ཀྲུང་གོའི་བོད་ལྗོངས་དྲ་བའི་འཕྲིན། བོད་ལྗོངས་དིང་རི་རྫོང་དུ་ས་ཡོམ་རིམ་པ6.8བྱུང་བའི་ཉིན་གཉིས་པར། ང་ཚོས་དིང་རི་རྫོང་གྲམ་སོ་ཞང་དགའ་ལྡན་གྲོང་ཚོའི་ཧྲུའུ་ཅི་ཝུའུ་ཆི་ཞུན་ལ་བཅར་འདྲི་བྱས་པ་ཡིན། མོ་ནི་གཟུགས་རིང་པོ་མེད་ཅིང་། མིག་ཟུང་བརྟན་ལ། རིག་ལམ་གསལ་པོ་ཡོད་མཁན་ཞིག་ཡིན། མི་མང་པོ་ད་དུང་ས་ཡོམ་རྗེས་ཀྱི“འཇིགས་སྣང”ཁྲོད་གནས་པའི་སྐབས་དེར། མོས་མི་རྣམས་ལ་སེམས་བདེ་བ་དང་ཏན་ཏིག་འགྱུར་མེད་ཀྱི་ཚོར་སྣང་ཞིག་སྦྱིན།
དིང་རི་རྫོང་གྲམ་སོ་ཞང་དགའ་ལྡན་གྲོང་ཚོའི་གྲོང་སྡོད་ཧྲུའུ་ཅི་དང་པོ་ཝུའུ་ཆི་ཞུན།
“ས་ཡོམ་བྱུང་སྐབས་ནམ་ད་དུང་ལངས་མེད་པས། ང་ཚོ་གྲོང་ཚོ་ཨུ་ལྷན་ནང་བསྡད་པའི་བུད་མེད་ལས་བྱེད་པ་གསུམ་འཕྲལ་དུ་གྲོང་ཚོར་བསྐྱོད་པ་ཡིན། དྲང་པོ་བཤད་ན་ཚང་མ་སྐྲག་སྣང་སྐྱེས་བྱུང་། མ་གཞི་ང་ཁོང་ཚོའི་ཁྲོད་ཀྱི་ལོ་ཆེ་ཤོས་ཡིན་མོད། འོན་ཀྱང་གནས་ཚུལ་འདི་འདྲ་གཏན་ནས་འཕྲད་མྱོང་མེད”གྲོང་ཚོའི་ནང་མིག་གིས་མཐོང་སར་ཁང་པ་མང་པོ་ཞིག་རྡིབ་ཡོད་པས། ལོ29ལ་སླེབས་པའི་ཝུའུ་ཆི་ཞུན་དང་བུད་མེད་ལས་བྱེད་པ་གཞན་གཉིས་ཀྱིས་གྲོང་ཚོར་བརྒྱུད་པའི་ལམ་བར་ནས་གྱང་རོའི་འོག་མནན་པའི་མི7བསྐྱབས།
“དྲང་མོར་བཤད་ན། ང་ཚོའི་སྟོབས་ཤུགས་ལ་བརྟེན་ནས་བསྐྱབས་པའི་མང་ཚོགས་ནི་ཚང་མར་གཏིང་ཐུང་སར་མནན་ཡོད། ཡིན་ཡང་རེ་ཐག་ཆད་པ་ཞིག་ནི་ཐོག་བརྩེགས་གཉིས་ཀྱི་འོག་ཏུ་བྱིས་པ་གཉིས་མནན་ཡོད་པ་དང་། གཞན་རྨོ་བོ་ཞིག་གྱང་རོའི་ཆེས་འོག་ཏུ་མནན་ཡོད། ངེད་གསུམ་གྱིས་གྱང་རོའི་ནང་དུ་ཡང་ཡང་བཙལ་ཡང་རྩ་བ་ནས་རྙེད་མ་བྱུང་། སྐབས་དེར། གློ་བུར་དུ་དམག་མདོག་གི་ལྭ་བ་གྱོན་པའི་བློ་མཐུན་ཞིག་ང་ཚོའི་འགྲམ་དུ་སླེབས་བྱུང་། ཁོང་མཐོང་འཕྲལ་དུ་ཡིད་ལ་ད་ནི་སྲོག་སྐྱོབ་མཁན་ཞིག་སླེབས་བྱུང་བས་སེམས་སུ་དགའ་ཚོར་ཆེན་པོ་སྐྱེས་བྱུང”ཞེས་ཝུའུ་ཆི་ཞུན་གྱིས་བཤད། བཅིངས་འགྲོལ་དམག་མི་དེ་ནི་ཁྱིམ་གྱི་གཉེན་ཉེ་ལ་ཐུག་ཏུ་ཡོང་བའི་ལམ་བར་ནས་གནས་ཚུལ་འདི་དང་འཕྲད། འོན་ཀྱང་དེས་ཝུའུ་ཆི་ཞུན་གྱི་རོགས་སྐྱོབ་ཀྱི་སྤོབས་སེམས་ཆེ་རུ་ཕྱིན། ཁོང་གིས་ཝུའུ་ཆི་ཞུན་ལ་དངངས་འཚབ་མ་བྱེད། ང་ཚོས་རྔོག་ག་ཚོད་ཐུབ་ན་དེ་ཚོད་ཀྱི་རྔོག་པ་དང་། དཔུང་ཆེན་རྒྱབ་ཕྱོགས་སུ་ཡོད་པས་ད་མྱུར་དུ་འབྱོར་སྲིད་ཅེས་བཤད།
“རོགས་སྐྱོབས་ཀྱི་ལས་དོན་ངེད་ཚོའི་ཕྲག་སྟེང་དུ་ཞོག་དང་། ཁྱེད་ཚོས་སྔོན་ལ་མི་གྲངས་ཀྱི་བསྡོམས་རྩིས་རྒྱོབས་དང་། ནོར་ལུག་དང་རྒྱུ་ནོམ་སོགས་ཁྱེད་ཚོས་ཁ་ཡ་བྱེད་མི་དགོས”ཞེས་ས་ཡོམ་བྱུང་རྗེས་བཅིངས་འགྲོལ་དམག་དང་དྲག་ཆས་ཉེན་རྟོག་དཔུང་སྡེ་ནི་ཡོ་བྱད་འཁྱེར་ནས། གནོད་ཐེབས་ས་ཁུལ་དུ་འབྱོར་མཁན་དང་པོ་ཡིན་ཞིང་། སྐབས་དེའི་དངངས་འཚབ་ཁྲོད་ཝུའུ་ཆི་ཞུན་གྱིས་ཁོང་ཚོའི་དམག་དཔུང་ཨང་རྟགས་གསལ་པོར་ངོས་མ་ཟིན་མོད། འོན་ཀྱང་དཔུང་སྡེའི་འགོ་ཁྲིད་ཀྱིས“རོགས་སྐྱོབ་ཀྱི་ལས་འགན་ང་ཚོ་ཁུར”ཞེས་པའི་སྐད་ཆ་དེས་དངངས་འཚབ་ཀྱི་གནས་བབ་ཁྲོད་ཁོང་ཚོར་རོགས་སྐྱོབ་ཀྱི་རིག་ལམ་གསལ་བོར་བཏོན་བྱུང་།
ཀྲུང་གོའི་ཨན་ནེང་རོགས་སྐྱོབ་ཀྱིས་དགའ་ལྡན་གྲོང་ཚོའི་རོགས་སྐྱོབ་དང་གེགས་རྗེས་བཀོད་སྒྲིག་ནང་ཞུགས་བཞིན་པ།
ཝུའུ་ཆི་ཞུན་གྱིས་ས་ཡོམ་བྱུང་བའི་དགོང་མོ་དེའི་གནས་ཚུལ་ལ་ཕྱིར་དྲན་བྱེད་བཞིན“ས་ཡོམ་བྱུང་བའི་ཉིན་དེའི་དགོང་མོར་དངོས་གནས་ཧ་ཅང་གྲང་མོ་འདུག སྟབས་ལེགས་པ་ཞིག་ལ་ང་ཚོའི་འགྲམ་དུ་ཉི་འོད་ཁང་པ་ཞིག་ཡོད་པས། ང་ཚོས་གནོད་འཚེ་ཐེབས་པའི་མང་ཚོགས་རྣམས་དེ་གར་གཅིག་སྡུད་བྱས་ནས་སྡོད་དུ་བཅུག ཉིན་དེའི་དགོང་མོར་ང་མཚན་གང་ལ་གཉིད་མ་ཁུག རྒྱུ་མཚན་མི་དེ་འདྲིའི་མང་པོ་ཞིག་དེ་གར་གཅིག་སྡུད་བྱས་ཡོད་པས་གནད་དོན་ཆུང་ངུ་ཞིག་བྱུང་ན་ཡང་དཀའ་ལས་ཁག་པ་ཡོད”ཅེས་བཤད། ཉི་འོད་ཁང་པའི་ནང་དུ་བགྲེས་སོང་ཞིག་ས་ཡོམ་གྱི་འཇིགས་སྣང་ཐེབས་པས་མཚན་གང་བོར་རྨི་ལམ་ངན་པ་རྨིས་བ་དང་། སྐབས་རེ་རེར་བཙིར་སྐད་ཀྱང་འབྱིན་པ་རེད། བགྲེས་སོང་གི་སེམས་ཁམས་བརྟན་པོ་ཡོང་ཆེད་ཁོང་ཚོ་བགྲེས་སོང་གི་གམ་དུ་བསྡད་དེ་མོ་ལ་སེམས་གསོ་བྱས།
དགའ་ལྡན་གྲོང་ཚོའི་ཏང་ཡོན་དང་མང་ཚོགས་ཀྱི་ཞབས་ཞུ་ལྟེ་གནས།
དགའ་ལྡན་གྲོང་ཚོའི་གནོད་འཚེ་ཐེབས་པའི་གྲོང་མིས་ཕན་ཚུན་རོགས་རམ་བྱས་ནས་བཀོད་སྒྲིག་གུར་རྒྱག་བཞིན་པ།
དགའ་ལྡན་གྲོང་ཚོའི་གནོད་འཚེ་ཐེབས་པའི་གྲོང་མི་ཚོའི་སྟབས་བདེའི་ཁང་པ།
ཝུའུ་ཆི་ཞུན་གྱིས“ང་རང‘རྒྱལ་ཁབ་དོན་དུ་རང་སྲོག་གཏོང་ཕོད་པས།། གེགས་བར་ཇི་འདྲ་ཆེ་རུང་གཡོལ་མི་སྲིད།།’ཅེས་པའི་སྐད་ཆ་འདིར་ཧ་ཅང་དགའ་པོ་ཡོད་ལ། ཀུའེ་ཀྲོའུ་ནས་ཡོང་བའི་ངས་ཅི་ཞིག་དབུལ་ཕོངས་ཞེས་པ་གསལ་བོར་ཤེས་ལ། ཧྲང་ཧའེ་ནས་སློབ་ཆེན་འགྲིམ་པའི་སྟབས་ཀྱིས་ཅི་འདྲ་ཞིག་ལ་དར་རྒྱས་ཆེ་བའི་ས་ཆ་ཟེར་བའང་ངས་ཤེས་ཀྱི་ཡོད། སྟེས་དབང་ཞིག་གིས་ང་རང་བོད་ལྗོངས་སུ་སླེབས་པ་དང་། ངས་གནས་འདིར་ལས་དོན་ཞིག་སྒྲུབ་རྒྱུའི་འདུན་པ་ཆེན་པོ་ཡོད། སྔོན་ཆད་ལས་དོན་སྒྲུབ་མ་ཐུབ་པའམ་ཡང་ན་ཡག་པོ་མ་སྒྲུབ་ནི་གོ་སྐབས་མེད་པའི་རྐྱེན་གྱིས་རེད། ད་ཐེངས་གོ་སྐབས་འདི་འདྲ་ཞིག་ཡོད་ལ་གནས་ཚུལ་འདི་འདྲ་ཞིག་དང་འཕྲད་པས། ངས་རང་ཉིད་ཀྱི་དམ་ཚིག་ལག་ལེན་བསྟར་ནས་རང་གི་མི་ལོ་ཉི་ཤུ་དང་སུམ་ཅུ་རིང་ནི་དོན་སྙིང་ལྡན་པ་ཞིག་ཡིན་པའི་ཚོར་སྣང་བྱུང་། གལ་ཏེ་སྔོན་ཆད་མང་ཆེ་བར་གསོག་འཇོག་བྱས་པ་ཞིག་ཡིན་ན། ད་ནི་རང་གིས་དངོས་སུ་ནུས་པ་འདོན་པའི་དུས་ལ་སླེབས”ཞེས་བཤད།
