དགུན་དུས་ནི་མེ་ཟོན་གྱི་མངོན་མེད་རྐྱེན་ངན་ཐོན་མང་བའི་དུས་ཡིན་པས་མེ་ཟོན་བདེ་འཇགས་ཀྱི་ལས་དོན་ཡག་པོ་སྒྲུབ་ཆེད། ཉེ་ཆར། ལྷ་ས་གྲོང་ཁྱེར་ལྷུན་གྲུབ་རྫོང་དྲག་ཆས་པུས་ཆེད་མངགས་ལྷུན་གྲུབ་རྫོང་མེ་ཟོན་རུ་ཆེན་གདན་ཞུ་བྱས་ཏེ་ཡུལ་དམག་གི་མེ་ཟོན་བདེ་འཇགས་ཐད་ཀྱི་རྩལ་ནུས་གསོ་སྦྱོང་བྱས་ཤིང་། མེ་གསོད་ཀྱི་རྩལ་ནུས་བསླབས་པའི་ཁར། ཡུལ་དམག་གི་མེ་ཟོན་བདེ་འཇགས་ཀྱི་འདུ་ཤེས་དང་མེ་ཤོར་མ་ཐག་གི་མེ་གསོད་པའི་འཇོན་ཐང་སྔར་བས་ཆེ་རུ་བཏང་ནས་རྫོང་ཡོངས་ཀྱི་ཡུལ་དམག་གི་དངོས་འཐབ་རྩལ་ནུས་ཆེ་རུ་བཏང་བ་རེད།
དགུན་ཁ་ཤར་ཚུན། ལྷུན་གྲུབ་རྫོང་དྲག་ཆས་པུས་ཐབས་ལམ་མང་པོ་དང་། རིམ་པ་མང་པོ། ཕྱོགས་མང་པོ་བཅས་ཀྱི་ཐོག་ནས་དགུན་དུས་མེ་སྐྱོན་སྔོན་འགོག་དང་མེ་ཟོན་ཤེས་བྱ་དྲིལ་བསྒྲགས་བྱས་ཏེ། ཡུལ་དམག་གི་མེ་སྐྱོན་སྔོན་འགོག་གི་འདུ་ཤེས་ཟམ་མི་ཆད་པར་ཟབ་ཏུ་བཏང་བ་དང་། རྫོང་དེར་བཅའ་སྡོད་མེ་ཟོན་རུ་ཆེན་གདན་ཞུ་བྱས་ཏེ་ཡུལ་དམག་ལ་མེ་ཟོན་བདེ་འཇགས་ཐད་ཀྱི་རྩལ་ནུས་གསོ་སྦྱོང་བྱས་པ་རེད། གསོ་སྦྱོང་བྱེད་རིང་། ལྷུན་གྲུབ་རྫོང་མེ་གསོད་རུ་ཆེན་གྱི་ལས་དོན་པས་འཆད་ཁྲིད་བྱེད་པ་དང་། ས་གནས་ས་ཐོག་ཏུ་སྐོར་ལྟ་བྱེད་པ། ས་ཆ་དེ་རང་དུ་སློབ་ཁྲིད་བྱེད་པ། ཉམས་མྱོང་སྤེལ་རེས་བྱེད་པ་སོགས་ཀྱི་ཐོག་ནས་གསོ་སྦྱོང་ནང་ཞུགས་མཁན་ཡུལ་དམག་ཚོར་མེ་སྐྱོན་ཐོན་ཚུལ་དང་། དེའི་གནོད་འཚེ། མེ་ཤུགས་ཆེ་རུ་འགྲོ་བའི་རྒྱུ་རྐྱེན་སོགས་འབྲེལ་ཡོད་མེ་ཟོན་ཤེས་བྱ་གསལ་འགྲེལ་བྱས་པ་དང་། དུས་རྒྱུན་གྱི་མེ་གསོད་ཡོ་ཆས་ཀྱི་ནུས་པ་དང་། བཀོལ་སྤྱོད་བྱེད་སྟངས། དེ་བཞིན་མེ་སྐྱོན་ཐག་གཅོད་བྱེད་ཐབས་བཅས་ལ་གཅིག་གྱུར་དུ་དཔེ་སྟོན་བྱས་པ་མ་ཟད། ས་གནས་ས་ཐོག་ཏུ་ཡུལ་དམག་སྒྲིག་འཛུགས་བྱས་ཏེ་མེ་གསོད་ནང་སྦྱོང་ཡང་བྱས་པ་རེད།
རྩོམ་སྒྲིག་པ། བདེ་སྒྲོལ།
