རང་རྒྱལ་གྱི་ཞིང་པ་ལས་མིའི་གླ་ཆའི་ཁེ་དབང་འགན་སྲུང་བྱེད་པའི་ཆེད་དོན་ཁྲིམས་སྲོལ་ཨང་དང་པོ་བཀྲམས་པ་དང་། ཟླ་༥ཚེས་༡ཉིན་ནས་བཟུང་དངོས་སུ་ལག་བསྟར་བྱས་པ་རེད། སྲོལ་ཡིག་ལག་བསྟར་བྱས་པས་བོད་ལྗོངས་ཀྱིས་ཕྱོགས་ཡོངས་ནས་ཁྲིམས་ལྟར་གླ་ཆ་ཆད་འགྱངས་བྱས་པའི་གནད་དོན་བཅོས་སྐྱོང་བྱེད་པར་དོན་སྙིང་གལ་ཆེན་ཐོན་ཡོད།
གླ་ཆ་སྤྲོད་པར་འགན་སྲུང་བྱེད་པའི་སྲོལ་ཡིག་ཁྲོད་སྔར་ལས་ལྷག་པའི་སྒོ་ནས་མིང་ཐོ་ནག་པོའི་ལམ་ལུགས་འཛུགས་རྒྱུ་དང་། འཐུས་ཚང་བཟོ་རྒྱུའི་སྐོར་གཏན་འབེབས་གསལ་བོ་བྱས་འདུག དོན་མེད་དུ་ཞིང་པ་ལས་མིའི་གླ་ཆ་ཆད་འགྱངས་དང་། དངུལ་གྲངས་ཚད་གཞི་ངེས་ཅན་ཞིག་ཏུ་བསླེབས་ཀྱང་གླ་ཆ་མི་སྤྲོད་པའི་ཉེས་ཁྲིམས་འགལ་བའི་རིགས་དང་། ཞིང་པ་ལས་མིའི་གླ་ཆ་མ་སྤྲད་པར་མང་ཚོགས་རང་བཞིན་གྱི་དོན་རྐྱེན་དང་ཐལ་དྲགས་དོན་རྐྱེན་བྱུང་སྟེ། སྤྱི་ཚོགས་སྟེང་ཤུགས་རྐྱེན་ངན་པ་ཐེབས་ཚེ། གླ་ཆ་ཆད་འགྱངས་བྱས་པའི་མིང་ཐོ་ནག་པོའི་ནང་འཇོག་རྒྱུ་རེད།
