གསར་འགོད་པས་ཚེས་༨ཉིན་མངའ་རིས་ས་ཁུལ་ཉེན་རྟོག་ཕྱོགས་ནས་ཤེས་རྟོགས་བྱུང་བར་གཞིགས་ན། ས་དེའི་ཉེན་རྟོག་པས་རི་སྐྱེས་སྲོག་ཆགས་ཐོན་ཁུངས་ལ་གཏོར་བརླག་བཏང་བའི་གྱོད་གཞི་ཞིག་རྩད་ཆོད་པ་དང་། དོགས་ཡོད་ཉེས་ཅན་མི་༨འཛིན་བཟུང་བྱས་པར་མ་ཟད། རི་དྭགས་གཙོད་ཀྱི་པགས་པ་༤༣དང་པགས་པ་ཧྲུལ་པོ་༤༦ལག་ཏུ་ཐེབས་པ་རེད།
༢༠༢༠ལོའི་ཟླ་༣ཚེས་༡༢ཉིན་གྱི་ཕྱི་དྲོའི་ཆུ་ཚོད་༦ཡས་མས་སུ། མངའ་རིས་ས་ཁུལ་སྒེར་རྩེ་རྫོང་སྤྱི་བདེ་ཅུད་ལ་ཡར་ཞུ་བྱས་དོན། སྒེར་རྩེ་རྫོང་བྲག་པོ་ཤང་རྩ་མི་རིང་གྲོང་ཚོ་དང་སྡེངས་སྒོ་གྲོང་ཚོ་གཉིས་ཀྱི་འབྲེལ་མཚམས་སུ་པགས་པ་བཤུས་པའི་གཙོད་ཀྱི་ཤི་རོ་ཡོད་པ་མཐོང་པས་སྤྱི་བདེ་ཅུས་ནས་ཞིབ་བཤེར་བྱ་རོགས་ཞུས་པ་རེད།
པར་འདི་ནི་སྒེར་རྩེ་ཉེན་རྟོག་པས་དོགས་ཡོད་ཉེས་ཅན་འཛིན་བཟུང་བྱས་ཤིང་པགས་པ་སོགས་གཞུང་བཞེས་བྱས་ཚུལ་རེད། པར་སྒེར་རྩེ་རྫོང་སྤྱི་བདེ་ཅུད་ཀྱིས་མཁོན་འདོན་བྱས།
ཉེན་བརྡ་འབྱོར་རྗེས། སྒེར་རྩེ་རྫོང་སྤྱི་བདེ་ཅུད་ཀྱིས་འཕྲལ་མར་ཉེན་རྟོག་པ་སྒྲིག་འཛུགས་བྱས་ཏེ་ས་ཡུལ་དངོས་སུ་བསྐྱོད་དེ་ཞིབ་བཤེར་སོགས་ལས་དོན་བསྒྲུབས་པ་རེད།
གྱོད་གཞི་བྱུང་ཡུལ་དུ་ཉེན་རྟོག་ཕྱོགས་ཀྱིས་དོགས་ཡོད་ཉེས་ཅན་གྱིས་གཡུག་པའི་ལག་ཆ་དང་སྦག་སྦག་འཁོར་ལོ་སོགས་ལས་རྔུལ་ཆུ་བླངས་ཏེ་དོགས་ཡོད་ཉེས་ཅན་གྱི་DNAབཙལ་བ་དང་། དེའི་རྗེས་བྲག་པོ་ཤང་མཐའ་སྐོར་གྱི་གྲོང་ཚོ་ལ་ཞིབ་བཤེར་བྱས་པ་རེད།
ཤེས་རྟོགས་བྱུང་པར་གཞིགས་ན། དོགས་ཡོད་ཉེས་ཅན་ལ་འདྲི་གཅོད་བྱས་པ་བརྒྱུད། སྒེར་རྩེ་རྫོང་སྤྱི་བདེ་ཅུད་ཀྱིས་ཉེན་རྟོག་པ་སྒྲིག་འཛུགས་བྱས་ཏེ་ཝང་ཆེ་གེ་མོ་སོགས་དོགས་ཡོད་ཉེས་ཅན་མི་༨ཚང་མ་འཛིན་བཟུང་བྱས་པ་དང་། གྱོད་དོན་བཟོ་མཁན་ཚང་མ་སྒེར་རྩེ་རྫོང་གི་མི་ཡིན་ལ། དེ་མིན་གཙོད་པགས་༤༣དང་གཙོད་པགས་ཧྲུལ་པོ་༤༦ཁྲིམས་ལྟར་གཞུང་བཞེས་བྱས་པར་མ་ཟད། གྱོད་དོན་སྒྲུབ་བྱེད་ཀྱི་རླངས་འཁོར་༡དང་། སྦག་སྦག་འཁོར་ལོ་༢། མཚོན་ཆ་༢བཅས་ཀྱང་བཙན་ཉར་བྱས་པ་རེད། གཞན་ད་དུང་ཤེས་རྟོགས་བྱུང་བ་ལྟར་ན། གྱོད་གཞི་དང་འབྲེལ་བ་ཡོད་པའི་དོགས་ཡོད་ཉེས་ཅན་མི་༨ཟླ་༥ཚེས་༣ཉིན་སྒེར་རྩེ་རྫོང་མི་དམངས་ཞིབ་བཤེར་ཁང་གིས་འཛིན་བཟུང་བྱས་པ་རེད།
པར་འདི་ནི་སྒེར་རྩེ་རྫོང་ཉེན་རྟོག་ཕྱོགས་ཀྱིས་གྱོད་དོན་ཡུལ་དངོས་ནས་རྙེད་པའི་བདེན་དཔང་རེད། པར་སྒེར་རྩེ་རྫོང་སྤྱི་བདེ་ཅུད་ཀྱིས་མཁོ་འདོན་བྱས།
