ཟླ་2ཚེས་6ཉིན། ནག་ཆུ་གྲོང་ཁྱེར་ལྷ་རི་རྫོང་ནགས་ཚལ་སྤྱི་བདེ་ཅུས་ཀྱིས་ནགས་སྲུང་བས་ཐེར་འདོན་བྱས་པ་ལྟར། སྟོངས་ལ་ཉེ་བའི་རྩ་ཆེའི་རི་སྐྱེས་སྲོག་ཆགས་ཁྲིམས་འགལ་ངང་རྔོན་རྒྱབ་པའི་གྱོད་གཞི་ཞིག་རྩད་གཅོད་ཐུབ་ནས་དོགས་གཞི་ཡོད་པའི་མི་གཉིས་བཟུང་བ་མ་ཟད། རྔོན་རྒྱག་པའི་ལྕགས་སྐུད་ཀྱི་རྒྱ་རྙི་99ཞིབ་བཤེར་ཐུབ་ཡོད། འདྲི་རྩད་བྱས་པ་བརྒྱུད། དོགས་གཞི་ཡོད་པའི་མི་དེ་གཉིས་ཀྱིས་ད་དུང་ངན་རོགས་གཞན་ཞིག་རྩིས་སྤྲད་པ་རེད།
བརྟག་དཔྱད་བྱས་པ་བརྒྱུད། ཉེས་གསོག་དོགས་ཅན་གསུམ་པོ་ས་དེར་གླ་བ་གཟུང་བར་འོང་ནས་རང་ཉིད་ཀྱིས་བཟོས་པའི་ལྕགས་སྐུད་ཀྱི་རྒྱ་རྙི་རི་སྟེང་ལ་ཁྱེར་ཏེ་རྙི་རྒྱག་སྐབས་ནགས་སྲུང་བས་མཐོང་ནས་འཕྲལ་མར་ནགས་ཚལ་སྤྱི་བདེ་ལས་ཁུངས་ལ་སྙན་སེང་ཞུས་པ་རེད། མི་གསུམ་པོས་རང་ཉིད་ཀྱི་ནག་ཉེས་སྦ་གསང་མེད་པར་ངོས་ལེན་ཞུས་ཤིང་། ཟླ་3ཚེས་8ཉིན་ལྷ་རི་རྫོང་ནགས་ཚལ་སྤྱི་བདེ་ཅུས་ཀྱིས་སྟོངས་ལ་ཉེ་བའི་རྩ་ཆེའི་རི་སྐྱེས་སྲོག་ཆགས་ཁྲིམས་འགལ་ངང་རྔོན་རྒྱག་པ་དང་གསོད་པའི་དོགས་གཞི་ཡོད་པའི་ཐོག་ནས་རྫོང་མི་དམངས་ཞིབ་དཔྱོད་ཁང་ལ་ཁྲིམས་བཞིན་གཏུག་བཤེར་བྱས་པ་རེད།
ཟླ་4ཚེས་22ཉིན། ལྷ་རི་རྫོང་མི་དམངས་ཁྲིམས་ཁང་གིས་ཉེས་གསོག་དོགས་ཅན་གསུམ་པོས་སྟོངས་ལ་ཉེ་བའི་རྩ་ཆེའི་རི་སྐྱེས་སྲོག་ཆགས་ཁྲིམས་འགལ་ངང་རྔོན་རྒྱག་པ་དང་གསོད་པའི་ཉེས་པ་བསགས་པའི་མིང་ཐོག་ནས། མི་གསུམ་པོ་སོ་སོར་ཟླ་བ་གཅིག་རེའི་བཀག་ཉར་བྱ་རྒྱུ་དང་དངུལ་ཆད་སྒོར་1000གཅོད་རྒྱུའི་ཁྲུན་ཐག་བཅད་འདུག
