གཉན་དུག་སྡོང་སོགས་ཁྲིམས་འགལ་གྱིས་ཐད་གཏོང་བྱེད་མཁན་དག་ལ་སློབ་གསོའི་ཐ་ཚིག་བསྒྲགས་འདུག
ཁྱོན་ཡོངས་ནས་དག་གཙང་དྲི་མེད་ཀྱི་དྲ་བའི་ཁོར་ཡུག་འཛུགས་སྐྲུན་དང་དེའི་ལྟ་རྟོག་དོ་དམ་གྱི་ལས་འགན་ནན་གྱིས་བསྒྲུབ་ཆེད། སྤྱི་ཟླ1པོའི་ཚེས15ཉིན་མཚོ་ལྷོ་བོད་རིགས་རང་སྐྱོང་ཁུལ་བྲག་དཀར་རྫོང་སྤྱི་བདེ་ཅུས་ཀྱིས་རྫོང་འཐབ་ཕྱོགས་གཅིག་གྱུར་པུའུ་དང་རྫོང་དྲིལ་སྒྲོག་པུའུ། རྫོང་སྲིད་ཁྲིམས་ཨུ་སོགས་འབྲེལ་ཡོད་ལས་ཁུངས་དང་མཉམ་འབྲེལ་སྒོས། རྫོང་ཡོངས་ཀྱི་སྐད་འཕྲིན་དང་མགྱོགས་འཕྲིན་ཁྲོད་ཤུགས་རྐྱེན་ངན་པ་ཆེ་ཞིང་མདོ་མེད་ལུང་གཏམ་བཤད་མཁན་དང་། ཆགས་སྦྱོར་འཆལ་གཏམ་སྒྲོག་མཁན་གྱི་ཐད་གཏོང་བྱེད་མཁན་དག་ལ་སློབ་གསོའི་ཐ་ཚིག་བསྒྲགས་འདུག
འབྲེལ་ཡོད་སྡེ་ཁག་གི་འགན་ལེན་པས་བྲག་དཀར་རྫོང་གི་གཉན་དུག་སྡོང་དང་། འཕགས་པ་ཚེ་རིང་། ཀླུ་རྒྱལ་སོགས་ཐད་གཏོང་མཁན་དག་གིས་སྒྲིག་འགལ་གྱིས་རང་སྣང་གང་བྱུང་དང་གཤིས་ངན་ཁྱབ་སྤེལ། དོན་མེད་ཉོག་གཏམ་དང་ཁྲེལ་བྲལ་འུར་སློང་གི་བསམ་བློ་དང་དྲན་ཕྱོགས་མ་རུང་བ་ཁྲོམ་སྒྲོག་བྱེད་པའི་དོན་དངོས་ལ་དམིགས་ཏེ། ཁོ་ཚོར་སློབ་གསོ་བཏང་ཞིང་ཐ་ཚིག་བསྒྲགས་པར་མ་ཟད། མཉམ་འབྲེལ་དྲ་རྒྱའི་གསར་འགྱུར་ཆ་འཕྲིན་ཞབས་ཞུའི་དོ་དམ་གཏན་འབེབས་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་རྒྱའི་བདེ་འཇགས་བཅའ་ཁྲིམས། མཉམ་འབྲེལ་དྲ་རྒྱའི་ཆ་འཕྲིན་ཞབས་ཞུའི་དོ་དམ་བྱེད་ཐབས། མཉམ་འབྲེལ་དྲ་རྒྱའི་ཐད་གཏོང་བའི་ཞབས་ཞུའི་དོ་དམ་གཏན་འབེབས་སོགས་བཅའ་ཁྲིམས་དང་ཁྲིམས་སྲོལ་ལ་སློབ་སྦྱོང་བྱེད་དགོས་པའི་རེ་བ་བཏོན་ཞིང་། དྲ་རྒྱའི་ཞབས་ཞུ་བེད་སྤྱོད་གོ་རིམ་ཁྲོད་ཁྲིམས་མཐུན་སྤྱོད་བཟང་གཞིར་བྱས། བདེན་དགེ་མཛེས་གསུམ་གྱི་དྲ་བའི་རིག་གནས་དར་སྤེལ་བྱ་དགོས་པའི་རེ་བ་ནན་མོ་བཏོན་འདུག
དེ་མིན་གཉན་དུག་སྡོང་རབ་བྱུང་བ་ཞིག་ཡིན་པས་ཁོས་དེ་ལྟར་བྱས་ན་མི་འོས་པ་དང་། དེས་ཆོས་ལུགས་པའི་སྣང་བརྙན་དང་དགོན་པའི་མཚན་སྙན་ལ་གནོད་པ་ཐེབས་པའི་སྐྱོན་བརྗོད་བྱས་འདུག ཁོས་ཀྱང་མཐའ་མཇུག་གི་ཐད་གཏོང་བརྒྱུད་དེ་རང་སྐྱོན་ངོས་ལེན་དང་གསལ་བཤད་བྱས་རྗེས་རྗེས་ཕྱོགས་ནས་བཟུང་ཐད་གཏོང་མི་བྱེད་པའི་ཁས་ལེན་བྱས་འདུག
བྲག་དཀར་རྫོང་གི་རྫོང་དཔོན་གཞོན་པའམ་རྫོང་སྤྱི་བདེ་ཅུས་ཀྱི་ཅུས་ཀྲང་བཀྲ་ཤིས་རབ་བརྟན་གྱིས་ཐད་གཏོང་བྱེད་མཁན་རྣམས་ཀྱིས་རྗེས་ཕྱོགས་ཐད་གཏོང་བྱ་དུས་ཁྲིམས་བརྩི་ལུགས་བསྲུང་དང་། རྒྱལ་ཁབ་དང་སྤྱི་བའི་ཁེ་ཕན་ལ་སྲུང་སྐྱོབ་བྱས་ནས། དྲང་བོའི་སྲོལ་དང་མཐུན་པར་བྱས་ཏེ་རྒྱ་ཆེ་བའི་དྲ་དམངས་ཡོངས་ལ་དག་གཙང་དྲི་མེད་ཀྱི་དྲ་རྒྱའི་ཁོར་ཡུག་ཅིག་བསྐྲུན་དགོས་པར་གདམས་ཤིང་། གལ་ཏེ་ཐད་གཏོང་གི་སྐབས་སུ་ཁྲིམས་དང་འགལ་བའི་སྤྱོད་པ་སྤེལ་ཚེ་ཁྲིམས་ལྟར་ལག་བསྟར་བྱ་རྒྱུ་ཡིན་པར་མ་ཟད། གནས་ཚུལ་ཚབས་ཆེན་ཡིན་ན་ཁྲིམས་ཀྱི་འགན་འཁྲི་འགེལ་རྒྱུ་ཡིན་པ་དང་། ཐ་ན་ནག་འཇོམས་ངན་སེལ་གྱི་གྲས་སུ་བཞག་ནས་ཐག་གཅོད་ནན་མོ་བྱ་རྒྱུ་ཡིན་ཞེས་ཐ་ཚིག་བསྒྲགས། རྫོང་སྤྱི་བདེ་ཅུས་སོགས་འབྲེལ་ཡོད་ལས་ཁུངས་ཀྱིས་ཐེངས་འདིར་སློབ་གསོ་གཏོང་ཡུལ་གྱི་ཐད་གཏོང་བ་གསུམ་པོར་མཉམ་འབྲེལ་དྲ་རྒྱའི་ཐད་གཏོང་ཞབས་ཞུའི་འགན་འཁྲིའི་གན་རྒྱའི་སྟེང་མིང་རྟགས་ཀྱང་བཀོད་དུ་བཅུག་འདུག
རྩོམ་སྒྲིག་པ། བདེ་སྒྲོལ།
