ཉིང་ཁྲི་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་ཞུ་སྦྱོར་ཕྱི་མ་དངོས་གྲུབ་ཀྱིས་ལྐོག་རྔན་བླངས་པ་དང་རྐང་བཙུགས་ནས་རྩིས་གཉེར་གྱི་སྤ་སེ་མེད་པར་བཟོས་པའི་གྱོད་གཞིའི་འདྲི་གཅོད་དང་པོའི་དཔྱད་ཁྲ་ཁྱབ་བསྒྲགས་བྱས་པ།
དངོས་གྲུབ། ཕོ། བོད་རིགས། 1986ལོའི་ཟླ་7པར་ལས་ཀར་ཞུགས། 1995ལོའི་ཟླ་7པར་ཀྲུང་གོ་གུང་ཁྲན་ཏང་ནང་ཞུགས། 1986ལོའི་ཟླ་7པ་ནས་2007ལོའི་ཟླ་10པ་བར་སྔ་རྗེས་སུ་ཀོང་པོ་རྒྱ་མདའ་རྫོང་ཞིང་འབྲོག་ཅུས་དང་། ཆུ་གློག་ཅུས། ཆུ་བེད་ཅུས། རྫོང་སྲིད་གཞུང་། ཉིང་ཁྲི་ས་ཁུལ་འཕེལ་སྒྱུར་ཨུ་ལྷན། ཆུ་བེད་ཅུས་བཅས་སུ་ལས་ཀ་བྱས། 2007ལོའི་ཟླ་10པར་ཉིང་ཁྲི་ས་ཁུལ་ཆུ་བེད་ཅུས་ཏང་ཙུའི་ཧྲུའུ་ཅི་གཞོན་པ་དང་ཅུས་ཀྲང་གི་འགན་འཁུར། 2015ལོའི་ཟླ་9པར་ཉིང་ཁྲི་གྲོང་ཁྱེར་ཆུ་བེད་ཅུས་ཏང་ཙུའུ་ཡི་ཧྲུའུ་ཅི་དང་ཅུས་ཀྲང་གི་འགན་འཁུར། 2018ལོའི་ཟླ་5པར་ཉིང་ཁྲི་གྲོང་ཁྱེར་མི་དམངས་འཐུས་ཚོགས་ནོར་སྲིད་དཔལ་འབྱོར་ཨུ་ལྷན་གྱི་ཀྲུའུ་རེན་ཨུ་ཡོན་གཞོན་པའི་འགན་འཁུར།
2019ལོའི་ཟླ་8ཚེས་16ཉིན་དངོས་གྲུབ་ལ་སྒྲིག་ཁྲིམས་ལས་ཚབས་ཆེན་འགལ་བའི་དོགས་པ་ཡོད་པས། སྒྲིག་ཁྲིམས་ཞིབ་བཤེར་དང་ལྟ་ཞིབ་བརྟག་དཔྱད་བྱེད་འགོ་ཚུགས། 2020ལོའི་ཟླ་1ཚེས་16ཉིན་དངོས་གྲུབ་ཀྱིས་ལས་གནས་ཀྱི་སྟབས་བདེ་སྤྱད་ནས་གཞན་ལ་ཁེ་ཕན་བསྒྲུབས་པ་དང་། ཁྲིམས་འགལ་ངང་གཞན་གྱི་རྒྱུ་དངོས་བླངས་པས། ལྐོག་རྔན་བླངས་པའི་ཉེས་པ་བསགས་པའི་དོགས་པ་ཡོད་སྟབས་ཏང་གི་སྐྱིད་སྡུག་དང་གཞུང་གི་ལས་གནས་ནས་ཕྱིར་འབུད་བྱས། ཟླ་1ཚེས་23ཉིན་ཉེས་གསོག་གི་དོགས་པ་ཡོད་པའི་གནད་དོན་ཞིབ་དཔྱོད་ལས་ཁུངས་སུ་ཁྲིམས་ལྟར་ཞིབ་བཤེར་དང་ཞུ་གཏུག་བྱེད་པར་བསྐྱལ་བ་རེད།
2020ལོའི་ཟླ་5ཚེས་11ཉིན་ཉིང་ཁྲི་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་དངོས་གྲུབ་ཀྱིས་ལྐོག་རྔན་བླངས་པ་དང་རྐང་བཙུགས་ནས་རྩིས་གཉེར་སྤ་སེ་མེད་པར་བཟོས་པའི་གྱོད་གཞིར་འདྲི་གཅོད་དང་པོའི་དཔྱད་ཁྲ་ཁྱབ་བསྒྲགས་བྱས། འདྲི་ཞིབ་བྱས་རྗེས་རྩད་ཆོད་པ་ལྟར་ན། 2008ལོ་ནས་2017ལོ་བར་ཞུ་སྦྱོར་ཕྱི་མ་དངོས་གྲུབ་ཀྱིས་ཉིང་ཁྲི་གྲོང་ཁྱེར་ཆུ་བེད་ཅུས་ཀྱི་ཏང་ཙུའི་ཧྲུའུ་ཅི་གཞོན་པ་དང་ཅུས་ཀྲང་གི་འགན་འཁུར་རིང་། ལས་གནས་ཀྱི་སྟབས་བདེ་སྤྱད་ནས་གཞན་ལ་ཆུ་བེད་ལས་གྲྭ་འགན་གཙང་ལེན་རོགས་བྱས་ཏེ་ཁེ་ཕན་རག་ཐབས་བྱས་པ་དང་། ཁྲིམས་འགལ་ངང་མངགས་བཅོལ་བྱེད་མཁན་གྱི་ས་ནས་ལྐོག་རྔན་མི་དམངས་ཤོག་སྒོར་ཁྲི་769.4782བླངས་ནས་རང་གི་རྒྱུན་གཏན་གྱི་འགྲོ་སོང་གཏོང་བྱེད་དང་ཁང་པ་ཉོ་བ་སོགས་བྱས། 2011ལོ་ནས་2014ལོ་བར་ཉིང་ཁྲི་གྲོང་ཁྱེར་ཆུ་བེད་ཅུས་ཀྱིས་ལས་གྲྭའི་རྣམ་གྲངས་ཀྱི་མ་དངུལ་འཐེན་འཕྲི་དང་ཁང་གླ་བཙན་ཉར་སོགས་ཀྱི་ཐབས་ལ་བརྟེན་ནས“དངུལ་སྦས་ཁུངས”བཙུགས། 2015ལོའི་ལོ་འགོར་ཞུ་སྦྱོར་ཕྱི་མ་དངོས་གྲུབ་ཀྱིས་རང་ཉིད་ཀྱི་སྒྲིག་འགལ་བྱེད་སྤྱོད་ཛོར་དོགས་དང་ཞིབ་བཤེར་ལས་གཡོལ་ཆེད། རྐང་བཙུགས་ནས་ཉིང་ཁྲི་གྲོང་ཁྱེར་ཆུ་བེད་ཅུས་ཀྱི“དངུལ་སྦས་ཁུངས”ཀྱི་རྩིས་གཉེར་སྤ་སེ་དང་གཏོང་ཡོང་རྩིས་ཐོ་མེད་པར་བཟོས་པ་དང་། མེད་པར་བཟོས་པའི་རྩིས་གཉེར་སྤ་སེའི་ཐོག་དངུལ་གྲངས་སྒོར་ཁྲི་139.5ཙམ་ཟིན་གྱི་ཡོད་པ་རེད།
ཉིང་ཁྲི་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་འདྲི་ཞིབ་བྱས་རྗེས། ཞུ་སྦྱོར་ཕྱི་མ་དངོས་གྲུབ་རྒྱལ་ཁབ་ཀྱི་ལས་དོན་མི་སྣ་ཡིན་ཡང་། ལས་གནས་ཀྱི་སྟབས་བདེ་སྤྱད་དེ་གཞན་ལ་ཁེ་ཕན་སྒྲུབ་རོགས་དང་། མངགས་བཅོལ་བྱེད་མཁན་གྱི་ས་ནས་ཁྲིམས་འགལ་ངང་ལྐོག་རྔན་བླངས་པ་མ་ཟད། དངུལ་གྱི་གྲངས་འབོར་ཆེ་བས། བྱེད་སྤྱོད་དེ་དག་ལྐོག་རྔན་བླངས་པའི་ཉེས་པ་བསགས་པའི་ཁོངས་སུ་གཏོགས་ཡོད། ཞུ་སྦྱོར་ཕྱི་མ་དངོས་གྲུབ་ཀྱིས་ཁྲིམས་བཞིན་ཉར་ཚགས་བྱེད་དགོས་པའི་རྩིས་གཉེར་སྤ་སེ་རྐང་བཙུགས་ནས་མེད་པར་བཟོས་པའི་གནས་ཚུལ་ཧ་ཅང་ཚབས་ལྕི་བས། བྱེད་སྤྱོད་དེ་རྐང་བཙུགས་ནས་རྩིས་གཉེར་གྱི་སྤ་སེ་མེད་པར་བཟོས་པའི་ནག་ཉེས་ཀྱི་ཁོངས་སུ་གཏོགས་པའི་ངོས་འཛིན་བྱས། ཞུ་སྦྱོར་ཕྱི་མ་དངོས་གྲུབ་ཀྱི་ཉེས་གསོག་གནས་ཚུལ་དང་། ནག་ཉེས་ངོས་ལེན་གྱི་རྣམ་འགྱུར། སྤྱི་ཚོགས་ལ་བཟོས་པའི་གནོད་འཚེ་ཆེ་ཆུང་བཅས་ལ་གཞིགས་ཏེ་ཉེས་མང་བསྡོམས་གཅོད་བྱས་རྗེས་དུས་བཀག་བཙོན་འཇུག་ལོ་བཅུ་གཉིས་དང་ཟླ་བ་གཉིས་བྱ་རྒྱུ་མ་ཟད། དངུལ་ཆད་མི་དམངས་ཤོག་སྒོར་ཁྲི་123གཏོང་རྒྱུའི་ཆད་པ་བཅད་པ་རེད།
