མདུན་ཤོག > ཁྲིམས་ལུགས། > གྱོད་ལྟར་ཁྲིམས་གླེང་།

གཞིས་རྩེ་ནས་རྐུན་མ་ལང་ཤོར་ཞིག་བཟུང་འདུག

2020-04-28
          ཉེ་ཆར། གཞིས་རྩེ་གྲོང་ཁྱེར་འབྲོང་པ་རྫོང་སྤྱི་བདེ་ཅུས་ཀྱིས་མྱུལ་ཞིབ་ནན་ཏན་བྱས་པ་བརྒྱུད། རྐུ་མ་བརྐུས་པའི་མུ་འབྲེལ་གྱོད་གཞི་ཞིག་རྩད་ཆོད་དེ་ཉེས་གསོག་དོགས་ཅན་གཅིག་བཟུང་ནས་བཙོག་དངུལ་སྒོར་6584དང་ལག་ཐོགས་ཁ་པར་1ཚུར་བླངས་པ་རེད། 
          2019ལོའི་ཟླ་12ཚེས་15ཉིན། འབྲོང་པ་རྫོང་སྤྱི་བདེ་ཅུས་ཉེས་དོན་མྱུལ་ཞིབ་རུ་ཆེན་ལ་ལུང་དཀར་ཤང་གི་མང་ཚོགས་མགོན་ཆེ་གེ་མོའི་གྱོད་དོན་སྙན་སེང་འབྱོར་ནས“མདང་ནུབ་ཐོ་རེངས་མི་ཞིག་གིས་ང་ཚོའི་སྒོ་རྩིས་ཚོང་ཁང་གི་སྒོ་ལྕགས་བཅག་སྟེ་ལག་ཐོགས་ཁ་པར་3དང་དངུལ་སྨར་སྒོར་4000ལྷག་ཙམ་བརྐུས་འདུག་པས་བརྟག་དཔྱད་བྱེད་རོགས”ཞེས་ཞུས 
          གྱོད་དོན་སྙན་སེང་འབྱོར་རྗེས། ཉེས་དོན་མྱུལ་ཞིབ་རུ་ཆེན་གྱིས་དེ་མུར་ཉེན་རྟོག་པ་ཧྲག་སྒྲིག་བྱས་ཏེ་ས་གནས་ས་ཐོག་ཏུ་བརྟག་དཔྱད་དཔང་ལེན་གྱི་ལས་དོན་སྤེལ་བ་རེད། གྱོད་གཞི་ཐོན་ཡུལ་གྱི་མཐའ་འཁོར་དུ་གློག་མིག་མེད་པའི་ཁར་དོ་བདག་གིས་རྐུ་མ་ཤོར་ཡུལ་སྲུང་མེད་སྟབས། མྱུལ་ཞིབ་མི་དམངས་ཉེན་རྟོག་པར་དཔང་རྟགས་ནུས་ལྡན་རག་མེད་པས་གྱོད་གཞི་མྱུལ་ཞིབ་ལ་འགོག་རྐྱེན་ཆེན་པོ་ཕྲད། འདི་ལོའི་ཟླ་2ཚེས་28ཉིན། ཉེས་དོན་མྱུལ་ཞིབ་རུ་ཆེན་ལ་སླར་ཡང་ལུང་དཀར་ཤང་གི་མང་ཚོགས་ཟླ་ཆེ་གེ་མོའི་གྱོད་དོན་སྙན་སེང་འབྱོར་ནས“ང་ཚོའི་ནང་གི་བཙན་སྒམ་མི་གཞན་གྱིས་ཁ་ཕྱེ་ནས་དངུལ་སྨར་སྒོར་9000བརྐུས་འདུག་པས་བརྟག་དཔྱད་བྱེད་རོགས”ཞེས་ཞུས། ཉེས་དོན་མྱུལ་ཞིབ་རུ་ཆེན་གྱིས་དེ་མུར་རྐུ་མ་ཤོར་ཡུལ་དུ་བརྟག་དཔྱད་དཔང་ལེན་བྱེད་པར་འགྲོ་སྐབས་རྐུ་མ་ཤོར་ཡུལ་དུ་རྐུ་མ་རྐུ་སྟངས་2019ལོའི་ཟླ་12པར་ལུང་དཀར་ཤང་གི་མགོན་ཆེ་གེ་མོའི་སྒོ་རྩིས་ཚོང་ཁང་དུ་རྐུ་མ་ཤོར་བའི་གྱོད་གཞི་དང་འདྲ་པོ་ཡོད་སྟབས་རྐུན་པོ་མི་གཅིག་ཡིན་སྲིད་པ་ཤེས། མི་དམངས་ཉེན་རྟོག་པས་དེ་མུར་ཁུངས་སྣེ་དེ་གོང་རིམ་འགོ་ཁྲིད་ལ་སྙན་སེང་ཞུས་པས་འགོ་ཁྲིད་ཀྱིས་དེར་མཐོང་ཆེན་པོ་བྱས་ཏེ“ངེས་པར་དུ་གྱོད་གཞི་དེ་མགྱོགས་མྱུར་རྩད་ཆོད་བྱས་ནས་རྐུ་མ་ཤོར་བའི་རྒྱུ་ནོར་ཚུར་བླངས་ནས་སླར་ཡང་རྐུ་མ་མི་ཤོར་བ་བྱེད་དགོས་པའི”མཆན་འགོད་མཛུབ་སྟོན་བྱས་པ་རེད། 
          དུས་འགོར་བརྟག་དཔྱད་དཔང་ལེན་བྱས་པ་དང་ཉེས་དོན་ལག་རྩལ་བྱེད་ཐབས་སོགས་བརྒྱུད། ཕྱོགས་མང་པོའི་ཐད་ནས་དཔང་རྟགས་བླངས་པས། མི་དམངས་ཉེན་རྟོག་པས་ཉེས་གསོག་དོགས་ཅན་ཀུན་ཆེ་གེ་མོས་གྱོད་གཞི་བཟོས་པའི་དོགས་པ་ཚབས་ཆེན་ཡོད་པ་གཏན་འཁེལ་རགས་ཙམ་བྱས། འདི་ལོའི་ཟླ་4ཚེས་12ཉིན་གྱི་སྔ་དྲོའི་ཆུ་ཚོད་6པ་ཙམ་ལ་ཉེས་གསོག་དོགས་ཅན་ཀུན་ཆེ་གེ་མོ་མངའ་རིས་ས་ཁུལ་སྒེར་རྩེ་རྫོང་གི་སྣེ་ལེན་ཁང་ཞིག་ནས་བཟུང་། 
          འདྲི་རྩད་བྱས་པ་བརྒྱུད། ཉེས་གསོག་དོགས་ཅན་ཀུན་ཆེ་གེ་མོས་གོང་གསལ་གྱི་རྐུ་མ་བརྐུས་པའི་གྱོད་གཞི་གཉིས་པོའི་དོན་དངོས་ཁས་བླངས་པ་དང་དུས་མཚུངས་མི་དམངས་ཉེན་རྟོག་པས་སློབ་གསོ་བརྒྱབ་པ་བརྒྱུད། ཁང་པར་འཛུལ་ནས་རྐུ་མ་བརྐུས་པའི་གྱོད་གཞི་གཞན་དག་གཉིས་ཀྱི་ཉེས་གསོག་དོན་དངོས་ཀྱང་ཁས་བླངས་པ་རེད། མིག་སྔར《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་དོན་གཏུག་བཤེར་བཅའ་ཁྲིམས》དོན་ཚན་གྱ་གཉིས་པའི་གཏན་འབེབས་གཞིར་བཟུང། ཉེས་གསོག་དོགས་ཅན་ཀུན་ཆེ་གེ་མོ་འབྲོང་པ་རྫོང་སྤྱི་བདེ་ཅུས་ཀྱིས་ཁྲིམས་ལྟར་ཉེས་དོན་བཀག་ཉར་བྱས་པ་དང་གྱོད་གཞི་དེར་ཞིབ་གཅོད་ནན་ཏན་བྱེད་བཞིན་ཡོད་པ་རེད།