ཟླ་5ཚེས་7ཉིན་གྱི་དགོང་མོ་ནས་ཚེས་8ཉིན་གྱི་ཐོ་རེངས་བར། ཧོང་ཕུའུ་འགག་སྒོའི་ལྐོག་འདྲེན་འཛིན་བཟུང་ཅུས་དང་ཀོང་ཏུང་ཞིང་ཆེན་ཏུང་ཀོན་གྲོང་ཁྱེར་སྤྱི་བདེ་ཅུས་ཀྱིས་མཉམ་འབྲེལ་ཐོག་མིང་རྟགས་ལ་“10.28”འབོད་པའི་འཁྱག་ཤའི་ནག་ཚོང་ལ་རྡུང་རྡེག་གཏོང་བའི་ཆེད་དོན་བྱེད་སྒོ་སྤེལ་ཞིང་། བྱེད་སྒོའི་ཁྲོད་སྒོར་དུང་ཕྱུར་10ཙམ་ཟིན་པའི་འཁྱག་ཤ་ནག་ཚོང་གྱོད་གཞི་ཆེན་པོ་ཞིག་རྩད་ཆོད་ཡོད།
ཧོང་ཕུའུ་འགག་སྒོའི་ལྐོག་འདྲེན་འཛིན་བཟུང་ཅུས་དང་ཏུང་ཀོན་གྲོང་ཁྱེར་སྤྱི་བདེ་ཅུས་ཀྱིས་ལོ་ཕྱེད་ལྷག་ཙམ་རིང་མཉམ་འབྲེལ་བྱས་པ་བརྒྱུད། ཙེང་ཆེ་གེ་མོས་གཙོ་བྱས་པའི་འཁྱག་ཤ་ནག་ཚོང་གི་ཉེས་གསོག་ཚོགས་པ་དང་ནག་ཚོང་བྱེད་སྟངས་རིམ་བཞིན་ཁོང་དུ་ཆུད་པ་དང་། ཟླ་5ཚེས་7ཉིན་གྱི་དགོང་མོར། ཧོང་ཕུའུ་འགག་སྒོའི་ལྐོག་འདྲེན་འཛིན་བཟུང་ཅུས་དང་ཏུང་ཀོན་གྲོང་ཁྱེར་སྤྱི་བདེ་ཅུས་ཀྱིས་ཁྱོན་ཉེན་རྟོག་པ་458ཚོགས་ཆུང་62སུ་བགོས་ཏེ། ཀོང་ཏུང་ཀོང་ཀྲོའུ་དང་། ཏུང་ཀོན། ཧྲན་ཐོའུ། ཧྲེན་ཀྲེན། ཀོང་ཤིས་ཀུའེ་ལིན་སོགས་སུ་འཛིན་བཟུང་དང་སྔོག་བཤེར་གྱི་བྱ་སྤྱོད་སྤེལ་ནས་ཉེས་གསོག་དོགས་ཅན་36བཟུང་བ་དང་། གྱོད་འབྲེལ་ཚགས་ཤ་དང་། བྱ་དེའི་སྡེར་མོ། ཕག་གྲོད་བཅས་འཁྱག་ཤ་ཏུན་4592རྩད་ཆོད་པ་མ་ཟད། གྱོད་འབྲེལ་དཔང་འཛིན་དང་གློག་རྡུལ་དཔང་རྟགས་ཁག་གཅིག་ཀྱང་རྩད་ཆོད་པ་དང་ནག་ཚོང་ཉེས་གསོག་ཚོགས་པ་ཆེན་པོ་དེ་མེད་པར་བཟོས་ཡོད།
ཤེས་རྟོགས་བྱུང་བ་ལྟར་ན། 2019ལོ་ནས་བཟུང་ཙེང་ཆེ་གེ་མོས་ཏུང་ཀོན་གྱི་ལང་ཆེ་གེ་མོའི་ཀུང་སིར་ཚོད་འཛིན་བྱས་ཏེ་ས་ཁོངས་ཕྱི་རོལ་ནས་འཁྱག་ཤ་མངགས་ཉོ་སོགས་བྱས་ཏེ་ཤང་ཀང་དུ་དབོར་རྗེས་ཙེང་ཆེ་གེ་མོ་སོགས་ཀྱིས་འཁྱག་ཤ་ཏུང་ཀོན་ཀྲུང་ཐང་དང་ཀོང་ཀྲོའུ་ནན་ཧྲ་སོགས་གྲུ་ཁ་ནས་མཚོ་འགྲམ་དུ་དབོར་ཏེ་ཏུང་ཀོན་ཏ་ལིན་རི་བོ་དང་ཧྥེང་ཀང་སོགས་ས་ཆའི་འཁྱག་མཛོད་དུ་དབོར་ནས་སླར་ཡང་ཕྱིར་ཚོང་བྱས་ཏེ་ཁེ་བཟང་རག་ཐབས་བྱས།
ཧོང་ཕུའུ་འགག་སྒོའི་ལྐོག་འདྲེན་འཛིན་བཟུང་མི་སྣས་གྱོད་གཞི་སྒྲུབ་སྐབས་ཚོགས་པ་དེས་ཁྲིམས་འགལ་འཁྱག་མཛོད་ཁང་མང་པོ་སྤྱད་དེ་ཁྲིམས་འགལ་ངང་ནང་འདྲེན་བྱས་པའི་འཁྱག་ཤ་དེ་དག་ཉར་ཚགས་བྱས་པ་ཤེས་རྟོགས་བྱུང་བ་དང་། ཁྲིམས་འགལ་གྱི་འཁྱག་མཛོད་དུ་ཕྱི་རྒྱལ་གྱི་ཕྱི་ཐུམ་ཅན་གྱི་འཁྱག་ཤ་མང་པོ་སྤུངས་ཡོད་པ་དང་། ཚང་མར་ཁྲིམས་མཐུན་གྱི་ནང་འདྲེན་འཛིན་ཤོག་དང་ཞིབ་བཤེར་དང་ནད་ཡམས་བརྟག་ཞིབ་ཀྱི་དཔང་ཡིག་མེད་པ་རེད། འཁྱག་ཤ་དེ་དག་གི་ཡོང་ཁུངས་མི་གསལ་ཞིང་ནད་ཡམས་ཞིབ་བཤེར་སོགས་བྱས་མེད་པ་མ་ཟད། སྐྱེལ་འདྲེན་བརྒྱུད་རིམ་ནང་གྲང་ཉར་ཆ་རྐྱེན་བརྟན་པོ་མེད་པས་ནད་སྲིན་གྱི་སྦགས་བཙོག་དང་རུལ་སུངས་སུ་འགྱུར་སླ་བ་དང་བཟའ་བཅའི་བདེ་འཇགས་ཀྱི་ཉེན་ཁ་ཆེ་ཙམ་ཡོད་པས་རྒྱལ་ནང་ཁྲོམ་རར་འབྱོར་ཚེ་འཛད་སྤྱོད་པའི་གཟུགས་གཞིའི་བདེ་ཐང་ལ་ཉེན་ཁ་ཚབས་ཆེན་བཟོ་བ་དང་རྒྱལ་ནང་གི་ཁྲོམ་རའི་སྒྲིག་ལམ་ལའང་ཤུགས་རྐྱེན་ངན་པ་བཟོ་སྲིད།
མིག་སྔར་གྱོད་གཞི་དེ་གོམ་གང་མདུན་སྤོས་མྱུལ་ཞིབ་བྱེད་བཞིན་ཡོད།
