གཉིས་པ་རྗེ་ཙོང་ཁ་པ་ཆེན་པོའི་རིང་ལུགས་དྲི་མ་མེད་པ་བསྟན་འཛིན་དམ་པ་རྣམས་ཀྱིས་དར་ཞིང་རྒྱས་པར་མཛད་པའི་ཚུལ་བརྗོད་པ་ལ། སྤྱིར་རྗེ་ཐམས་ཅད་མཁྱེན་པའི་གསུང་ལས་སྐྱེས་པའི་སློབ་མ། སྡོམ་པ་གསུམ་གྱི་ཚུལ་ཁྲིམས་ལ་གནས་ནས་སྐྱེས་བུ་གསུམ་གྱི་ལམ་དང་། རིམ་གཉིས་ཀྱི་རྣལ་འབྱོར་ལྷུར་ལེན་ཞིང་། སྡེ་སྣོད་གསུམ་དང་རྒྱུད་སྡེ་བཞིའི་བཤད་པ་འཆད་ཉན་དང་། སྒྲུབ་པ་ཉམས་ལེན་གྱི་སྒོ་ནས་ཐུབ་པའི་མདོ་སྔགས་ཀྱི་བསྟན་པའི་སྙིང་པོ་དགེ་ལྡན་ལུགས་བཟང་དྲི་མ་མེད་པ་ཕྱོགས་ཀྱི་འཁོར་ལོའི་མཐར་སྤེལ་ཞིང་རྒྱས་པར་མཛད་པའི་དངོས་དང་བརྒྱུད་པའི་སློབ་མ་ནམ་མཁའི་སྐར་ཚོགས་ལྟ་བུ་བགྲང་གིས་མི་ལང་བ་ཞིག་བྱོན་ཀྱང་། དེ་དག་གི་ནང་ནས་གཙོ་བོར་གྱུར་པ་འགའ་ཞིག་བརྗོད་ན། ས་སྐྱའི་རྗེ་བཙུན་ཆེན་པོ་རེད་མདའ་བ་དང་། བླ་མ་དབུ་མ་པ། མཁན་ཆེན་ཕྱག་རྡོར་བ་སྟེ་ཕན་ཚུན་ཆོས་འབྲེལ་གསན་པ་གསུམ། འདི་ལ་ཐུའུ་བཀྭན་རིན་པོ་ཆེས་མཁན་ཆེན་ཆོས་སྐྱབས་བཟང་པོ་བརྩིས་པས་བཞིར་བགྲངས། ཚ་ཁོ་ངག་དབང་གྲགས་པ་སོགས་བྱ་བྲལ་ལ་མ་ཕེབས་གོང་གི་སྲས་སྔ་ཚར་བཞི། བླ་མ་འཇམ་དཀར་པ་སོགས་དབུས་པ་བཞི་དང་། རྗེ་རྟོགས་ལྡན་པ་སོགས་ཁམས་པ་བཞི་སྟེ་བྱ་བྲལ་ལ་བྱོན་དུས་ཀྱི་འཁོར་དག་པ་རྣམ་བརྒྱད། རྒྱལ་ཚབ་དར་མ་རིན་ཆེན་དང་། འདུལ་འཛིན་གྲགས་པ་རྒྱལ་མཚན་ཏེ་སྲས་ཀྱི་ཐུ་བོ་གཉིས། ནང་ཐུགས་ཀྱི་སྲས་གཅིག་མཁས་གྲུབ་ཐམས་ཅད་མཁྱེན་པ། འཇམ་དབྱངས་ཆོས་ཀྱི་རྗེ་བཀྲ་ཤིས་དཔལ་ལྡན་དང་། མཚུངས་མེད་ཆོས་རྗེའམ་གུང་རུ་རྒྱལ་མཚན་དཔལ་བཟང་པོ། རྗེ་ཤེས་རབ་སེང་གེ་ཐམས་ཅད་མཁྱེན་པ་དགེ་འདུན་གྲུབ་དཔལ་བཟང་པོ་སྟེ་འཕྲིན་ལས་ནམ་མཁའ་དང་མཉམ་པའི་སྲས་ཆེན་བཞི། ཆོས་རྗེ་དཀོན་མཆོག་ཚུལ་ཁྲིམས་སོགས་དབུས་གཙང་གི་བསྟན་པའི་སྒྲོན་མེ་བཅུ། བྱང་སེམས་ཤཱཀྱ་བསོད་ནམས་སོགས་གཞན་དོན་ལྷུན་གྱིས་གྲུབ་པའི་སེམས་དཔའ་དྲུག བྱམས་ཆེན་ཆོས་རྗེ་ཤཱཀྱ་ཡེ་ཤེས་དང་། བྱང་དར་མ་སྟེ་མི་དབང་གཙུག་ན་མཛེས་པའི་ཏི་ཤྲཱི་གཉིས། མ་ཅིག་དཔོན་པོ་ནམ་མཁའ་དཔལ་དང་། ཡར་རྒྱབ་དཔོན་པོ་བསོད་ནམས་རྣམ་རྒྱལ་ཏེ་རྒྱ་ཆེན་མང་དུ་ཐོས་པའི་དཔོན་སྲས་གཉིས། ཞ་ལུ་པ་བཀྲ་ཤིས་རྒྱ་མཚོ་དང་། ཞ་ལུ་པ་ལེགས་པ་རྒྱལ་མཚན་ཏེ་སྦྱང་བའི་ཡོན་ཏན་འཛིན་པའི་ཅོག་ཆེ་ཆུང་གཉིས། མུས་སྲད་པ་བློ་གྲོས་རིན་ཆེན་དང་། ཞང་ཞུང་པ་ཆོས་དབང་གྲགས་པ་སྟེ་རྣམ་དཔྱོད་ཕུལ་དུ་བྱུང་བའི་མཁས་པ་གཉིས། སྟོད་སྨད་ཀྱི་ཤེར་བཟང་སོགས་བསྟན་པ་ཕྱོགས་མཐར་སྐྱོང་བའི་དར་ཆེན་དྲུག འགོས་ལོ་ཙཱ་བ་གཞོན་ནུ་དཔལ་བ་དང་། སྟག་ལུང་ལོ་ཙཱ་བ་སྟེ་སྐད་གཉིས་སྨྲ་བའི་ལོ་ཙཱ་བ་གཉིས། ཆོས་རྗེ་དཔལ་ལྡན་བཟང་པོ་སོགས་སྐྱོང་མིའི་ཆོས་རྗེ་དྲུག ཆོས་རྗེ་ཤེར་འབྱུང་པ་སོགས་གསུང་རབ་མང་དུ་མཁྱེན་པའི་བསྟན་འཛིན་བརྒྱད། མདོ་སྨད་པ་འོད་ཟེར་དང་རོང་ཆེན་ལྗགས་ནག་པ་སོགས་མདོ་རོང་གི་མཁས་པ་བཞི། ཆོས་རྗེ་སྨོན་ལམ་མཐའ་ཡས་དང་། རི་མི་འབབ་པ་བསོད་ནམས་རིན་ཆེན་སྟེ་ཡ་མཚན་ཅན་གྱི་སྐྱེས་བུ་གཉིས། སྤྲེ་ཞིང་རིན་པོ་ཆེ་བྱང་ཆུབ་དཔལ་བ་དང་། རིན་ཆེན་དཔལ་བ་སྟེ་མཁའ་སྤྱོད་གྲུབ་པའི་གདུང་བརྒྱུད་གཉིས། སྤྱན་སྔ་བློ་གྲོས་རྒྱལ་མཚན་སོགས་སྤྱན་སྔ་བརྒྱད། གུང་ཐང་པ་ཆོས་རྗེ་མཛེས་པ་དཔལ་སོགས་ཆོས་ཀྱི་གདན་ཁྲི་མཛེས་པའི་བླ་ཆེན་བཞི། མཁན་ཆེན་ཆོས་རྒྱལ་དཔལ་བཟང་སོགས་ཚོགས་པ་སྐྱོང་བའི་མཁན་པོ་བཞི། ཆེན་པོ་གྲགས་པ་བཟང་པོ་སོགས་སྡེ་དགོན་ཁྲ་མོའི་ཆེན་པོ་ལྔ། གདན་ས་མཐིལ་གྱི་ཆོས་སྒོ་པ་འཇམ་དབྱངས་ཁ་ཆེ་དང་། འབྲི་གུང་ཆོས་སྒོ་པ་བཀྲ་ཤིས་རིན་ཆེན་ཏེ་གདན་ས་ཆེན་པོའི་ཆོས་སྒོ་པ་གཉིས། དཀའ་བཅུ་པ་དར་མ་བཟང་པོ་སོགས་ལུང་རིགས་སྨྲ་བའི་དཀའ་བཅུ་པ་བཞི། མཐིལ་ཆུང་དཀའ་བཞི་པ་དོན་ཡོད་སོགས་ཚིག་དོན་འཛིན་པའི་དཀའ་བཞི་པ་བཅུ། ཇོ་གདན་ཟླ་བ་བློ་གྲོས་སོགས་བརྟུལ་ཞུགས་འཛིན་པའི་ཇོ་གདན་པ་བཞི། གནས་བརྟན་ཆོས་བཟང་སོགས་ཚུལ་ཁྲིམས་རྣམ་པར་དག་པའི་གནས་བརྟན་དྲུག ཀུ་ཅོར་རྟོགས་ལྡན་པ་སངས་རྒྱས་དཔལ་བ་སོགས་ཚེ་བློས་བཏང་གི་རྟོགས་ལྡན་པ་ལྔ་ལ་སོགས་པའི་བུ་སློབ་གཙོ་ཆེ་བའི་རིགས་འདི་དག་རྗེ་བསོད་ནམས་གྲགས་པའི་བཀའ་གདམས་གསར་རྙིང་གི་ཆོས་འབྱུང་དང་། རྗེ་འཇིགས་མེད་དབང་པོའི་བསྟན་འགྱུར་དཀར་ཆག ཐུའུ་བཀྭན་གྲུབ་མཐའ་སོགས་ལས་གསུངས་པ་ལྟར་བྲིས་པ་ཡིན་ལ། གཞན་ཡང་རྣམ་ཐར་ཆོས་འབྱུང་སོགས་ལས་མང་དུ་གསུངས་པ་རྣམས་འདིར་ཡི་གེ་མང་བར་འཇིགས་ནས་མ་བྲིས་སོ། །དེ་ལྟ་བུའི་མཁས་གྲུབ་གཉིས་འཛོམས་ཀྱི་བུ་སློབ་རྣམས་ཀྱིས་རྗེ་བླ་མའི་བསྟན་པ་ཇི་ལྟར་དར་ཞིང་རྒྱས་པར་མཛད་པའི་ཚུལ་ཞིབ་རྒྱས་རང་རང་གི་རྣམ་པར་ཐར་བ་སོགས་ལས་ཤིན་ཏུ་གསལ་བས་འདིར་བརྗོད་པར་མི་སྤྲོ་ལ། གཙོ་བོར་གྱུར་པ་རེ་གཉིས་ཙམ་གྱིས་བསྟན་པ་ལ་བྱ་བ་མཛད་པའི་ཚུལ་རགས་རམ་ཙམ་ཞིག་བརྗོད་ན།
རྒྱལ་ཚབ་དར་མ་རིན་ཆེན་ནི། རབ་བྱུང་དྲུག་པའི་ཤིང་འབྲུག་(སྤྱི་ལོ་༡༣༦༤)ལོར་གཙང་ཉང་སྟོད་ཀྱི་སའི་ཆ་རི་ནང་ཞེས་བྱ་བར་སྐུ་འཁྲུངས། དགུང་ལོ་བཅུའི་སྟེང་གདན་ས་ཆེན་པོ་གནས་རྙིང་དུ་མཁས་ཆེན་རིན་ཆེན་རྒྱལ་མཚན་ལས་རབ་ཏུ་བྱུང་ཞིང་དགེ་ཚུལ་གྱི་སྡོམ་པ་བཞེས་པས་མཚན་དར་མ་རིན་ཆེན་ཞེས་གསོལ། མཁས་པའི་དབང་པོ་རི་ནང་པ་རིན་ཆེན་རྡོ་རྗེ་དང་གངས་ཅན་ཀུན་དགའ་དཔལ་བ། བྲན་མ་བྲག་ཁ་པ་དོན་འགྲུབ་རིན་ཆེན། དཀའ་བཞི་པ་བློ་གྲོས་བཟང་པོ་སོགས་ཀྱི་དྲུང་དུ་གཞུང་ཆེན་བཀའ་པོད་ལྔ་ལ་སྦྱང་བ་མཐར་ཕྱིན་པ་མཛད། ཁྱད་པར་དུ་རྗེ་བཙུན་རེད་མདའ་བ་ཆེན་པོ་དང་། ལོ་ཆེན་སྐྱབས་མཆོག་དཔལ་བཟང་། ཤངས་པ་ཀུན་དགའ་བ་སོགས་ཀྱི་ཞབས་རྡུལ་སྤྱི་བོར་བསྟེན་ཏེ་མདོ་སྔགས་ཀྱི་གཞུང་ལུགས་སྤྱི་དང་ཁྱད་པར་དུ་གསང་བ་འདུས་པ་སོགས་ཀྱི་གཞུང་རྣམས་ལེགས་པར་གསན་ཞིང་རང་གཞན་གྱི་གྲུབ་མཐའ་རྒྱ་མཚོའི་ཕ་རོལ་ཏུ་སོན་པའི་མཁས་པའི་དབང་པོར་གྱུར། དགུང་ལོ་ཉེར་དགུའི་སྟེང་གཙང་ལ་སྟོད་ལྡོག་ལྷོ་པ་ཀུན་དགའ་དཔལ་བས་མཁན་པོ་ད་ང། རྗེ་བཙུན་རེད་མདའ་བས་ལས་སློབ། ཆོས་རྗེ་གངས་ཅན་པ་ཀུན་དགའ་དཔལ་བས་གསང་སྟོན་མཛད་དེ་དད་པའི་དགེ་འདུན་ཉེར་གཉིས་ཀྱི་དབུས་སུ་བསྙེན་པར་རྫོགས་པའི་སྡོམ་པ་རྣམ་པར་དག་པ་བཞེས། པཎ་ཆེན་བསོད་ནམས་གྲགས་པས་འདི་བའི་བསྙེན་རྫོགས་ཀྱི་མཁན་པོ་རྗེ་རེད་མདའ་བ་ཡིན་པར་གསུངས། དེ་ནས་ས་སྐྱ་དང་། གསང་ཕུ། རྩེད་ཐང་རྣམས་སུ་དཀའ་བཅུའི་གྲྭ་སྐོར་གནང་སྟེ་མཁས་པ་རྣམས་ལེགས་བཤད་ཀྱིས་ཡིད་འཕྲོག་ཅིང་རིགས་པས་དཔལ་སྐོང་བ་མཛད་དེ་རྩོད་པ་ལ་མཁས་པའི་གྲགས་པ་དབུས་གཙང་གི་ཕྱོགས་ཐམས་ཅད་དུ་ཁྱབ་པས། རྗེ་རེད་མདའ་བ་ཆེན་པོས་ཀྱང་། རྩོད་པ་མཆོག་གྱུར་དར་མ་རིན་ཆེན་ཏེ། ཞེས་སོགས་ཀྱིས་བསྔགས་བརྗོད་ཆེན་པོ་གནང་། རྩེད་ཐང་དུ་གྲྭ་སྐོར་གནང་ཚར་ནས་རྗེ་ཙོང་ཁ་པ་ཆེན་པོའི་མཁས་པའི་སྙན་པ་གསན་ཏེ། རྗེ་ཉིད་གཉལ་ར་གྲོང་དུ་བཞུགས་པ་ལ་རྩོད་པ་མཛད་པར་དགོངས་ནས་མཇལ་བར་བྱོན་པ་ན། སྤྱིར་རྗེ་བླ་མའི་སྐུ་གསུང་ཐུགས་ཀྱི་ཡོན་ཏན་བསམ་གྱིས་མི་ཁྱབ་པ་དང་། ཁྱད་པར་དུ་རྟོན་པ་བཞིའི་བཤད་པ་ཡིད་འཕྲོག་པ་གནང་བ་ལ་ཐུགས་དད་ཚད་མེད་འཁྲུངས་པས། ཞབས་རྡུལ་སྤྱི་བོར་བླངས་ཏེ་རྩེ་གཅིག་ཏུ་གསོལ་བ་བཏབ་པ་ན་རྗེ་བདག་ཉིད་ཆེན་པོས་ཀྱང་གདུལ་བྱ་རིན་པོ་ཆེ་ལྟ་བུར་གཟིགས་ནས་འཁོར་གྱི་ཐོག་མར་བརྩེ་བས་རྗེས་སུ་བཟུང་། ཡང་གསུང་ཚུལ་གཞན་ཞིག་ལ། དེ་དུས་བོད་ཀྱི་མཁས་པ་ཆེན་པོ་རོང་སྟོན་སྨྲ་བའི་སེང་གེ་ལ་སློབ་དཔོན་འདིས་རྩོད་པ་མཛད་པས་ཆོས་རྗེ་འདི་བ་ལ་རྒྱལ་ཁ་ཐོབ་རྐྱེན། རྗེ་བདག་ཉིད་ཆེན་པོ་གཉལ་སྟོད་ར་གྲོང་དུ་བཞུགསས་པ་ལ་ཡང་ཐུགས་རྒྱལ་བའི་ཚུལ་གྱིས་རྩོད་པ་མཛད་པར་དགོངས་ནས་རྗེའི་དྲུང་དུ་བྱོན་ཏེ། དབུ་ཞྭ་མ་ཕུད་པར་ཆོས་གྲྭར་ཕེབས་པ། རྗེ་བདག་ཉིད་ཆེན་པོས་གཟིགས་ནས་གསུང་ཆོས་འཕྲོ་མ་བཅད་པར་ཁྲི་ལས་གཞོལ་བར་བཞུགས་པ་ན། སློབ་དཔོན་འདིས་ཁེངས་པ་ངོམ་པའི་ཚུལ་གྱིས་རྗེའི་བཞུགས་ཁྲིའི་སྟེང་དབུ་ཞྭ་ནབ་བཞིན་པར་བཞུགས་ཏེ། རྗེ་བླ་མས་ཆོས་ཀྱི་གསུང་བཤད་མཛད་པ་གསན་པས། སྔོན་ཆད་མཁས་པ་གཞན་གྱི་ཞལ་ལས་མ་ཐོས་པའི་ལེགས་བཤད་ཤ་སྟག་སྙན་གྱི་གོང་བུར་སོང་བས། ཁེངས་པའི་རི་བོ་རང་ཤུགས་ཀྱིས་བསྙིལ་ཏེ་དབུ་ཞྭ་ཕུད་ཅིང་ཁྲི་ལས་བབ་ནས་ཕྱག་དང་བཅས་སློབ་མའི་ཁྲོད་དུ་བྱོན། དེའི་ཚེ་རྗེའི་བཞུགས་ཁྲིར་ཕེབས་པ་དེ་ཕྱིས་སུ་གདན་སའི་ཁྲིའི་ཐོག་མར་བྱོན་པའི་རྟེན་འབྲེལ་འགྲིག་པར་གསུངས། ལྷག་པར་དེ་དུས་རྗེ་ཐམས་ཅད་མཁྱེན་པས་རྟོན་པ་བཞིའི་བཤད་པ་ཡིད་འཕྲོག་པ་ཞིག་གནང་བ་གསན་པས་ཐུགས་མོས་ཚད་མེད་འཁྲུངས་ཏེ། ཕྱག་དུ་མ་མཛད་ཅིང་ཞབས་སྤྱི་བོར་བླངས་ནས་ཕྱིན་ཆད་ཐུགས་བརྩེ་བས་རྗེས་སུ་གཟུང་དུ་གསོལ་ཞེས་དད་པའི་ང་རོ་སྤྱན་ཆབ་དང་བཅས་ཏེ་ཞུས་པས། རྗེ་ཐམས་ཅད་མཁྱེན་པས་དགྱེས་བཞིན་ཞལ་གྱིས་བཞེས་ཤིང་བརྩེ་བས་རྗེས་སུ་བཟུང་སྟེ། འཁོར་གྱི་ཐོག་མར་ནམ་ཡང་འབྲལ་མེད་དུ་བཞུགས་རྗེ་བདག་ཉིད་ཆེན་པོ་ཞིང་གཞན་དུ་གཤེགས་པར་ཉེ་བ་ན། ན་བཟའ་སྐུ་བེར་དང་། པཎ་ཞྭ་གནང་སྟེ་དོན་དེ་གོ་བར་གྱིས་ཤིག ཅེས་གསུངས་པ་བཞིན། དགུང་ལོ་ང་དྲུག་པ་ས་ཕག་ལོ་དེ་ལ་འདུལ་འཛིན་རིན་པོ་ཆེ་དང་གནས་བརྟན་རིན་ཆེན་རྒྱལ་མཚན་སོགས་ཀྱིས་ཐོག་དྲངས་པའི་དགེ་འདུན་པ་རྣམས་ཀྱིས་མགྲིན་གཅིག་ཏུ་གསོལ་བ་བཏབ་པས། གདན་སར་མི་འཇིགས་གདོང་ལྔས་བཏེགས་པའི་ཁྲི་ལ་ཞབས་སྐྱེ་པདྨོ་མཛེས་པར་བཀོད་དེ་རྒྱལ་བ་གཉིས་པའི་རྒྱལ་ཚབ་དམ་པར་དབང་བསྐུར། དེའི་ཚེ་མཁས་གྲུབ་ཐམས་ཅད་མཁྱེན་པས། དཔལ་ལྡན་ཡོན་ཚོགས་མའི་བསྟོད་པ་མཛད་པ་དང་། ཐམས་ཅད་མཁྱེན་པ་དགེ་འདུན་གྲུབ་ཀྱིས་ཀྱང་། སྙན་ངག་ཀུན་བཟང་འཁོར་ལོ་རྨད་དུ་བྱུང་བའི་ལམ་ནས་བསྟོད་ཅིང་བསྔགས་པའི་མེ་ཏོག་འཐོར། སློབ་དཔོན་འདི་ཉིད་གཙོ་བོར་གདན་ས་ཆེན་པོ་ཉིད་དུ་བཞུགས་ནས། གཞི་བྱེས་ཀྱི་སྡེ་སྣོད་འཛིན་པ་སྟོང་ཕྲག་ཙམ་ལ་གཞུང་ཆེན་མོ་རྣམས་ཀྱི་བཤད་པ་སྤྱི་དང་། ལྷག་པར་ཚད་མ་རྣམ་འགྲེལ་གྱི་བཤད་པ་ཞིབ་རྒྱས་སུ་གནང་བ་སོགས་བཤད་སྒྲུབ་ཀྱི་འཆད་ཉན་ལོ་བཅུ་གསུམ་གྱི་བར་མཛད་དེ་རི་བོ་དགེ་ལྡན་པའི་བསྟན་པ་རིན་པོ་ཆེའི་རྐང་བཙུགས་ཤིང་རྗེ་ཐམས་ཅད་མཁྱེན་པའི་ཐུགས་ཀྱི་དགོངས་པ་ཡོངས་སུ་རྫོགས་པར་མཛད། སྐབས་འགར་འོལ་ཁ་དང་། གནས་རྙིང་སོགས་སུ་ཕེབས་ནས་ཆོས་ཀྱི་འཁོར་ལོ་རྒྱ་ཆེར་བསྐོར། མཁས་གྲུབ་རིན་པོ་ཆེ་ཁྲིར་ཕེབས་པ་ནས་བཟུང་དབེན་གནས་རྒྱལ་ཁང་རྩེར་ཐུགས་དམ་ཟབ་མོ་ལ་རྩེ་གཅིག་ཏུ་གཞོལ་བར་མཛད། གསུང་སྐྱེས་བུ་སློབ་ཡང་རྗེའི་དངོས་སློབ་ཕལ་ཆེར་དང་། ཐུན་མོང་མ་ཡིན་པ། མཁས་པ་བློ་གྲོས་མགོན། གླིང་སྟོད་དཔལ་སེང་བ། གླིང་སྨད་ཡོན་རྒྱམ་པ། སློབ་དཔོན་རཏྣ་ཤྲཱི། འདུལ་འཛིན་གྲགས་པ་དཔལ་ལྡན། འདུལ་འཛིན་བསམ་འཕེལ་བ། ཆོས་རྗེ་བྱམས་གླིང་བ། གནས་ཕུ་དཀའ་བཅུ་པ་སོགས་མཁས་ཤིང་གྲུབ་པའི་སློབ་མ་བགྲང་ལས་འདས་པ་བྱུང་། སྐུ་མྱ་ངན་ལ་འདའ་བར་ཉེ་བ་ན། ལྷ་སའི་པོ་ཏ་ལ་ནི་ས་ལ་གནས་པའི་འོག་མིན་གཉིས་པར་གཟིགས་ནས་རིམ་གྱིས་གནས་རྙིང་དང་། ངམ་རིང་ཆོས་སྡེར་འབྱོན་པར་སྙད་བཏགས་ཏེ་པོ་ཏ་ལར་བྱོན་མ་ཐག་སྐུ་སྙུང་བའི་ཚུལ་བསྟན་ཏེ། དགུང་ལོ་རེ་དགུ་པ་ཆུ་བྱི(༡༤༣༢)ལོའི་ཧོར་ཟླ་ལྔ་པའི་ཚེས་བརྒྱད་ལ་མཁའ་སྤྱོད་དུ་གཤེགས། སྐུ་གདུང་རིན་པོ་ཆེ་དགའ་ལྡན་དུ་གདན་དྲངས་ཤིང་རིང་བསྲེལ་མང་པོ་འཕེལ་ལོ། །
མཁས་གྲུབ་ཐམས་ཅད་མཁྱེན་པ་ནི། རབ་བྱུང་དྲུག་པའི་ཤིང་གླང་(༡༣༨༥)ལོར། ལ་སྟོད་བྱང་གི་སའི་ཆ་ལྡོག་གཞུང་དུ། བྱང་བའི་དཔོན་རིགས་སུ་སྐུ་འཁྲུངས། མཁས་གྲུབ་ལྷ་དབང་བློའི་སྐུའི་སྐྱེ་བ་དྲན་པ་ཡིན་པས་མཁས་གྲུབ་རྗེ་ཞེས་ཕྱོགས་ཀུན་ཏུ་གྲགས། མཁན་ཆེན་སེངྒེ་རྒྱལ་མཚན་ལས་རབ་ཏུ་བྱུང་ཞིང་དགེ་ཚུལ་གྱི་སྡོམ་པ་བཞེས་པས། མཚན་དགེ་ལེགས་དཔལ་བཟང་པོ་ཞེས་གསོལ། རྗེ་བཙུན་རེད་མདའ་བ་ཆེན་པོའི་ཞབས་ལ་གཏུགས་ཏེ་ཚད་མ་སྡེ་བདུན། མངོན་པ་གོང་འོག བྱམས་ཆོས་སྡེ་ལྔ། དབུ་མ་རིགས་ཚོགས། འདུལ་བ་རྣམས་ལ་སྦྱངས་ཏེ་རིང་པོར་མ་ཐོགས་པར་མཁས་པའི་ཕ་རོལ་ཏུ་སོན། ལམ་འབྲས་པ་ཡེ་ཤེས་དཔལ་བ་ལས་ཀྱེ་རྡོ་རྗེའི་དབང་དང་ལམ་འབྲས་ཆ་ལག་དང་བཅས་པ་རྫོགས་པར་གསན། གཞན་ཡང་བླ་མ་དམ་པ་བསོད་ནམས་རྒྱལ་མཚན་དང་། ན་བཟའ་བ་སོགས་བཤེས་གཉེན་དུ་མ་ལས་མདོ་སྔགས་ཀྱི་ཆོས་མང་དུ་གསན་ཏེ་གཞུང་ལུགས་རབ་འབྱམས་སྨྲ་བ་ལ་མི་འཇིགས་པའི་སྤོབས་པ་ཐོབ་ཅིང་རང་གཞན་གྱི་གྲུབ་མཐའ་རྒྱ་མཚོའི་ཕ་རོལ་ཏུ་སོན་པར་གྱུར། དེ་ནས་གཙང་ཕྱོགས་ཀྱི་ཆོས་གྲྭ་ཆེན་པོ་རྣམས་སུ་གྲྭ་སྐོར་མཛད་དེ་ངམ་རིང་ཆོས་སྡེར་ཕེབས་པ་ན། དེའི་ཚེ་གངས་ཅན་གྱི་མཁས་པ་ཆེན་པོ་ཆོས་རྗེ་བོ་དོང་པ་པཎ་ཆེན་ཕྱོགས་ལས་རྣམ་རྒྱལ་གྱིས། ས་པཎ་གྱི་རིགས་གཏེར་ལ་དགག་པ་མཛད་དེ། ས་སྐྱ་དང་། བོ་དོང་སོགས་ཆོས་གྲྭ་ཕལ་ཆེར་དུ་དམ་བཅའ་བཞག་པས། མཁས་པ་སུས་ཀྱང་རྒོལ་བའི་གླགས་མ་རྙེད་པར་བོ་དོང་པཎ་ཆེན་ཉིད་དམ་རིང་ཆོས་སྡེར་བྱོན་ནས་དམ་བཅའ་འཇོག་པ་དང་དུས་མཚུངས་པས། ཕྱོགས་དེའི་མཁས་པར་རློམ་པ་སུས་ཀྱང་ལན་ལྡོན་མ་ནུས་པ་ན། མཁས་པ་རྣམས་བཀའ་བགྲོས་མཛད་དེ་ཐམས་ཅད་ཀྱིས་མགྲིན་གཅིག་ཏུ་མཁས་གྲུབ་རིན་པོ་ཆེར་ཞུས་པས། དེ་དུས་འདི་བ་དགུང་ལོ་བཅུ་དྲུག་ཡིན་པས་སྐུ་ན་ཤིན་ཏུ་ཕྲ་ཡང་། འཇིགས་པ་མེད་པར་ཁྱུ་མཆོག་རླབས་པོ་ཆེའི་གནས་སུ་དམ་བཅས་ཏེ་ཁོ་བོས་ནུས་སོ་ཞེས་ཞལ་གྱིས་བཞེས་ནས་སྡེ་སྣོད་འཛིན་པ་ཐམས་ཅད་ཚོགས་པའི་དབུས་སུ་པཎ་ཆེན་ཕྱོགས་ལས་རྣམ་རྒྱལ་དང་རྩོད་པ་མཛད་པས། རྗེ་འདིས་དྲི་མ་མེད་པའི་རིགས་པ་འབུམ་ཕྲག་གིས་སུན་ཕྱུང་སྟེ་པཎ་ཆེན་ཕྱོགས་རྒྱལ་བ་ལན་མེད་དུ་གྱུར། དེ་དུས་ཁོང་རྣམ་གཉིས་ཀྱི་རྩོད་པ་མཛད་པའི་རིགས་པའི་འཕུད་མཚམས་ཕྲ་ཞིང་ཕྲ་བ་གཞན་དང་མི་འདྲ་བ་ཐམས་ཅད་མཁས་པ་རྣམས་ཀྱིས་ཟིན་བྲིས་སུ་མཛད་ཅིང་། ཕྱིས་སུ་སྡེ་བདུན་ཡིད་ཀྱི་མུན་སེལ་མཛད་སྐབས་དེ་དུས་ཀྱི་རྩོད་པའི་རིགས་ལམ་རྣམས་དེའི་ནང་དུ་དྲངས་ཡོད་པར་གསུངས། བོ་དོང་པཎ་ཆེན་ཕྱོགས་ལས་རྣམ་རྒྱལ་པས་ཀྱང་མཁས་གྲུབ་རིན་པོ་ཆེ་ལ་ཆེད་དུ་བསྔགས་པ་བརྗོད་པའི་བསྟོད་ཚིག་བྱང་བ་རྣམ་པར་རྩེན་པའི་རྒྱུད་མངས་ཞེས་བྱ་བ་དེ་དུས་ཕུལ་བར་གྲགས། དེ་ལྟར་མཁས་གྲུབ་རིན་པོ་ཆེ་སྐུའི་ན་ཚོད་ཕྲ་མོ་དེ་ཙམ་ནས་འཆད་རྩོད་རྩོམ་གསུམ་གང་ལ་ཡང་ཐོགས་པ་མེད་པའི་མཁས་པའི་སྙན་གྲགས་ཕྱོགས་ཐམས་ཅད་དུ་ཁྱབ། དེ་ནས་རྗེ་བཙུན་རེད་མདའ་བ་ཆེན་པོས་མཁན་པོ། ཆོས་རྗེ་དཔལ་འབྱོར་ཤེས་རབ་ཀྱིས་ལས་སློབ། གཉལ་བ་བློ་གྲོས་མཚུངས་མེད་ཀྱིས་གསང་སྟོན་མཛད་དེ་དད་པའི་དགེ་འདུན་གྲངས་ཚང་བའི་དབུས་སུ་དགེ་སློང་གི་སྡོམ་པ་ཡང་དག་པར་བཞེས། དེའི་ཚེ་རྗེ་རེད་མདའ་བས་བསྐུལ་བ་ལ་བརྟེན་ནས་རྗེ་བླ་མར་མཇལ་དུ་བྱོན་པའི་ལམ་བར་སྙེ་ཐང་དུ་བཞུགས་པའི་ཚེ་མནལ་ལམ་དུ་རྗེ་བཙུན་འཇམ་པའི་དབྱངས་དངོས་སུ་གཟིགས་ཏེ་མཐར་རང་གི་ལུས་ལ་ཐིམ་པ་ཞིག་རྨིས། དེའི་ཕྱི་ཉིན་སེ་ར་ཆོས་སྡིངས་སུ་བྱོན་པ་ན་ཐོག་མར་དགེ་སློང་ཞི་ཞིང་དུལ་བ་ཅན་ཞིག་དང་མཇལ་བས། དེ་ལ་ཆོས་རྗེ་བློ་བཟང་གྲགས་པའི་གཟིམ་ཁང་གང་ཡིན་དྲིས་པ་ན། ལན་མི་སྨྲ་བར་ནང་དུ་སོང་ནས་སྤོས་རིང་ཞིག་སྦར་ནས་ཁྱེར་ཏེ་གཟིམ་ཁང་སེར་པོའི་དྲུང་དུ་སླེབས་མ་ཐག་ཕྱག་གསུམ་བཙལ་ལག་པ་གཉིས་ཀྱིས་སྤོས་རིང་བཟུང་སྟེ། དོན་གྱི་སླད་དུ་མཚན་ནས་སྨོས་ཏེ། བདག་གི་མཁན་པོ་རིན་པོ་ཆེ་བློ་བཟང་གྲགས་པའི་ཞལ་སྔ་ནས་བཞུགས་པའི་གཙུགས་ལག་ཁང་འདིའོ་ཞེས་སྤོས་ཀྱི་རྩེ་མོ་ཕྱོགས་དེར་བསྟན་པས། དགེ་སློང་དེ་འདུལ་བ་ནས་གསུངས་པ་ལྟར་གྱི་ཀུན་སྤྱོད་དག་པ་དང་དགེ་བའི་བཤེས་གཉེན་ལ་ཤིན་ཏུ་གུས་པ་མཛད་པའི་ཚུལ་རྣམས་གཟིགས་པས། མཁས་གྲུབ་རིན་པོ་ཆེའི་ཐུགས་ལ་རྗེ་ཙོང་ཁ་པའི་ཞབས་འབྲིང་དག་ཀྱང་འདི་འདྲ་ན། རྗེ་རིན་པོ་ཆེ་ཉིད་ཇི་འདྲ་ཞིག་ཡོད་སྙམ་དུ་ཧ་ལས་ཤིང་ལུས་ཀྱི་བ་སྤུ་ཟིང་སྟེ་འཇིགས་ཤིང་སྤ་ཞུམ་པར་གྱུར། དེ་ནས་གཟིམ་ཆུང་དུ་ཕེབས་ཏེ་རྗེ་ཙོང་ཁ་པ་ཆེན་པོ་དང་མཇལ་མ་ཐག སྐུ་ཚེ་སྔ་རོལ་ནས་དཔོན་སློབ་ཀྱི་འབྲེལ་བ་ཤིན་ཏུ་ཟབ་པའི་རྟེན་འབྲེལ་གྱི་མཐུས་མི་ཕྱེད་པའི་དད་པ་སྙིང་ནས་འཁྲུངས་ཏེ་རྗེས་སུ་འཛིན་པར་གསོལ་བ་བཏབ་པ་ན། རྗེ་ཐམས་ཅད་མཁྱེན་པས། ཁྱེད་ལ་ལམ་དུ་རྨི་ལམ་ཅི་བྱུང་གསུངས་པར། སྙེ་ཐང་དུ་བྱུང་བ་རྣམས་ཞུས་པས། ཁྱེད་སྔགས་ཀྱི་གདུལ་བྱ་དབང་རྣོན་ཡིན་པར་འདུག ཁྱེད་ཀྱིས་གདུལ་བྱ་མང་པོ་ལ་ཕན་ཐོགས་ཆེན་པོ་འོང་གསུངས་པ་སོགས་བཀའ་འདྲི་མང་པོ་གནང་བའི་མཐར་ཁྱེད་ཀྱིས་ཡི་དམ་གང་ལ་བྱེད་ཀྱི་ཡོད་ཅེས་བཀའ་འདྲི་གནང་བར། མཁས་གྲུབ་རིན་པོ་ཆེ་ནས། གཤིན་རྗེ་གཤེད་དམར་ནག་འཇིགས་གསུམ་གང་ལ་ཡི་དམ་བྱས་ཀྱང་རྗེ་བཙུན་ཉིད་ཀྱིས་རྗེས་སུ་འཛིན་མོད། འོན་ཀྱང་ངེད་རང་གི་བརྒྱུད་པ་འདི་ནི་རྗེ་བཙུན་འཇམ་པའི་དབྱངས་ཀྱིས་རྗེས་སུ་འཛིན་ཅིང་བྱིན་རླབས་ཆེ་བ་ཡིན་པས་དེ་ལྟར་ཤེས་དགོས། ཁྱད་པར་དུ་ཡི་དམ་རྡོ་རྗེ་འཇིགས་བྱེད་ལ་བྱ་དགོས་ཏེ། འདི་ལ་རྒྱུ་འབྲས་གཉིས་ཀའི་སྐབས་སུ་རྗེ་བཙུན་གྱི་ཞལ་དངོས་སུ་ཡོད་པས་གནད་ཁྱད་པར་ཅན་ཡོད་ཀྱང་། འགའ་ཞིག་གིས་འདིའི་གནས་ཡེ་མི་གོ་ཞེས་སོགས་ཀྱིས་གསུང་གླེང་ཞིབ་རྒྱས་དང་བཅས་ནང་ཐུགས་ཀྱི་སྲས་གཅིག་པུར་རྗེས་སུ་བཟུང་སྟེ་གསུང་གི་གསང་བ་མ་ལུས་པ་བུམ་པ་གང་འཇོའི་ཚུལ་དུ་གསན། སླར་ཡང་གཙང་ལ་བྱོན་ཏེ་ཉང་སྟོད་ལྕང་རའི་གདན་ས་མཛད་པས་ལྕང་ར་དཀའ་བཅུ་པར་གྲགས། དེ་ནས་ས་སྐྱོང་རབ་བརྟན་འཕགས་པ་དང་མཆོད་ཡོན་རྣམ་གཉིས་ཀྱིས་དཔལ་འཁོར་བདེ་ཆེན་གྱི་ཆོས་གྲྭ་ཆེན་པོ་སོགས་དགེ་ལྡན་པའི་གྲྭ་ཚང་མང་པོའི་གཞི་འཛུགས་པ་མཛད་དོ། སྡེ་སྣོད་འཛིན་པ་མང་པོ་པདྨོའི་ཚལ་ལ་བུང་བ་བཞིན་འདུས་ཤིང་བཤད་སྒྲུབ་ཀྱི་འཆད་ཉན་འཕེལ་རྒྱས་ཆེན་པོ་བྱུང་བས་དགེ་ལྡན་པའི་བསྟན་པ་རིན་པོ་ཆེ་ཁྱབ་སྤེལ་དུ་མཛད། དེའི་ཚེ་ས་སྐྱོང་རབ་བརྟན་པས། ཆོས་རྗེ་རོང་ཆེན་པ་གདན་དྲངས་པར་མཁས་གྲུབ་ཐམས་ཅད་མཁྱེན་པ་དང་རྩོད་པ་མཛད་པར་དྲིལ་བསྒྲགས་བྱས་པ་ལྟར། མཁས་གྲུབ་རིན་པོ་ཆེ་ནས་ཀྱང་ཞལ་གྱིས་བཞེས་ཏེ་ཕྱོགས་ཡས་མས་ཀྱི་ཆོས་སྡེ་ཆེ་ཆུང་ཐམས་ཅད་ནས་གཞུང་ལུགས་སྨྲས་བའི་བཤེས་གཉེན་ཆེན་པོ་དུ་མ་དང་སྡེ་སྣོད་འཛིན་པ་བརྒྱ་ཕྲག་མང་པོ་དཔང་པོར་ལྷགས་ཏེ་རྒོལ་བའི་དཀྱིལ་འཁོར་བཤམས་པ་ན། ས་སྐྱོང་རབ་བརྟན་པ་དང་རོང་ཆེན་པ་རྣམ་གཉིས་ཐུགས་འགྱུར་ཏེ་འཇོལ་བའི་ཐབས་མཛད། དེའི་ཚེ་མཁས་གྲུབ་ཐམས་ཅད་མཁྱེན་པས། འོན་ཀྱང་རོང་སྐྱེས་ཤཱཀྱ་ཡིས། །བསྟན་ལ་སྡང་བའི་ཡིད་ལྡན་ཞིང་། །གཤེན་རབ་གཞུང་ལུགས་རྒྱལ་མཚན་འཛིན། །བྱིས་པ་མཁས་པར་རློམ་པ་གང་། །རིང་ན་གནས་ཚེ་ཁོ་བོ་དང་། །ལྷན་ཅིག་བརྒལ་ལན་བྱ་འོ་ཞེས། །གྱ་གྱུའི་ཡིད་ལྡན་དྲང་སྲོང་གིས། །སྨོད་པའི་ཚིག་བཞིན་ཡང་ཡང་བསྒྲགས། །དེ་ནས་ནམ་ཞིག་འདིར་ཕྱིན་ཚེ། །ཞུམ་པ་བཞིན་དང་སྐྲག་པ་བཞིན། །ནོངས་པ་བཞིན་དང་འགྱོད་པ་བཞིན། །སྐྱབས་མེད་བཞིན་དུ་སྐྱབས་འཚོལ་བྱེད། །དཔལ་ལྡན་ཟླ་བའི་འོད་དཀར་ལ། །གླགས་འཚོལ་འདོད་པའི་མུན་ཅན་དེ། །ཁོ་བོའི་རིགས་ཚུལ་རྡོ་རྗེ་ཡིས། །གཞོམ་པར་བྱ་ཞེས་མངོན་དུ་སྨྲས། །ཞེས་སོགས་དང་། བདེ་གཤེགས་བསྟན་པ་གངས་རིའི་སུལ་ན་གནས། །གཞུང་ལུགས་འབུམ་ཕྲག་རལ་བའི་ཁུར་གྱིས་བརྗིད། །རིགས་པའི་མཆེ་སྡེར་མི་བཟད་སྟོབས་ལྡན་པ། །མཁས་མཆོག་གདོང་ལྔའི་དབང་པོ་ཁོ་བོ་ཙམ། །དྲི་མེད་རིགས་པའི་གད་རྒྱངས་གཅིག་གིས་ཀྱང་། །དྲེགས་ལྡན་ཕས་རྒོལ་གླང་པོ་སྟོང་གི་སྙིང་། །ལྐོག་མར་འབྱིན་པའི་འཇིགས་སྟེར་དགེ་ལེགས་དཔལ། །བཟང་པོ་ལས་གཞན་སྨྲ་བའི་སེང་གེ་གང་། །ཞེས་འཇིགས་པ་མེད་པའི་དཔའ་བོའི་ཉམས་ཀྱིས་རབ་ཏུ་བཅིངས་པའི་ཚིགས་སུ་བཅད་པ་འདི་དག་གསུངས་ཏེ་སླར་དབེན་གནས་རི་བོ་མདངས་ཅན་དུ་བྱོན་ནས་ཐུགས་དམ་ལ་གཞོལ་བར་མཛད། དེའི་ཚེ་ས་སྐྱོང་རབ་བརྟན་གྱིས་འགྱོད་པ་དང་བཅས་སླར་ཡང་ཐབས་སྣ་ཚོགས་ལ་བརྟེན་ནས་དཔལ་འཁོར་སྡེ་ཆེན་དུ་གདན་འདྲེན་པར་བརྩམ་པ་ན། མཁས་གྲུབ་རྗེའི་ཞལ་ནས། མཆེ་བ་མི་བཟད་སྦར་མོའི་ཤུགས་འཆང་བ། །གངས་རི་འཛིན་པའིགདོང་ལྔའི་དབང་པོ་དེ། །ལྕགས་ཀྱིས་བཅིངས་ནས་བཙོག་ཆུས་འཚོ་བ་ཡི། །སྒོ་ཁྱིར་འདོད་པ་མཁས་པའི་བཞད་གད་ཡིན། །ཞེས་གསུངས་ཏེ་ཞལ་བཞེས་མ་གནང་བར་དགའ་ལྡན་དུ་ཕེབས། དགུང་གྲངས་ཞེ་བདུན་པ་རབ་བྱུང་བདུན་པའི་ལྕགས་ཕག་ལོར་གདན་ས་ཆེན་པོ་དགེ་ལྡན་རྣམ་པར་རྒྱལ་བའི་གླིང་དུ་གསེར་གྱི་ཁྲི་འཕང་མཐོན་པོར་མངའ་གསོལ་ཏེ་འཆད་ཉན་བཤད་སྒྲུབ་ཀྱི་སྒོ་ཐམས་ཅད་ཡར་ཟླ་བཞིན་དུ་འཕེལ་ཞིང་རྒྱས་པར་མཛད། ལྷག་པར་རྗེ་བདག་ཉིད་ཆེན་པོའི་གསུང་ཟུར་ཕྲ་མོ་ཙམ་ཡང་གཞན་དང་མ་འདྲེས་པར་གསལ་བར་གསུངས་ཏེ་གཞན་ཕྱོགས་ནས་རྗེའི་གསུང་རབ་ལ་རྒོལ་བར་རྩོམ་པའི་ལུགས་སུ་བྱེད་པ་མཐའ་དག་ལུང་རིགས་དྲི་མ་མེད་པའི་སྒོ་ནས་སུན་ཕྱུང་། ཁྱད་པར་དུ་རྗེའི་བླ་མའི་བཤད་སྲོལ་ཐུན་མོང་མ་ཡིན་པའི་རྒྱུན་ཆད་ཀྱི་དོགས་ནས་གསང་སྔགས་ཀྱི་དཀའ་བའི་གནད་མཁའ་འགྲོའི་སྙིང་ཁྲག་ལྟ་བུ་གཞན་ལ་སྤེལ་ན་མཁའ་འགྲོའི་བཀའ་ཆད་ཡོད་པ་དག་ཀྱང་སྐུ་སྲོག་ལ་མི་ལྟ་བར་བསྟན་པ་རིན་པོ་ཆེ་ཁོ་ན་ཐུགས་ལ་བརྣག་སྟེ་འཆད་པ་དང་རྩོམ་པའི་སྒོ་ནས་གསལ་བར་མཛད་པའི་བཀའ་དྲིན་འགྲན་ཟླ་དང་བྲལ། དེ་ལྟར་གདན་སའི་ཁྲི་ལ་ལོ་བརྒྱད་ཀྱི་བར་དུ་བཞུགས་ནས་འཇམ་མགོན་བློ་བཟང་གྲགས་པའི་བསྟན་པ་རིན་པོ་ཆེ་ཕྱོགས་ཐམས་ཅད་ལས་རྣམ་པར་རྒྱལ་བའི་རྒྱལ་མཚན་སྲིད་པའི་རྩེ་མོར་བཙུགས་ཏེ། དགུང་ལོ་ང་བཞི་པ་ས་རྟ(༡༤༣༨)ལོའི་ཆོ་འཕྲུལ་ཟླ་བའི་ཚེས་ཉེར་གཅིག་ལ་མཁའ་སྤྱོད་ཆོས་ཀྱི་ཕོ་བྲང་དུ་གཤེགས་སོ། །སློབ་དཔོན་འདིའི་དག་པའི་གཟིགས་སྣང་ཡང་། རྗེ་བཙུན་འཇམ་པའི་དབྱངས་དང་། ལྷ་མོ་དབྱངས་ཅན་མ། ཡི་དམ་རྡོ་རྗེ་འཇིགས་བྱེད། མགོན་པོ་ཕྱག་དྲུག་པ། ཞལ་བཞི་པ་རྣམས་ཡང་ཡང་གཟིགས་ཤིང་ལྷག་པར་རྗེ་བདག་ཉིད་ཆེན་པོ་མྱ་ངན་ལས་འདས་པའི་རྗེས་སུ་སློབ་དཔོན་འདིས་གཟིགས་པ་མི་འདྲ་བ་ལྔའི་སྒོ་ནས་རྗེ་བླ་མའི་ཞལ་དངོས་སུ་མཇལ་ཞིང་གསུང་གི་བདུད་རྩི་ཡང་ཡང་མྱངས་པའི་ཚུལ་རྣམ་ཐར་སོགས་ལས་གསུངས་པ་ལྟར་ཡིན་ལ། སློབ་དཔོན་འདིའི་གསུང་ལས་སྐྱེས་པའི་བུ་སློབ་ཡང་། མཁན་ཆེན་བསོད་ནམས་མཆོག་གྲུབ། ཀུན་མཁྱེན་འཕགས་པ་འོད། གསང་མདའ་བ་ཆོས་ལྡན་རབ་འབྱོར། སྤྱན་སྔ་བློ་གྲོས་རྒྱལ་མཚན། ཚ་ཁོའི་དཔོན་པོ་ཆོས་ཀྱི་གྲགས་པ། རོང་སྟོན་བློ་བཟང་གྲགས་པ། ཆོས་རྗེ་དོན་གྲུབ་དཔལ་བ། ཆོས་རྗེ་ཀུན་ལེགས་པ། སྒྲ་པ་ཆོས་རྒྱལ་བ། གནས་བརྟན་ཆོས་སྐྱོང་བ་སོགས་མཁས་གྲུབ་གཉིས་འཛོམས་ཀྱི་སྐྱེས་བུ་དམ་པ་བགྲང་ལས་འདས་སོ། །
དེ་ནས་དགའ་ལྡན་ཁྲི་རབས་བཞི་པ་ཞ་ལུ་པ་ལེགས་པ་རྒྱལ་མཚན་ནི། རབ་བྱུང་དྲུག་པའི་ཤིང་ཡོས(༡༣༧༥)ལོར་གཙང་ནས་འཁྲུངས། ཞ་ལུར་རབ་བྱང་མཛད། རྗེ་ཐམས་ཅད་མཁྱེན་པའི་ཞབས་པད་བསྟེན་ཏེ་དགའ་ལྡན་ཕྱག་འདེབས་གསར་དུ་མཛད་པ་ནས་བཟུང་དབུ་མཛད་གནང་། དགུང་ལོ་རེ་བཞི་པ་ལ་གདན་སར་གསེར་གྱི་ཁྲི་ལ་འཁོད། ཐུན་མོང་བའི་སྣང་ཚོད་ལ་མཁྱེན་རབ་ཧ་ཅང་ཆེ་བར་མ་གྲགས་ཀྱང་། དོན་དུ་རྣལ་འབྱོར་གྱི་དབང་ཕྱུག་ཆེན་པོ་ཡིན་པས། སྡེ་སྣོད་འཛིན་པ་རྣམས་རྗེ་འདི་ལ་ཇེ་གུས་ཇེ་གུས་དང་སྐྱེ་བོ་མི་བསྲུན་པ་རྣམས་ཇེ་སྐྲག་ཇེ་སྐྲག་ཏུ་སོང་ཞེས་རྗེ་བསོད་གྲགས་པས་གསུངས། མཐར་དགུང་ལོ་དོན་དྲུག་པ་ལྕགས་རྟ(༡༤༥༠)ལོའི་ཧོར་ཟླ་གཉིས་པའི་ཚེས་ཉེར་བཞི་ལ་ཞི་བར་གཤེགས་སོ། །
དགའ་ལྡན་ཁྲི་རབས་ལྔ་པ་གཡག་སྡེ་བློ་གྲོས་ཆོས་སྐྱོང་ནི། རབ་བྱུང་བདུན་པའི་ས་སྦྲུལ(༡༣༨༩)ལོར་གཡག་སྡེར་སྐུ་འཁྲུངས། ཆོས་ལུང་ཚོགས་པ་ལ་རབ་བྱུང་ཞུས། རྗེ་ཡབ་སྲས་གསུམ་དང་། ཁྱད་པར་མཁས་གྲུབ་རིན་པོ་ཆེ་གཙོ་བོར་བསྟེན་ནས་མདོ་སྔགས་ཀྱི་གཞུང་ལུགས་ཐམས་ཅད་ལ་སྦྱངས་པ་མཐར་ཕྱིན་པ་བྱས། དགུང་ལོ་རེ་གཉིས་པར་གདན་སར་གསེར་གྱི་ཁྲི་ལ་འཁོད་དེ་གཙོ་བོར་དུས་ཀྱི་འཁོར་ལོའི་འགྲེལ་ཆེན་ཊྰིཀྐ་དང་བཅས་པའི་འཆད་ཉན་རྒྱས་པར་གནང་ཞིང་ཊྰིཀ་ཆེན་གྱི་ཁ་སྐོང་ཡང་མཛད། དགུང་ལོ་དོན་ལྔ་པ་ཆུ་ལུག(༡༤༦༣)ལོའི་ཧོར་ཟླ་དགུ་པའི་ཚེས་བཅོ་ལྔ་ལ་སྐུ་གཤེགས་སོ། །
དགའ་ལྡན་ཁྲི་རབས་དྲུག་པ་མཁས་གྲུབ་ཐམས་ཅད་མཁྱེན་པའི་གཅུང་བ་སོ་ཆོས་ཀྱི་རྒྱལ་མཚན་ནི་རབ་བྱུང་བདུན་པའི་ཆུ་རྟ(༡༤༠༢)ལོར་ལ་སྟོད་དུ་འཁྲུངས། རྗེ་ཡབ་སྲས་ཀྱི་ཞབས་ལ་གཏུགས་ཏེ་མཚན་ཉིད་དང་སྔགས་ཀྱི་གཞུང་ལུགས་རྣམས་ལ་ཞིབ་པར་སྦྱངས། ཁྱད་པར་དུ་གྲུབ་པའི་དབང་ཕྱུག་རྟོགས་ལྡན་འཇམ་དཔལ་རྒྱ་མཚོར་བསྟེན་ནས་རྗེ་བདག་ཉིད་ཆེན་པོ་ལ་མགོན་པོ་འཇམ་པའི་དབྱངས་ཀྱིས་དངོས་སུ་གནང་བའི་སྙན་བརྒྱུད་ཀྱི་མན་ངག་ལམ་གྱི་ལུས་ཡོངས་སུ་རྫོགས་པའི་ཟབ་ལམ་བླ་མ་ལྷའི་རྣལ་འབྱོར་གྱི་སྒོ་ནས་སྙིགས་དུས་ཀྱི་ཚེ་ཐུང་གཅིག་ལ་ཟུང་འཇུག་སྒྲུབ་པའི་ཐབས་བླ་ན་མེད་པ་གསང་བ་ལས་ཀྱང་ཆེས་གསང་བའི་གདམས་པ། དགའ་ལྡན་སྙན་བརྒྱུད་ཀྱི་མན་ངག་ཡོངས་སུ་རྫོགས་པ་བུམ་པ་གང་འཇོའི་ཚུལ་དུ་གནང་བའི་མཐར། གྲུབ་ཆེན་རྟོགས་ལྡན་པ་རང་ཉིད་ལ་རྗེ་བཙུན་འཇམ་པའི་དབྱངས་ཀྱིས་ལུང་བསྟན་པ་ལྟར། དགའ་ལྡན་སྤྲུལ་པའི་གླེགས་བམ་ཆེན་མོ་ཡང་གནང་སྟེ་རེ་ཞིག་ཆིག་བརྒྱུད་དུ་བཀའ་རྒྱས་བཏབ། གཞན་ཡང་དུས་ཀྱི་འཁོར་ལོའི་བསྐྱེད་རྫོགས་ཡོངས་སུ་རྫོགས་པ་གསན་ཏེ་ཐུགས་ཉམས་སུ་བཞེས་པས། ཐུན་མོང་མ་ཡིན་པའི་བདེ་སྟོང་གི་ཏིང་ངེ་འཛིན་ཟབ་མོ་ཐུགས་རྒྱུད་ལ་འཁྲུངས་པ་ཞལ་སློབ་ནང་མ་དག་ལ་དེ་ཀའི་ཞལ་བཞེས་ཀྱང་མཛད་པར་གྲགས། དགུང་ལོ་རེ་གཉིས་པར་གདན་སར་གསེར་གྱི་ཁྲི་ལ་མངའ་གསོལ། དེ་ལྟར་འཇམ་མགོན་བཤད་སྒྲུབ་ཀྱི་བསྟན་པ་ལ་བྱ་བ་རྒྱ་ཆེར་མཛད་ནས། དགུང་ལོ་དོན་གཉིས་པ་ཆུ་སྦྲུལ(༡༤༧༣)ལོར་མཁའ་སྤྱོད་དུ་གཤེགས། གསུང་ལས་སྐྱེས་པའི་བུ་སློབ་ཀྱང་རྗེའི་སྙན་བརྒྱུད་ཀྱི་མན་ངག་ཁྱད་པར་ཅན་འཛིན་པའི་སློབ་མ་གྲུབ་ཆེན་ཆོས་ཀྱི་རྡོ་རྗེ། སྟོད་ལུང་དཔལ་ལྡན་རྡོ་རྗེ། ཁམས་པ་རྡོ་རྗེ་དཔལ་པ་སྟེ་སྐུ་ཚེ་དེ་ལ་ཟུང་འཇུག་གྲུབ་ཅིང་འཆི་མེད་རྡོ་རྗེ་སྐུ་བརྙེས་པའི་རྡོ་མཆེད་གསུམ་དུ་གྲགས་པའི་སློབ་མ་སོགས་མཁས་ཤིང་གྲུབ་པའི་སྐྱེས་ཆེན་མང་དུ་བྱུང་ངོ་། །
དགའ་ལྡན་ཁྲི་རབས་བདུན་པ་ཆོས་རྗེ་བློ་གྲོས་བསྟན་པ་ནི། གཙང་སྟོད་དུ་འཁྲུངས། བ་སོ་ཆོས་ཀྱི་རྒྱལ་མཚན་དང་དགུང་མཉམ་ཡིན། གནས་རྙིང་དུ་རབ་བྱུང་མཛད། རྗེ་ཡབ་སྲས་གསུམ་དང་ཁྱད་པར་དུ་རྒྱལ་ཚབ་ཐམས་ཅད་མཁྱེན་པར་བསྟེན་ནས་གསུང་རབ་ལ་སྦྱངས་པས་མང་དུ་ཐོས་པའི་མཁས་པ་ཆེན་པོར་གྱུར། དང་པོ་གསང་ཕུ་ནས་འཆད་ཉན་མཛད་ཀྱང་རེ་ཞིག་ཆགས་སྡང་འཕེལ་བའི་དབང་གིས་བཞུགས་མ་སྤྲོ་བར་ལར་སྟོད་དང་འོལ་ཁའི་ཕྱོགས་སུ་འཆད་ཉན་མཛད། དེ་ནས་བྱང་རྩེར་ཕེབས་ཏེ་བྱམས་ཆོས་སོགས་ཀྱི་གཞུང་ཆེན་མོའི་བཤད་པ་རྒྱ་ཆེར་གནང་ཞིང་རྣམ་འགྲེལ་གྱི་ལམ་བསྒྲིགས་དང་། བྱམས་ཆོས་ཕྱི་མ་བཞིའི་ཊྰིཀྐ་སོགས་ཀྱང་མཛད། དགུང་ལོ་དོན་གཉིས་པར་གདན་སར་གསེར་གྱི་ཁྲི་ལ་བཞུགས། དགུང་ལོ་དོན་བདུན་པ་ས་ཁྱི(༡༤༧༨)ལོར་ངོ་མཚར་བའི་ལྟས་དང་བཅས་སྐུ་གཤེགས་སོ། །
དགའ་ལྡན་ཁྲི་རབས་བརྒྱད་པ་ཆོས་རྗེ་སྨོན་ལམ་དཔལ་མ་ནི་རབ་བྱུང་བདུན་པའི་ཤིང་རྟ་(༡༤༡༤)ལོར། གཡས་རུ་བྱང་གི་སའི་ཆར་འཁྲུངས། རྗེ་དགེ་འདུན་གྲུབ་རྩ་བའི་ཡོངས་འཛིན་དུ་བསྟེན་ནས་གསུང་རབ་མཐའ་དག་ལ་ལེགས་པར་སྦྱངས། རྗེ་ཤེས་རབ་སེང་གེའི་དྲུང་དུ་གསང་བ་འདུས་པའི་རྒྱུད་འགྲེལ་སོགས་གསན། རྩེད་ཐང་དུ་པོ་ཏི་སུམ་ཅུ་རྩ་དྲུག་གི་གྲྭ་སྐོར་མཛད་པས་མཁས་པའི་སྙན་གྲགས་ཕྱོགས་བཅུར་རྒྱས། གཙང་པོ་ལྷོའི་གྲྭ་ཚང་ཆེན་མོ། བཀྲ་ཤིས་ལྷུན་པོ། གསེར་ཁང་གོང་མ་རྣམས་སུ་རིམ་པ་བཞིན་འཆད་ཉན་མཛད་དེ་སླར་ཡང་དབུས་སུ་བྱོན་ནས་སེ་ར་རྒྱའི་གྲྭ་ཚང་། ཤར་གྱི་མཚན་ཉིད་ཁང་། སྐྱ་ཐང་སོགས་སུ་འཆད་ཉན་རྒྱ་ཆེར་གནང་ཞིང་རྣམ་འགྲེལ་གྱི་ཊྰིཀྐ་ཞིག་ཀྱང་མཛད། དགུང་ལོ་རེ་བདུན་པར་གདན་སར་གསེར་གྱི་ཁྲི་ལ་མངའ་གསོལ་ཞིང་། དེའི་ཕྱི་ལོར་འབྲས་སྤུངས་ཀྱི་གདན་སར་ཡང་ཕེབས་པས། གདན་ས་གཉིས་ཀར་མདོ་རྒྱུད་ཀྱི་གསུང་རབ་མང་དུ་གསུངས་ཏེ་འཆད་ཉན་གྱིས་ལེགས་པར་བསྐྱངས། དགུང་ལོ་དོན་བརྒྱད་པ་ལྕགས་ཕག(༡༤༩༡)ལོའི་ཧོར་ཟླ་བཅུ་གཅིག་པའི་ཆོས་ཉེར་གཉིས་ལ་ལྷ་སའི་པོ་ཏ་ལར་སྐུ་གཤེགས། རྒྱལ་ཚབ་རྗེ་ནས་འདིའི་བར་དུ་དགའ་ལྡན་གསེར་ཁྲི་འཇམ་དབྱངས་གཙང་བ་བདུན་བརྒྱུད་དུ་གྲགས་སོ། །
དེ་ནས་ཁྲི་རབས་དགུ་པ་ཁྲི་ཆེན་བློ་བཟང་ཉི་མ། བཅུ་པ་ལྡན་མ་ཡེ་ཤེས་བཟང་པོ། བཅུ་གཅིག་པ་འདར་སྟོན་བློ་བཟང་གྲགས་པ། བཅུ་གཉིས་པ་འཇམ་དབྱངས་ཤེས་རབ་ལེགས་པའི་བློ་གྲོས། བཅུ་གསུམ་པ་ཁྲི་ཆེན་ཆོས་ཀྱི་བཤེས་གཉེན། བཅུ་བཞི་པ་སྟོད་ལུང་བ་རིན་ཆེན་འོད་ཟེར། བཅོ་ལྔ་པ་པཎ་ཆེན་བསོད་ནམས་གྲགས་པ། བཅུ་དྲུག་པ་རྒྱ་ར་ཆོས་སྐྱོང་རྒྱ་མཚོ། བཅུ་བདུན་པ་མི་ཉག་རྡོ་རྗེ་བཟང་པོ། བཅོ་བརྒྱད་པ་བྱེ་རི་རྒྱལ་མཚན་བཟང་པོ། བཅུ་དགུ་པ་ཁྲི་ཆེན་ངག་དབང་ཆོས་ཀྱི་གྲགས་པ། ཉི་ཤུ་པ་ཁྲི་ཆེན་ཆོས་གྲགས་བཟང་པོ། ཉེར་གཅིག་པ་ཆོས་རྗེ་བདེ་བ་ཅན་པ་དགེ་ལེགས་དཔལ་བཟང་། ཉེར་གཉིས་པ་ཀླུང་ཤོད་དགེ་འདུན་བསྟན་པ་རབ་རྒྱས། ཉེར་གསུམ་པ་ཆོས་རྗེ་ཚེ་བརྟན་རྒྱ་མཚོ། ཉེར་བཞི་པ་མངོན་དགའ་བ་བྱམས་པ་རྒྱ་མཚོ། ཉེར་ལྔ་པ་ཁྲི་ཆེན་དཔལ་འབྱོར་རྒྱ་མཚོ། ཉེར་དྲུག་པ་ཁྲི་ཆེན་དམ་ཆོས་དཔལ་འབར། ཉེར་བདུན་པ་ཆོས་རྗེ་སངས་རྒྱས་རིན་ཆེན། ཉེར་བརྒྱད་པ་ཁྲི་ཆེན་དགེ་འདུན་རྒྱལ་མཚན། ཉེར་དགུ་པ་ཅོ་ནེ་བཤེས་གཉེན་གྲགས་པ། སུམ་ཅུ་པ་སྟག་ལུང་བྲག་པ་བློ་གྲོས་རྒྱ་མཚོ། སོ་གཅིག་པ་ཆོས་རྗེ་དམ་ཆོས་དཔལ་བ། སོ་གཉིས་པ་འབྲོང་རྩེ་ཚུལ་ཁྲིམས་ཆོས་འཕེལ། སོ་གསུམ་པ་ཁྲི་ཆེན་གྲགས་པ་རྒྱ་མཚོ། སོ་བཞི་པ་ཁྲི་ཆེན་ངག་དབང་ཆོས་ཀྱི་རྒྱལ་མཚན། སོ་ལྔ་པ་གླིང་སྨད་ཞབས་དྲུང་འཇམ་དབྱངས་དཀོན་མཆོག་ཆོས་འཕེལ། འདི་བ་རྒྱལ་དབང་ལྔ་བས་ཡོངས་འཛིན་དུ་བསྟེན། སོ་དྲུག་པ་ཀོང་པོ་བསྟན་འཛིན་ལེགས་བཤད། འདིའི་སྐབས་དགའ་ལྡན་རྩེ་ཤར་བར་འཁྲུངས་རྩོད་བྱུང་རྐྱེན་འདི་བ་བཞུགས་མ་བདེ་བར་ཁམས་སུ་བྲོས། འདི་ཡན་ལ་དགའ་ལྡན་ཁྲི་པ་རྩེ་ཤར་རེ་མོས་བྱེད་ཀྱང་ལོ་གྲངས་སོགས་ལ་ངེས་ཅན་མེད་པར། འདི་ནས་གཙང་པ་རྒྱལ་པོས་ཁྲིམས་བཅད་པས་ཁྲིའི་ལོ་གྲངས་ངེས་ཅན་གྱི་སྲོལ་ཚུགས། སོ་བདུན་པ་ཁྲི་ཆེན་དགེ་འདུན་རིན་ཆེན་རྒྱལ་མཚན། སོ་བརྒྱད་པ་གྲོ་མདའ་བ་བསྟན་པ་རྒྱལ་མཚན། སོ་དགུ་པ་ཁྲི་ཆེན་དཀོན་མཆོག་ཆོས་བཟང་། བཞི་བཅུ་པ་ཆོས་རྗེ་མངའ་རིས་པ་དཔལ་ལྡན་རྒྱལ་མཚན་ནམ་བསྟན་པ་རྒྱལ་མཚན་ཡང་ཟེར། ཞེ་གཅིག་པ་ཤར་རྩེ་བློ་བཟང་རྒྱལ་མཚན། ཞེ་གཉིས་པ་ཁྲི་ཆེན་བློ་བཟང་དོན་ཡོད་དམ་ཆོས་རྗེ་རྣམ་དག་རྡོ་རྗེ་ཡང་ཟེར། ཞེ་གསུམ་པ་ཁྲི་ཆེན་བྱམས་པ་བཀྲ་ཤིས། ཞེ་བཞི་པ་ཀླུ་འབུམ་ངག་དབང་བློ་གྲོས་རྒྱ་མཚོ། ཞེ་ལྔ་པ་ཅོ་ནེ་འཇམ་དབྱངས་ཚུལ་ཁྲིམས་དར་རྒྱས། འདི་བ་རྒྱལ་དབང་ལྔ་པའི་དུས་ཡིན་ཞིང་ཁྲི་རབས་ཞེ་དྲུག་པའི་རྗེས་སུ་སླར་ཡང་ཁྲི་ཚབ་བྱས་ཏེ་གོང་ས་ལྔ་པའི་གསེར་གདུང་ཆེན་མོར་རབ་གནས་དང་། རྒྱལ་དབང་དྲུག་པ་ཚངས་དབྱངས་རྒྱ་མཚོར་ལམ་རིམ་ཆེན་མོ་སོགས་ཀྱི་བཀའ་ཆོས་མང་དུ་བསྩལ། ཞེ་དྲུག་པ་བསམ་བློ་སྦྱིན་པ་རྒྱ་མཚོ། ཞེ་བདུན་པ་སྤོམ་མདའ་བ་བློ་བཟང་ཆོས་འཕེལ། ཞེ་བརྒྱད་པ་ཁྲི་ཆེན་དོན་གྲུབ་རྒྱ་མཚོ། ཞེ་དགུ་པ་ཁྲི་ཆེན་བློ་བཟང་དར་རྒྱས། ལྔ་བཅུ་པ་གུང་ཐང་ཁྲི་ཆེན་དགེ་འདུན་ཕུན་ཚོགས། ང་གཅིག་པ་ཧོར་གཙང་ཁྲི་ཆེན་དཔལ་ལྡན་གྲགས་པ། ང་གཉིས་པ་ཁྲི་ཆེན་ངག་དབང་ཆོས་འཕེལ། ང་གསུམ་པ་ཁྲི་ཆེན་རྒྱལ་མཚན་སེང་གེ། ང་བཞི་པ་ཁྲི་ཆེན་ངག་དབང་མཆོག་ལྡན། ང་ལྔ་པ་ཟམ་ཚ་ཁྲི་ཆེན་ངག་དབང་ནམ་མཁའ། ང་དྲུག་པ་ཁྲི་ཆེན་བློ་བཟང་དྲི་མེད། ང་བདུན་པ་ཁྲི་ཆེན་བསམ་གཏན་ཕུན་ཚོགས། ང་བརྒྱད་པ་བྱ་ཁྱུང་པ་ངག་དབང་ཆོས་གྲགས། ང་དགུ་པ་ཆུ་བཟང་ངག་དབང་ཆོས་གྲགས། འདི་བས་སྐུ་ཚེ་མ་ཟིན་པས་མཐར་མ་ཕྱིན། དྲུག་ཅུ་པ་ཁྲི་ཆེན་བློ་བཟང་བསྟན་པ་དར་རྒྱས། རེ་གཅིག་པ་ཚ་རྡོར་ངག་དབང་ཚུལ་ཁྲིམས། རེ་གཉིས་པ་ཁྲི་ཆེན་བློ་བཟང་སྨོན་ལམ། རེ་གསུམ་པ་ཁྲི་ཆེན་བློ་བཟང་མཁས་མཆོག འདི་བ་ཟླ་བ་གཉིས་ལས་མ་བཞུགས་པར་སྐུ་འདས་རྗེས་བློ་བཟང་སྨོན་ལམ་པ་སླར་ཁྲི་ཚབ་ཏུ་བཞུགས། རེ་བཞི་པ་ཁྲི་ཆེན་བློ་བཟང་བཀྲ་ཤིས། རེ་ལྔ་པ་ཁྲི་ཆེན་དགེ་འདུན་ཚུལ་ཁྲིམས། རེ་དྲུག་པ་བྱ་ཁྱུང་ངག་དབང་སྙན་གྲགས། རེ་བདུན་པ་འཇམ་དབྱངས་སྨོན་ལམ་ཟླ་བ་གསུམ་ནས་འདས། རེ་བརྒྱད་པ་ཁྲི་ཆེན་བློ་བཟང་དགེ་ལེགས། དེས་ཀྱང་ཁྲི་མཐར་མ་ཕྱིན་པར་འདས། རེ་དགུ་པ་ཁྲི་ཆེན་བྱང་ཆུབ་ཆོས་འཕེལ། བདུན་ཅུ་པ་ཁྲི་ཆེན་ངག་དབང་ཆོས་འཕེལ། དོན་གཅིག་པ་ཁྲི་ཆེན་ཡེ་ཤེས་ཐར་འདོད། དོན་གཉིས་པ་ཁྲི་ཆེན་འཇམ་དཔལ་ཚུལ་ཁྲིམས། དོན་གསུམ་པ་ཚ་རྡོར་ངག་དབང་འཇམ་དཔལ་ཚུལ་ཁྲིམས་རྒྱ་མཚོ། དོན་བཞི་པ་བློ་བཟང་ལྷུན་གྲུབ། དོན་ལྔ་པ་ཁྲི་ཆེན་ངག་དབང་ལུང་རྟོགས་རྒྱ་མཚོ། དོན་དྲུག་པ་ཁྲི་ཆེན་བློ་བཟང་མཁྱེན་རབ་དབང་ཕྱུག དོན་བདུན་པ་ཁྲི་ཆེན་ཚུལ་ཁྲིམས་དར་རྒྱས། དོན་བརྒྱད་པ་ཁྲི་ཆེན་འཇམ་དབྱངས་དར་རྒྱས། དོན་དགུ་པ་ཁྲི་ཆེན་བློ་བཟང་སྦྱིན་པ། བརྒྱད་ཅུ་པ་ཁྲི་ཆེན་གྲགས་པ་དོན་འགྲུབ། གྱ་གཅིག་པ་ཁྲི་ཆེན་ངག་དབང་ནོར་བུ། གྱུ་གཉིས་པ་ཁྲི་ཆེན་ཡེ་ཤེས་ཆོས་འཕེལ། གྱ་གསུམ་པ་ཁྲི་ཆེན་བྱང་ཆུབ་ནམ་མཁའ། གྱ་བཞི་པ་ཁྲི་ཆེན་བློ་བཟང་ཚུལ་ཁྲིམས། གྱ་ལྔ་པ་ཁྲི་ཆེན་ཚུལ་ཁྲིམས་དཔལ་ལྡན། གྱ་དྲུག་པ་ཚེ་སྨོན་གླིང་བ་བློ་བཟང་རྒྱལ་མཚན། གྱ་བདུན་པ་ཁྲི་ཆེན་ངག་དབང་ཐུབ་བསྟན་བསྟན་པའི་རྒྱལ་མཚན། གྱ་བརྒྱད་པ་ཁྲི་ཆེན་མཁྱེན་རབ་ཡོན་ཏན། གྱ་དགུ་པ་ཁྲི་ཆེན་བློ་བཟང་སྙན་གྲགས་རྒྱ་མཚོ། དགུ་བཅུ་པ་ཁྲི་ཆེན་བྱམས་པ་ཆོས་གྲགས། གོ་གཅིག་པ་ཁྲི་ཆེན་བློ་བཟང་རྒྱལ་མཚན། གོ་གཉིས་པ་ཁྲི་ཆེན་ཐུབ་བསྟན་ཉིན་བྱེད། གོ་གསུམ་པ་ཁྲི་ཆེན་ཡེ་ཤེས་དཔལ་ལྡན། གོ་བཞི་པ་ཁྲི་ཆེན་ལྷུན་གྲུབ་བརྩོན་འགྲུས། གོ་ལྔ་པ་ཁྲི་ཆེན་བཀྲ་ཤིས་སྟོང་འདུལ། གོ་དྲུག་པ་ཁྲི་ཆེན་ཐུབ་བསྟན་ཀུན་དགའ་སྟེ། མཁས་གྲུབ་གཉིས་འཛོམས་ཀྱི་སྐྱེས་བུ་དམ་པ་དེ་དག་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ་གསེར་གྱི་ཁྲི་འཕང་མཐོན་པོར་མངའ་བསྒྱུར་ཞིང་། འཇམ་མགོན་རྒྱལ་བ་གཉིས་པའི་རྒྱལ་ཚབ་དམ་པར་དབང་བསྐུར་ཏེ་མདོ་སྔགས་ཡོངས་སུ་རྫོགས་པའི་ཆོས་ཀྱི་འཁོར་ལོ་རྒྱ་ཆེར་བསྐོར་བས། ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་བསྟན་པ་རིན་པོ་ཆེ་སྒོ་ཐམས་ཅད་ནས་ཕྱོགས་ཐམས་ཅད་དུ་དར་ཞིང་རྒྱས་པར་མཛད་དོ། །
གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་འདིར་ཤར་བྱང་གི་གྲྭ་ཚང་གཉིས་བྱུང་བ་ཡང་། སྔོན་མཁས་གྲུབ་རིན་པོ་ཆེ་དགའ་ལྡན་ཁྲིར་བཞུགས་པའི་སྐབས་སུ་ཁོང་གིས་བཤད་གྲྭའི་འཆད་ཉན་གྱི་སློབ་དཔོན་ལ་པཎ་ཆེན་པ་དང་། སྣོན་པ། ཡར་འབྲོག་པ། ཆོས་གྲགས་དཔལ་བ་དང་བཞི་བསྐོ་བཞག་གནང་སྟེ་སོ་སོས་འཆད་ཉན་མཛད་པ་ཕྱིས་སུ་ཤར་བྱང་གཉིས་སུ་བསྒྲིལ་ཏེ་ཤར་རྩེ་ལ་རྗེ་ཙོང་ཁ་པའི་དངོས་སློབ་ཤར་བ་རིན་ཆེན་རྒྱལ་མཚན་གྱིས་འཆད་ཉན་མཛད། དེ་ནས་དབོན་ཟླ་གྲགས། ཉི་གྲགས་དང་། ཆོས་རྗེ་མཚེ་མ་དབང་རྒྱལ། ཆོས་རྗེ་རྒྱལ་དབང་བ་སོགས་མཁན་བརྒྱུད་རིམ་པར་བྱོན། བྱང་རྩེ་ལ་ཧོར་སྟོན་ནམ་མཁའ་དཔལ་བས་འཆད་ཉན་མཛད། དེ་ནས་ཉན་པོ་ཆོས་ཀྱི་དབང་ཕྱུག གཉལ་སྟོན་དཔལ་འབྱོར་ལྷུན་གྲུབ་སོགས་མཁན་བརྒྱུད་རིམ་བྱོན་གྱིས་འཆད་ཉན་འཕེལ་རྒྱས་སུ་མཛད་དོ། །གོང་དུ་བཤད་པའི་དགའ་ལྡན་ཁྲི་རབས་ཞེ་ལྔ་ཡན་གྱི་རིམ་པ་འགོད་ཚུལ་ལ་མི་མཐུན་པ་འགའ་རེ་ཡོད་ཀྱང་། འདིར་བཻ་སེར་ལས་བྱུང་བ་ལྟར་བསྒྲིགས་པ་ཡིན།
རྗེ་ཐམས་ཅད་མཁྱེན་པའི་སྲས་ཀྱི་ཐུ་བོ་འདུལ་འཛིན་གྲགས་པ་རྒྱལ་མཚན་ནི། དབུས་སྟོད་སྦྲང་དུ་ཀུན་དགའ་ཞེས་པར་རབ་བྱུང་དྲུག་པའི་ཤིང་སྟག(༡༣༧༤)ལོར་འཁྲུངས། འབྲི་གུང་ཆོས་རྗེ་ལས་རབ་ཏུ་བྱུང་། འབྲི་གུང་ཉེར་གཉིས་རིན་པོ་ཆེ་སོགས་བཤེས་གཉེན་དུ་མར་བསྟེན་ནས་གཞུང་ལུགས་མཐའ་དག་ལ་སྦྱང་བ་མཐར་ཕྱིན་པ་བྱས་ཤིང་། ཁྱད་པར་དུ་རྗེ་ཐམས་ཅད་མཁྱེན་པའི་ཞབས་ལ་གཏུགས་ནས་མདོ་སྔགས་ཀྱི་གཞུང་ལུགས་སྤྱི་དང་། ཁྱད་པར་དུ་འདུལ་བའི་གཞུང་ལུགས་མཐའ་དག་མ་ཚང་བ་མེད་པར་གསན་ནས་སྡོམ་པ་གསུམ་གྱི་བཅོས་མཚམས་ཕྲ་ཞིང་ཕྲ་བ་ཚུན་ཆད་ཀྱང་ཉམས་པ་མེད་པར་ཚུལ་བཞིན་སྲུང་ཞིང་། བྱང་ཆུབ་ཀྱི་སེམས་རིན་པོ་ཆེ་ཐུགས་དམ་གྱི་མཐིལ་དུ་མཛད་པས་ལུང་དང་མངོན་པར་རྟོགས་པའི་ཡོན་ཏན་གྱི་གཏེར་ལ་མངའ་བསྒྱུར་བར་མཛད། རྗེ་བདག་ཉིད་ཆེན་པོས་བསླབ་བྱ་ཆེན་མོ་གསུང་དུས་ཞིག་ལ། འདུལ་འཛིན་པ་འདི་ལྟ་བུ་རྒྱ་གར་ནའང་དཀོན་ཞེས་བསྔགས་བརྗོད་ཆེན་པོ་གནང་། དགའ་ལྡན་རྣམ་པར་རྒྱལ་བའི་གླིང་ཕྱག་འདེབས་མཛད་ཆེ། ཆོས་རྗེ་འདུལ་འཛིན་པ་འདིས། གཙུག་ལག་ཁང་དང་། སྤོང་པ་པ་སོ་སོའི་སྤྱིལ་བུ་རྩིག་པ་སོགས་ལ་ཡང་ངལ་བ་ཁྱད་དུ་བསད་དེ་འབད་བརྩོན་ཆེན་པོའི་སྒོ་ནས་དེ་དག་རེ་རེ་ནས་འདུལ་བ་དང་མཐུན་པ་ཁོ་ན་མཛད་ཅིང་རྟེན་དང་བརྟེན་པར་བཅས་པ་ཡོངས་རྫོགས་འགྲུབ་པའི་བར་ཁུར་བཞེས་ཏེ་མཐར་ཕྱིན་པ་མཛད། རྗེ་མྱ་ངན་ལས་འདས་རྗེས་ཐུགས་ཀྱི་དགོངས་པ་རྫོགས་པའི་ཕྱིར་བཙུན་མོའི་ཚལ་དུ་དགོན་པ་བཏབ་ནས་ཚོགས་པ་བསྐྱངས་པས་དགེ་འདུན་བརྒྱད་བརྒྱ་ལྷག་འདུས། གསུང་རྩོམ་གྱི་རྣམ་གྲངས་ཀྱང་དགེ་སློང་གི་བསླབ་བྱ་ཆེན་མོ། དགེ་ཚུལ་གྱི་བསླབ་བྱ། གཞི་གསུམ་ཆོ་ག གླེང་འབུམ་སྟེ་འདུལ་བའི་ཆོས་སྐོར་མང་པོ་དང་། གཞན་ཡང་བདེ་གསང་འཇིགས་གསུམ། རྡོར་དབྱིངས། ཀུན་རིག་སོགས་ཀྱིས་སྒྲུབ་ཐབས་དང་། དཀྱིལ་ཆོག་གི་སྐོར་ལ་སོགས་པའི་བསྟན་བཅོས་དུ་མ་མཛད་པ་སོགས་བསྟན་པའི་བྱ་བ་རླབས་པོ་ཆེ་མཐའ་དག་ལེགས་པར་བསྒྲུབས་ནས་དགུང་ལོ་རེ་གསུམ་པ་རབ་བྱུང་བདུན་པའི་མེ་འབྲུག(༡༤༣༦)ལོའི་ཧོར་ཟླ་ལྔ་པའི་ཚེས་ཉི་ཤུ་ལ་བཙུན་མོའི་ཚལ་དུ་གཟུགས་སྐུའི་བཀོད་པ་བསྡུས། པཎ་ཆེན་བསོད་གྲགས་པས་དགུང་ལོ་རེ་གཅིག་པ་ཤིང་སྟག་ལ་འདས་པར་གསུངས་སོ། །
འཇམ་དབྱངས་ཆོས་ཀྱི་རྗེ་བཀྲ་ཤིས་དཔལ་ལྡན་ནི་རབ་བྱུང་དྲུག་པའི་ས་ལུག(༡༣༧༩)ལོར་བསམ་ཡས་སུ་འཁྲུངས། ཐོག་མར་རྩེད་ཐང་དུ་རབ་བྱུང་མཛད་དེ་ཆོས་གྲྭར་ཞུགས། གསང་ཕུར་གཉལ་རྒོད་རིན་བསམ་པ་དང་། ལྡན་མ་དཀོན་མཆོག་སེང་གེ་ལས་ཕར་ཚད་དང་། སྐྱོར་མོ་ལུང་དུ་མཁན་ཆེན་དཀའ་བཞི་པ་ལས་འདུལ་མངོན་སོགས་གསན། ཁྱད་པར་དུ་རྗེ་བདག་ཉིད་ཆེན་པོའི་ཞབས་ལ་གཏུགས་ཏེ་དབུ་མ་རྩ་འཇུག་གི་བཤད་པ། དྲང་ངེས། འདུལ་བ། ལམ་རིམ་ཆེ་ཆུང་། སྔགས་རིམ་ཆེན་མོ། གསང་འདུས་རྩ་རྒྱུད་འགྲེལ་པ་སྒྲོན་གསལ་དང་བཅས་པ། བཤད་རྒྱུད་ལྔ་དང་། མདོར་བྱས། མདོ་བསྲེ། རྣམ་བཞག་རིམ་པ་སོགས་དང་། བདེ་དགྱེས་ཀྱི་ཆོས་སྐོར་ཡ་ག་སྐོར་སོགས་མདོ་སྔགས་ཀྱི་གཞུང་ལུགས་ཕལ་ཆེ་བ་གསན་ཏེ་མཁྱེན་རབ་འགྲན་ཟླ་དང་བྲལ་བ་བྱུང་། མཁས་པ་ཡིད་བཟང་རྩེ་བས་ཀྱང་། རྗེ་བླ་མའི་སྲས་གཅིག་ལ་འབྲས་སྤུངས་ཆོས་རྗེ་འདི་རང་མཁྱེན་རབ་ཆེ་ཞེས་བསྔགས་པ་བརྗོད། དེ་ནས་རྗེ་ཐམས་ཅད་མཁྱེན་པ་ཉིད་ཀྱིས་མཁན་པོ། འདུལ་འཛིན་པས་ལས་སློབ། རྒྱལ་ཚབ་ཆོས་རྗེས་གསང་སྟོན་མཛད་དེ། དད་པའི་དགེ་འདུན་གྲངས་ཚང་བའི་དབུས་སུ་བསྙེན་རྫོགས་ཀྱི་སྡོམ་པ་བཞེས། དེའི་ཚེ་རྗེ་ཉིད་ཀྱིས་འགོག་པ་རིར་གཏེར་ནས་བཞེས་པའི་ཆོས་དུང་དཀར་པོ་ཆོས་རྗེ་འདི་ལ་གནང་བཞིན་ཁྱོད་ཀྱིས་ཆོས་སྡེ་ཕུན་སུམ་ཚོགས་པ་ཞིག་ཐོབ་དང་། །དགོན་མ་ལས་བུ་དགའ་བའི་དར་རྒྱས་ཆེ་བ་འོང་གསུངས་པས། སྣེའུ་དཔོན་ནམ་མཁའ་བཟང་པོས་སྦྱིན་བདག་མཛད་དེ་ཆོས་རྗེ་ཉིད་དགུང་ལོ་སོ་བརྒྱད་པ་རབ་བྱུང་བདུན་པའི་མེ་སྤྲེལ(༡༤༡༦)ལོར་དཔལ་ལྡན་འབྲས་སྤུངས་ཆོས་ཀྱི་སྡེ་ཆེན་པོ་ཕྱག་འདེབས་གནང་། དེ་ནས་ཆོས་ཐོག་ནམ་བཙུགས་སུ་ཆོས་རྗེ་རང་ཉིད་ཀྱིས་མདོ་ཕྱོགས་ཀྱི་པོ་ཏི་བརྒྱད་བརྒྱད་རང་རང་གི་འགྲེལ་པ་པོད་ཊྰིཀ་དེ་དང་སྦྱར་ནས་བཤད་པ་ཞིབ་ཅིང་གསལ་ལ་རྒྱས་པ་རེ་གནང་བས་མཁས་པ་ཀུན་གྱི་ཐུགས་རབ་ཏུ་འཕྲོག་པར་གྱུར། ཆོས་རྗེ་འདི་ཉིད་ཀྱིས་སྤྱིར་མདོ་ཕྱོགས་དང་སྔགས་ཕྱོགས་ཀྱི་གཞུང་ལུགས་པོ་ཏི་ཆེན་པོ་བརྒྱ་དང་སུམ་ཅུའི་ཚིག་དོན་མཐའ་དག་ཐུགས་ལ་བཟུང་ནས་ཐུགས་ཐོག་ཁོ་ནས་འཆད་པ་མཛད་པའི་མཁྱེན་རབ་འགྲན་ཟླལ་དང་བྲལ་བ་ཞིག་ཡིན་པར་གསུངས། གསུང་ལས་སྐྱེས་པའི་བུ་སློབ་ཡང་། མུས་སྲད་པ་བློ་གྲོས་རིན་ཆེན། ཉན་སྟོན་པ་ཤཱཀྱ་རྒྱལ་མཚན། རྗེ་སྨོན་ལམ་དཔལ་བ། སློབ་དཔོན་སྒ་ལེབ་དང་ལྟག་ལེབ་གཉིས། ལོ་ཙཱ་བ་ཤེས་རབ་རིན་ཆེན། ཆོས་རྗེ་ནམ་མཁའ་བློ་གྲོས། གཙང་བ་ཀུན་རྒྱལ་བ། གནས་བརྟན་དགེ་ལེགས་དཔལ་བ་སོགས་སྡེ་སྣོད་འཛིན་པ་མཐའ་ཡས་པ་བྱུང་། དགུང་ལོ་དོན་གཅིག་པ་ས་སྦྲུལ(༡༤༤༩)ལོའི་ས་ག་ཟླ་བའི་ཚེས་བཅོ་བརྒྱད་ལ་འབྲས་སྤུངས་སུ་ངོ་མཚར་བའི་ལྟས་དང་བཅས་མཁའ་སྤྱོད་དུ་གཤེགས་སོ། །
ཆོས་རྗེ་རང་ཉིད་གདན་སར་བཞུགས་ཏེ་འཆད་ཉན་གྱི་སློབ་དཔོན་བདུན་སོ་སོར་བསྐོས་པས་གྲྭ་ཚང་བདུན་བྱུང་སྟེ། སྒོ་མང་། བློ་གསལ་གླིང་། བདེ་ཡངས། ཤག་སྐོར། ཐོས་བསམ་གླིང་ངམ་རྒྱལ་བ། འདུལ་བ། སྔགས་གྲྭ་ཚང་བཅས་བྱུང་། ཕྱིས་སུ། སྒོ་བློ་བདེ་སྔགས་བཞིར་སྒྲིལ། གདན་ས་འཛིན་མཁན་ཡང་། ཆོས་རྗེ་སྐུ་གཤེགས་པའི་རྗེས་སུ ། ཆོས་རྗེ་དཔལ་ལྡན་སེང་གེ ཆོས་རྗེ་རིན་ཆེན་བྱང་ཆུབ། ཆོས་རྗེ་བློ་བཟང་ཉི་མ། རོང་སྟོན་བློ་བཟང་གྲགས་པ། ཉན་པོ་ཤཱཀྱ་རིན་ཆེན། རྗེ་སྨོན་ལམ་དཔལ་བ། འཇམ་དབྱངས་ལེགས་པ་ཆོས་འབྱོར་རམ་འཇམ་དབྱངས་དགའ་བློ་བ། ཆོས་རྗེ་ཡོན་ཏན་རྒྱ་མཚོ། ཐམས་ཅད་མཁྱེན་པ་དགེ་འདུན་རྒྱ་མཚོ། པཎ་ཆེན་བསོད་ནམས་གྲགས་པ། རྒྱལ་བ་བསོད་ནམས་རྒྱ་མཚོ། རྒྱལ་བ་ཡོན་ཏན་རྒྱ་མཚོ། པཎ་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན། གོང་ས་ལྔ་པ་ཆེན་པོ། དེ་ནས་རྒྱལ་དབང་སྐུ་ཕྲེང་ན་རིམ་མཁན་ཁྲིར་བཞུགས་ཤིང་འཛིན་བདག་མཛད་དེ་དག་ལྡན་བསྟན་པའི་སྲོག་ཤིང་ཆེན་པོར་གྱུར་པས་མཁས་གྲུབ་བྱེ་བའི་འབྱུང་གནས་གངས་ཅན་གྱི་ན་ལེནྡྲ་ཞེས་སྙན་པའི་གྲགས་པ་ས་སྟེང་ཡོངས་ལ་ཁྱབ་པ་འདིའོ། །
གྲྭ་ཚང་སོ་སོའི་བླ་རབས་ཀྱང་རེ་རེ་ནས་བྲིས་ན་ཡིག་ཚོགས་ཆེ་བས་གཙོ་ཆེ་བ་འགའ་ནི། བློ་གསལ་གླིང་དུ་ཐོག་མར་མཁན་ཆེན་ལེགས་ལྡན་པས་གཞུང་ལུགས་ཀྱི་བཤད་པ་མཛད། དེའི་རྗེས་ཆོས་རྗེ་གཞུ་བསོད་པ། ཆོས་རྗེ་དཔལ་ལྡན་བློ་གྲོས། ཀོང་པོ་ཚུལ་བློ་བ། ལྡན་མ་ཡེ་བཟང་བ། ཆོས་རྗེ་ལེགས་པ་དཔལ་འབྱོར། སློབ་དཔོན་སངས་རྒྱས་བཟང་པོ། སློབ་དཔོན་ཡོན་ཏན་འོད། པཎ་ཆེན་བསོད་ནམས་གྲགས་པ་སོགས་བར་མ་ཆད་དུ་བྱོན་ཏེ་འཆད་ཉན་མཛད། པཎ་ཆེན་འདི་ཉིད་ནི་དགའ་ལྡན་ཁྲི་ཐོག་བཅོ་ལྔ་པར་བཞུགས་ཤིང་རྒྱལ་བ་བསོད་ནམས་རྒྱ་མཚོའི་མཁན་པོ་མཛད་པ་སོགས་འཕྲིན་ལས་ཧ་ཅང་རྒྱས། ལྷག་པར་མདོ་སྔགས་ཀྱི་གཞུང་ལུགས་སྤྱི་དང་གཞུང་ཆེན་པོ་ཏི་ལྔའི་ཡིག་ཆ་གསར་པ་ཁ་ཚང་ལྗགས་རྩོམ་གནང་བས་ཡིག་ཆ་འདི་ནི་དེང་སང་གི་བར་བློ་གསལ་གླིང་གི་འཆད་ཉན་གྱི་གཞུང་གཙོ་བོར་བྱེད་པར་མ་ཟད། མདོ་སྟོད་སྨད་ཀྱི་ཆོས་སྡེ་ཆེན་པོ་དུ་མར་ཁྱབ་བརྡལ་དུ་འཕེལ་བས་འཕྲིན་ལས་ཤིན་ཏུ་རྒྱས། སྒོ་མང་གྲྭ་ཚང་དུ་ཐོག་མར་ཆོས་རྗེ་རིན་ཆེན་བྱང་ཆུབ། མཁས་པ་སྒ་ལེབ་ལྟག་ལེབ་གཉིས། གུང་རུ་ཚུལ་བཟང་བ། ཆེན་པོ་དཔལ་ཤེས་པ། སློབ་ཆུང་ཀུན་རྒྱལ་བ། མཁན་ཆེན་དབང་དཔལ་བ། སློབ་དཔོན་དཔལ་བློ་ཤེར་བློ། ཅོ་ནེ་ཕྱོགས་ལས་རྣམ་རྒྱལ། གུང་རུ་ཆོས་ཀྱི་འབྱུང་གནས ཆུ་བཟང་བྱམས་པ་ལྷུན་གྲུབ་སོགས་རིམ་པར་བྱོན་པའི་རྗེས་སུ། ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ་ཞེས་མཁས་པའི་སྙན་པ་ས་གསུམ་དུ་གྲགས་པ། འཕགས་ཡུལ་གྱི་འཛམ་གླིང་མཛེས་པའི་རྒྱན་དུ་གྱུར་པའི་པཎྜི་ཏ་ཆེན་པོ་དང་སྒོ་ཐམས་ཅད་ནས་མཚུངས་པའི་མཁས་གྲུབ་ཆེན་པོ་དེ་ཉིད་ཆོས་ཀྱི་མཁན་ཁྲིར་བཞུགས་ནས། མདོ་སྔགས་ཀྱི་གཞུང་ལུགས་སྤྱི་དང་ཁྱད་པར་དུ་གཞུང་ཆེན་པོ་ཏི་ལྔའི་མཐའ་དཔྱོད་ཀྱི་ཡིག་ཆ་གསར་པ་སྔོན་མེད་ལེགས་བཤད་ཀྱི་གཏེར་དུ་གྱུར་པ་མཛད་པས། དེང་སང་གི་བར་དུ་སྒོ་མང་གྲྭ་ཚང་གི་འཛིན་ཆོས་ཡིག་ཆ་འདི་ཁོ་ན་བྱེད་ལ། དེར་མ་ཟད་མདོ་དབུས་ཀྱི་རིགས་པ་སྨྲ་བ་མཐའ་དག་གིས་ཐོས་བསམ་གྱི་གཞིར་བྱེད་པར་བརྟེན། ཡིག་ཆ་གཞན་ལས་ཁྱད་པར་འཕགས་ཞེས་ཐུའུ་བཀྭན་ཆོས་ཀྱི་ཉི་མས་བསྔགས་བརྗོད་ཀྱི་མེ་ཏོག་འཐོར་བ་དེ་ལྟར་ཡིན། བདེ་ཡངས་གྲྭ་ཚང་དུ། ཐོག་མར་ལྕོག་པ་བྱང་དཔལ་བས་འཆད་ཉན་མཛད། དེ་ནས་དྲུང་ཆོས་དཔལ་བ་དང་། གྲྭ་ཆུང་ཡོན་ཏན་རྒྱལ་མཚན། མཁས་པ་མཚེ་མ་དབང་རྒྱན། དཀའ་བཅུ་པ་བརྩོན་འགྲུས་སེང་གེ བླ་མ་བློ་སེང་བ། དྲུང་ནམ་མཁའ་བ། བླ་མ་བཀྲས་རྒྱམ་པ། དྲུང་རིན་དར་བ། ཆེན་པོ་རྒྱལ་མཚན་ལེགས་པ་སོགས་མཁན་བརྒྱུད་རིམ་པས་བྱོན་པས་འཆད་ཉན་མཛད། སྔགས་པ་གྲྭ་ཚང་དུ། སློབ་དཔོན་རྒྱན་ཚུལ་བ། སློབ་དཔོན་སྦྱིན་མཆོག་པ། དྲུང་རིན་མཆོག་པ། སློབ་དཔོན་དཔལ་མགོན་རྒྱལ་མཚན་སོགས་མཁན་བརྒྱུད་རིམ་བྱོན་གྱིས་འཆད་ཉན་མཛད་པས་མདོ་སྔགས་བཤད་སྒྲུབ་ཀྱི་བསྟན་པ་དབྱར་མཚོ་ལྟར་འཕེལ་རྒྱས་བྱུང་བ་འདིའོ། །
བྱམས་ཆེན་ཆོས་རྗེ་ཤཱཀྱ་ཡེ་ཤེས་པ་ནི་རབ་བྱུང་དྲུག་པའི་ཤིང་རྟ(༡༣༥༤)ལོར་གུང་ཐང་ཚལ་དུ་དཔོན་རྒྱུད་ཀྱི་རིགས་སུ་སྐུ་འཁྲུངས། སུམ་པའི་ཆོས་འབྱུང་དུ་ཆུ་ཕག་ལོར་འཁྲུངས་པར་བཤད། སྔོན་གྱི་སྐྱེ་གནས་རྗེས་སུ་དྲན་པ་སོགས་ལུང་དང་རྟོགས་པའི་ཡོན་ཏན་ལ་མངའ་བརྙེས། ཁྱད་པར་དུ་རྒྱལ་ཆེན་རྣམ་ཐོས་སྲས་ཀྱིས་རྗེས་སུ་བཟུང་ཞིང་གནམ་བསྐོས་འཇམ་དབྱངས་གོང་མ་ཆེན་པོ་ཡུང་ལོ་ནས་རྒྱ་ནག་ཏུ་གདན་དྲངས་པ་ལྟར་རབ་བྱུང་བདུན་པའི་ས་བྱི(༡༤༠༨)ལོར་རྗེ་ཐམས་ཅད་མཁྱེན་པའི་ཚབ་ཏུ་ཆོས་རྗེ་ཉིད་ལྷོ་རྒྱུད་ཁམས་ཕྱོགས་ལི་ཐང་བརྒྱུད་དེ་རྒྱ་ནག་གོང་མའི་ཕོ་བྲང་དུ་བྱོན། ཡུང་ལོ་རྒྱལ་པོ་དང་མཇལ་ཏེ་ཆོས་ཀྱི་བདུད་རྩི་བསྩལ་བས་གོང་མ་ཆེན་པོ་ཡབ་སྲས་གཉིས་ཀྱི་དབུ་བླར་བཀུར། རྒྱ་ནག་གི་ཡུལ་གྲུ་ཀུན་ཏུ་རྗེ་བླ་མའི་རང་ལུགས་རྣམ་པར་དག་པ་དར་བའི་དབུ་ཚུགས་ཏེ་སླར་བོད་དུ་བྱོན། རྗེ་ཐམས་ཅད་མཁྱེན་པས་བཀའ་གནང་བ་བཞིན་རབ་བྱུང་བདུན་པའི་ས་ཕག(༡༤༡༩)ལོར་སེ་ར་ཐེག་ཆེན་གླིང་ཕྱག་འདེབས་མཛད་དེ་འཆད་ཉན་གྱིས་ལེགས་པར་བསྐྱངས། དེའི་ཚེ་སླར་ཡང་གོང་མ་ཆེན་པོའི་གདན་ཞུ་བ་འབྱོར་པས་ས་བྱ(༡༤༢༩)ལོར་ཆོས་རྗེ་ཉིད་ཀྱི་རྒྱལ་ཚབ་ཏུ་དཀའ་བཅུ་པ་དར་རྒྱས་བཟང་པོ་མཁན་ཁྲི་བསྐོ་བཞག་གནང་སྟེ་རང་ཉིད་སླར་རྒྱ་ནག་ཏུ་བྱོན། གནམ་བསྐོས་འཇམ་དབྱངས་གོང་མ་ཆེན་པོ་མེན་ཁྲེང་ཙུང་གིས་ཆོས་རྗེ་ཤཱཀྱ་སེང་གེ་ལ། ནུབ་ཕྱོགས་ཀྱི་ལྷའི་སྲས་པོ་ཏཱ་གུའུ་ཤྲཱི་ཞེས་པའི་ཆོ་ལོ་གནང་ཞིང་ཆོས་ཀྱི་འཁོར་ལོ་རྒྱ་ཆེར་བསྐོར་ཏེ་འགྲོ་བ་རྣམས་སྨིན་གྲོལ་གྱི་ལམ་ལ་འགོད་པར་མཛད་ནས། དགུང་གྲངས་གྱ་གཉིས་པར་སླར་བོད་དུ་ཕེབས་པའི་ལམ་མཛོ་མཁར་དུ་ཤིང་ཡོས(༡༤༣༥)ལོའི་ཧོར་ཟླ་བཅུ་པའི་ཚེས་ཉེར་བཞི་ལ་སྐུ་གཤེགས་པར་ཡོངས་འཛིན་ཡེ་ཤེས་རྒྱལ་མཚན་གྱིས་གསུངས་ཤིང་། རྒྱའི་ཡིག་ཚང་དང་སོག་པོའི་ཆོས་འབྱུང་སོགས་ནས་བཤད་པ་དང་མཐུན། སྐྱབས་རྗེ་ཕུར་ལྕོག་རིན་པོ་ཆེ་ནས་དགུང་ལོ་རེ་བརྒྱད་པ་ལྕགས་སྟག་ལོའི་ཟླ་བ་བདུན་པའི་ཚེས་བཅུ་ལ་འདས་པར་གསུངས་ཀྱང་ལོ་ཁམས་མི་འག གསུང་ལས་སྐྱེས་པའི་བུ་སློབ་ཡང་སྙེ་ཐང་བ་ཆོས་རྗེ་ཨ་མོ་གྷ་བ་དང་། ཆོས་རྗེ་བསོད་ནམས་ཤེས་རབ་སོགས་མང་དུ་བྱོན་ཀྱང་། འདི་རྣམ་པ་གཉིས་གནམ་བསྐོས་གོང་མ་ཏཱ་མིང་ཡུང་ལོའི་སྲས་ཟོན་ཏེ་རྒྱལ་པོའི་དབུ་བླ་མཛད་པ་སོགས་ལུགས་གཉིས་ཀྱི་འཕྲིན་ལས་ཧ་ཅང་རྒྱས། དམ་པ་འདིའི་གདན་ས་སྐྱོང་བའི་མཁན་རབས་ཀྱང་ཆོས་རྗེ་དར་རྒྱས་པའི་རྗེས་སུ་མཚུངས་མེད་ཆོས་རྗེའམ་གུང་རུ་རྒྱལ་མཚན་བཟང་པོས་འཆད་ཉན་མཛད། དེ་ནས་ཞ་ལུ་རབ་འབྱམས་པ་བཀྲ་ཤིས་རྒྱ་མཚོ། ཆོས་རྗེ་མུས་སྲད་པ། ཆོས་རྗེ་གནས་བརྟན་པ། ལྷ་ཕུ་ཆོས་རྗེ། གཉལ་སྟོན་དཔལ་འབྱོར་ལྷུན་གྲུབ། མང་ཐོས་དཔལ་ལྡན་བློ་གྲོས། འཇམ་དབྱངས་དོན་ཡོད་དཔལ་ལྡན། རྒྱལ་བ་དགེ་འདུན་རྒྱ་མཚོ། རྗེ་བཙུན་ཆོས་ཀྱི་རྒྱལ་མཚན། འདི་བ་ནི་རིགས་པའི་དབང་ཕྱུག་འགྲན་ཟླ་དང་བྲལ་བ་ཞིག་སྟེ། ཁོང་གིས་དབུ་ཕར་དང་ཚད་མ་ལ་སོགས་པའི་ཡིག་ཆ་མང་པོ་མཛད་ཅིང་། སེར་བྱེས་དང་དགའ་བྱང་སོགས་སུ་དེང་སང་གི་བར་དུ་ཡིག་ཆ་འདིའི་སྟེང་ནས་འཆད་ཉན་མཛད་པ་དང་། ལྷག་པར་མདོ་དབུས་ཁམས་གསུམ་གྱི་ཆོས་སྡེ་ཆེན་པོ་དུ་མར་ཡིག་ཆ་འདིའི་སྟེང་ནས་འཆད་ཉན་གྱི་རྒྱུན་སྐྱོང་བར་མཛད་པས་འཕྲིན་ལས་ཆེས་ཆེར་འཕེལ་བ་བྱུང་། དེའི་རྗེས་སུ་པཎ་ཆེན་བསོད་ནམས་གྲགས་པ། ཆོས་རྗེ་གྲགས་བཟང་པ། རྒྱལ་བ་བསོད་ནམས་རྒྱ་མཚོ། སྟོང་འཁོར་ཡོན་ཏན་རྒྱ་མཚོ། རྒྱལ་བ་ཡོན་ཏན་རྒྱ་མཚོ། པཎ་ཆེན་བློ་བཟང་ཆོས་རྒྱན། རྒྱལ་དབང་ལྔ་པ་ཆེན་པོ་སྟེ། དེ་ནས་བཟུང་རྒྱལ་དབང་སྐུ་ཕྲེང་རིམ་བྱོན་གྱིས་འཛིན་བདག་མཛད། ཆོས་སྡེ་འདི་ལ་ཐོག་མར་གྲྭ་ཚང་ལྔ་ཡོད་ཀྱང་ཕྱིས་སུ་བྱེས་པ་དང་སྨད་པ་གྲྭ་ཚང་གཉིས་སུ་སྒྲིལ། དེ་ཡང་གུང་རུ་རྒྱལ་མཚན་བཟང་པོས་གདན་ས་སྐྱོང་སྐབས་གྲྭ་ཚང་སོ་སོར་འཆད་ཉན་བྱེད་མཁན་གྱི་སློབ་དཔོན་བསྐོ་བཞག་གནང་སྟེ། རྒྱ་གྲྭ་ཚང་དུ་ཆོས་རྗེ་འཇམ་དབྱངས་འཕགས་པ་དང་། འབྲོམ་སྟེང་གྲྭ་ཚང་དུ་དྲུག་བརྒྱ་དཔོན་པོ། སྟོད་གྲྭ་ཚང་དུ་གུང་རུ་རྒྱན་བཟང་བ་ཉིད་ཀྱིས་འཆད་ཉན་མཛད། དེ་ནས་རྒྱ་དང་། འབྲོམ་སྟེང་གཉིས་སྟོད་གྲྭ་ཚང་དུ་དྲིལ་ནས་ཆེན་པོ་ཤེར་རྒྱམ་པ་དང་། གུང་རུ་ཆོས་བློ་བ། དཔོན་ཤཱཀྱ་བཟང་པོ་སོགས་ཀྱིས་བར་མ་ཆད་པར་འཆད་ཉན་གྱིས་བསྐྱངས། དེའི་ཚེ་འཇམ་དབྱངས་ཆོས་རྗེའི་སློབ་མ་མུས་སྲད་པ་བློ་གྲོས་རིན་ཆེན་སེང་གེ་འབྲས་སྤུངས་སུ་བཞུགས་པ་ལ། འགའ་ཞིག་གིས་ལོག་སྒྲུབ་བགྱིས་པས་ཐུགས་སུན་ཏེ་འབྲས་སྤུངས་སུ་བཞུགས་མ་སྤྲོ་བར་སེ་རར་ཕེབས་པ་ན། འབྲས་སྤུངས་ནས་ཁོང་གི་སློབ་མ་མཁས་པ་བརྒྱ་ཕྲག་ལྷག་ཙམ་ཞིག་ཁོང་གི་སྐུ་རྗེས་འབྲངས་ཏེ་བྱོན་པ་དང་སེ་རའི་རྒྱ་དང་། འབྲོམ་སྟེང་། སྟོད་པའི་མཁས་པ་ཕལ་ཆེར་འདུས་པ་ལ་དབུ་ཕར་དང་ཚད་མ་སོགས་ཀྱི་འཆད་ཉན་རྒྱ་ཆེར་གནང་བས་བྱེས་པ་གྲྭ་ཚང་དུ་གྲགས། སྨད་གྲྭ་ཚང་དུ་ཀུན་མཁྱེན་བྱང་ཆུབ་འབུམ་པའམ་བྱང་ཆུབ་འོད་ཟེར། ཆོས་རྗེ་བརྩོན་འགྲུས་བཟང་པོ། སློབ་དཔོན་ཤཱཀྱ་བཀྲས་པ། མཚེ་མ་དབང་རྒྱལ་བ། ཆེན་པོ་ཚུལ་རྒྱལ་བ། ཆེན་པོ་བཟང་པོ་དཔལ་བ་སོགས་མཁན་ཁྲིར་རིམ་པར་བྱོན་ནས་འཆད་ཉན་རྒྱ་ཆེར་མཛད། རྗེས་སུ་རྒྱལ་པོ་ལྷ་བཟང་གིས་སྔགས་པ་གྲྭ་ཚང་འཛུགས་པ་མཛད། འཆད་ཉན་གྱི་ཡིག་ཆ་ཡང་བྱེས་པ་གྲྭ་ཚང་རྗེ་བཙུན་ཆོས་ཀྱི་རྒྱལ་མཚན་དང་། སྨད་པ་གྲྭ་ཚང་དུ་དགའ་ལྡན་ཁྲི་ཐོག་ཉེར་གཉིས་པ་དགེ་འདུན་བསྟན་དར་གྱི་ཡིག་ཆ་གཙོ་བོར་བྱས་ཏེ་འཆད་ཉན་མཛད་ནས་རི་བོ་དགེ་ལྡན་པའི་བསྟན་པ་འཛིན་པའི་མཁས་གྲུབ་བྱེ་བའི་འབྱུང་གནས་དམ་པར་གྱུར་ཏོ། །
ཐམས་ཅད་མཁྱེན་པ་དགེ་འདུན་གྲུབ་ནི་རབ་བྱུང་བདུན་པའི་ལྕགས་ལུག(༡༣༩༡)ལོར་གཙང་གི་ཤབ་སྟོད་དུ་སྐུ་འཁྲུངས། སྣར་ཐང་དུ་མཁན་པོ་གྲུབ་པ་ཤེས་རབ་ལས་རབ་ཏུ་བྱུང་བ་དང་བསྙེན་རྫོགས་ཀྱི་སྡོམ་པ་རིམ་པར་བཞེས། ཁྲ་འབྲུག་དགོན་པར་ཕེབས་ནས་ཆོས་རྗེ་ཀུན་བཟང་ལ་དབུ་ཚད་སོགས་གསན་ཏེ་ཐུགས་སྦྱོང་མཛད། དེ་ནས་དབུས་སུ་ཕེབས་ཏེ་བཀྲ་ཤིས་དོ་ཁར་རྗེ་བདག་ཉིད་ཆེན་པོ་དང་མཇལ་བ་ནས་བཟུང་ཐུགས་ཀྱི་ཟེའུ་འབྲུ་ལྟ་བུར་བཟུང་སྟེ་མདོ་སྔགས་ཀྱི་ཆོས་མང་དུ་གསུངས། གཞན་ཡང་སེམས་དཔའ་ཆེན་པོ་ཀུན་བཟང་བ་དང་། རྗེ་ཤེས་རབ་སེང་གེ་རྒྱལ་ཚབ་ཐམས་ཅད་མཁྱེན་པ། མཁས་གྲུབ་རིན་པོ་ཆེ་སོགས་ཀྱི་དྲུང་དུ་མཚན་ཉིད་དང་སྔགས་ཀྱི་གཞུང་ལུགས་མཐའ་དག་གསན་ཏེ་མཁས་པའི་ཕ་རོལ་ཏུ་སོན་པས་སྙན་གྲགས་ཕྱོགས་བཅུར་ཁྱབ། སླར་ཡང་གཙང་ལ་བྱོན་ནས་སྣར་ཐང་བྱམས་ཆེན་དུ་སྐུ་མཚམས་ཡུན་རིང་དུ་བཅད་ནས་བཞུགས། དགུང་ལོ་ང་བདུན་པ་རབ་བྱུང་བརྒྱད་པའི་མེ་ཡོས(༡༤༤༧)ལོར་བཀྲ་ཤིས་ལྷུན་པོ་དཔལ་གྱི་བདེ་ཆེན་ཕྱོགས་ཐམས་ཅད་ལས་རྣམ་པར་རྒྱལ་བའི་གླིང་བཏབ་སྟེ་གཙང་ཕྱོགས་ཀྱི་སྡེ་སྣོད་འཛིན་པ་ཕལ་ཆེ་བ་དེར་འདུས་པ་ལ་རྗེ་ཡབ་སྲས་གསུམ་གྱི་གཞུང་ལུགས་ཐང་མར་བརྡལ་ཏེ་གཞུང་ཆེན་བཀའ་པོད་ལྔའི་བཤད་པ་རྒྱ་ཆེར་གནང་བ་སོགས་གཙང་ཕྱོགས་སུ་རྗེ་ཙོང་ཁ་པའི་བསྟན་པ་དར་ཞིང་རྒྱས་པར་མཛད། གསུང་ལས་སྐྱེས་པའི་བུ་སློབ་ཡང་རྗེ་སྨོན་ལམ་དཔལ་བ། འདུལ་དཀར་བ་བྱང་ཆུབ་སེམས་དཔའ། འདུལ་ནག་པ་དཔལ་ལྡན་བཟང་པོ། བྱ་བཏང་སེམས་དཔའ་ཆེན་པོ། པཎ་ཆེན་བཟང་པོ་བཀྲ་ཤིས། རྒྱུད་སྡེ་འཛིན་པ་སྦྱིན་པ་དཔལ་བ། རྒྱུད་སྡེ་འཛིན་པ་གྲགས་བཟང་བ། རྒྱུད་སྡེ་འཛིན་པ་ཀུན་དགའ་དོན་གྲུབ། པཎ་ཆེན་ལུང་རིགས་རྒྱ་མཚོ། གནས་རྙིང་བ་ཀུན་དགའ་བདེ་ལེགས། བྱང་བ་བློ་གྲོས་མགོན་པོ། པཎ་ཆེན་ཡེ་ཤེས་རྩེ་མོ། ཆོས་རྗེ་རྟ་ནག་པ་སོགས་སློབ་མ་མཁས་གྲུབ་གཉིས་འཛོམས་ཀྱི་སྐྱེས་བུ་དམ་པ་བསམ་གྱིས་མི་ཁྱབ་པ་མང་དུ་བྱུང་། བསྟན་བཅོས་ཀྱི་རྣམ་གཞག་ཀྱང་རྣམ་འགྲེལ་ཊྰིཀ་ཆུང་། སྤྱི་དོན་རིགས་རྒྱན། འདུལ་ཊྰིཀ་ཆེན་མོ་བཅས་བཀའ་རྩོམ་མང་པོ་གནང་བ་སོགས་བསྟན་པའི་བྱ་བ་རྒྱ་ཆེར་མཛད་ནས་དགུང་ལོ་གྱ་བཞི་པ་རབ་བྱུང་བརྒྱད་པའི་ཤིང་རྟ(༡༤༧༤)ལོའི་ཟླ་བ་བཅུ་གཉིས་པའི་ཚེས་བརྒྱད་ལ་ངོ་མཚར་བའི་ལྟས་དང་བཅས་སྐུ་གཤེགས། གདན་སར་པཎ་ཆེན་བཟང་པོ་བཀྲ་ཤིས་བཞུག་སྟེ་འཆད་ཉན་གྱིས་ལེགས་པར་བསྐྱངས། དེ་ནས་པཎ་ཆེན་ལུང་རིགས་རྒྱ་མཚོ། པཎ་ཆེན་ཡེ་ཤེས་རྩེ་མོ། འདིའི་དུས་སུ་རྒྱལ་བ་དགེ་འདུན་རྒྱ་མཚོ་བཀྲ་ཤིས་ལྷུན་པོར་བཞུགས་པ་ལ། པཎ་ཆེན་ཡེ་ཤེས་རྩེ་མོས་ཕྲག་དོག་གི་རྣམ་པ་མཛད་པས་རྒྱལ་བ་མ་བཞུགས་པར་འབྲས་སྤུངས་སུ་ཕེབས། དེ་ནས་ཆོས་འཁོར་རྒྱལ་གྱི་དགོན་པ་ཕྱག་འདེབས་མཛད་པ་སོགས་འཕྲིན་ལས་ཤིན་ཏུ་རྒྱས་པའི་སྐབས། པཎ་ཆེན་ཡེ་ཤེས་རྩེ་མོས་སླར་བཟོད་གསོལ་དང་བཅས་ནན་གྱིས་གསོལ་བ་བཏབ་པ་ལ་བརྟེན་ནས་རྒྱལ་བ་དགེ་འདུན་རྒྱ་མཚོ་བཀྲ་ཤིས་ལྷུན་པོའི་གདན་སར་ལོ་བཞི་ཙམ་ལ་བཞུགས་ཏེ་སླར་འབྲས་སྤུངས་སུ་ཕེབས། དེ་ནས་མངའ་རིས་ལྷ་བཙུན་བསྟན་པའི་ཉི་མ། པཎ་ཆེན་བློ་གྲོས་རྒྱལ་མཚན། པཎ་ཆེན་དོན་ཡོད་རྒྱ་མཚོ། ཤངས་སྟོན་བློ་གྲོས་ལེགས་བཟང་། གནས་རྙིང་བ་ཆོས་ཀྱི་རྒྱལ་མཚན། ཤངས་སྟོན་ཆོས་དཔལ་བ། ཕྱུག་གཞུང་བ་བསོད་ནམས་རྒྱལ་མཚན། ཤངས་སྟོན་བསམ་བཟང་བ། ཉང་སྟོད་དམ་ཆོས་པ། མྱང་སྟོན་ལྷ་དབང་བློ་གྲོས། པཎ་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན་ཏེ། དེ་ནས་ཀུན་གཟིགས་པཎ་ཆེན་ཐམས་ཅད་མཁྱེན་པའི་སྐུ་འཕྲེང་ན་རིམ་གྱིས་གདན་ས་མཛད་དེ་འཇམ་མགོན་བློ་བཟང་གྲགས་པའི་མདོ་སྔགས་ཟུང་འབྲེལ་གྱི་བསྟན་པ་རིན་པོ་ཆེ་ཕྱོགས་ཐམས་ཅད་ནས་དར་ཞིང་རྒྱས་ལ་ཡུན་རིང་དུ་གནས་པར་བྱས་པ་འདི་ལགས་སོ། །
ཆོས་སྡེ་འདི་ལ་ཐོག་མར་གྲྭ་ཚང་གསུམ་བྱུང་བས་ཤར་རྩེར་འཆད་ཉན་བྱེད་པ་པོ་ཤངས་སྟོན་དྲི་མེད་བཤེས་གཉེན། ཆོས་རྗེ་སྟོབས་ལྡན་པ། དྲུང་ཚུལ་ལེགས་པ། དཀའ་བཞི་པ་ཆོས་གྲགས། སློབ་དཔོན་བློ་གྲོས་རྒྱ་མཚོ་སོགས་རིམ་པར་བྱོན། ཐོས་བསམ་གླིང་དུ་ཐོག་མར་ཀུན་མཁྱེན་ཆོས་འབྱོར་དཔལ་བཟང་། མང་ཐོས་བློ་བཟང་བཤེས་གཉེན། ལྕི་ལུང་རབ་འབྱམས་པ་བློ་བཟང་། ཁྱུང་ཕྱུག་བྱམས་པ་བཀྲ་ཤིས་སོགས་རིམ་པར་བྱོན། དཀྱིལ་ཁང་དུ་ཐོག་མར་སློབ་དཔོན་དཔལ་ཆོས་པ། སངས་རྒྱས་དཔལ་རིན་པ། སློབ་དཔོན་སངས་རྒྱས་དབང་ཕྱུག དྲུང་ཆོས་གྲགས་པ། ཆོས་རྗེ་ལྷ་བཙུན་པ། རབ་འབྱམས་པ་བསྟན་པ། རབ་འབྱམས་པ་དགེ་འདུན་དོན་གྲུབ། རབ་འབྱམས་པ་ཤནྟི་བ་སོགས་རིམ་པར་བྱོན་ཏེ་འཆད་ཉན་རྒྱ་ཆེར་མཛད། རྒྱལ་བ་དགེ་འདུན་གྲུབ་ཀྱིས་སྔགས་གྲྭ་ཞིག་འཛུགས་པའི་དགོངས་པ་ཡོད་ཀྱང་མ་འགྲུབ་པ་ལ། ཕྱིས་སུ་པཎ་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན་གྱིས་སྔགས་གྲྭ་གསར་འཛུགས་གནང་བས་སྔགས་ཆེན་རྡོ་རྗེ་འཛིན་པ་དཀོན་མཆོག་རྒྱལ་མཚན་སོགས་མཁས་ཤིང་གྲུབ་པའི་དབང་ཕྱུག་མང་དུ་བྱོན་ནོ། །དེ་ལྟར་དབུས་གཙང་གི་ཆོས་སྡེ་ཆེན་པོ་བཞི་ལ་བརྟེན་ནས་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་སྟེ་བོད་གངས་ཅན་གྱི་མཐའ་དབུས་ཀུན་ཏུ་རི་བོ་དགེ་ལྡན་པའི་དགོན་སྡེ་མང་དུ་འཕེལ་ཞིང་འཇམ་མགོན་བླ་མ་བློ་བཟང་གྲགས་པའི་བཤད་སྒྲུབ་ཀྱི་བསྟན་པ་རིན་པོ་ཆེ་འཛམ་གླིང་གི་ཁྱོན་ཡོངས་སུ་ཁྱབ་བོ། །
ད་ནི་རྗེ་ཙོང་ཁ་པ་ཆེན་པོའི་གསང་སྔགས་ཀྱི་བསྟན་པ་ཇི་ལྟར་དར་བའི་ཚུལ་ནི། རྗེ་བླ་མ་ལ་བུ་སློབ་གནམ་གྱིས་ས་བཀབ་པ་ལྟ་བུ་བྱོན་པ་དེ་དག་གི་ཁྲོད་ན་གསང་སྔགས་ཀྱི་ལམ་ཉམས་སུ་བཞེས་པས་རྟོགས་པའི་གོ་འཕང་མཐོན་པོར་མངའ་བརྙེས་པ་དང་། གཞན་ལ་འཆད་པའི་སྒོ་ནས་སྣོད་ལྡན་གྱི་སློབ་མ་རིང་དུ་བསྐྱངས་པའི་མཁས་གྲུབ་གཉིས་འཛོམས་ཀྱི་སྐྱེས་བུ་དམ་པ་བསམ་གྱིས་མི་ཁྱབ་པ་བྱུང་ཡང་། གསང་སྔགས་ཀྱི་བསྟན་པའི་འབྱུང་ཁུངས་སུ་གྱུར་པ་འདུས་པའི་བཀའ་བབ་ནི་རྗེ་བཙུན་ཤེས་རབ་སེང་གེ་ཡིན་ཏེ། དེ་ནི་གཙང་སྟོད་སྲད་ཀྱི་གུར་མ་ཞེས་བྱ་བར་སྐུ་འཁྲུངས། དགུང་ལོ་བཅུ་བཞིའི་སྟེང་སྣར་ཐང་དུ་མཁན་ཆེན་གྲུབ་པ་ཤེས་རབ་ལས་རབ་བྱུང་དང་དགེ་ཚུལ་གྱི་སྡོམ་པ་བཞེས་པས་མཚན་ལ་ཤེས་རབ་སེང་གེ་ཞེས་གསོལ། དེ་ནས་མཁན་རིན་པོ་ཆེ་དེ་དང་ལྷག་པར་གཡག་ཕྲུག་སངས་རྒྱས་དཔལ་བ་ལས་བྱམས་ཆོས་དང་། དབུ་མ་རིགས་ཚོགས་དྲུག འཇུག་པ་རྩ་འགྲེལ། སྤྱོད་འཇུག་ཚད་མ་མདོ་དང་སྡེ་བདུན་སོགས་ལ་སྦྱང་བ་ཕུལ་དུ་ཕྱིན་པ་མཛད། དགུང་ལོ་ཉི་ཤུའི་སྟེང་སྣར་ཐང་དུ་མཁན་ཆེན་ལས་བསྙེན་རྫོགས་ཀྱི་སྡོམ་པ་བཞེས། དེའི་ཚེ་སྔོན་གྱི་ཐུགས་བསྐྱེད་དང་སྨོན་ལམ་གྱི་མཐུས་རྗེ་ཙོང་ཁ་པ་ཆེན་པོའི་མཁས་པའི་སྙན་གྲགས་གསན་པས་རྐྱེན་བྱས་པས་དབུས་སུ་བྱོན་ཏེ། དགའ་ལྡན་དུ་རྗེ་ཡབ་སྲས་ཀྱི་ཞབས་ལ་གཏུགས་ནས་གསུང་རབ་སྤྱི་དང་ཁྱད་པར་དུ་དཔལ་གསང་བ་འདུས་པའི་རྩ་བཤད་འགྲེལ་པ་ཆ་ལག་དང་བཅས་པ་ཚང་བར་གསན་ཞིང་རྒྱུད་དོན་མཐའ་དག་ཐུགས་ལ་བྱང་ཆུད་པ་བྱུང་བས་མཁས་པའི་སྙན་གྲགས་རྒྱས། ཕྱིས་སུ་སེ་ར་ཆོས་སྡིངས་སུ་རྗེ་ཐམས་ཅད་མཁྱེན་པས་རྒྱུད་ཀྱི་འཆད་ཉན་མཛད་སྐབས་འགྲེལ་པ་བཞི་སྦྲགས་ཀྱི་དཔེ་ཕྱག་ཏུ་བསྣམས་ནས། ཁྱེད་ཅག་མཁས་པ་རྣམས་ཀྱི་ཁྲོད་ན་དཔལ་གསང་བ་འདུས་པའི་རྒྱུད་ཀྱི་བཤད་སྲོལ་འཛིན་ནུས་པ་སུ་ཡོད་ཅེས་བཀའ་འདྲི་ལན་གསུམ་མཛད་པ་ན། མཁས་པ་སུས་ཀྱང་གསུང་ལན་འབུལ་མ་ནུས་པའི་ཚེ། ཆོས་རྗེ་འདི་ཉིད་ཀྱིས་དེ་བདག་གིས་བྱའོ་ཞེས་ཕྱག་དང་བཅས་ཏེ་བཀའ་སྤྱི་བོས་མནོས་པ་ལ། རྗེ་བདག་ཉིད་ཆེན་པོ་ཐུགས་ཤིན་ཏུ་དགྱེས་ནས་གསང་བ་འདུས་པའི་གསེར་སྐུ། འགྲེལ་པའི་གླེགས་བམ། ཆོས་རྒྱལ་གྱི་ཞལ་འབག འཆམ་གོས། དབྱུག་ཞགས་བཅས་གནང་ཞིང་གསང་སྔགས་ཀྱི་བསྟན་པའི་བདག་པོར་མངའ་གསོལ་ཏེ། ཞལ་ནས། ཁྱོད་སྐྲག་མི་དགོས་ངས་ཆོས་རྒྱལ་ལ་གཏོད་པ་ཡིན། ཁྱོད་རང་གཙང་དུ་སོང་དང་། རི་དྲིལ་བུ་ཁ་སྦུབ་པ་འདྲ་བའི་སྟེང་ན་གཤིན་རྗེ་གཤེད་ཀྱི་རྣལ་འབྱོར་པ་ཡོད། དེས་ཁྱོད་ཀྱི་བསྟན་པ་སྤེལ་བར་བྱེད། རི་སྲིན་མོ་གན་རྐྱལ་དུ་བསྒྱེལ་བ་འདྲ་བའི་སྟེང་ན་གནོད་སྦྱིན་མོ་ཡོད། དེས་ཀྱང་ཁྱོད་ཀྱི་བསྟན་པ་སྤེལ་བར་བྱེད། དེའི་ཚེ་ཁྱོད་རང་གིས་ཀྱང་ཤེས་ཡོང་ཞེས་ལུང་བསྟན་གནང་། དེ་ནས་རྗེ་དགེ་འདུན་གྲུབ་དང་ལྷན་དུ་གཙང་ལ་ཕེབས། རེ་ཞིག་སྣར་ཐང་དུ་བཞུགས་ཏེ་ཡབ་སྲས་རྣམ་གཉིས་དང་འདུལ་འཛིན་བློ་གྲོས་སྦས་པ་ཞལ་འཛོམས་ཀྱིས་མཚན་ཉིད་དང་སྔགས་ཀྱི་འཆད་ཉན་རྒྱ་ཆེར་གནང་བས་བུ་སློབ་མང་དུ་འདུས། དེ་ལྟར་འཆད་ཉན་ཤིན་ཏུ་འཕེལ་བའི་སྐབས་ཤིག་རྗེ་ཤེར་སེང་བའི་ཐུགས་དགོངས་ལ་སྔར་རྗེ་ཐམས་ཅད་མཁྱེན་པའི་དྲུང་དུ་རྒྱུད་ཀྱི་འཆད་ཉན་སྤེལ་བའི་གཡར་དམ་བཞེས་པ་གློ་བུར་དུ་ཐུགས་ལ་ཤར་ནས་དཔལ་གསང་བ་འདུས་པའི་རྒྱུད་ཀྱི་བཤད་པ་རྒྱ་ཆེར་གནས་ཞིང་། དེའི་ཚེ་གནོད་སྦྱིན་མོའི་སྤྲུལ་པ་བདག་མོ་ཤཱཀྱ་དཔལ་གྱིས་གདན་དྲངས་པ་ལྟར་རྒྱུད་ཀྱི་འཆད་ཉན་མཛད་བཞིན་པར་ལྷུན་པོའི་རྩེར་བྱོན། ཆོས་སྡེའི་བླ་མ་འཕགས་པ་འོད་འཁོར་དང་བཅས་པ་ལ་གསང་འདུས་དང་བདེ་མཆོག་སོགས་གསང་སྔགས་ཀྱི་ཆོས་མང་དུ་གསུངས་ཏེ་བླ་མ་འཕགས་པ་འོད་རྡོ་རྗེ་སློབ་དཔོན་དུ་བསྐོས་ཤིང་གནས་དེར་རྒྱུད་ཀྱི་འཆད་ཉན་བཙུགས། རྟེན་འབྲེལ་ལ་དགོངས་ནས་རྗེ་ཐམས་ཅད་མཁྱེན་པས་གནང་བའི་ཆོས་རྒྱལ་གྱི་ཞལ་འབག འཆམ་གོས། དབྱུག་ཞགས་སོགས་རྟེན་སྐལ་དུ་བསྩལ། དེ་ནས་སྲད་ཀྱི་ལུང་པའི་ཕུག་ཏུ་བྱོན་ནས་སྲས་དགའ་ལྡན་ཕོ་བྲང་ཞེས་རྒྱུད་ཀྱི་འཆད་ཉན་མཛད་པའི་ཆོས་སྡེ་ཞིག་གསར་འཛུགས་གནང་སྟེ། འདུལ་ནག་པ་དཔལ་ལྡན་བཟང་པོ་འཆད་ཉན་པར་བསྐོ་བཞག་གནང་བས་གཙང་སྟོད་རྒྱུད་དུ་གྲགས། རྗེ་ཐམས་ཅད་མཁྱེན་པས་གནང་བའི་འགྲེལ་བ་བཞི་སྦྲགས་ཀྱི་གླེགས་བམ་དང་ཤོག་ལྷུང་སོགས་རྗེ་འདུལ་ནག་པ་ལ་བྱིན་རླབས་ཀྱི་རྟེན་སྐལ་དུ་གནང་། དེ་ནས་སླར་དབུས་སུ་བྱོན་ཏེ་སྣེའུ་གདོང་དཔོན་ནམ་མཁའ་དཔལ་འབྱོར་གྱིས་གསོལ་བ་བཏབ་པ་ལྟར་སྟོད་ལུང་དུ་ཕེབས། གནས་དེར་སྡེ་སྣོད་འཛིན་པ་མང་དུ་འདུས་པ་ལ་རྒྱུད་ཀྱི་རྒྱལ་པོ་གསང་བ་འདུས་པའི་རྒྱུད་འགྲེལ་དང་། བསྐྱེད་རྫོགས་ཀྱི་འཆད་ཉན་རྒྱ་ཆེར་མཛད། རབ་བྱུང་བདུན་པའི་ཆུ་གླང(༡༤༣༣)ལོར་གནས་དེར་རྒྱུད་ཀྱི་བཤད་གྲྭ་བཙུགས་ཏེ་དཔལ་ལྡན་སྨད་རྒྱུད་གྲྭ་ཚང་དུ་གྲགས། དེར་དབྱར་དང་སོས་ཀར་རྒྱུད་འགྲེལ་གྱི་བཤད་པ། སྟོན་དུས་རིམ་ལྔའི་དམར་ཁྲིད་སོགས་ཁྲིད་ཆེན་དྲུག་གི་འཆད་ཉན་མཛད་པའི་སྲོལ་བཙུགས་ཤིང་། རྗེ་ཐམས་ཅད་མཁྱེན་པས་གནང་བའི་གསང་བ་འདུས་པའི་གསེར་སྐུ་བྱིན་རླབས་ཅན་དེ་གྲྭ་ཚང་གི་རྟེན་སྐལ་དུ་བསྩལ། དེ་ལྟར་དབུས་གཙང་གི་ཕྱོགས་གཉིས་སུ་རྒྱུད་ཀྱི་འཆད་ཉན་མཛད་པའི་བཤད་གྲྭ་གསར་འཛུགས་གནང་བས་གསང་ཆེན་རྒྱུད་ཀྱི་རྒྱལ་པོའི་ལམ་གྱི་རྣམ་གཞག རྗེ་བླ་མའི་བཞེད་སྲོལ་ཐུན་མོང་མ་ཡིན་པའི་རྒྱུན་རྒྱ་ཆེར་སྤེལ་ཏེ་མདོ་སྔགས་ཟུང་འབྲེལ་གྱི་བསྟན་པ་རིན་པོ་ཆེ་སྙིགས་མའི་དུས་འདིར་དར་ཞིང་རྒྱས་པར་མཛད་པའི་བཀའ་དྲིན་བསམ་གྱིས་མི་ཁྱབ་པ་བྱུང་། ཆོས་རྗེ་ཡིད་བཟང་རྩེ་བས་ཀྱང་། རྗེའི་སློབ་མ་ལ་སྣར་ཐང་བ་ཤེས་རབ་སེང་གེ་ལས་འཕྲིན་ལས་ཆེ་བ་མ་བྱུང་ཞེས་བསྔགས་བརྗོད་གནང་། དེ་ལྟར་བསྟན་པ་ལ་བྱ་བ་རྒྱ་ཆེར་མཛད་ནས་དབུས་ཀྱི་སྨད་རྒྱུད་གྲྭ་ཚང་གི་འཆད་ཉན་སློབ་དཔོན་སྦྱིན་པ་དཔལ་བ་ལ་གཏད་དེ། རབ་བྱུང་བདུན་པའི་ཤིང་གླང(༡༤༤༥)ལོའི་ཟླ་བ་བཞི་པའི་ཚེས་ཉེར་བརྒྱད་ལ་དགའ་ལྡན་དུ་གཟུགས་སྐུའི་བཀོད་པ་བསྡུས་སོ། །
གསུང་ལས་སྐྱེས་པའི་བུ་སློབ་ཡང་རྗེ་དགེ་འདུན་གྲུབ། ཀུན་མཁྱེན་འཕགས་པ་འོད། རྒྱུད་ཆེན་སྦྱིན་པ་དཔལ་བ། ཆོས་རྗེ་སྨོན་ལམ་དཔལ་བ། བྱང་སེམས་འདུལ་དཀར་བ། འདུལ་ན་པ་དཔལ་ལྡན་བཟང་པོ་སོགས་མཁས་ཤིང་གྲུབ་པའི་སྐྱེས་བུ་དམ་པ་བསམ་གྱིས་མི་ཁྱབ་པ་བྱུང་། གཙང་སྟོད་རྒྱུད་པ་འམ་སྲད་རྒྱུད་པར་རྒྱུད་ཀྱི་འཆད་ཉན་མཛད་པའི་མཁན་རབས་ཀྱང་། འདུལ་ནག་པའི་རྗེས་སུ་འཇམ་དབྱངས་དགེ་འདུན་འཕེལ། རབ་འབྱམས་པ་ཆོས་དབྱིངས། བླ་མ་བཀྲས་འཕགས་པ། རྒྱུད་པ་བསམ་འགྲུབ་རྒྱ་མཚོ། རྒྱུད་ཆེན་བརྩོན་འགྲུས་འཕགས་པ། མཁས་གྲུབ་རྡོ་རྗེ་བཟང་པོ། རྒྱུད་ཆེན་སངས་རྒྱས་རྒྱ་མཚོ། རྒྱུད་ཆེན་དཀོན་མཆོག་རྒྱ་མཚོ། རྒྱུད་ཆེན་དཀོན་མཆོག་ཡར་འཕེལ་སོགས་རིམ་པར་བྱོན་པ་ང་། དབུས་ཀྱི་སྨད་རྒྱུད་དུ་འཆད་ཉན་མཛད་པའི་བླ་རབས་ཀྱང་རྒྱུད་ཆེན་སྦྱིན་པ་དཔལ་བ། རྡོ་རྗེ་འཛིན་པ་ཤེས་རབ་བཟང་པོ། ཨུ་རི་དཀའ་བཅུ་པ་ཤེས་རབ་དཔལ་བ། ཆོས་རྗེ་ཚུལ་བཟང་བ། སློབ་དཔོན་རིན་ཆེན་པ། ཆོས་རྗེ་ཆོས་སྐྱོང་རྒྱ་མཚོ། རྒྱུད་པ་རྒྱལ་མཚན་བཟང་པོ་སོགས་རིམ་པར་བྱོན། རྒྱུད་ཆེན་དེ་རྣམས་ཀྱང་བསྐྱེད་རྫོགས་ཀྱི་རྟོགས་པ་མཐོན་པོ་ལ་མངའ་བརྙེས་པ་ཤ་སྟག་ཡིན་ཞིང་། རྒྱུད་ཀྱི་འཆད་ཉན་གཙོ་བོ་ཡང་འགྲེལ་པ་བཞི་སྦྲགས་ཊྰིཀྐ་ཆེ་ཆུང་། འདུལ་ནག་པའི་རྡོ་རྗེ་ལམ་བསྒྲིགས་སོགས་ཀྱི་སྟེང་ནས་བཤད་པ་མཛད་པ་ཡིན། སྨད་རྒྱུད་ཁྲིད་ཆེན་བརྒྱད་དུ་གྲགས་པ་ནི་གསང་འདུས་རིམ་ལྔ། འཇམ་རྡོར་གྱི་ཐིག་ལེ་བཞི་སྟེ་བརྒྱད་ཡིན། ཁྲིད་ཆེན་བརྒྱད་འདི་ནི་དགའ་ལྡན་ཁྲི་རབས་ཉི་ཤུ་པ་རྒྱུད་ཆེན་ཆོས་གྲགས་བཟང་པོས་ཡི་གེར་བཏབ་པ་ཡིན་ལ། དེ་ཡན་ཆད་རྗེ་ཐམས་ཅད་མཁྱེན་པ་དང་། རྗེ་ཤེས་རབ་སེང་གེ་སོགས་ཀྱིས་ཐུགས་ཐོག་ནས་གསུངས་ཏེ་རྡོ་ལག་བརྒྱུད་ཀྱི་ཚུལ་དུ་གནང་བར་གསུངས། སྲད་རྒྱུད་ཁྲིད་ཆེན་བརྒྱད་ནི་གསང་འདུས་རིམ་ལྔ། འཇིགས་བྱེད་ཀྱི་རྫོགས་རིམ་རྣལ་འབྱོར་བཞི། དྲིལ་བུའི་རིམ་ལྔ། ལཱུ་ཨི་བའི་རྫོགས་རིམ་རྣལ་འབྱོར་ཆེན་མོ། དུས་འཁོར་སྦྱོར་དྲུག་ནཱ་རོ་ཆོས་དྲུག་སྟེ་སྲད་རྒྱུད་ཁྲིད་ཆེན་དྲུག་དང་། དེའི་སྟེང་འཁོར་ཆེན་གྱི་བྱིན་རླབས་བཞི་དང་། འཕོ་ཁྲིད་གསེར་གྱི་སྒོ་འབྱེད་བསྣན་པས་སྲད་རྒྱུད་ཁྲིད་ཆེན་བརྒྱད་དུ་གྲགས། གཞན་ཡང་། ལྕགས་མཁར། འཁྲུལ་འཁོར། སྦྱིན་སྲེག་སྟེ་མན་ངག་རྣམ་གསུམ་གྱི་ཁྲིད་དང་། འཕོ་ཁྲིད་གསེར་གྱི་སྒོ་འབྱེད་ཀྱི་ཁྲིད། མགོན་པོའི་གཏོར་སྒྲུབ་ཀྱི་ཁྲིད། གཏོར་ཆེན་གྱི་ཁྲིད། གདུགས་དཀར་ཟློག་ཆེན་སོགས་ཟློག་ཆེན་བཞིའི་ཁྲིད། རབ་གནས་ཀྱི་ཁྲིད་དང་དྲུག་ལ་ཡན་ལག་ཁྲིད་དྲུག་ཏུ་གྲགས། རྒྱུད་ཆེན་དཀོན་མཆོག་ཡར་འཕེལ་ལ་སྐུ་ཚེ་སྟོད་དུ་སྲད་རྒྱུད་རང་ནས་སློབ་མ་མང་དུ་བྱུང་ཡང་ཆོས་རྒྱུན་ཟིན་པ་ཞིག་མ་བྱོན། སྐུ་ཚེ་སྨད་དུ་མེ་རྒན་བླ་མ་དང་། ཞ་ལུ་མཁན་ཆེན་འཇམ་དབྱངས་བསྟན་འཛིན་གཉིས་རྒྱུད་ཆེན་པའི་ཞབས་ལ་གཏུགས་ནའང་། གསང་འདུས་སྐོར་གྱི་མན་ངག་གནད་ཆེ་བ་དུ་མ་ཞིག་གསན་མ་ཐུབ། དགུང་ལོ་བརྒྱད་ཅུའི་སྟེང་ཀུན་མཁྱེན་འཇམ་དབྱངས་བཞད་པའི་རྡོ་རྗེ་དང་། གྱ་གཅིག་གི་སྟེང་ལྕང་སྐྱ་ངག་དབང་བློ་བཟང་ཆོས་ལྡན་དང་། ཐག་སག་པ་དངོས་གྲུབ་རྒྱ་མཚོ་སོགས་དབུས་ནས་ཆེད་གཉེར་དུ་རྒྱུད་ཆེན་པའི་དྲུང་དུ་བྱོན་ཏེ་གསང་བ་འདུས་པའི་རྒྱུད་ཀྱི་བཤད་པ་དང་། རིམ་གཉིས་ཀྱི་ཁྲིད་སོགས་སྲད་རྒྱུད་ཀྱི་གདམས་པ་ཡོངས་སུ་རྫོགས་པ་བུམ་པ་གང་འཇོའི་ཚུལ་དུ་གནང་སྟེ། མི་རིང་བར་རྒྱུད་ཆེན་ཉིད་སྐུ་གཤེགས་པར་སྣང་ཞིང་ཆོས་ཆོས་ཀྱི་བདག་པོ་ལ་སྤྲོད་ཀྱི་བར་དུ་བསྒུགས་ནས་བཞུགས་པར་སེམས་སོ ། ཞེས་ཐུའུ་བཀྭན་རིན་པོ་ཆེ་ནས་གསུངས། དམ་པ་འདི་གསུམ་གྱིས་གཙང་སྟོད་རྒྱུད་དམ་སྲད་རྒྱུད། དབུས་ཀྱི་སྨད་རྒྱུད། དབེན་ས་སྙན་བརྒྱུད་སོགས་ལས་འོངས་པའི་མདོ་སྔགས་ཀྱི་གདམས་པ་ཟབ་མོ་མཁའ་འགྲོའི་སྙིང་ཁྲག་ལྟ་བུའི་མན་ངག་མཐའ་དག་མ་ཚང་བ་མེད་པར་གསན་པར་གདམས་པའི་ཆུ་བོ་གཅིག་འདྲེས་སུ་གྱུར་པ་མདོ་དབུས་ཀྱི་ཡུལ་གྲུ་ཐམས་ཅད་ལ་ཁྱབ་བོ། །
རྒྱུད་ཆེན་ཀུན་དགའ་དོན་གྲུབ་ནི་རབ་བྱུང་བདུན་པའི་ས་ཕག(༡༤༡༩)ལོར་གཙང་དུ་འཁྲུངས། སྣར་ཐང་དུ་རབ་ཏུ་བྱུང་ཞིང་རྗེ་དགེ་འདུན་གྲུབ་ཀྱི་དྲུང་དུ་རྣམ་འགྲེལ། རྗེ་ཤེས་རབ་སེང་གེའི་དྲུང་ནས་རིམ་ལྔའི་དམར་ཁྲིད་དང་རྩ་རྒྱུད་ལེའུ་བ་པ་ཡན་གྱི་བཤད་ལུང་གསན། འབྲས་སྤུངས་སུ་མཁན་ཆེན་དཔལ་བློ་བ་ལས་དབུ་ཕར་འདུལ་མངོན་ལ་སོགས་པའི་གཞུང་མང་པོ་དང་། རྒྱུད་ཆེན་སྦྱིན་པ་དཔལ་བ་ལས་གསང་བ་འདུས་པའི་རྒྱུད་འགྲེལ་མན་ངག་ཕྲ་མོ་ཚུན་ཆད་ཡོངས་སུ་རྫོགས་པ་གསན་ཞིང་། གཞན་ཡང་རྒྱུད་པ་གྲགས་པ་བཟང་པོ་དང་། ཆོས་རྗེ་བ་སོ་བ་སོགས་ལས་ཀྱང་མདོ་སྔགས་ཀྱི་ཆོས་མང་དུ་གསན་ཏེ་མདོ་རྒྱུད་ཡོངས་སུ་རྫོགས་པའི་མན་ངག་རྒྱ་མཚོའི་མངའ་བདག་ཏུ་གྱུར། དེ་ནས་བྱམས་པ་གླིང་དུ་གདན་ས་མཛད་དེ་ཡུན་རིང་བཞུགས་རྗེས་སྨད་རྒྱུད་དུ་ཕེབས། དེའི་ཚེ་རྒྱུད་ཆེན་སྦྱིན་པ་དཔལ་བས་འཆད་ཉན་མཛད་བཞིན་པའི་སྐབས་ཡིན་ཞིང་། དེའི་རྗེས་སུ་རྒྱུད་པ་གྲགས་བཟང་བ་ཁྲིར་བཞུགས་ཏེ་འཆད་ཉན་མཛད་ཀྱང་སྐུ་ཚེ་མ་ཟིན། དེ་ནས་ཆོས་རྗེ་ཟླ་བ་རྒྱལ་མཚན་འཆད་ཉན་པར་བསྐོས་ཀྱང་སྐུ་ལུས་ཀྱིས་མ་ལྕོགས་པར་ཁྲིར་མ་ཕེབས། དེའི་ཚེ་རྒྱུད་པའི་དགེ་འདུན་པ་ཡོངས་རྫོགས་རྗེ་ཀུན་དགའ་དཔལ་བ་འདི་ཉིད་ཁྲིར་བཞུགས་རྒྱུ་ལ་འདུན་པ་ཆེན་པོ་ཡོད་ན་ཡང་། རྒྱུད་པའི་དབུ་མཛད་དོན་ཡོད་ཀྱི་དབང་གིས་ཁྱེར་ནས་སློབ་དཔོན་བཀྲ་ཤིས་རྒྱལ་མཚན་འཆད་ཉན་པར་བསྐོས་པ་དང་། རྗེ་འདིའི་ཐུགས་ཅུང་ཟད་མ་རངས་པའི་ཚུལ་གྱིས་རྒྱུད་པའི་ནང་རྟེན་མགོན་པོའི་ཞལ་ཐང་དང་ཀ་པཱ་ལི་བསྣམས་ཏེ་དབུས་སྟོད་དུ་བྱོན། དེ་ནས་རྒྱུད་ཀྱི་འཆད་ཉན་མཛད་སྐབས་ཐོག་མར་སློབ་དཔོན་དྲུག་དང་། རྗེས་སུ་རིམ་གྱིས་འདུལ་བ་འཛིན་པ་སོ་གཉིས་འདུས་པ་བྱུང་བས་གསང་འདུས་པའི་ལྷ་གྲངས་དང་མཉམ་པའི་རྟེན་འབྲེལ་འགྲིགས་པས། སློབ་དཔོན་ཉིད་དགུང་ལོ་ང་དྲུག་པ་རབ་བྱུང་བརྒྱད་པའི་ཤིང་རྟ(༡༤༧༤)ལོར་དབུས་ཀྱི་རྒྱུད་སྟོད་གྲྭ་ཚང་ཕྱག་འདེབས་མཛད་དེ་འཕྲིན་ལས་ཤིན་ཏུ་རྒྱས། དེའི་རྗེས་སུ་རྒྱུད་སྨད་པའི་སློབ་དཔོན་ཤེར་བཟང་བས་སླར་སྤྱན་དྲངས་ཀྱང་མ་བྱོན་པར་རྒྱུད་སྟོད་ཁོ་ནར་ལོ་བཅུ་གསུམ་བར་དུ་འཆད་ཉན་རྒྱ་ཆེར་གནང་བས་གྲྭ་ཚོགས་ཀྱང་ཧ་ཅང་འཕེལ། གསུང་ལས་སྐྱེས་པའི་བུ་སློབ་ཡང་རྒྱུད་པ་ལྷ་རིན་པ། ཆོས་རྗེ་ཡེས་བརྩེ་བ། སློབ་དཔོན་དཔལ་ལྡན་འོད་ཟེར་སོགས་མཁས་ཤིང་གྲུབ་པའི་སྐྱེས་བུ་དམ་པ་མང་དུ་བྱུང་། དེ་ལྟར་བསྟན་པ་ལ་བྱ་བ་རྒྱ་ཆེར་མཛད་ནས་དགུང་ལོ་རེ་བརྒྱད་པ་རབ་བྱུང་བརྒྱད་པའི་མེ་རྟ(༡༤༨༦)ལོའི་ཧོར་ཟླ་གཉིས་པའི་ཚེས་དྲུག་ལ་བྱམས་པ་གླིང་དུ་སྐུ་གཤེགས། ཆོས་རྗེ་འདི་ཉིད་སྐུ་གཤེགས་པའི་རྟ་ལོ་འདི་དང་ལུག་ལོ་གཉིས་ཀྱི་རིང་ལ་འཆད་ཉན་མ་ཚུགས་པར་བར་སྟོང་དུ་ལུས་པར་པཎ་ཆེན་བསོད་ནམས་གྲགས་པས་གསུངས། དེ་ནས་སློབ་དཔོན་ལྷ་རིན་པ། སློབ་དཔོན་ཆོས་ལྡན་བློ་གྲོས། པཎ་ཆེན་བསོད་ནམས་གྲགས་པ། ཆོས་རྗེ་དཀོན་མཆོག་དར་རྒྱས། སྒོམ་སྡེ་ནམ་མཁའ་རྒྱལ་མཚན། རྗེ་དཀོན་མཆོག་ཆོས་འཕེལ་སོགས་རིམ་པར་བྱོན་ནས་གསང་སྔགས་ཀྱི་བསྟན་པ་རིན་པོ་ཆེ་དར་ཞིང་རྒྱས་པར་མཛད་དོ། །
དབེན་ས་སྙན་བརྒྱུད་ཇི་ལྟར་བྱོན་ཚུལ་ནི་རྗེ་རྟོགས་ལྡན་འཇམ་དཔལ་རྒྱ་མཚོ་རབ་བྱུང་དྲུག་པའི་མེ་སྤྲེལ(༡༣༥༦)ལོར་མདོ་སྨད་ཙོང་ཁའི་ཡུལ་དུ་སྐུ་འཁྲུངས། སྔོན་གྱི་བག་ཆགས་བཟང་པོའི་མཐུ་བརྟས་པར་གྱུར་པས་གཞོན་ནུའི་དུས་ཉིད་ནས་ཟླ་བ་སྒྲོན་མེའི་མདོ་ལ་སོགས་པའི་མདོ་དང་བསྟན་བཅོས་མང་པོ་ཐུགས་ལ་བཟུང་ཞིང་ཟླ་བ་སྒྲོན་མེའི་མདོ་རྒྱུན་དུ་ཞལ་འདོན་ལ་མཛད། དགུང་ལོ་བཅོ་བརྒྱད་པར་དབུས་སུ་བྱོན་ཏེ་བླ་མ་ཞོ་ལུང་མཚོ་ཁ་པ་དང་། སྟག་ལུང་ལོ་ཙཱ་བ། སློབ་དཔོན་དཀོན་མཆོག་སེང་གེ བྲག་ཆབ་མཁན་པོ་དགེ་འདུན་སོགས་བསྟེན་ནས་མདོ་རྒྱུད་ཀྱི་གཞུང་ལུགས་མཐའ་དག་ལ་སྦྱང་ལ་ཕ་རོལ་ཏུ་ཕྱིན་པ་མཛད། ཁྱད་པར་དུ་རྗེ་ཙོང་ཁ་པ་ཆེན་པོ་རྩ་བའི་ཡོངས་འཛིན་དུ་བསྟེན་ནས་མདོ་སྔགས་གཉིས་ཀའི་ལམ་གྱི་གནད་བསྡུས་པའི་དགེ་ལྡན་སྙན་བརྒྱུད་ཀྱི་གདམས་པ་ཡོངས་སུ་རྫོགས་པ་གསན་ཞིང་སྤྲུལ་པའི་གླེགས་བམ་དང་བཅས་པ་གནང་། ཕྱིས་སུ་སྤང་ས་མཁན་པོས་གདན་དྲངས་པ་ལྟར་དེར་བྱོན་ཏེ་དབེན་གནས་སེ་བ་རོང་གི་གཟིམ་ཁང་དུ་ཐུགས་དམ་མཉམ་བཞག་ལ་རྩེ་གཅིག་ཏུ་གཞོལ་བས་མངོན་པར་རྟོགས་པའི་ཡོན་ཏན་མང་པོ་འཁྲུངས་ཤིང་རྗེ་བཙུན་འཇམ་པའི་དབྱངས་ཀྱིས་ཞལ་དངོས་སུ་གཟིགས། དེ་ནས་བཟུང་སྐུ་དང་གསུང་གི་སྣང་བ་ནམ་འདོད་དུ་བྱུང་། དགུང་ལོ་དོན་གསུམ་པ་ས་སྤྲེལ(༡༤༢༨)ལོར་ངོ་མཚར་བའི་ལྟས་མང་པོ་དང་བཅས་དབེན་གནས་སེ་བ་རོང་དུ་ཞི་བར་གཤེགས། རྗེ་ཐམས་ཅད་མཁྱེན་པ་ཉིད་ཀྱིས་གསུངས་པའི་སྙན་བརྒྱུད་ཀྱི་གདམས་ངག་མང་པོ་དང་། ཁྱད་པར་རྗེ་བཙུན་མཁྱེན་པའི་གཏེར་ཆེན་ཡི་གེ་གདངས་སུ་ཤར་བ་སྤྲུལ་པའི་གླེགས་བམ་དང་བཅས་པ། རྗེ་བདག་ཉིད་ཆེན་པོས་བླ་མ་རྟོགས་ལྡན་པ་འདི་བ་ཁོ་ན་ལས་གཞན་སུ་ལ་ཡང་མ་གནང་ཞིང་། བླ་མ་རྟོགས་ལྡན་པས་ཀྱང་དགེ་ལྡན་སྙན་བརྒྱུད་ཀྱི་མན་ངག་སྤྲུལ་པའི་གླེགས་བམ་དང་བཅས་པ་བ་སོ་ཆོས་ཀྱི་རྒྱལ་མཚན་ཁོ་ན་ལ་ལྐོག་ཆོས་སུ་གནང་། ཆོས་རྗེ་བ་སོ་བ་ལ་རྗེ་བཙུན་འཇམ་དབྱངས་ཀྱིས་ལུང་བསྟན་པ་ལྟར་ཁོང་གིས་ཀྱང་གདུལ་བྱ་རིན་པོ་ཆེ་ལྟ་བུའི་སློབ་མ་རྡོ་རྗེ་མཆེད་གསུམ་ལ་ལྐོག་ཆོས་སུ་གནང་བ་མ་གཏོགས་གཞན་སུ་ལ་ཡང་མ་གསུངས་ཤིང་། གསུམ་པོ་དེ་ལའང་ཆོས་རྗེ་ནས། ཚེ་འདིའི་བྱ་བ་བློས་བཏང་བའི་སྣོད་ལྡན་གྱི་སློབ་མ་རེ་གཉིས་ཙམ་བྱུང་ན་སྙན་བརྒྱུད་ཀྱི་གདམས་པ་ཤོད ། དེ་མིན་གཞན་སུ་ལ་ཡང་མན་ངག་འདི་ལྟ་བུ་ཡོད་པའི་གཏམ་ཙམ་ཡང་མ་སྨྲ་ཞེས་ཡི་དམ་མཁའ་འགྲོ་ཆོས་སྐྱོང་དཔང་བཙུགས་ནས་བཀའ་རྒྱ་ཤིན་ཏུ་དམ་པོར་མཛད། རྡོ་རྗེ་མཆེད་གསུམ་དུ་གྲགས་པའི་བླ་མ་གསུམ་ནི་འཇམ་མགོན་བླ་མའི་བསྟན་པ་འདིར། ཚེ་འདི་ལ་སྐུ་འཇའ་ལུས་གྲུབ་ཅིང་འཆི་མེད་རྡོ་རྗེ་སྐུ་ལ་མངའ་བརྙེས་པས་ད་ལྟ་ཡང་བཞུགས་པར་གྲགས་ལ། དེ་གསུམ་ལས་སྟོད་ལུང་པ་དཔལ་ལྡན་རྡོ་རྗེ་ནས་སྐལ་ལྡན་གྱི་སློབ་མ་རེ་གཉིས་ཙམ་ལ་སྙན་བརྒྱུད་ཀྱི་མན་ངག་འདི་གནང་བར་གྲགས་ཏེ། རྒྱལ་བ་དགེ་འདུན་རྒྱ་མཚོས། ཟུང་འཇུག་གྲུབ་པའི་དཔའ་བོ་འདི་ལས་ཆོས་ཀྱི་བཀའ་དྲིན་ཐོབ་པ་རྣམ་ཐར་དུ་གསུངས་པ་དང་། རྒྱལ་བ་བསོད་ནམས་རྒྱ་མཚོའི་རྣམ་ཐར་དུའང་གྲུབ་ཆེན་དཔལ་ལྡན་རྡོ་རྗེ་ཞེས་སྐུ་འཇའ་ལུས་བརྙེས་པ་དེ་ལ་གཟིམ་ཆུང་ཉི་འོད་འཁྱིལ་དུ་བདེ་མཆོག་ལཱུ་ཨི་བའི་དབང་གསན་པ་དང་། གྲུབ་ཆེན་རང་གིས་སློབ་དཔོན་པདྨ་ལས་དངོས་སུ་གསན་པའི་ཚེ་དབང་ཡང་རྒྱལ་བ་འདི་ལ་གནང་བར་གསུངས། ཁམས་པ་རྡོ་རྗེ་དཔལ་བ་ནི་ཐོག་མར་བ་སོ་ཆོས་ཀྱི་རྒྱལ་མཚན་པའི་དྲུང་དུ་སྙན་བརྒྱུད་ཀྱི་མན་ངག་འདི་གསན་པའི་དུས་དང་། རི་བོ་དགེ་འཕེལ་དུ་བཞུགས་པའི་སྐབས་དང་། རྗེས་སུ་ཁོང་རང་ཉིད་དང་བཅས་རྡོ་རྗེ་མཆེད་གསུམ་ཞལ་འཛོམས་པའི་སྐབས་མ་གཏོགས་སྐྱེ་བོ་ཕལ་བ་གཞན་སུས་ཀྱང་མཐོང་ཚོར་གང་ཡང་མེད་པར། གྲུབ་པའི་གནས་མཆོག་གཞན་ཞིག་ཏུ་བཞུག་པའམ་མ་དག་པའི་ཞིང་ཁམས་གཞན་དུ་བྱོན་པ་ཇི་འདྲ་ཞིག་ཡིན་ཡང་ལྗོངས་འདིར་ཆོས་ཀྱི་བཀའ་དྲིན་ཐོབ་པ་མངོན་ཆེ་བ་མ་བྱུང་ཞེས་ཡོངས་འཛིན་ཡེ་ཤེས་རྒྱལ་མཚན་གྱིས་གསུངས་སོ། །
གྲུབ་ཆེན་ཆོས་ཀྱི་རྡོ་རྗེ་ནི་མདོ་སྨད་ཙོམ་ཁའི་ཡུལ་དུ་ཡབ་ཀུན་དགའ་རྒྱལ་པོ་དང་། ཡུམ་དཔལ་འཛོམས་ཞེས་བྱ་བའི་བྱ་བྲལ་ཕོ་མོ་གཉིས་དབུས་གཙང་དུ་གནས་སྐོར་ལ་འོངས་པའི་སྐབས་རྟ་ནག་རྡོ་རྗེ་གདན་དུ་སླེབས་པ། རབ་བྱུང་བརྒྱད་པའི་མེ་གླང(༡༤༥༧)ལོར་སྐུ་བལྟམས། དགུང་ལོ་བཅུ་གཅིག་གི་དུས་སུ་ཡབ་ཡུམ་གཉིས་ཀྱིས་སྲས་ཁྲིད་ནས་གནས་ཆེན་སོ་སོར་མཇལ་དུ་ཕྱིན་པས་འཇམ་མགོན་བླ་མའི་ཐུགས་བསྐྱེད་དང་བསྟན་སྲུང་རྣམས་ཀྱིས་བསྐུལ་བའི་མཐུས་དགེ་ལྡན་རྣམ་པར་རྒྱལ་བའི་གླིང་དུ་རིམ་གྱིས་བྱོན། དེའི་ཚེ་ཐོག་མར་བ་སོ་ཆོས་ཀྱི་རྒྱལ་མཚན་དང་མཇལ་བ་ན། ཆོས་རྗེ་འདིས་ཡབ་ཡུམ་གཉིས་ལ་འཇིག་རྟེན་དང་མཐུན་པའི་བདག་རྐྱེན་དཔག་ཏུ་མེད་པ་གནང་ནས་བུ་འདི་ང་ལ་བྱིན་ཅིག་ཅེས་གསུངས་པ། ཡབ་ཡུམ་གཉིས་ཀྱིས་དགའ་སྤྲོའི་ངང་ཕུལ། དེ་ནས་བཟུང་ཆོས་རྗེ་འདི་ཉིད་ཀྱིས་གཅེས་པར་བསྐྱངས་ཤིང་རབ་ཏུ་བྱུང་ནས་མཚན་ཆོས་ཀྱི་རྡོ་རྗེ་ཞེས་བཏགས། མདོ་རྒྱུད་གསུང་རབ་མཐའ་དག་ལ་སྦྱང་བ་ཕུལ་དུ་ཕྱིན་པ་མཛད་ཅིང་ལྷག་པར་དུ་བྱང་ཆུབ་ལམ་གྱི་རིམ་པའི་དམིགས་སྐོར་མན་ངག་ཞལ་ཤེས་གེགས་སེལ་བོགས་འདོན་དང་བཅས་པ། བདེ་གསང་འཇིགས་གསུམ་དུས་འཁོར་དང་བཅས་རྒྱུད་སྡེ་བཞིའི་དབང་ལུང་མན་ངག་ཡོངས་སུ་རྫོགས་པ་གསན། ཁྱད་པར་དུ་རྗེ་བཙུན་ཙོང་ཁ་པ་ཆེན་པོ་ལ་མགོན་པོ་འཇམ་པའི་དབྱངས་ཀྱིས་དངོས་སུ་གནང་བའི་སྙན་བརྒྱུད་ཐུན་མོང་མ་ཡིན་པ་མདོ་སྔགས་གཉིས་ཀའི་ལམ་གྱི་ལུས་ཡོངས་སུ་རྫོགས་པའི་ཟབ་ལམ་བླ་མ་ལྷའི་མན་ངག་ཞལ་ཤེས་དང་བཅས་པ་རྫོགས་པའི་ཟབ་ལམ་བླ་མ་ལྷའི་མན་ངག་ཞལ་ཤེས་དང་བཅས་པ་རྫོགས་པར་གནང་བའི་མཐར། དགེ་ལྡན་སྤྲུལ་པའི་གླེགས་བམ་ཆེན་མོ་ཕྱག་ཏུ་གཏད་དེ་མཁའ་འགྲོས་ལུང་བསྟན་པའི་སློབ་མ་རེ་གཉིས་ཙམ་མ་གཏོགས་གཞན་སུ་ལ་ཡང་མ་སྟོན་ཞེས་བཀའ་རྒྱ་དམ་པོ་དང་བཅས་བསྩལ། དེ་ནས་འབྲས་སྤུངས་སུ་ཕེབས་ཏེ་མཁས་དབང་བདེ་ལེགས་སྟོབས་ལྡན་པའི་དྲུང་དུ་དབུ་ཕར་གཙོ་བྱས་པའི་ཤིང་རྟ་ཆེན་པོའི་གཞུང་ལུགས་ལ་སྦྱངས་པ་མཐར་ཕྱིན་པ་མཛད་ཅིང་། སློབ་དཔོན་ཉི་མ་མགོན་དང་། ཆོས་རྗེ་སྟོབས་ལྡན་པའི་སྤྱན་སྔར་བསྙེན་རྫོགས་ཀྱི་སྡོམ་པ་བཞེས་ཏེ་གཙང་དུ་བྱོན། འདུལ་འཛིན་བློ་གྲོས་སྦས་པ་ལ་འདུལ་བའི་སྐོར་ཡོངས་སུ་རྫོགས་པ་གསན། དེ་ནས་ཆོས་རྗེ་བ་སོ་རིན་པོ་ཆེའི་བཀའ་བཞིན་གངས་དང་། རི་སུལ། ནགས་ཁྲོད་སོགས་དབེན་པ་ནས་དབེན་པའི་ས་ཕྱོགས་དུ་མར་ཕེབས་ཏེ་མདོ་སྔགས་ཀྱི་ལམ་ཡོངས་སུ་རྫོགས་པ་ལ་སྒྲུབ་པ་སྙིང་པོར་མཛད་པས་ཉམས་རྟོགས་ཀྱི་ཡོན་ཏན་གོང་ནས་གོང་དུ་འཕེལ། ཁྱད་པར་དུ་སྔོན་བྱོན་སྐྱེས་བུ་དམ་པ་དུ་མ་གྲུབ་པ་བརྙེས་པའི་གནས་ཆེན་བ་སྣམ་ཇོ་མོའི་ལྷ་རིའི་གསང་ཆེན་གྲུབ་པའི་གནས་པདྨ་ཅན་དུ་སྒྲུབ་པ་ལྷུར་བཞེས་པས་བསྐྱེད་རིམ་མཐར་ཕྱིན་ཅིང་རྫོགས་རིམ་ལ་ཚིག་སྒྲིལ་མཛད་པས་སེམས་དབེན་དཔེའི་འོད་གསལ་དང་། མ་དག་པའི་སྒྱུ་ལུས་དངོས་སུ་གྲུབ། དེའི་ཚེ་རྫོགས་རིམ་དང་འབྲེལ་བའི་བླ་མའི་རྣལ་འབྱོར་བསྒོམས་པས་རྒྱལ་བ་ཙོང་ཁ་པ་ཆེན་པོའི་ཞལ་དངོས་སུ་གཟིགས་ནས་ཐུན་མོང་མ་ཡིན་པའི་སྙན་བརྒྱུད་ཀྱི་གདམས་པ་མང་དུ་གསན། སླར་ཡང་སྒྲུབ་གནས་དེར་རྫོགས་རིམ་ཟབ་མོའི་རྣལ་འབྱོར་རྩེ་གཅིག་ཏུ་བཞེས་པས་ཤིན་ཏུ་སྤྲོས་མེད་ཀྱི་སྤྱོད་པ་ལ་བརྟེན་ནས་སྐུ་དག་པ་སྒྱུ་མའི་སྐུ་དང་། ཐུགས་དག་པ་དོན་གྱི་འོད་གསལ་གཉིས་ཟུང་དུ་འཇུག་པའི་ལམ་གྱིས་ཤེས་སྒྲིབ་ཕྲ་ཞིང་ཕྲ་བ་མ་ལུས་པ་ཟད་པར་སྤངས་ཏེ། ཁ་སྦྱོར་ཡན་ལག་བདུན་ལྡན་ཟུང་འཇུག་རྡོ་རྗེ་འཆང་གི་གོ་འཕང་མངོན་དུ་བྱས་ནས་ནམ་མཁའ་ཇི་སྲིད་གནས་ཀྱི་བར་དུ་ཆོས་ཀྱི་སྐུ་ལས་གཡོ་བ་མེད་པར་སེམས་ཅན་ཐམས་ཅད་ཀྱི་རང་རང་གི་སྐལ་བ་དང་འཚམ་པར་སྤྲུལ་པའི་བཀོད་པ་སྣ་ཚོགས་པས་འགྲོ་བའི་དོན་ལ་གཡེལ་བ་མེད་པར་བཞུགས་སོ། །
གྲུབ་ཆེན་དེས་རྒྱལ་བ་དབེན་ས་བ་བློ་བཟང་དོན་གྲུབ་ལ་མན་ངག་ཡོངས་སུ་རྫོགས་པ་གནང་བ་ཡིན་པས། ཆོས་རྗེ་དབེན་ས་བ་ནི་གཙང་ལྟ་ཁུད་ཅེས་བྱ་བར། རབ་བྱུང་བརྒྱད་པའི་ཤིང་གླང(༡༥༠༥)ལོའི་ཧོར་ཟླ་དང་པོའི་ཚེས་བཅུའི་ཉིན་འཁྲུངས། དགུང་ལོ་བཅུ་གཅིག་པར་ཆོས་འཁོར་དབུས་སྡིངས་ཀྱི་དགོན་པར་ཆོས་རྗེ་ལྷ་རི་རྩེ་བ་གྲགས་པ་དོན་གྲུབ་ཀྱིས་རབ་ཏུ་བྱུང་སྟེ་མཚན་བློ་བཟང་དོན་འགྲུབ་ཅེས་གསོལ། དེ་ནས་ཆོས་རྗེ་ལྷ་རི་བ་གྲགས་པ་དོན་གྲུབ་དང་། སློབ་དཔོན་ཚུལ་ཁྲིམས་རིན་ཆེན་པ་རྣམ་གཉིས་དང་ལྷན་དུ་འབྲས་སྤུངས་སུ་བྱོན། རྗེ་གྲགས་པ་དོན་གྲུབ་ལ་བྱང་ཆུབ་ལམ་གྱི་རིམ་པའི་མྱོང་ཁྲིད། དུས་འཁོར་དང་འཇིགས་བྱེད་སོགས་ཀྱི་དབང་ལུང་མན་ངག་དུ་མ་དང་། རི་བོ་དགེ་འཕེལ་དུ་ཆོས་རྗེ་བློ་གྲོས་རྒྱལ་མཚན་པའི་དྲུང་དུ་དཔལ་གསང་བ་འདུས་པའི་དབང་སོགས་གསན། དེ་ནས་བཀྲ་ཤིས་ལྷུན་པོར་ཕེབས་ཏེ་ཐོས་བསམ་གླིང་གི་གདན་ས་བ་བློ་བཟང་བཤེས་གཉེན་པའི་དྲུང་དུ་ཕར་ཕྱིན་ཐེག་པའི་གཞུང་ལུགས་མཐའ་དག་ལ་སྦྱངས་པ་མཐར་ཕྱིན་པ་མཛད། དེའི་ཚེ་ཡུལ་ཕྱོགས་ཀུན་ཏུ་འབྲུམ་ནད་ཀྱིས་ཁྱབ་ནས་ཆོས་རྗེ་ཉིད་ཀྱང་དགུང་ལོ་བཅུ་བདུན་པར་འབྲུམ་བུའི་ནད་ཀྱིས་བསྙུན་པས་དབེན་སར་བཞུགས་པའི་སྐབས། ཉིན་ཞིག་སྒོ་ཁར་རྟེན་འབྲེལ་བསྟོད་པ་ཁ་ཏོན་བྱེད་པའི་བྱ་བྲལ་བ་ཞིག་སླེབས་འདུག་པ། དེའི་གསུང་གི་གདངས་ཐོས་པ་ཙམ་གྱིས་ལུས་ཀྱི་བ་སྤུ་ཟིང་ཞིང་སྣང་བ་གཏིང་ནས་འགྱུར་བ་ཞིག་བྱུང་བས་སྒོར་ཕེབས་ཏེ་གཟིགས་པ་ན། དགེ་སློང་སྨ་ར་དཀར་པོའི་ཨག་ཚོམ་ཅན་ཕྱགས་དར་ཁྲོད་ཀྱི་ཆོས་གོས་གསོལ་བ་ཤིན་ཏུ་དང་བ་འདྲེན་པ་ཞིག་འདུག་པས། རྗེའི་སྙན་བརྒྱུད་འཛིན་པའི་གྲུབ་ཆེན་ཞིག་ཡིན་པར་མཁྱེན་ནས་ནང་དུ་སྤྱན་དྲངས་ཏེ་རྗེས་སུ་འཛིན་པར་གསོལ་བ་བཏབ་པ་ན། དུས་ཚོད་འདི་ཙམ་ཞིག་ལ་བཀྲ་ཤིས་རྫོང་དགའི་ཕུའི་མགར་མོ་ཆོས་རྫོང་དུ་ཤོག་ཅེས་བཀའ་གནང་། གོང་དུ་བཤད་པའི་གྲུབ་ཆེན་ཆོས་ཀྱི་རྡོ་རྗེ་སྐུ་ཚེ་དེ་ལ་ཟུང་འཇུག་མངོན་དུ་གྲུབ་ཀྱང་ཏེ་ཞིག་རྣམ་སྨིན་གྱི་སྐུ་ལུས་རགས་པ་མ་དོར་བར་མགོན་པོ་འཇམ་པའི་དབྱངས་ཀྱིས་ལུང་བསྟན་པའི་སྙན་བརྒྱུད་བསྟན་པའི་བདག་པོ་དབེན་ས་པ་བློ་བཟང་དོན་གྲུབ་འདི་ཉིད་མ་བྱོན་པའི་རིང་། དགུང་ལོ་བརྒྱ་ཕྲག་ལྷག་བརྒལ་བའི་བར་དུ་ཟུང་འཇུག་དབང་གི་རྒྱལ་པོའི་ཟ་མ་ཏོག་ལ་གནས་ནས་སྐལ་བ་དང་ལྡན་པའི་གདུལ་བྱ་འགའ་ལ་ཆོས་ཀྱི་བདུད་རྩི་སྩོལ་བ་དང་། སྐབས་འདིར་དབེན་ས་པ་ཆེན་པོར་སྙན་བརྒྱུད་གྱི་གདམས་པ་མ་ལུས་པར་སྤྲོད་པའི་དུས་ལ་བབ་པར་གཟིགས་ནས། དགེ་སློང་ཤིན་ཏུ་བགྲེས་པོའི་རྣམ་པར་བསམ་བཞིན་དུ་རྗེ་དབེན་ས་པ་བཞུགས་སའི་སྒོ་ཁར་བྱོན་པ་ཡིན། དེ་ནས་རྗེ་དབེན་ས་ཉིད་འབྲུམ་བུའི་བསྙུན་ལས་གྲོལ་མ་ཐག་བླ་མ་གྲུབ་ཆེན་གྱིས་ཇི་ལྟར་གསུངས་པ་བཞིན་མགར་མོ་ཆོས་རྫོང་དུ་ཕེབས། གྲུབ་ཆེན་ལས་བྱང་ཆུབ་ལམ་གྱི་རིམ་པའི་ཁྲིད་ལ་སོགས་པའི་སྙན་བརྒྱུད་ཀྱི་གདམས་ངག་ཡོངས་རྫོགས་དང་བདེ་གསང་འཇིགས་གསུམ་གྱི་དབང་། རིམ་གཉིས་ཀྱི་མན་ངག་ཡོངས་སུ་རྫོགས་པ་བུམ་པ་གང་འཇོའི་ཚུལ་དུ་གནང་སྟེ་འཇམ་མགོན་སྙན་བརྒྱུད་ཀྱི་བསྟན་པའི་བདག་པོར་མངའ་གསོལ། དེ་ནས་གྲུབ་ཆེན་ཆོས་ཀྱི་རྡོ་རྗེ་དང་དབེན་ས་པ་རྣམ་གཉིས་ལྷན་ཅིག་ཏུ་དབུས་གཙང་གི་ཕྱོགས་སོ་སོའི་སྐལ་ལྡན་གྱི་གདུལ་བྱ་དུ་མ་རྗེས་སུ་འཛིན་པ་དང་། མཐོང་ཐོས་དྲན་རེག་གིས་གནས་སྐབས་དང་མཐར་ཐུག་གི་ཕན་བདེ་བསྒྲུབ་པའི་རྟེན་འབྲེལ་ཁྱད་པར་ལ་གཟིགས་ནས་ཡུལ་གངས་ཅན་གྱི་གནས་ཆེན་དང་། ཡུལ་ལྗོངས་ཕལ་ཆེར་ཞབས་ཀྱིས་བཅགས་ཤིང་བྱིན་གྱིས་བརླབས་ཏེ། མཐར་གནས་མཆོག་པདྨ་ཅན་དུ་བྱོན་ནས་རྗེ་དབེན་ས་པ་ཆེན་པོ་སྒྲུབ་པ་ལ་རྩེ་གཅིག་ཏུ་གཞོལ་བས་མངོན་པར་རྟོགས་པའི་ཡོན་ཏན་གྱི་ཀློང་བརྡོལ་བར་གྱུར། དེའི་ཚེ་བླ་མ་གྲུབ་ཆེན་པའི་འཁོར་དུ་གྲུབ་པ་ཐོབ་པའི་སློབ་མ་བཅུ་ཙམ་ཡོད་པའི་ནང་ནས་རྗེ་དབེན་ས་པ་འདི་ཉིད་སྲས་ཀྱི་ཐུ་བོར་དགོངས་ནས་དགེ་ལྡན་སྙན་བརྒྱུད་སྤྲུལ་པའི་གླེགས་བམ་རྗེ་འདི་ཉིད་ཀྱི་ཕྱག་ཏུ་གཏད་དེ། ལྷ་དང་བླ་མའི་ཚོགས་ཐམས་ཅད་ཀྱིས་ཆོས་ཀྱི་རྒྱལ་ཚབ་ཏུ་དབང་བསྐུར། དེ་ནས་སླར་རི་བོ་དགེ་འཕེལ་དུ་བྱོན་ནས་གང་ཤར་བདེ་སྟོང་དུ་ཤར་བའི་རིག་པ་བརྟུལ་ཞུགས་ཀྱི་སྤྱོད་པ་ཁོ་ན་བསྐྱངས་པས། བློ་མིག་ལྡོངས་པའི་སྐྱེ་བོ་ཕལ་ཆེར་གྱིས་དབེན་ས་སྨྱོན་པ་ཞེས་ཀྱང་སྒྲོག དེའི་ཚེ་མཁའ་འགྲོས་ལུང་བསྟན་པ་ལྟར་སྙན་བརྒྱུད་ཀྱི་མན་ངག་ཐུན་མོང་མ་ཡིན་པ་དང་སྤྲུལ་པའི་གླེགས་བམ་ལས། སྐབས་སུ་བབ་པ་འགའ་ཞིག་ཀུན་མཁྱེན་ལེགས་པ་དོན་གྲུབ་ལ་གནང་། དགུང་ལོ་སོ་གསུམ་དུ་ཕེབས་པ་ན་འབྲས་སྤུངས་སུ་བྱོན་ཏེ་ཐམས་ཅད་མཁྱེན་པ་དགེ་འདུན་རྒྱ་མཚོའི་དྲུང་དུ་བསྙེན་རྫོགས་ཀྱི་སྡོམ་པ་བཞེས། དེ་ནས་སླར་གཙང་དུ་བྱོན། ལྷ་དང་བླ་མས་ལུང་བསྟན་པ་ལ་བརྟེན་ནས་དབུས་རིའི་རྩེར་དབེན་དགོན་བཏབ་སྟེ་སྐལ་ལྡན་གྱི་གདུལ་བྱ་རྣམས་ལ་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་བསྐོར་བར་མཛད། ཁྱད་པར་དུ་གདན་ས་དེར་མཁས་གྲུབ་སངས་རྒྱས་ཡེ་ཤེས་ལ་བདེ་གསང་འཇིགས་གསུམ་གྱི་དབང་གཞི་ཡོངས་སུ་རྫོགས་པ། རིམ་གཉིས་ཀྱི་ཁྲིད་དང་བཅས་པའི་གདམས་པ་ཁྱད་པར་ཅན་རྣམས་དང་། བྱང་ཆུབ་ལམ་གྱི་རིམ་པའི་མྱོང་ཁྲིད་བཅས་བསྩལ། ལྷག་པར་རྗེ་ཙོང་ཁ་པ་ཆེན་པོའི་སྙན་བརྒྱུད་ཐུན་མོང་མ་ཡིན་པའི་ཞལ་ཤེས་མན་ངག་དང་བཅས་པ་བུམ་པ་གང་འཇོའི་ཚུལ་དུ་གནང་སྟེ་རྗེ་བླ་མའི་སྙན་བརྒྱུད་ཀྱི་གདམས་པའི་བདག་པོར་མངའ་གསོལ། དེ་ལྟར་བསྟན་པ་དང་འགྲོ་བའི་དོན་རླབས་པོ་ཆེ་མཛད་ནས་སྐུ་དངོས་ཀྱི་གདུལ་བྱ་རྫོགས་པའི་དུས་ལ་བབ་པ་ན་རྗེ་བཙུན་དམ་པ་སངས་རྒྱས་ཡེ་ཤེས་རང་ཉིད་ཀྱི་རྒྱལ་ཚབ་ཏུ་དབང་བསྐུར་ཏེ། ཚེར་མ་ཟུག་པའི་སྙུང་གཞིའི་རྐྱེན་བྱས་པའི་ཚུལ་བསྟན་ནས་དགུང་ལོ་རེ་གཉིས་པ་རབ་བྱུང་དགུ་པའི་མེ་སྟག(༡༥༦༦)ལོའི་ཆོ་འཕྲུལ་ཟླ་བའི་ཚེས་ཉེར་གསུམ་ལ་གཟུགས་སྐུའི་བཀོད་པ་ཆོས་ཀྱི་དབྱིངས་སུ་བསྡུས་སོ། །རྗེ་འདིའི་གསུང་ལས་སྐྱེས་པའི་བུ་སློབ་ཡང་། མཁས་གྲུབ་སངས་རྒྱས་ཡེ་ཤེས་དང་། ཀུན་མཁྱེན་ལེགས་པ་དོན་གྲུབ། བྱང་སྟོན་སྨྲ་བའི་དབང་པོ། རྗེ་བློ་གྲོས་རྣམ་རྒྱལ། ཆོས་རྗེ་དགེ་ལེགས་རྣམ་རྒྱལ། མཁན་ཆེན་ནོར་བཟང་རྒྱ་མཚོ། ཆོས་རྗེ་དམ་ཆོས་ཡར་འཕེལ་སོགས་བསྟན་འཛིན་གྱི་སྐྱེས་བུ་བསམ་གྱིས་མི་ཁྱབ་པ་བགྲང་ལས་འདས་པ་བྱུང་། དེ་ནས་དབེན་ས་སྙན་བརྒྱུད་ཀྱི་གདམས་ངག་མ་ལུས་པ་མཁས་གྲུབ་སངས་རྒྱས་ཡེ་ཤེས་ཀྱིས་པཎ་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན་ལ་གནང་སྟེ། དབེན་ས་ཡབ་སྲས་གཉིས་དང་། ཁྱད་པར་དུ་པཎ་ཆེན་ཐམས་ཅད་མཁྱེན་པས་སྙན་བརྒྱུད་ཀྱི་གདམས་པ་འགའ་ཞིག་མི་ནུབ་པའི་ཆེད་དུ་ཡི་གེར་འགོད་པར་མཛད། དེ་ལྟར་སྙན་བརྒྱུད་སྤྲུལ་པའི་གླེགས་བམ་གཙོས་རྗེ་བླ་མའི་སྙན་བརྒྱུད་ཀྱི་གདམས་ངག་མ་ལུས་པ་རྟོགས་ལྡན་འཇམ་དཔལ་རྒྱ་མཚོ་དང་། མཁས་གྲུབ་ཐམས་ཅད་མཁྱེན་པ་ལས་བརྒྱུད་པ་རྣམས། དབེན་ས་པ་ཡས་སྲས་ནས་རིམ་པར་བྱུང་བ་ལ་དབེན་ས་སྙན་བརྒྱུད་ཅེས་གྲགས་སོ། །
མདོ་ཁམས་ཀྱི་ཕྱོགས་སུ་རྗེ་བླ་མའི་བསྟན་པ་ཐོག་མར་དར་བར་མཛད་པ་པོ་ནི་རྗེའི་དངོས་སློབ་བསྟན་པ་ཕྱོགས་མཐར་སྤེལ་བའི་དར་ཆེན་དྲུག་གི་ནང་ཚན་སྨད་ཀྱི་བྱང་སེམས་ཤེས་རབ་བཟང་པོ་ཡིན་ཏེ། སེ་ར་ཐེག་ཆེན་གླིང་དུ་བྱམས་ཆེན་ཆོས་རྗེའི་གདན་སར་ཆོས་རྗེ་དར་རྒྱས་བཟང་པོ་བཞུགས་བཞིན་པའི་སྐབས། བྱང་སེམས་ཤེས་རབ་བཟང་པོས་ཟུར་ཆོས་མཛད་ནས་མཁས་མང་འདུས་པ་རྒྱ་མཚོར་གཞུང་ཆེན་རྣམས་ཀྱི་འཆད་ཉན་རྒྱ་ཆེར་གནང་བཞིན་པའི་སྐབས་ཤིག་ཁོང་གི་ཐུགས་ལ་ཉིད་ཀྱི་སྐྱེས་ཡུལ་ཀརྨའི་ཕྱོགས་སུ་འབྱོན་ཏེ། འདུལ་ཁྲིམས་རྣམ་པར་དག་པ་ལ་གནས་ནས་ཆོས་བརྒྱུད་དང་ལྟ་སྤྱོད་ཤིན་ཏུ་གཙང་མ་ཞིག་བཅོས་ན། རྗེ་བླ་མའི་བསྟན་པ་དང་སེམས་ཅན་ལ་ཕན་ཐོགས་རྒྱ་ཆེན་པོ་ཞིག་ཨེ་ཡོང་སྙམ་པ་ཞིག་འཁྲུངས་པ། ཀུན་མཁྱེན་བྱང་ཆུབ་འབུམ་གྱིས་མཁྱེན་ཏེ་ཆོས་རྗེ་ཤེས་རབ་བཟང་པོ་གདན་དྲངས། ཞབས་ཏོག་བཟང་པོ་བྱས་རྗེས། སྣམ་བུ་དང་དབུ་ཞྭ་ཞིག་གནང་ནས། འཕྲོས་གཞན་གང་ཡང་མེད་པར་ཁྱེད་མགྱོགས་པོར་ཁམས་ཕྱོགས་སུ་ཕེབས་རྒྱུ་ཡིན་འདུག་པས་ཁམས་ཀྱི་ཕྱོགས་སུ་བསྟན་པ་ལ་ཕན་པ་རེ་མཛོད་གསུངས། ཆོས་རྗེ་ཤེར་བཟང་བའི་ཐུགས་ལ་ང་རང་ཁམས་ཕྱོགས་སུ་མགྱོགས་པོར་འགྲོ་བའི་སྐད་ཆ་ཅི་ཡང་མེད་པ་ལ། ཁོང་གིས་འདི་ལྟར་གསུངས་པ་ནི་ང་རང་འདིར་བསྡད་པ་མི་འཐད་པ་ཡིན་ནམ། གང་ལྟར་རྒྱལ་ཚབ་རིན་པོ་ཆེར་ཞུས་ན། རེ་ཞིག་འདིར་སྡོད་ཨེ་གསུང་སྙམ་ནས་དགའ་ལྡན་དུ་ཕེབས་ཏེ་རྒྱལ་ཚབ་རིན་པོ་ཆེ་ལ་གནས་ཚུལ་རྣམས་ཞུས་པས། རྒྱལ་ཚབ་རྗེ་ནས་བཤོལ་འདེབས་པ་ལྟ་ཅི། ཁྱོན་ཁམས་སུ་འབྱོན་པ་ཤིན་ཏུ་ལེགས། ཁམས་ཕྱོགས་དེ་ན་རི་བོ་ཞེས་པར་གྲགས་པ་ཞིག་ཡོད། དེའི་ཉེ་སྐོར་ནས་ཁྱོད་ཀྱི་གདུལ་བྱ་དང་འཕྲིན་ལས་ཆེན་པོ་འོང་། ཞེས་ལུང་བསྟན་པ་དང་འབྲེལ་དངོས་པོའི་རྫོང་བ་ཡང་རྒྱ་ཆེན་པོ་གནང་། དེ་ནས་བར་ཁམས་ཀྱི་རྒྱུད། ངོམ་ཆུ་དང་རྫ་ཆུ་འདྲེས་པའི་མདོར་ཕེབས་པ་ན་གནས་དེར་རྗེ་བླ་མ་དབུས་སུ་སློབ་གཉེར་ལ་ཕེབས་སྐབས་ཞག་གཅིག་བཞུགས་པར་འཕགས་པའི་གནས་བརྟན་བཅུ་དྲུག་གི་ཞལ་གཟིགས་བྱུང་བ་དང་། ད་ལྟའི་མགོན་ཁང་ཡོད་སར་མགོན་པོ་ཕྱག་དྲུག་པའི་ཞལ་གཟིགས་བྱུང་བས་མ་འོངས་པར་གནས་འདིར་ཆོས་སྡེ་ཆེན་པོ་ཞིག་འབྱུང་བར་ལུང་བསྟན་ཡོད་པ་གསན་ཞིང་དུས་ཐོག་ཏུ་ཁེལ་བར་གཟིགས་ནས། ཆོས་རྗེ་ཤེར་བཟང་བ་དགུང་ལོ་ཞེ་གསུམ་བཞེས་པ་རབ་བྱུང་བདུན་པའི་མེ་སྦྲུལ(༡༤༣༧)ལོར་རྗེ་ཐམས་ཅད་མཁྱེན་པར་གནས་བརྟན་བཅུ་དྲུག་གི་ཞལ་གཟིགས་བྱུང་བའི་གནས་དེར་ཆབ་མདོ་བྱམས་པ་གླིང་ཕྱག་འདེབས་མཛད། ཀུན་མཁྱེན་བསྟན་རྩིས་སུ་ཤིང་བྱི་ལོར་བཏབ་པར་གསུངས། ཆོས་རྗེ་ཤེར་བཟང་བའི་རྗེས་སུ་ཞང་ཞུང་ཆོས་དབང་གྲགས་པ། མཚུར་སྟོན་ནམ་མཁའ་དཔལ་བ། རྗེ་དྲུང་ཤེས་རབ་དཔལ་བརྩེགས། རྗེ་དྲུང་ཀུན་དགའ་དཔལ་བ་སོགས་གདན་སར་རིམ་པར་བྱོན་ཏེ་འཆད་ཉན་རྒྱ་ཆེར་གནང་བ་དང་། རྗེ་ཐམས་ཅད་མཁྱེན་པའི་དངོས་སློབ་ཀུ་ཅོར་རྟོགས་ལྡན་པའམ་རྣལ་འབྱོར་པ་འོད་དཔག་རྡོ་རྗེའི་སྲས་རྒྱལ་བ་འཕགས་པ་ལྷ་སྐུ་ཕྲེང་རིམ་བྱོན་དང་། འཕགས་ལྷའི་སློབ་མ་ཞི་བ་བཟང་པོ་སོགས་ཀྱི་གདན་ས་མཛད་དེ་སྐུ་ཕྲེང་ན་རིམ་གྱིས་ཆོས་དང་ཟང་ཟིང་གི་སྒོ་ནས་ལེགས་པར་བསྐྱངས་དང་སྐྱོང་བཞིན་པ་འདི་དང་། རབ་བྱུང་དགུ་པའི་ས་སྤྲེལ(༡༥༤༨)ལོར་རྗེ་དྲུག་ཤེས་རབ་དབང་པོས་ཁམས་དར་རྒྱས་དགོན་ཕྱག་འདེབས་མཛད་པ་དང་། ཧོར་ཆོས་རྗེ་ངག་དབང་ཕུན་ཚོགས་ཀྱིས་ཁམས་དཀར་མཛེས་བཀྲ་ཤིས་བཤད་སྒྲུབ་ནོར་བུའི་གླིང་ཕྱག་འདེབས་མཛད། གཞན་ཡང་། ལྕང་ར་སྤྲུལ་སྐུ། རྒྱ་ར་སྤྲུལ་སྐུ་རྣམས་ཀྱི་སྐྱེ་བརྒྱུད་དང་། བ་སོ་ཆོས་ཀྱི་རྒྱལ་མཚན་གྱི་སྤྲུལ་སྐུ་རྟ་ཚག་རྗེ་དྲུང་སྤྲུལ་སྐུ་རིམ་བྱོན། རྔོག་ལོ་ཙཱ་བའི་སྐྱེ་བར་གྲགས་པ་བྲག་ཡབ་སྤྲུལ་སྐུ་ཆེ་ཆུང་སོགས་འཕགས་ཆེན་དམ་པའི་སྐྱེ་རབས་ཀྱི་ཕྲེང་བ་འཛིན་པའི་བླ་མ་དམ་པ་རྣམས་དང་། མཁས་གྲུབ་གཉིས་འཛོམས་ཀྱི་དགེ་བའི་བཤེས་གཉེན་མང་དུ་བྱོན་ཏེ་མདོ་སྔགས་ཀྱི་འཆད་ཉན་རྒྱ་ཆེར་མཛད་པ་དང་། ཡུལ་ཕྱོགས་མང་པོར་དགེ་འདུན་གྱི་སྡེ་གསར་འཛུགས་གནང་བ་སོགས་འཇམ་མགོན་བློ་བཟང་གྲགས་པའི་བསྟན་པ་རིན་པོ་ཆེ་མདོ་ཁམས་སྒང་དྲུག་གི་ཕྱོགས་ཐམས་ཅད་དུ་དར་ཞིང་རྒྱས་པར་མཛད་དོ། །
མདོ་སྨད་ཀྱི་ཕྱོགས་སུ་ཡང་། ཐོག་མར་ཆོས་རྗེ་དོན་གྲུབ་རིན་ཆེན་གྱིས་རབ་བྱུང་དྲུག་པའི་ས་གླང་(༡༣༤༩)ལོར་བྱ་ཁྱུང་ཐེག་ཆེན་ཡོན་ཏན་དར་རྒྱས་གླིང་ཕྱག་འདེབས་མཛད། རྗེ་ཐམས་ཅད་མཁྱེན་པའི་དགེ་ཚུལ་བཞེས་སྐབས་ཀྱི་ལས་སློབ་པ་གཞོན་ནུ་བྱང་ཆུབ་འོད་སོགས་མཁན་ཁྲི་རིམ་བྱོན་གྱིས་ལེགས་པར་བསྐྱངས། མཁན་རབས་དྲུག་པ་ལྷོ་བྲག་ཐར་བ་བཟང་པོས་གདན་ས་སྐྱོང་བཞིན་པའི་སྐབས། རབ་བྱུང་བཅུ་པའི་ཆུ་ལུག(༡༥༨༣)ལོར་རྒྱལ་བ་བསོད་ནམས་རྒྱ་མཚོ་སྡེ་འདིར་བྱོན་ཏེ་ཆོས་རྗེ་དོན་གྲུབ་རིན་ཆེན་གྱི་སྐུ་གདུང་འཁྲུལ་མེད་དངོས་འཛིན་གནང་ཞིང་། མཆོད་རྟེན་གསེར་ཟངས་ཀྱིས་བཏུམ་པར་མཛད་དེ་སྡེ་སྣོད་འཛིན་པ་མང་པོ་ཆོས་ཀྱི་བདུད་རྩིས་ཚིམ་པར་བྱས། མཁན་རབས་དགུ་པ་བྱམས་པ་གླིང་བ་བསྟན་པ་རིན་ཆེན་གྱིས་རབ་བྱུང་བཅུ་པའི་ཆུ་ཕག(༡༦༢༣)ལོར་པོ་ཏི་ལྔའི་འཆད་ཉན་བཙུགས་ཏེ་བཤད་སྒྲུབ་ཀྱི་བསྟན་པ་རིན་པོ་ཆེ་འཕེལ་ཞིང་རྒྱས་པར་མཛད།
རྗེ་ཙོང་ཁ་པ་ཆེན་པོ་སྐུ་བལྟམས་པའི་གནས་སུ་ལྟེ་ཁྲག་བོར་བའི་སར་ཙན་དན་གྱི་ལྗོན་པ་ཆེན་པོ་ལོ་མ་རེ་ལ་རྒྱལ་བ་སེང་གེའི་ང་རོའི་སྐུ་རང་བྱོན་དུ་ཕེབས་པ། རྗེ་ཉིད་དགུང་ལོ་ཉེར་གཉིས་བཞེས་པའི་སྐབས་སུ་ཡུམ་གྱིས་དབུ་སྐྲ་དཀར་པོའི་ལན་བུ་དང་བཅས་མདོ་སྨད་དུ་འབྱོན་དགོས་པའི་ཞུ་ཡིག་ཕུལ་བར། རྗེ་དཔོན་གྲགས་པ་རྒྱལ་མཚན་སྐུ་ཚབ་ཏུ་མངགས་ཏེ་ཡུམ་དང་ཨ་ཇོ་གཉིས་ལ་རྗེ་རང་གི་སྐུ་ཐང་རེ་དང་། བདེ་མཆོག་བུམ་སྐུ། རྒྱལ་བ་སེང་གེའི་ང་རོའི་སྐུ་པར་བཅས་བསྐུར་ནས་ཁོ་བོ་སྐྱེ་ས་དེར་འདིའི་སྐུ་འབུམ་ཕྲག་བཏབ་པ་ནང་རྟེན་བྱས། ཙན་དན་གྱི་སྡོང་པོ་དེ་སྙིང་པོར་བྱས་པའི་མཆོད་རྟེན་ཞིག་བཞེངས་ན་བདག་འོང་བ་དང་ཁྱད་མེད། ཅེས་བཀའ་ལན་གནང་བ་ལྟར་དུ་ཡུམ་གྱིས་ཐུགས་ཁུར་བཞེས་ཏེ་གནས་དེར་ཙན་དན་གྱི་ལྗོན་པ་དེ་སྙིང་པོར་བཞུགས་པའི་པད་སྤུངས་མཆོད་རྟེན་བཞེངས། རབ་བྱུང་དགུ་པའི་ལྕགས་སྤྲེལ(༡༥༦༠)ལོར་སྒོམ་པ་རིན་ཆེན་བརྩོན་འགྲུས་ཀྱིས་གནས་གཞི་བཟུང་སྟེ་རྒྱལ་བ་བྱམས་པའི་གཙུག་ལག་ཁང་རྟེན་དང་བརྟེན་པར་བཅས་པ་བཞེངས། རབ་བྱུང་བཅུ་པའི་ཆུ་ལུག(༡༥༨༣)ལོར་ཞིང་སྐྱོང་ནང་སོས་གདན་དྲངས་པ་ལྟར་རྒྱལ་བ་བསོད་ནམས་རྒྱ་མཚོ་གནས་འདིར་བྱོན་ཏེ་གསེར་སྡོང་ཆེན་མོ་བྱང་ཆུབ་མཆོད་རྟེན་དུ་བསྒྱུར་ཞིང་གདན་ས་ཆེན་པོ་སྐུ་འབུམ་བྱམས་པ་གླིང་ཕྱག་འདེབས་མཛད་དེ་འདུལ་བ་ཆོས་རྗེ་སྔ་མ་བརྩོན་འགྲུས་རྒྱལ་མཚན་བཟང་པོ་བླ་མར་བསྐོས། གདན་རབས་དང་པོ་འདུལ་བ་ཆོས་རྗེ་ཕྱི་མ་འོད་ཟེར་རྒྱ་མཚོས་རྒྱལ་བ་ཡོན་ཏན་རྒྱ་མཚོའི་བཀའ་བཞིན་ཆུ་བྱི(༡༦༡༢)ལོར་འཆད་ཉན་གསར་འཛུགས་གནང་། དེ་ནས་ཟི་ན་ཆོས་རྗེ་ལེགས་པ་རྒྱ་མཚོས་རྒྱུད་པ་གྲྭ་ཚང་དང་། ཁྲི་རབས་བཅོ་བརྒྱད་པ་ཆུ་བཟང་བསྟན་པའི་རྒྱལ་མཚན་གྱིས་སྨན་པ་གྲྭ་ཚང་། ཆེ་ཤེས་དཔོན་སློབ་བཤད་སྒྲུབ་བསྟན་པའི་ཉི་མས་དུས་འཁོར་གྲྭ་ཚང་གསར་འཛུགས་གནང་སྟེ། གྲྭ་ཚང་དེ་དག་གི་མཁན་རབས་རིམ་བྱོན་གྱིས་མདོ་སྔགས་བཤད་སྒྲུབ་ཀྱི་འཆད་ཉན་རྒྱ་ཆེར་གནང་ཞིང་འཇམ་མགོན་བསྟན་པའི་འབྱུང་གནས་དམ་པར་གྱུར།
རྒྱལ་བ་ཡོན་ཏན་རྒྱ་མཚོས། རྒྱལ་སྲས་དོན་ཡོད་ཆོས་ཀྱི་རྒྱ་མཚོ་མདོ་སྨད་དུ་ཆོས་སྡེ་འཛུགས་པར་བཏང་སྟེ་རབ་བྱུང་བཅུ་པའི་ཤིང་འབྲུག(༡༦༠༤)ལོར་རྒྱལ་སྲས་རིན་པོ་ཆེ་ནས་དགོན་ལུང་བྱམས་པ་གླིང་ཕྱག་འདེབས་མཛད་ཅིང་འཆད་ཉན་གྱི་རྒྱུན་བཙུགས་པར་གནས་བསྐོས་འཇམ་དབྱངས་གོང་མ་ཆེན་པོའི་མཆོད་ཡོན་དུ་གྱུར་པ། ལྕང་སྐྱ་ཐམས་ཅད་མཁྱེན་པ་དང་། ཐུའུ་བཀྭན་རིན་པོ་ཆེ་རྣམ་གཉིས་ཀྱི་སྐུ་ཕྲེང་རིམ་བྱོན། བཙན་པོའི་སྐུ་སྐྱེས། སུམ་བྷ་མཁན་ཆེན་སོགས་སྐྱེས་ཆེན་དམ་པ་དུ་མ་ཆོས་ཀྱི་གདན་ཁྲིར་རིམ་པར་བྱོན་ཏེ་གཞུང་ཆེན་བཀའ་པོད་ལྔའི་འཆད་ཉན་གྱི་རྒྱུན་ལེགས་པར་བསྐྱངས། རབ་བྱུང་བཅུ་གཉིས་པའི་ལྕགས་སྟག(༡༧༡༠)ལོར་ཀུན་མཁྱེན་འཇམ་དབྱངས་བཞད་པས་རྒྱུད་གྲྭ་བཙུགས་ཏེ་སློབ་དཔོན་འདན་མ་ཞབས་དྲུང་ངག་དབང་བསྟན་འཛིན་འཕྲིན་ལས་རྒྱུད་ཀྱི་འཆད་ཉན་པར་བསྐོ་བཞག་གནང་།
ཆུ་བཟང་བླ་མ་རྣམ་རྒྱལ་དཔལ་འབྱོར་གྱིས་རབ་བྱུང་བཅུ་གཅིག་པའི་ས་གླང(༡༦༤༩)ལོར་ཆུ་བཟང་དགོན་དགའ་ལྡན་མི་འགྱུར་གླིང་ཕྱག་འདེབས་མཛད་དེ་སྐུ་ཕྲེང་རིམ་བྱོན་གྱི་གདན་ས་མཛད། རབ་བྱུང་བཅུ་གསུམ་པའི་ས་སྟག(༡༧༥༨)ལོར་ཆུ་བཟང་ངག་དབང་ཐུབ་བསྟན་དབང་ཕྱུག་གིས་འཆད་ཉན་གསར་འཛུགས་མཛད་དེ་སེར་ཙུད་གྲགས་པ་ལྷུན་གྲུབ་འཆད་ཉན་པར་བསྐོ་བཞག་གནང་། དེ་ནས་རབ་འབྱམས་པ་དཔལ་བཟང་སོགས་ཁྲི་རབས་རིམ་བྱོན་གྱིས་ལེགས་པར་བསྐྱངས།
དགོན་ལུང་མཁན་རབས་བཅུ་པ་བཙན་པོ་དོན་གྲུབ་རྒྱ་མཚོས་རབ་བྱུང་བཅུ་གཅིག་པའི་ལྕགས་སྟག(༡༦༥༠)ལོར་གསེར་ཁོག་དགའ་ལྡན་དམ་ཆོས་གླིང་ཕྱག་འདེབས་མཛད། བཻ་སེར་དུ། ས་གླང་དང་སུམ་བྷས་ལྕགས་ཡོས་ལ་བཏབ་ཟེར། སྒོ་མང་སློབ་ཟུར་ཧོར་ངག་དབང་འཕྲིན་ལས་ལྷུན་གྲུབ་ཀྱིས་འཆད་ཉན་གསར་འཛུགས་གནང་བས་འཕེལ་རྒྱས་ཆེན་པོ་བྱུང་། མཚན་ཉིད་གྲྭ་ཚང་གོང་འོག་གཉིས་དང་། སྔགས་པ། སྨན་པ་སྟེ་གྲྭ་ཚང་བཞི་ཡོད་བ། སྨིན་གྲོལ་སྤྲུལ་སྐུ་བློ་བཟང་བསྟན་འཛིན་རྒྱ་མཚོ་སོགས་སྐུ་ཕྲེང་རིམ་བྱོན་གྱིས་བསྐྱངས།
ཆོས་རྗེ་དོན་གྲུབ་རིན་ཆེན་གྱི་སློབ་མ་རོང་བོའི་བླ་མ་བསམ་གཏན་རིན་ཆེན་གྱིས་རབ་བྱུང་དྲུག་པའི་ནང་ཚན་ཞིག་ཏུ་རོང་བོའི་དགོན་ཆེན་བདེ་ཆེན་ཆོས་འཁོར་གླིང་གི་ཐོག་མའི་རྨང་གཞི་དུས་གསུམ་སངས་རྒྱས་ཀྱི་ལྷ་ཁང་སོགས་གཙུག་ལག་ཁང་རྟེན་དང་བརྟེན་པར་བཅས་པ་ལེགས་པར་བཞེངས་ཏེ་དགེ་འདུན་གྱི་སྡེ་གསར་འཛུགས་མཛད། གྲུབ་པའི་དབང་ཕྱུག་ཆོས་པ་རིན་པོ་ཆེ་བློ་བཟང་བསྟན་པའི་རྒྱལ་མཚན་གྱིས་རབ་བྱུང་བཅུ་པའི་ཤིང་སྦྲུལ(༡༦༠༥)ལོར་རེབ་གོང་སྟོད་སྨད་ཀྱི་གྲྭ་རྒྱུན་བསྡུས་ཤིང་འདུ་ཁང་ཆེན་མོ་གསར་བསྐྲུན་གྱི་གཞི་བཏིང་། ཡབ་རྗེ་བླ་མ་སྐལ་ལྡན་རྒྱ་མཚོ་དགུང་ལོ་ཉེར་བཞི་པ་རབ་བྱུང་བཅུ་གཅིག་པའི་ལྕགས་རྟ(༡༦༣༠)ལོར་འཆད་ཉན་གསར་འཛུགས་གནང་སྟེ་ཆོས་སྲིད་གཉིས་ཀྱི་སྒོ་ནས་ལེགས་པར་བསྐྱངས་ཤིང་ཉིད་ཀྱི་གདན་ས་མཛད། དེའི་སྐུ་ཕྲེང་གཉིས་པ་རྗེ་ངག་དབང་འཕྲིན་ལས་རྒྱ་མཚོ་དགུང་གྲངས་ང་བདུན་པ་རབ་བྱུང་བཅུ་གཉིས་པའི་ཤིང་སྟག(༡༧༣༤)ལོར་རྒྱུད་པ་གྲྭ་ཚང་བཙུགས། སྐུ་ཕྲེང་གསུམ་པ་དགེ་འདུན་འཕྲིན་ལས་རབ་རྒྱས་དགུང་གྲངས་སོ་བཞི་པ་རབ་བྱུང་བཅུ་གསུམ་པའི་ཆུ་སྦྲུལ(༡༧༧༣)ལོར་དུས་འཁོར་གྲྭ་ཚང་གསར་འཛུགས་གནང་བ་སོགས་ཡབ་རྗེ་བླ་མ་སྐལ་ལྡན་རྒྱ་མཚོའི་སྐུ་ཕྲེང་རིམ་བྱོན་གྱིས་གདན་ས་མཛད་དེ་ལུགས་གཉིས་ཀྱི་སྒོ་ནས་ལེགས་པར་བསྐྱངས་པས་བཤད་སྒྲུབ་ཀྱི་འཕྲིན་ལས་ཡར་ངོའི་ཟླ་ལྟར་འཕེལ་ཞིང་རྒྱས།
མཁས་གྲུབ་བྱེ་བའི་གཙུག་རྒྱན་ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ་དགུང་གྲངས་རེ་གཉིས་བཞེས་པ། རབ་བྱུང་བཅུ་གཉིས་པའི་ས་གླང(༡༦༠༩)ལོར་འཇམ་མགོན་བཤད་སྒྲུབ་བསྟན་པའི་འབྱུང་གནས་དམ་པ་དཔལ་ལྡན་བཀྲ་ཤིས་གཡས་སུ་འཁྱིལ་བའི་སྡེ་ཆེན་པོ་འདི་ཉིད་གསར་འདེབས་ཀྱི་སྐར་འཛིན་དང་སྔོན་འགྲོའི་སྦྱོར་བ་སོགས་མཛད་ཅིང་། ལྕགས་སྟག་ལོར་དངོས་གཞི་ཕྱག་འདེབས་མཛད་དེ་སྨྲ་བའི་དབང་ཕྱུག་ཐུགས་སྲས་ངག་དབང་བཀྲ་ཤིས་པ་ལ་ཁྱོད་ཀྱིས་བླ་མ་གྱིས་ལ་རྩི་བཞག་ཐོང་གསུངས་ནས་ཆོས་ཀྱི་རྒྱལ་ཚབ་ཏུ་དབང་བསྐུར་ཏེ་བཤད་སྒྲུབ་ཀྱི་འཆད་ཉན་སྤེལ། དགུང་གྲངས་རེ་དགུ་པ་མེ་སྤྲེལ(༡༧༡༦)ལོར་རྒྱུད་པ་གྲྭ་ཚང་གསར་འཛུགས་གནང་སྟེ་ཧོར་བློ་གསལ་རྒྱ་མཚོ་རྒྱུད་ཀྱི་འཆད་ཉན་པར་བསྐོ་བཞག་གནང་། ཀུན་མཁྱེན་སྐུ་ཕྲེང་གཉིས་པ་རྗེ་འཇིགས་མེད་དབང་པོ་དགུང་གྲངས་སོ་དྲུག་པ་རབ་བྱུང་བཅུ་གསུམ་པའི་ཆུ་ལུག(༡༧༦༣)ལོར་དུས་འཁོར་གྲྭ་ཚང་ཕྱག་འདེབས་མཛད་པ་དང་། དགུང་གྲངས་ང་བདུན་པ་ཤིང་འབྲུག(༡༧༨༤)ལོར་སྨན་པ་གྲྭ་ཚང་ཕྱག་འདེབས་མཛད། ཀུན་མཁྱེན་སྐུ་ཕྲེང་བཞི་པ་སྐལ་བཟང་ཐུབ་བསྟན་དབང་ཕྱུག་དགུང་གྲངས་ཉེར་བཞི་པ་རབ་བྱུང་བཅོ་ལྔ་པའི་ས་ཡོས(༡༨༧༩)ལོར་ཀྱེ་རྡོར་གྲྭ་ཚང་གསར་འཛུགས་གནང་། ཀུན་མཁྱེན་སྐུ་ཕྲེང་ལྔ་པ་རྗེ་བསྟན་པའི་རྒྱལ་མཚན་དཔལ་བཟང་པོ་དགུང་གྲངས་བཅུ་གསུམ་པ་རབ་བྱུང་བཅུ་དྲུག་པའི་ས་འབྲུག(༡༩༢༨)ལོར་རྒྱུད་སྟོད་གྲྭ་ཚང་གསར་འཛུགས་གནང་བ་སོགས་ཀུན་མཁྱེན་སྐུ་ཕྲེང་རིམ་བྱོན་གྱི་གདན་ས་མཛད་དེ་ཆོས་སྲིད་གཉིས་ཀྱི་སྒོ་ནས་ལེགས་པར་བསྐྱངས་པས་འཇམ་མགོན་བླ་མ་ཙོང་ཁ་པ་ཆེན་པོའི་མདོ་སྔགས་ཟུང་འབྲེལ་གྱི་བསྟན་པའི་སྲོག་ཤིང་གཅིག་པུར་གྱུར་ཏོ། །
ཅོ་ནེ་དཔོན་པོ་སྤྱང་ཐིའི་དུས་སུ། འགྲོ་མགོན་འཕགས་པ་རིན་པོ་ཆེ་ཧོར་སེ་ཆེན་རྒྱལ་པོས་གདན་དྲངས་པ་ལྟར་རྒྱ་ནག་ཏུ་ཕེབས་པའི་ལམ་སྐབས་སུ། ད་ལྟའི་ཅོ་ནེ་དགོན་ཆགས་ས་འདིར་གཟིགས་ནས་གནས་འདི་ཉིད་དུ་དགོན་པ་ཞིག་བཏབ་ན་བསྟན་པ་ལ་ཕན་པར་འདུག་གསུངས་ཏེ། ཉིད་ཀྱི་ཞལ་སློབ་དགེ་བཤེས་ཤིག་གནས་དེར་གཞི་འདིང་དུ་བཅུག་ཅིང་རྟེན་བཞེང་སོགས་ཀྱི་ཞལ་བཀོད་གནང་བ་ལྟར། དགེ་བཤེས་དེས་འཕགས་པ་རིན་པོ་ཆེའི་བཀའ་བཞིན་རབ་བྱུང་ལྔ་པའི་ཤིང་ལུག(༡༢༩༥)ལོར་ཅོ་ནེ་དགོན་ཆེན་དགའ་ལྡན་བཤད་སྒྲུབ་གླིང་ངམ་ཏིང་འཛིན་དར་རྒྱས་གླིང་འདི་ཐོག་མར་འདེབས་པའི་འགོ་བཙུགས། དེ་དུས་ས་སྐྱའི་དགོན་པ་ཡིན། དེ་ནས་དཔོན་བརྒྱུད་རིམ་བྱོན་གྱིས་སྟུད་མར་བསྐྱངས་པས་སྐབས་ཤིག་ན། དཔོན་རྒྱུད་དུ་འཁྲུངས་པའི་ཆོས་རྗེ་རིན་ཆེན་ལྷུན་གྲུབ་པས་གདན་ས་བཟུང་སྟེ་རབ་བྱུང་བརྒྱད་པའི་ས་ཡོས(༡༤༥༩)ལོར་ཆོས་སྡེ་འདི་ཉིད་དགེ་ལུགས་པར་བསྒྱུར། རབ་བྱུང་བཅུ་གཉིས་པའི་ཤིང་རྟ(༡༧༡༤)ལོར་ཏཱ་གོའུ་ཤྲཱི་ངག་དབང་འཕྲིན་ལས་ཀྱིས་ཚོགས་ཆེན་ལས་ཟུར་དུ་བཤད་གྲྭ་བཙུགས་ཏེ་ཆོས་རྗེ་གྲགས་པ་བཤད་སྒྲུབ་འཆད་ཉན་པར་བསྐོས། ཡང་དེ་ཉིད་ཀྱིས་ས་བྱ་ལོར་རྒྱུད་པ་གྲྭ་ཚང་གསར་འཛུགས་གནང་། ཆོས་སྡེ་འདིའི་གདན་སའི་ཐོག་མ་ཆོས་རྗེ་བློ་གྲོས་རྒྱལ་མཚན་ནས་གདན་རབས་རིམ་བྱོན་དང་། དཔོན་རྒྱུད་ན་རིམ་གྱིས་སྟུད་མར་ཆོས་དང་ཟང་ཟིང་གིས་ལེགས་པར་བསྐྱངས་པས་བཤད་སྒྲུབ་ཀྱི་འཕྲིན་ལས་འཕེལ་ལོ། །དེ་ལྟ་བུའི་མདོ་སྨད་ཕྱོགས་ཀྱི་རི་བོ་དགེ་ལྡན་པའི་ཆོས་སྡེ་ཆེན་པོ་དེ་རྣམས་ལས་ཡན་ལག་དང་ཉིང་ལག་གི་ཚུལ་གྱིས་བཤད་གྲྭ་དང་སྒྲུབ་གྲྭ་མང་དུ་འཕེལ་བས་བསླབ་ཁྲིམས་རྣམ་པར་དག་པའི་དགེ་འདུན་དབྱར་གྱི་ཆུ་གཏེར་བཞིན་དུ་རྒྱས་ཤིང་། མཁས་བཙུན་བཟང་གསུམ་འཛོམས་པའི་བསྟན་འཛིན་གྱི་སྐྱེས་བུ་ས་ཆེན་པོའི་རྡུལ་གྱི་གྲངས་དང་མཉམ་པ་བྱུང་བས། རྒྱལ་བའི་བསྟན་པ་སྤྱི་དང་ཁྱད་པར་དུ་འཇམ་མགོན་རྒྱལ་བ་གཉིས་པ་ཤར་ཙོང་ཁ་པ་བློ་བཟང་གྲགས་པའི་བཤད་སྒྲུབ་ཀྱི་བསྟན་པ་རིན་པོ་ཆེ་ཡུལ་མདོ་སྨད་ཀྱི་ལྷོ་བྱང་གི་ཕྱོགས་ཐམས་ཅད་དུ་ཁྱབ་པར་མཛད་དེ། མི་ནུབ་པའི་ཆོས་ཀྱི་རྒྱལ་མཚན་སྲིད་མཐར་བསྒྲེངས་པས་ལུས་ཅན་མཐའ་དག་ཕན་བདེ་འཛད་པ་མེད་པའི་གཏེར་ཆེན་པོར་ལོངས་སུ་སྤྱོད་པའི་སྐལ་བ་བཟང་པོའི་དགའ་སྟོན་འདི་མངོན་དུ་བྱས་སོ། །
འདིར་སྨྲས་པ།
གངས་རིའི་མུ་ཁྱུད་མཛེས་པའི་ར་བ་ན། །
མཁྱེན་གཏེར་མི་ཡི་ལང་ཚོ་གཞོན་ནུའི་གར། །
སྒྱུར་བའི་ཐུགས་ཀྱི་གསང་བའི་མཛའ་ན་མོར། །
བཀུག་པའི་མཁས་མང་ལི་ཁྲིའི་རྒྱ་མཚོའི་རྡུལ། །
འཆད་པ་གཡུ་འབྲུག་གྲེ་བར་བབ་པའི་དབྱངས། །
རྩོད་པ་མི་བཟད་གནམ་ལྕགས་ཐོག་གི་ཟླ། །
རྩོམ་པ་དབྱངས་ཅན་མགྲིན་ལས་ཕྱུང་བའི་གླུ། །
རྣམ་དཔྱོད་མཁའ་ལས་འགོངས་པའི་དྲན་དབང་མང་། །
བསླབ་གསུམ་པདྨོའི་རྒྱན་གྱིས་ལུས་མཛེས་པས། །
ཚུལ་ཁྲིམས་དྲི་ངད་བྱེ་བའི་གཏེར་རྒྱ་གྲོལ། །
ཉམ་ཐག་འགྲོ་བའི་གདུང་སེལ་དབུགས་དབྱུང་བའི། །
ལྷག་བསམ་རྔ་ཡབ་དཀར་པོའི་འཇོ་སྒེག་འཛིན། །
ཐུགས་བསྐྱེད་དཔག་བསམ་རྒྱས་པའི་ལྡིང་ཁང་ནས། །
བཤད་སྒྲུབ་གསེར་གྱི་འཁོར་ལོ་འབུམ་བསྐོར་བས། །
འཇམ་དཔལ་སྙིང་པོའི་བསྟན་པ་ཡུག་གཅིག་གིས། །
ས་གསུམ་འཛིན་མའི་ཁྱོན་ཀུན་ཁྱབ་པར་བྲེས། །
བྱེ་བ་ཕྲག་བརྒྱའི་གྲངས་ཀྱིས་གཞལ་མིན་པའི། །
ལི་ཁྲིའི་རྡུལ་ཕྲེང་སྤུངས་འདྲའི་མཁས་དགུ་ཡིས། །
ཚུལ་གནས་ཐོས་བསམ་དག་པའི་གྲུ་གཟིངས་ལས། །
ལྟ་སྤྱོད་རྣམ་དག་ནོར་བུའི་གཏེར་མཛོད་བླངས། །
ལུང་རིགས་སེང་གེ་མྱོས་པའི་གད་རྒྱངས་ཀྱིས། །
ལོག་རྟོག་གླང་པོ་སྟོང་གི་ཀླད་འགེམས་པས། །
ཕྱོགས་ལས་རྣམ་པར་རྒྱལ་བའི་བ་དན་དཀར། །
བཙུགས་པའི་སྙན་པ་ས་གསུམ་ཁྱོན་ལ་ཁྱབ། །
ལུང་རྟོགས་བདུད་རྩི་གསར་པའི་དོག་པ་འབུམ། །
འཐུངས་པའི་འདུས་སྡེ་གསེར་གྱི་མེ་ཏོག་མང་། །
ཐུབ་བསྟན་ནོར་འཛིན་ཡངས་པའི་མཛེས་རྒྱན་དུ། །
ཕྱོགས་དང་ཕྱོགས་སུ་བཀྲ་བའི་གྲངས་མི་དཔོག །
ཅེས་པ་འདི་ནི་བར་སྐབས་སུ་ངལ་གསོ་བའི་ཚིགས་སུ་བཅད་པའོ། །
