ཀུན་གྱིས་དོ་ཁུར་ཆེན་པོ་བྱེད་པའི་མི་སྒེར་གྱི་ཆ་འཕྲིན་སྲུང་སྐྱོང་བཅའ་ཁྲིམས་འཆར་ཟིན་ཉེ་དུས་དངོས་སུ་འདོན་རྒྱུ་རེད།
སྤྱི་ཚེས་12ཉིན། རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ཁྲིམས་ལུགས་ལས་དོན་ཨུ་ཡོན་ལྷན་ཁང་གི་མགྲིན་ཚབ་པ་ཙང་ཐིའེ་ཝེ་ཡིས་གསར་འགོད་པའི་ཚོགས་འདུའི་ཐོག སྐབས་བཅུ་གསུམ་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་ཉེར་གཉིས་པ་ཟླ་10ཚེས་13ཉིན་ནས་ཚེས་17ཉིན་བར་པེ་ཅིང་དུ་འཚོག་རྒྱུ་ཡིན་པ་དང་། མི་སྒེར་གྱི་ཆ་འཕྲིན་སྲུང་སྐྱོང་བཅའ་ཁྲིམས་འཆར་ཟིན་དེ་ཐེངས་འདིའི་ཚོགས་འདུའི་ཐོག་གྲོས་ཞིབ་བྱ་རྒྱུར་འབུལ་རྒྱུ་རེད་ཅེས་གསུངས་ཡོད།
ཆ་འཕྲིན་ཅན་དང་དཔལ་འབྱོར་སྤྱི་ཚོགས་རྒྱུན་མཐུད་ངང་མཉམ་འདྲེས་གཏིང་ཟབ་བྱུང་བ་དང་བསྟུན་ནས། མི་སྒེར་གྱི་ཆ་འཕྲིན་འཚོལ་བསྡུ་དང་བེད་སྤྱོད་བྱ་རྒྱུ་དེ་བས་ཁྱབ་རྒྱ་ཆེ་རུ་འགྲོ་བཞིན་ཡོད། ཉེ་བའི་ལོ་ཤས་རིང་། རང་རྒྱལ་གྱི་མི་སྒེར་གྱི་ཆ་འཕྲིན་སྲུང་སྐྱོང་བྱེད་ཤུགས་རྒྱུན་ཆད་མེད་པར་ཇེ་ཆེར་བཏང་ཡོད་མོད། འོན་ཀྱང་དོན་དངོས་འཚོ་བའི་ཁྲོད་དུ། མི་སྒེར་གྱི་ཆ་འཕྲིན་རང་དགར་འཚོལ་བསྡུ་བྱེད་པ་དང་། ཁྲིམས་འགལ་ངང་རག་ཐབས་བྱེད་པ། བེད་སྤྱོད་བྱེད་རྒྱུ་ཐལ་དྲག་པ། ཁྲིམས་འགལ་ངང་ཉོ་ཚོང་བྱེད་པ། མི་སྒེར་གྱི་ཆ་འཕྲིན་བེད་སྤྱད་དེ་མི་དམངས་མང་ཚོགས་ཀྱི་ལྷིང་འཇགས་འཚོ་བར་གཏོར་བཤིག་གཏོང་བ། མི་དམངས་མང་ཚོགས་ཀྱི་ཚེ་སྲོག་བདེ་ཐང་དང་རྒྱུ་ནོར་བདེ་འཇགས་ལ་གནོད་འཚེ་གཏོང་བ་སོགས་ཀྱི་གནད་དོན་སྔར་བཞིན་མངོན་གསལ་དོད་པོར་གནས་ཡོད།
མི་སྒེར་གྱི་ཆ་འཕྲིན་སྲུང་སྐྱོང་བཅའ་ཁྲིམས་ཀྱིས་་གཙོ་བོ་ཕྱོགས་གང་དག་ལ་དོ་ཁུར་བྱེད་ཀྱི་ཡོད་དམ།
ཙང་ཐིའེ་ཝེ་ཡིས་མི་སྒེར་གྱི་ཆ་འཕྲིན་སྲུང་སྐྱོང་བཅའ་ཁྲིམས་གཏན་ལ་ཕབ་ཚུལ་ངོ་སྤྲོད་གནང་བ་གཤམ་གསལ།
མི་སྒེར་གྱི་ཆ་འཕྲིན་ཐག་གཅོད་བྱེད་སྒོས་བརྩི་སྲུང་ཞུ་དགོས་པའི་རྩ་དོན་སྔར་ལས་ལྷག་པར་གསལ་པོ་བཟོ་རྒྱུ་ཡིན་པ།
མི་སྒེར་གྱི་ཆ་འཕྲིན་ཐག་གཅོད་བྱེད་སྲོལ་འཐུས་ཚང་དུ་གཏོང་རྒྱུ་ཡིན་པ།
མི་སྒེར་གྱི་ཆ་འཕྲིན་ཐག་གཅོད་བྱེད་སྒོའི་ཁྲོད་ཀྱི་མི་སྒེར་གྱི་ཁེ་དབང་ཁག་འགན་སྲུང་བྱེད་པ།
མི་སྒེར་གྱི་ཆ་འཕྲིན་ཐག་གཅོད་བྱེད་མཁན་གྱི་འོས་འགན་ཆེ་རུ་གཏོང་རྒྱུ།
མི་སྒེར་གྱི་ཆ་འཕྲིན་སྲུང་སྐྱོང་གི་ལྟ་སྐུལ་དོ་དམ་འགན་འཁྲི་གསལ་པོ་བཟོ་བ་དང་བཅའ་ཁྲིམས་འགན་འཁྲི་ནན་པོ་བཟོ་རྒྱུ་ཡིན་པ་བཅས་རེད།
མི་སྒེར་གྱི་ཆ་འཕྲིན་སྲུང་སྐྱོང་བཅའ་ཁྲིམས་གཏན་འབེབས་བྱས་པ་དེས་བཅའ་ཁྲིམས་ཚད་གཞིའི་མ་ལག་རང་བཞིན་དང་དམིགས་སའི་རང་བཞིན། བཀོལ་སྤྱོད་རང་བཞིན་བཅས་སྔར་བས་ཆེ་རུ་གཏོང་རྒྱུ་དང་། མི་སྒེར་གྱི་ཆ་འཕྲིན་སྲུང་སྐྱོང་བྱེད་པའི་ཐད་སྔར་བས་འཐུས་སྒོ་ཚང་བའི་ལམ་ལུགས་ཆགས་པ་བྱེད་པ་དང་སྔར་ལས་ནུས་ལྡན་གྱི་བཅའ་ཁྲིམས་འགན་སྲུང་མཁོ་འདོན་བྱ་རྒྱུ་ཡིན་པ་རེད།
རྩོམ་སྒྲིག་པ། སྣང་རྡོར།
