2019ལོར་ལྗོངས་ཡོངས་ཀྱི་རིམ་ཁག་སྒྲིག་ཁྲིམས་ཞིབ་བཤེར་དང་ལྟ་ཞིབ་ལས་ཁུངས་ནས། ཞིབ་བཤེར་ལས་དོན་ཏན་ཏིག་སྤེལ་ཏེ་རུལ་སུངས་ལ་ཆད་གཅོད་ཀྱི་དམ་བསྒྲགས་རྣམ་པ་རྒྱུན་འཁྱོངས་བྱས་ཏེ། དུས་རབས་གསར་པའི་སྒྲིག་ཁྲིམས་ཞིབ་བཤེར་དང་ལྟ་ཞིབ་ལས་དོན་སྤུས་ལེགས་གོང་འཕེལ་ཡོང་རྒྱུར་རྒྱུན་ཆད་མེད་པར་སྐུལ་འདེད་བཏང་བ་རེད།
ལོ་གཅིག་རིང་ལྗོངས་ཡོངས་ཀྱི་རིམ་ཁག་སྒྲིག་ཁྲིམས་ཞིབ་བཤེར་དང་ལྟ་ཞིབ་ལས་ཁུངས་ནས། ཁྱོན་ཡིག་བཀུར་ངོ་བཅར་གྱི་ཐེར་འདོན་ཁག3965བདག་སྤྲོད་བྱས་པ་དང་གནད་དོན་གྱི་ཁུངས་སྣེ་ཁག5382 ཐག་གཅོད་བྱས་པ། གྱོད་དོན་ཁག1533ཐོ་འགོད་བྱས་པ། གྱོད་དོན་ཁག1426ཐག་གཅོད་བྱས་པ། མི1686ལ་ཏང་ཁྲིམས་དང་སྲིད་ཁྲིམས་ཀྱི་ཆད་པ་བཅད་པ། མི50ཁྲིམས་འཛིན་ལས་ཁུངས་ལ་རྩིས་སྤྲོད་བཅས་བྱས་པ། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དང་འགལ་བའི་གནད་དོན་ཁག117ཞིབ་བཤེར་ཐག་གཅོད་བྱས་པ། མི127ལ་ཏང་ནང་ཁུལ་གྱི་སྒྲིག་ཁྲིམས་དང་སྲིད་དོན་གྱི་ཆད་པ་བཅད་པ། མི42ལ་རྩ་འཛུགས་ཀྱི་ཆད་པ་བཅད་པ། མི58ལ་འགན་འཁྲི་བདའ་འདེད་བཏང་བ་བཅས་བྱས་ཏེ་སྤྱོད་ཚུལ་འཛུགས་སྐྱོང་ལས་དོན་རྒྱུན་མཐུད་ཏན་ཏིག་སྤེལ་བ་རེད།
མང་ཚོགས་ཀྱི་ཁེ་ཕན་སྣང་མེད་དུ་བཏང་བ་དང་གནོད་སྐྱོན་བཏང་བའི་གནད་དོན་ཆེད་དོན་བཅོས་སྒྲིག་གཏིང་ཟབ་བྱས་ནས་འབྲེལ་ཡོད་གནད་དོན་ཁྱོན264ཞིབ་བཤེར་ཐག་གཅོད་བྱས་པ་དང་། མི293ལ་ཏང་གི་སྒྲིག་ཁྲིམས་དང་སྲིད་དོན་གྱི་ཆད་པ་བཅད་པ། མི13ཁྲིམས་འཛིན་ལས་ཁུངས་ལ་རྩིས་སྤྲོད་བྱས་པ། དཔེ་མཚོན་གྱོད་དཔེ་ཁག་བརྒྱད་དང་མི12བརྡ་ཁྱབ་ཡོངས་བསྒྲགས་བཅས་བྱས་པ་དང་། དབུལ་སྐྱོར་ཁྱབ་ཁོངས་ཀྱི་གནད་དོན་ཁུངས་སྣེ་ཁག1040བདག་སྤྲོད་བྱས་པ། དཔེ་མཚོན་གྱོད་དོན་ཁག42དང་མི69བརྡ་ཁྱབ་ཡོངས་བསྒྲགས་བྱས་པ། ནག་སེལ་གཤེད་བཅོམ་གྱི་ཆེད་དོན་འཐབ་རྩོད་ལ་དམིགས་ནས་ཁུངས་སྣེ་ཁག104དུས་ཐོག་ཏུ་ཞིབ་བཤེར་ཐག་གཅོད་བྱེད་རྒྱུར་རྩིས་སྤྲོད་བྱས་པ། ཏང་ཡོན་དང་ལྟ་ཞིབ་བྱ་ཡུལ་གྱི་ནག་གཤེད་དང་འབྲེལ་བའི་རུལ་སུངས་དང་ཁྲིམས་འགལ་བར་སྲུང་སྐྱོབ་བྱེད་པའི་གནད་དོན 35དང་མི113ཞིབ་བཤེར་ཐག་གཅོད་བྱས་པ། མི73ལ་ཏང་གི་སྒྲིག་ཁྲིམས་དང་སྲིད་དོན་གྱི་ཆད་པ་བཅད་པ། མི38ལ་རྩ་འཛུགས་ཀྱི་ཆད་པ་བཅད་པ་བཅས་བྱས་ནས། དུས་དང་རྣམ་པ་ཀུན་དུ་མི་དམངས་ལྟེ་བར་འཛིན་པའི་རྩ་བའི་ལངས་ཕྱོགས་རྒྱུན་འཁྱོངས་བྱས་ཏེ་མང་ཚོགས་ཚོ་ནས་སེམས་ཁྲལ་བྱེད་པའི་རིགས་ཐག་གཅོད་ཧུར་ཐག་བྱས་པ་རེད། །
རྩོམ་སྒྲིག་པ། བདེ་སྒྲོལ།
