུང་གཟའ་འཁོར་གོང་མར་ཞིང་ཆེན་གྱིས་དོ་དམ་བྱེད་པའི་ལས་བྱེད་པ་མི་ཉུ་ཤུར་ཞིབ་བཤེར་བྱས་པ་རེད།
བསྡོམས་རྩིས་བརྒྱབ་ནས་ཤེས་གསལ། གཟའ་འཁོར་གོང་མ་ནི་ད་ལོར་ཞིང་ཆེན་གྱིས་དོ་དམ་བྱེད་པའི་ལས་བྱེད་པར་ཞིབ་བཤེར་བྱེད་གྲངས་ཆེས་མང་བའི་གཟའ་འཁོར་གཅིག་ཡིན། གཟའ་ཕུར་བུ་(སྤྱི་ཟླ་10ཚེས་22)དང་གཟའ་པ་སངས་(སྤྱི་ཟླ་10ཚེས་23)ཉིན་གཉིས་ལ། ཞིང་ཆེན་གྱིས་དོ་དམ་བྱེད་པའི་ལས་བྱེད་པ་མི་དྲུག་གི་གོ་གནས་འཐེན་པ་དང་། ཉིན་འདི་གཉིས་ནི་ད་ལོར་ཞིང་ཆེན་གྱིས་དོ་དམ་བྱེད་པའི་ལས་བྱེད་པར་ཞིབ་བཤེར་བྱེད་གྲངས་ཆེས་མང་བའི་ཉིན་གཉིས་སུ་གྱུར་ཡོད།
རང་འགུལ་ངང་རང་ཉེས་ངོས་ལེན་བྱས་པའི་དཔོན་རིགས་མང་པོ་ཞིག་ནི་སྲིད་ཁྲིམས་ཁོངས་གཏོགས་ནས་ཡིན་པ་རེད།
ལས་འཁྱུར་ངལ་གསོ་བྱས་ཟིན་པའི་ལས་བྱེད་པ་མང་པོ་དང་རྫོང་དང་གྲོང་ཁྱེར་གྱི་༼གཙོ་འགན་འཁུར་མཁན་༽ཕུད། གཟའ་འཁོར་འདིར་ད་དུང་ཞིང་ཆེན་གྱིས་དོ་དམ་བྱེད་པའི་ལས་བྱེད་པ་མི་དྲུག་གིས་ཝང་ལི་ཁོ་དང་འདྲ་བར་རང་འགུལ་ངང་རང་ཉེས་ངོས་ལེན་ཞུས་པ་རེད། རང་འགུལ་གྱིས་རང་ཉེས་ངོས་ལེན་ཞུས་པའི་ཞིང་ཆེན་གྱིས་དོ་དམ་བྱེད་པའི་ལས་བྱེད་པ་མི་དྲུག་པོ་དེའི་ཁྲོད། ཀྲོའུ་ཡིང་ཧྲུའུ་(周映枢)དང་ཁྲེན་ཁྲང་། (陈昌)ཁྲེན་མིང་ཧྭ་(陈明华)བཅས་ནི་ཝང་ལི་ཁོ་དང་འདྲ་བར་སྲིད་ཁྲིམས་ཁོངས་གཏོགས་ཀྱི་ལས་བྱེད་པ་ཡིན་ཞིང་ཚང་མ་ལས་གནས་ཡོད་བཞིན་དུ་རང་ཉེས་ངོས་ལེན་བྱས་པ་ཞིག་རེད།
ཉེ་ཆར། རྒྱལ་ཡོངས་སྲིད་ཁྲིམས་ཁོངས་གཏོགས་ཀྱི་མི་མང་པོས་རང་འགུལ་ངང་རང་ཉེས་ངོས་ལེན་ཞུ་བའི་རྒྱབ་ལྗོངས་ཆེན་པོ་ནི། ཟླ་བ་གསུམ་ལྷག་ཙམ་རིང་དུ་རྒྱལ་ཡོངས་སྲིད་ཁྲིམས་དཔུང་ཁག་ཁོངས་སུ་སློབ་གསོ་དག་ཐེར་བྱས་པ་དེ་རེད།
གཞི་གྲངས་ལས་མངོན་པ་ལྟར་ན། སྤྱི་ཟླ་10ཚེས་7ཉིན་བར། ཚོད་ལྟའི་ས་ཁུལ་དུ་སྲིད་ཁྲིམས་ལས་བྱེད་པ་དང་ཉེན་རྟོག་པ་མི་1546གིས་རང་འགུལ་ངང་རྩ་འཛུགས་ལ་གནད་དོན་གསལ་བཤད་དམ་རང་ཉེས་ངོས་ལེན་ཞུས་ནས་མི་373ལ་གྱོད་དོན་ཐོ་འགོད་ཞིབ་བཤེར་བྱས་ཡོད་པ་དང་མི་1040ལ་ཆད་པ་བཅད་ཡོད།
སྤྱི་ཚེས་25ཉིན་ནས་བརྩིས་ན། རྒྱལ་ཡོངས་སྲིད་ཁྲིམས་དཔུང་ཁག་གི་སློབ་གསོ་དག་ཐེར་ཚོད་ལྟའི་ལས་དོན་མཇུག་འགྲིལ་བར་ད་དུང་ཉིན་6ཡོད་པ་དང་། སྔོན་དཔག་བྱས་ན་ད་དུང་སྲིད་ཁྲིམས་ཁོངས་གཏོགས་སུ་རང་འགུལ་ངང་རང་ཉེས་ངོས་ལེན་ཞུ་མཁན་དཔོན་རིགས་ཡོད་སྲིད་པ་རེད།
