—— རྒན་ཡོལ་ཞུས་པའི་ལས་བྱེད་པ་དགེ་རྒྱས་རྫོང་སྤྱི་བདེ་ཅུས་ཀྱི་དེ་སྔའི་ཅུས་ཀྲང་ངག་དབང་རྣམ་རྒྱལ་གྱི་སྐོར་བཀོད་པ།
འདི་ནི་ངག་དབང་རྣམ་རྒྱལ་གྱིས་དགུང་ཟས་སྐབས་སུ་ཁ་པར་ཐོག་ནས་འབྲེལ་ཡོད་ལས་དོན་ཐག་གཅོད་བྱེད་བཞིན་པ།
ཉེན་རྟོག་པའི་ལས་ལ་གཞོལ་བའི་མི་ཚེའི་ལམ་བུར་དྲན་གསོ་བྱེད་སྐབས། ངག་དབང་རྣམ་རྒྱལ་གྱིས་ཐོག་མཐའ་བར་གསུམ་དུ་མི་དམངས་ལ་ཞབས་འདེགས་ཞུ་བའི་ལས་གནས་ཐོག་འབད་འབུངས་ལྷོད་མེད་བྱས་ཡོད་ལ། ཁོང་གི་ཚད་གཞི་མཐོ་བ་དང་། བླང་བྱ་ནན་པ། ལྷོད་གཡེང་མི་གཏོང་བ་བཅས་ཀྱི་ལས་ཀའི་རྣམ་འགྱུར་མི་དམངས་ཉེན་རྟོག་པ་དང་ལས་རོགས་ཉེན་རྟོག་པ་མང་པོའི་སློབ་སྦྱོང་བྱ་ཡུལ་དུ་གྱུར་བ་མ་ཟད། ཁོང་ཚོའི་སེམས་ནང་གི་མིག་དཔེ་བཟང་པོ་དང་སྙིང་ཉེ་བའི་རྒན་རབས་པར་གྱུར་ཡོད།
ངག་དབང་རྣམ་རྒྱལ་ཉེན་རྟོག་སློབ་གྲྭ་ནས་ཐོན་རྗེས་མངའ་རིས་ས་ཁུལ་སྤྱི་བདེ་ཁྲུའུ་རུ་ལས་བགོས་བརྒྱབ་ནས་གསང་གནད་འཕྲིན་གཏོང་ཚན་ཁག་གི་ལས་སྒྲུབ་མཁན་ཞིག་ཏུ་གྱུར། ངག་དབང་རྣམ་རྒྱལ་གྱི་ཕ་ཡུལ་ནི་མངའ་རིས་ས་ཁུལ་དང་བར་ཐག་སྤྱི་ལེ་2600ལྷག་ཙམ་ཡོད་པའི་ཆབ་མདོ་གྲོང་ཁྱེར་དུ་གནས་ཡོད། དུས་རྒྱུན་རང་ཁྱིམ་དང་ས་ཐག་རིང་བ་མ་ཟད། ད་དུང་ལས་ཀའི་དམིགས་བསལ་རང་བཞིན་གྱི་རྐྱེན་པས་ལོ་གཅིག་ལ་ཕ་ཡུལ་དུ་ཐེངས་གཅིག་ལས་ལོག་ཐུབ་ཀྱི་མེད། འོན་ཀྱང་ལོ་ལྟར་ལོ་གསར་དང་དུས་ཆེན་གྱི་སྐབས་ངག་དབང་རྣམ་རྒྱལ་གྱིས་རང་འགུལ་ངང་ལས་གནས་བརྟན་སྲུང་བྱེད་ཅིང། “ང་ཕ་ཡུལ་དང་ས་ཐག་རིང་བས་ལོག་མི་ཐུབ་པས་ལས་རེས་མང་ཙམ་བྱས་ཆོག”ཟེར་གྱི་ཡོད།
ངག་དབང་རྣམ་རྒྱལ་ཉེས་ཅན་ལྟ་སྲུང་ཁང་དུ་ལས་ཀ་བྱས་ནས་ལོ་དགུ་སོང་རིང་། ཁོང་ནི་ཉི་འོད་དང་འདྲ་བར་མི་རྣམས་ཀྱི་སེམས་ལ་དྲོ་སྐྱིད་སྦྱིན་མཁན་དེ་ཡིན་པ་རེད། རྒན་ཡོལ་མ་ཞུས་གོང་། ངག་དབང་རྣམ་རྒྱལ་མངའ་རིས་ས་ཁུལ་སྤྱི་བདེ་ཁྲུའུ་ཡི་ཏང་ཨུད་ཨུ་ཡོན་དང་བརྟག་ཞིབ་མཁན། དགེ་རྒྱས་རྫོང་ཨུད་ཀྱི་ཧྲུའུ་ཅི་གཞོན་པ་སྲིད་ཁྲིམས་ཨུ་ལྷན་གྱི་ཧྲུའུ་ཅི། དགེ་རྒྱས་རྫོང་སྤྱི་བདེ་ཅུས་ཏང་ཨུད་ཀྱི་ཧྲུའུ་ཅི། ཅུས་ཀྲང་། ལྟ་ཞིབ་དཔོན་བཅས་ཀྱི་འགན་འཁུར་མྱོང་བ་དང་། མ་གཞི་ལས་གནས་མང་པོའི་འགན་འཁྲི་འཁུར་མོད། འོན་ཀྱང་ཁོང་གིས་སྔར་བཞིན་སྤུས་འབོར་གཉིས་ལྡན་སྒོ་ནས་ལས་དོན་ཁག་ལེགས་གྲུབ་ཐུབ་པ་དང་། བྱ་སྤྱོད་ངོ་མའི་ཐོག་ནས་ཚེ་གང་མི་དམངས་སྤྱི་བདེའི་བྱ་གཞག་ལ་ལེགས་སྐྱེས་འབུལ་བའི་དམ་བཅའ་ལག་ལེན་དུ་འཁྱོལ་ཡོད།
ད་ཆ་ཁོང་རྒན་ཡོལ་ཞུས་ཀྱང་ཁོང་གི་འབད་འབུངས་ཡར་བརྩོན་དང་ཡར་རྒྱས་བརྩོན་ལེན་གྱི་བསམ་པའི་ཉམས་འགྱུར་དང་། འགན་འཁྲི་འཁུར་ཕོད་པ་དང་དཀའ་སྡུག་ལ་མི་སྐྲག་པའི་ལས་ཀའི་སྤྱོད་ཚུལ་གྱིས་ན་གཞོན་མི་དམངས་ཉེན་རྟོག་པར་མིག་དཔེ་བཟང་པོ་ཞིག་བཏོད་ཡོད།
དགེ་རྒྱས་རྫོང་སྤྱི་བདེ་ཅུས་ཀྱི་མི་དམངས་ཉེན་རྟོག་པ་དབྱང་ཤིང་ཧྥེས་གསར་འགོད་པར“མ་གཞི་ཅུས་ཀྲང་ངག་དབང་རྣམ་རྒྱལ་ལགས་རྒན་ཡོལ་ཞུས་པ་རེད། འོན་ཀྱང་ཁོང་གི་སྙིང་སྟོབས་ཀྱིས་ང་ཚོར་ལྕག་སྐུལ་ཆེན་པོ་ཐེབས་བྱུང་། ང་ཚོས་སྤྱི་བདེ་ཉེན་རྟོག་པའི་སྙིང་སྟོབས་རྒྱུན་འཛིན་དང་ལྷག་བསམ་ཟོལ་མེད་ཀྱི་བསམ་པ་ནམ་ཡང་གནས་པར་བྱེད་ཀྱི་ཡིན”ཞེས་བརྗོད།
རྩོམ་སྒྲིག་པ། བདེ་སྒྲོལ།
