མདུན་ཤོག > ཁྲིམས་ལུགས། > བཅའ་ཁྲིམས་རྒྱུན་ཤེས།

ནར་མ་སོན་པའི་བྱིས་པས་ལུས་ཐོག་ཏུ་རི་མོ་གཙགས་མི་ཆོག

2022-06-16

           དམངས་སྲིད་པུའུ་ཡི་དྲ་ཚིགས་ཐོག་གནས་ཚུལ་སྤེལ་བར་གཞིགས་ན། ཟླ6པའི་ཚེས10ཉིན་དམངས་སྲིད་པུའུ་བྱིས་པའི་ཕན་བདེ་སི་ཡིས《ནར་མ་སོན་པའི་བྱིས་པས་ལུས་ཐོག་ཏུ་རི་མོ་གཙགས་པ་བཅོས་སྐྱོང་བྱེད་པའི་ལས་ཀའི་བྱ་ཐབས》སྐོར་གྱི་དྲ་དམངས་ཀྱི་དོགས་གཞིར་ལན་བཏབ་པ་དང་། ཕ་མས་མོས་མཐུན་བྱུང་ཡང་ལུས་ཐོག་ཏུ་རི་མོ་གཙགས་པའི་ཞབས་ཞུ་མཁོ་འདོན་བྱེད་མི་ཆོག་ལ། ཕ་མས་གཉེར་བའི་ལུས་ཐོག་ཏུ་རི་མོ་གཙགས་པའི་ཚོང་ཁང་ཡིན་རུང་རང་ཉིད་ཀྱི་བྱིས་པའི་ལུས་ཐོག་ཏུ་རི་མོ་གཙགས་མི་ཆོག་པ་གཏན་འབེབས་ཁ་གསལ་བྱས་ཡོད།
           ཟླ6པའི་ཚེས7ཉིན་དྲ་གྲོགས་ཀྱིས་དམངས་སྲིད་པུའུ་ཡི་དྲ་ཚིགས་ཐོག་སྐད་བཞག་ནས་བརྗོད་དོན། འབྲེལ་ཡོད་ཀྱི་དཔྱད་ཡིག་འཚོལ་བཤེར་བྱས་རྗེས། ཕལ་ཆེར་འདིའི་ཡར་སྔོན་ལ་ནར་མ་སོན་པའི་བྱིས་པས་ལུས་ཐོག་ཏུ་རི་མོ་གཙགས་པའི་བྱ་སྤྱོད་ལ་གཏན་འབེབས་གསལ་པོ་མེད་པའམ་ཡང་ན་ལྡོག་ཕྱོགས་ཀྱི་ངོས་འཛིན་བྱེད་པ་རེད། འོན་ཀྱང་ཉེ་ཆར་གསར་དུ་བཏོན་མ་ཐག་པའི《ནར་མ་སོན་པའི་བྱིས་པས་ལུས་ཐོག་ཏུ་རི་མོ་གཙགས་པ་བཅོས་སྐྱོང་བྱེད་པའི་ལས་ཀའི་བྱ་ཐབས》(གཤམ་དུ“བྱ་ཐབས”ཞེས་བསྡུ་རྒྱུ།)ནང་ནར་མ་སོན་པའི་བྱིས་པར་ལུས་ཐོག་ཏུ་རི་མོ་གཙགས་པའི་ཞབས་ཞུ་མཁོ་འདོན་བྱེད་མི་ཆོག་པའི་གཏན་འབེབས་གསལ་པོ་བྱས་ཡོད། ད་ཐེངས་ཀྱི་ཡིག་ཆར་དམིགས་ཏེ། ང་ལ་དོགས་གཞི་འགའ་ཡོད་པ་སྟེ། དང་པོ། ལུས་ཐོག་ཏུ་རི་མོ་གཙགས་པའི་བྱ་སྤྱོད་ཐད་ནར་མ་སོན་པའི་བྱིས་པའི་རང་ངོས་ཀྱི་མོས་འདུན་ལ་བསམ་བློ་གཏན་ནས་མི་གཏོང་བ་ཡིན་ནམ། གཉིས་པ། ཕ་མའི་ཆོག་མཆན་ཐོབ་རྗེས་ནར་མ་སོན་པའི་བྱིས་པས་རང་གི་ལུས་ཐོག་དུ་རི་མོ་གཙགས་རྒྱུའི་རེ་བ་བཏོན་ན་ཁས་ལེན་བྱའམ། ཡང་ན་ཕ་མ་གཉིས་པོས་ལུས་ཐོག་ཏུ་རི་མོ་གཙགས་པའི་ཚོང་ཁང་གཉེར་ཡོད་པ་ཡིན་ན་ཡང་རང་ཉིད་ཀྱི་ནར་མ་སོན་པའི་བུ་དང་བུ་མོའི་ལུས་ཐོག་ཏུ་རི་མོ་གཙགས་ན་འགྲིག་གམ། གསུམ་པ། ནར་མ་སོན་པའི་བྱིས་པའི་ཁེ་དབང་ལ་བཙན་གནོད་ཐེབས་མིན་ར་སྤྲོད་བྱ་ཐབས་མེད་ན། ལུས་ཐོག་ཏུ་རི་མོ་གཙགས་པའི་ཞབས་ཞུ་མཁོ་འདོན་བྱེད་མཁན་གྱི་འགན་འཁྲི་བདའ་འདེད་བྱེད་དགོས་སམ།
           ཟླ6པའི་ཚེས10ཉིན་དམངས་སྲིད་པུའུ་བྱིས་པའི་ཕན་བདེ་སི་ཡིས་ལན་བཏབ་དོན། ནར་མ་སོན་པའི་བྱིས་པ་ནི་དམངས་དོན་བྱ་སྤྱོད་སྤེལ་ནུས་མེད་པའམ་ཡང་ན་དམངས་དོན་བྱ་སྤྱོད་སྤེལ་ནུས་ལ་ཚོད་འཛིན་ཐེབས་པའི་མི་ཚོགས་ཡིན་པས། ལུས་ཐོག་ཏུ་རི་མོ་གཙགས་པ་དེ་ནར་མ་སོན་པའི་བྱིས་པའི་གོ་རྟོགས་དང་རིགས་ཤེས་ཀྱི་ཐག་གཅོད་ནུས་པ་ལས་བརྒལ་ཡོད་སྟབས། དམིགས་བསལ་དུ་སྲུང་སྐྱོང་བྱེད་པ་དང་ཐོག་མར་སྲུང་སྐྱོང་བྱེད་དགོས་པ་རེད། 《ནར་མ་སོན་པའི་བྱིས་པར་སྲུང་སྐྱོང་བྱེད་པའི་བཅའ་ཁྲིམས》ཀྱི་དོན་ཚན17པར་གཏན་འབེབས་བྱས་པ་ལྟར་ན། ཕ་མའམ་ཡང་ན་བདག་སྐྱོང་བྱེད་མཁན་གཞན་དག་གིས་ནར་མ་སོན་པའི་བྱིས་པའི་ལུས་སེམས་བདེ་ཐང་གི་བྱ་སྤྱོད་ལ་གནོད་འཚེ་གཏོང་མི་ཆོག གལ་སྲིད་ཕ་མས་མོས་མཐུན་བྱུང་རུང་ལུས་ཐོག་ཏུ་རི་མོ་གཙགས་པའི་ཞབས་ཞུ་མཁོ་འདོན་བྱེད་མི་ཆོག་ལ། ཕ་མ་རང་ཉིད་ཀྱིས་གཉེར་བའི་ལུས་ཐོག་ཏུ་རི་མོ་གཙགས་པའི་ཚོང་ཁང་དུའང་རང་ཉིད་ཀྱི་བྱིས་པའི་ལུས་ཐོག་ཏུ་རི་མོ་གཙགས་མི་ཆོག་པ་རེད། ལུས་ཐོག་ཏུ་རི་མོ་གཙགས་པའི་ཞབས་ཞུ་མཁོ་འདོན་བྱེད་མཁན་ལ་འགན་འཁྲི་བདའ་འདེད་གཏོང་བ་དང་། གྱོད་དོན་མི་འདྲ་བར་གཞིགས་ནས་འབྲེལ་ཡོད་ཀྱི་བྱ་ཐབས་དང་གོ་རིམ་ལྟར་བསྒྲུབ་དགོས།