ཟླ་འདིའི་ཚེས17ཉིན། ཞིབ་འཇུག་མི་སྣས་ཡུས་ཧྲུའུ་བོད་རིགས་རང་སྐྱོང་ཁུལ་ཁོངས་ཀྱི་འབྲི་ཆུའི་བར་རྒྱུད་ཀྱི་འཛོམ་ཉག་ས་ཁུལ་དུ་གནའ་བོའི་བྲག་བརྐོས་རི་མོའི་ཚོགས་ཤིག་ཡོད་པ་གསར་རྙེད་བྱུང་ཞིང་། ཡུལ་དངོས་ནས་བསྡོམས་རྩིས་བྱས་ན། ཁྱོན་བསྡོམས་བྲག་བརྐོས་རི་མོ191ཙམ་ཡོད་པ་དང་། འདི་ནི་ཐེངས་དང་པོར་ཡུལ་ཤུལ་གྲོང་ཁྱེར་ཁོངས་ཀྱི་འབྲི་ཆུའི་སྟོད་བར་རྒྱུད་ས་ཁུལ་དུ་གསར་རྙེད་བྱུང་བའི་གནའ་བོའི་བྲག་བརྐོས་རི་མོ་ཡིན་པ་རེད།
མཚམས་སྦྱོར་བྱས་པར་གཞིགས་ན། བྲག་བརྐོས་རི་མོ་རྙེད་ས་དེ་ནི་ཡུལ་ཤུལ་གྲོང་ཁྱེར་འབྲོང་མདའ་ཞང་དང་ཨ་ཁྲོ་ཞང་གཉིས་འབྲེལ་མཚམས་ཀྱི་ལྷ་མོ་བྲག་སྣ་རི་ཡི་ཤར་ལྷོའི་རྒྱུད་དུ་ཡོད་ཅིང་། མིག་སྔར། ཞིབ་འཇུག་མི་སྣ་ཡིས་བྲག་བརྐོས་རི་མོའི་ཚོགས་འདིའི་དཔྱད་གཞི་འཚོལ་བསྡུ་དང་ཚད་འཇལ། ས་གནས་གཏན་འཁེལ། ཐོ་འགོད་སོགས་ཀྱི་བྱ་བ་བསྒྲུབས་པར་མ་ཟད། ཆེད་མཁས་པ་གདན་ཞུ་བྱས་ཏེ་ཞིབ་འཇུག་གི་འབྲེལ་ཡོད་བྱ་བ་ཡང་སྤེལ་བཞིན་ཡོད་པ་རེད།
“ནོར་གནག་གི་བྲག་བརྐོས་རི་མོ་འདི་ནི་བྲག་ངོས་སུ་རི་མོ་བརྐོས་བཟོ་བྱས་པ་ཞིག་ཡིན་ལ། མིའི་དབྱིབས་བྲག་བརྐོས་རི་མོའི་འབྲི་སྟངས་ནི་ཅུང་ཙམ་གཅིག་གྱུར་འདུག་ཅིང་། དེ་ལ་ཁྱད་ཆོས་འབུར་དུ་ཐོན་པ་དང་། མཆོད་རྟེན་དབྱིབས་ཀྱི་རི་མོའི་རྐོ་དུས་ནི་ཅུང་འཕྱི་བ་རེད། བྲག་བརྐོས་རི་མོའི་རྗེས་ཤུལ་ལ་བལྟས་ན། ཕལ་ཆེར་ལྕགས་རིགས་ཡོ་བྱད་སྤྱད་ནས་བརྐོས་པ་དང་། སྤྱིའི་ཆ་ནས་བཤད་ན། གསར་རྙེད་བྱུང་བའི་བྲག་བརྐོས་རི་མོ་འདིའི་ནང་དོན་ཕུན་སུམ་ཚོགས་ལ་གྲངས་ཀ་མང་བ། རི་མོ་མང་པོ་བྲག་ངོས་གཅིག་ཏུ་ཡོད་པ་ལས། ཡུས་ཧྲུའུ་ཁུལ་གྱི་བྲག་བརྐོས་རི་མོའི་རྐོ་རྩལ་ལ་རྒྱུན་མཐུད་རང་བཞིན་ཡོད་པ་མཚོན་པར་མ་ཟད། ད་དུང་མདོ་དབུས་མཐོ་སྒང་ཤར་རྒྱུད་ཀྱི་བྲག་བརྐོས་རི་མོའི་ལོ་རྒྱུས་ཀྱི་གནའ་བོའི་རང་བཞིན་ཡང་མཚོན”ཞེས་ཞི་ཨན་མཛེས་རྩལ་སློབ་གླིང་གི་དགེ་རྒན་ཆེན་མོ་ཀོའུ་ཨའེ་ཕིང་གིས་བསྟན།
ཞིབ་འཇུག་པ་རིན་ཆེན་ཉི་མ་ཡིས་མཚམས་སྦྱོར་བྱས་པ་ལ་གཞིགས་ན། གསར་རྙེད་བྱུང་བའི་བྲག་བརྐོས་རི་མོ་འདི་དག་ནི་རི་མོ་མང་པོ་མཉམ་དུ་འདུས་པའི་རིགས་དང་རི་མོ་རྐྱང་བ་ཡོད་པའི་རིགས་གཉིས་ཀྱིས་གྲུབ་ཅིང་། ཉར་འཇོག་ལེགས་ཤིང་ནང་དོན་ཕུན་སུམ་ཚོགས་པོ་འདུག གཙོ་བོ་བྲག་ངོས་བརྐོས་ནས་བྲིས་པའི་ནོར་གནག་གི་རི་མོ་ཡིན་ལ། ཤྭ་བ་དང་མིའི་གཟུགས་རིས་ཉུང་ངུ་ཞིག་འདུག་པར་མ་ཟད། ད་དུང་བྱུང་བ་ཅུང་འཕྱི་བའི་དུས་ཀྱི་བྲག་བརྐོས་སྐུ་བརྙན་ཡང་འདུག སྔ་དུས་ཀྱི་བྲག་བརྐོས་རི་མོ་ཡིས་སྔར་ལས་ལྷག་པའི་སྒོ་ནས་འབྲི་ཆུའི་སྟོད་སྨད་རྒྱུད་ཀྱི་གནའ་རབས་དུས་སྐབས་ཀྱི་རིག་གནས་འབྲེལ་བ་འདི་དམ་ཟབ་ཏུ་བཏང་སྟེ་གནའ་བོའི་མིའི་རིགས་ཀྱི་གནས་སྤོ་ཤུལ་རྗེས་ཇེ་གསལ་དུ་བྱས་པ་དང་། འཕྱི་དུས་ཀྱི་བྲག་བརྐོས་སྐུ་བརྙན་ནི་དུས་རབས་བཅུ་བའི་སྐབས་ལ་ཡུས་ཧྲུའུ་ཁུལ་ཁོངས་ཀྱི་འབྲི་ཆུའི་འབབ་རྒྱུད་དུ་ནང་ཆོས་དང་སྒྱུ་རྩལ་དར་སྤེལ་བྱེད་པའི་པཎ་ཊི་ཏ་སྨྲི་ཏི་ལ་འདྲ་བ་དང་། ཡུས་ཧྲུའུ་ཁུལ་གྱི་ལོ་རྒྱུས་འཕེལ་འགྲིབ་ལ་ཞིབ་འཇུག་གི་རིན་ཐང་ཆེན་པོ་ཡོད་པ་རེད།
“གསར་རྙེད་བྱུང་བའི་བྲག་བརྐོས་རི་མོའི་གྲངས་ཀ་མང་ཞིང་ནང་དོན་ཕུན་སུམ་ཚོགས་ལ། དུས་སྐབས་ཅུང་རིང་བ་དང་། དུས་སྔ་འཕྱིའི་ཁྱད་ཆོས་མི་འདྲ་ཞིང་། ཁྱད་ཆོས་འབུར་ཐོན་དཔེ་རིས་ཀྱི་ནང་དུ་སྲོག་ཆགས་རིགས་མང་པོ་འདུས་པ་དང་། རྔོན་པའི་འདྲ་གཟུགས་ཀྱང་མངོན་སུམ་རེད། བོད་བཙན་པོའི་དུས་སྐབས་ཀྱི་བྲག་བརྐོས་སྐུ་བརྙན་ནི་སྔ་དུས་ཀྱི་བྲག་བརྐོས་རི་མོའི་ཐོག་ཏུ་ཡོད་པ་འདི་ཐེངས་དང་པོར་གསར་རྙེད་བྱུང་བ་ཡིན་ལ། འདི་ཡིས་ཡུས་ཧྲུའུ་ཁུལ་གྱི་རྡོ་བརྐོས་རིག་གནས་ཀྱི་སྲོལ་རྒྱུན་ལ་ངོས་འཛིན་བྱེད་པར་དོན་སྙིང་གལ་ཆེན་འདུག”ཅེས་ཀྲུང་དབྱང་མི་རིགས་སློབ་ཆེན་གྱི་བྲག་བརྐོས་རི་མོའི་ལྟེ་གནས་ཀྱི་ཀྲུའུ་རེན་ཀྲང་ཡ་ཧྲ་ཡིས་བཤད།
ཤེས་རྟོགས་བྱུང་བར་གཞིགས་ན། ཡུས་ཧྲུའུ་ཁུལ་ཁོངས་ཀྱི་འབྲི་ཆུའི་འབབ་རྒྱུད་ཀྱི་བྲག་བརྐོས་རི་མོའི་ནང་དོན་ཕུན་སུམ་ཚོགས་ཤིང་། བརྗོད་དོན་རྒྱ་ཆེན་ཡིན་པ་དང་། མིག་སྔའི་བར་དུ། ཁྲི་འདུ་རྫོང་རྩོམ་རིག་སྒྱུ་རྩལ་མཉམ་འབྲེལ་ལས་རིགས་ལྷན་ཚོགས་ཀྱི་ཞིབ་འཇུག་མི་སྣ་ཡིས་འབྲི་ཆུའི་འབབ་རྒྱུད་དུ་ཁྱོན་བསྡོམས་གནའ་བོའི་བྲག་བརྐོས་རི་མོ3000ལྷག་རྙེད་པ་རེད།
རྩོམ་སྒྲིག་པ། བསྟན་ཆོས།
