ཐར་མེད་བཙོན་རར་ཆུད་པའི་མ་རྒན་རྣམས།།བྱམས་བརྩེའི་སྐྱོ་ངལ་ནམ་ཡང་མི་སྐྱོ་བའི།། རྒྱལ་དང་རྒྱལ་བའི་ངོ་བོ་ཇི་སྙེད་ཀྱི།།ཐུགས་རྗེའི་མངའ་བདག་དྲིན་ཆེན་བླ་མར་འདུད།། ཐམས་ཅད་མཁྱེན་པའི་གོ་འཕང་བསྒྲུབ་པ་ལ།། ལམ་གནད་མ་ལུས་བསྡུས་ན་ངེས་འབྱུང་དང༌།། བྱང་ཆུབ་སེམས་གཉིས་དག་ལ་འདུས་པའི་ཕྱིར།།དེ་ཡང་ཐེག་པ་མཆོག་དམན་གཉིས་ལས་སུ།། ཐེག་དམན་ལམ་ཞུགས་ངེས་འབྱུང་ཤེས་རབ་གཉིས།།རྒྱུད་ལ་སྐྱེས་ན་བསྒྲུབ་བྱའི་དོན་འགྲུབ་ཙམ།། དེ་ལས་བླ་མེད་བྱང་ཆུབ་ཐོབ་འདོད་པས།། གཞན་དོན་བྱང་ཆུབ་མཆོག་ཏུ་སེམས་བསྐྱེད་པ།། མེད་ན་བསྒྲུབ་བྱའི་འབྲས་བུ་ག་ལ་པ།།དེ་ཕྱིར་བྱང་ཆུབ་སེམས་མཆོག་རིན་པོ་ཆེ།། རྒྱུད་ལ་མ་སྐྱེས་པ་དག་སྐྱེས་པ་དང༌།།སྐྱེས་པ་མི་ཉམས་དེ་ཉིད་གོང་འཕེལ་ཐབས།། རྒྱུ་འབྲས་མན་ངག་བདུན་ལ་བློ་སྦྱང་བཞིན།།བྱང་ཆུབ་སེམས་དཔའི་ཚུལ་ཁྲིམས་རྣམ་གསུམ་ལ།། ཐུགས་དམ་གཅེས་སྤྲས་མཛད་པ་བྱང་སེམས་སྡོམ།།འདི་ལྟར་འཁོར་བའི་གནས་འདིར་འཁོར་བ་པ།། གང་ཡང་ཕ་མར་མ་གྱུར་གཅིག་མེད་དེ།།ཐོག་མེད་དུས་ནས་འཁོར་བར་འཁྱམས་པ་དང༌།། མཐོ་དམན་གནས་སུ་སྣ་ཚོགས་ལུས་བླངས་ཕྱིར།།ཕ་མར་བྱས་ཚེ་ད་ལྟའི་ཕ་མ་བཞིན།། བྱམས་བརྩེས་སྐྱོང་དང་ཕན་བཏགས་བསམ་མི་ཁྱབ།། དེ་ཕྱིར་དྲིན་ཆེ་དྲིན་དུ་གཟོ་བ་སྟེ།། ཚེ་འདིར་ཕན་བཏགས་ཕྲ་མོ་བྱས་ནའང༌།།དྲིན་ཆེ་ཡིན་ཞེས་ཕན་ལན་བྱ་དགོས་ན།། ཐོག་མའི་དུས་ནས་སྐྱོང་བའི་མ་རྒན་འགྲོར།།ཅི་ཕྱིར་དྲིན་ལན་ལན་གྱིས་གཟོ་མི་དགོས།། དེ་ཕྱིར་དེ་དག་བདེ་བ་ལྡན་འདོད་དང༌།། སྡུག་བསྔལ་བྲལ་འདོད་བྱམས་དང་སྙིང་རྗེ་དང༌།། ངེས་པར་སྡུག་བསྔལ་བསལ་བྱ་བདེ་བ་དག། འཐོབ་པར་བྱའོ་སྙམ་པའི་ལྷག་བསམ་སོགས།། བྱང་ཆུབ་སེམས་ཀྱི་རྒྱུ་ལ་ནན་ཏན་བྱ།། བྱང་ཆུབ་སེམས་དཔའི་ཚུལ་ཁྲིམས་རྣམ་གསུམ་ནི།། མི་དགེ་སྡོམ་དང་དགེ་བ་བོན་བསྡུད་དང༌།། སེམས་ཅན་དོན་བྱེད་ཚུལ་ཁྲིམས་གསུམ་ཡིན་ལ།། དང་པོ་མི་དགེ་སྡོམ་པའི་ཚུལ་ཁྲིམས་ནི།། སྡོམ་པ་འོག་མའི་སྤང་བྱ་གྱུར་བ་ཀུན།། འདི་ཡི་སྐབས་སུ་སྡོམ་པའི་ཚུལ་ཁྲིམས་ལ།། ཁྱད་པར་ཡེ་གཤེན་བསླབ་པ་སུམ་བརྒྱ་སོགས།། ཤིན་ཏུ་རྒྱ་ཆེ་གསུངས་ཀྱང་མདོ་བསྡུ་ན།།བླ་མ་དང་ནི་སྦྱིན་བདག་བསླུ་བ་དང༌།། གང་ཟག་དམ་པ་རྣམས་ལ་སྨོད་པ་དང༌།།འགྱོད་པ་མེད་ལ་འགྱོད་པ་བསྐྱེད་པ་དང༌།། མི་སྙན་སྒྲོགས་པར་བྱེད་དང་བཞི་པོ་ནི།།ནག་པོའི་བོན་བཞི་ཞེས་བྱ་སྤང་བྱ་ལ།། བླ་མ་དང་ནི་སྦྱིན་བདག་མི་བསླུ་ཞིང༌།། གང་ཟག་དམ་པ་རྣམས་ལ་བསྟོད་པ་དང༌།། གཞན་དགའ་བསྐྱེད་ཅིང་སྙན་པ་སྒྲོགས་པ་བཞི།། དཀར་པོ་བོན་བཞི་ཡིན་པས་རྟག་ཏུ་སློབ།། གཞན་ཡང་སྡིག་སྤྱོད་ཅན་དང་ལོག་ལྟ་ཅན།། ཐེག་པ་དམན་པའི་གྲོགས་དང་འགྲོག་མི་བྱ།། གཞན་དོན་སེམས་ཞུམ་རང་དོན་ཡིད་བྱེད་དང༌།། ཉོན་མོངས་ཡིད་ལ་མི་བྱ་སྤང་བྱ་ལ།། ལུས་ཀྱིས་སྡིག་སྤྱད་ངག་ཏུ་གཞན་སྐྱོན་བརྗོད།། གཞན་མི་དད་པའི་སྤྱོད་པ་བྱེད་པ་སྤང༌།། གཉིས་པ་དགེ་བ་བོན་བསྡུད་ཚུལ་ཁྲིམས་ལ།། ཚད་མེད་བཞི་དང་ཕ་རོལ་ཕྱིན་པ་དྲུག། ཚད་མེད་བཞི་ལས་སྙིང་རྗེ་ཚད་མེད་ལ།། འགྲོ་བའི་སྡུག་བསྔལ་ལ་དམིགས་སྙིང་རྗེ་དང༌།། གཞན་གྱི་རྐྱེན་ལ་དམིགས་པའི་སྙིང་རྗེ་དང༌།། གཞན་ལུགས་མ་རྟོགས་པ་ལ་སྙིང་རྗེ་བསྒོམ།། སྙིང་རྗེ་ཚད་མེད་གཞན་དག་སྡུག་བྲལ་དང༌།། བྱམས་པ་ཚད་མེད་བདེ་བ་ཐོབ་པར་སྨོན།། དགའ་བ་ཚད་མེད་དེ་ལ་སྤྲོ་བསྐྱེད་དེ།། བཏང་སྙོམས་ཚད་མེད་དགྲ་གཉེན་མཉམ་པའོ།། ཕར་ཕྱིན་དྲུག་ལས་བོན་གྱི་སྦྱིན་པ་དང༌།། སྐྱོབ་ཀྱི་སྦྱིན་པ་ཟང་ཟིང་སྦྱིན་པ་གསུམ།། མི་དགེ་སྡོམ་དང་དགེ་བ་བོན་བསྡུད་དང༌།། སེམས་ཅན་དོན་བྱེད་པ་ཡི་ཚུལ་ཁྲིམས་ཡིན།། སྡུག་བསྔལ་དང་ལེན་གནོད་པ་མི་སྙམ་དང༌།། བོན་ལ་ངེས་པར་སེམས་པའི་བཟོད་པ་གསུམ།། གོ་ཆ་དང་ནི་དོན་ལ་སྦྱོར་བ་དང༌།། ཡོངས་སུ་མཐར་ཕྱིན་བྱེད་པའི་བརྩོན་འགྲུས་གསུམ།། ཡོན་ཏན་མངོན་གྲུབ་དམིགས་པར་མི་གཡོ་བ།། དེ་ལ་དབང་འབྱོར་ཅན་གྱི་བསམ་གཏན་གསུམ།། ཐོས་པས་སྒྲ་འཛིན་བསམ་པས་དོན་རྟོགས་དང༌།། སྒོམ་པ་ཉམས་སུ་ལེན་པའི་ཤེས་རབ་གསུམ།། གཞན་ཡང་བྱང་ཆུབ་སེམས་ཀྱི་ཕན་ཡོན་དང༌།།ཉམས་ན་ཉེས་དམིགས་ཐོབ་དཀའི་གནས་ལ་བསམ།། ཡན་ལག་བདུན་དང་སེམས་བསྐྱེད་ཆོ་ག་དང༌།། འདུས་བྱས་དགེ་བ་དག་ལ་རྟག་ཏུ་བརྩོན།། ཐེག་ཆེན་གང་ཟག་དང་ནི་སངས་རྒྱས་བསྟན།། སེམས་ཅན་རྣམས་ནི་གཅེས་པར་བཟུང་བྱའོ།། གསུམ་པ་སེམས་ཅན་དོན་བྱེད་ཚུལ་ཁྲིམས་ལ།། ཕན་གདགས་པ་ནི་གདགས་པ་ཆེན་པོ་ལས།། ཕན་གདགས་པ་ནི་གནས་སྐབས་སེམས་ཅན་རྣམས།། ཟས་གོས་དང་ནི་གཏོ་དཔྱད་སོགས་ཀྱིས་སྐྱོབ།། གདགས་པ་ཆེན་པོ་བསྡུ་དངོས་བཞི་པོ་ཡིས།། འགྲོ་རྣམས་ཐར་པའི་ལམ་ལ་དཀྲི་བ་སྟེ།། སྦྱིན་པས་འཁོར་བསྡུད་དེ་ལ་སྙན་སྨྲ་དང༌།། དོན་ལ་སྤྱོད་དང་དོན་མཐུན་རང་ཡང་བརྩོན།། སེམས་ལུང་ལྟར་ན་ཚུལ་ཁྲིམས་གསུམ་པོ་དེ།། སྤང་བྱ་བཞི་དང་བླང་བྱ་བཞི་དང་ནི།། སེམས་བསྐྱེད་མ་བཞི་དག་ལ་འདུས་པར་གསུངས།། སྤང་བྱ་བཞི་ནི་ཀུན་འབྱུང་ཉོན་མོས་དང༌།། བདག་ལྟ་གཉིས་དང་སངས་རྒྱས་མི་འདོད་དང༌།། འདོད་ཀྱང་རང་དོན་ཁོ་ན་འདོད་པ་དང༌།། བླང་བྱ་བཞི་ནི་ངེས་འབྱུང་ཤེས་རབ་དང༌།། སྙིང་རྗེ་ཚད་མེད་བླ་མེད་སྨོན་ལམ་བཞི།། སེམས་བསྐྱེད་མ་བཞི་མི་ཆགས་བརྟུལ་ཞུགས་དང༌།། རིག་པའི་ཡེ་ཤེས་ཚད་མེད་ཟུང་འཇུག་དང༌།། འགྲོ་དྲུག་འདྲེན་པ་ཐུགས་རྗེའི་སྟོབས་བསྐྱེད་བཞི།། བྱམས་འབུམ་ལས་ནི་སེམས་ཅན་སེམས་གསོད་པ།། སྤང་ནས་བྱང་ཆུབ་མཆོག་ཏུ་སེམས་བསྐྱེད་པ།། བྱང་ཆུབ་སེམས་དཔའི་སྡོམ་གཅིག་ཡིན་པར་བཤད།། དེ་ལྟར་བྱང་ཆུབ་སེམས་ཀྱི་བསླབ་བྱ་ལ།། སྤང་བླང་འཛོལ་མེད་བྱ་བ་གནད་དུ་ཆེ།། བྱང་ཆུབ་སེམས་འདི་རྒྱུད་ལ་སྐྱེས་མ་ཐག། མིང་དོན་འཕོས་ནས་བྱང་ཆུབ་སེམས་དཔའ་ཞེས།། བརྗོད་པར་བྱ་ཞིང་ལྷ་མིས་མཆོད་པར་བྱེད།། མཚམས་མེད་ལ་སོགས་སྡིག་ཆེན་ཐམས་ཅད་ཀྱང༌།། འདི་ཉིད་རྒྱུད་ལ་སྐྱེས་དང་སྟོང་པར་འགྱུར།། དགེ་བ་གང་བྱས་འཁོར་བའི་དྲི་མ་ཡིས།། གོས་པར་མི་འགྱུར་རྣམ་པར་དག་པ་དང༌།། ཁོང་ཁྲོ་ལ་སོགས་ཉོན་མོངས་དག་གིས་ཀྱང༌།། དགེ་འབྲས་མི་འཛད་གོང་ནས་གོང་འཕེལ་འགྱུར།། བྱང་ཆུབ་སེམས་འདི་རྒྱུད་ལ་སྐྱེས་པ་དང༌།། གཉིད་ལོག་དང་ནི་བག་མེད་གྱུར་ཀྱང་རུང༌།། བསོད་ནམས་རྒྱུན་མི་འཆད་པ་འབྱུང་བར་གསུངས།། གོམ་གཅིག་བོར་བའི་སྐད་ཅིག་སེམས་དང་ནི།། ཁམས་གསུམ་གང་བ་བཅས་པའི་སེམས་ཅན་ལ།། སྲོག་སྦྱིན་དགེ་བ་བྱས་པ་ཆར་མི་ཉེ།། མདོ་ཕྲན་ལས་གསུངས་གཞན་ཡང་ཕན་ཡོན་ནི།། མདོ་རྒྱུད་ཀུན་ནས་ཤིན་ཏུ་རྒྱ་ཆེར་གསུངས།། སྡོམ་པ་གསུམ་ལས་ཉེས་དམིགས་ཤས་ཆེ་དང༌།། ཕན་ཡོན་ཤས་ཆེ་གཉིས་ཀ་ཆ་མཉམ་གསུམ།། ཡོད་དེ་འདི་ནི་ཕན་ཡོན་ཤས་ཆེའོ།། དེ་ལྟར་བྱང་སྡོམ་བསླབ་བསྡུས་བསྟན་པ་འདི།། བསླབ་གྲོགས་ཚེ་སྐྱིད་ཞེས་བྱས་བསྐུལ་བའི་ངོར།། རང་གཞན་དོན་དུ་མང་གའི་མིང་གིས་བྲིས།། དགེ་བས་འགྲོ་ཀུན་སངས་རྒྱས་མྱུར་ཐོབ་ཤོག །
