སློབ་འགོ་ཚུགས་སོང་། སློབ་གྲོགས་ཚོས་རང་ཉིད་ཀྱི་མིག་ལ་ཇི་ལྟར་སྲུང་སྐྱོབ་བྱེད་དགོས་པ་ཤེས་སམ། ཆེད་མཁས་པས་འདི་ལྟར་གསུང་གིན་འདུག
ཉེ་ཆར། སློབ་གསོ་པུའུ་ཡིས་ཞིང་ཆེན་9ཡི་སློབ་གྲྭ་ཆུང་འབྲིང་གི་སློབ་མ་14532ལ་རྒྱང་སྒྲིབ་མིག་གི་བརྟག་དཔྱད་བྱས་པ་དེ་2019ལོའི་ལོ་མཇུག་གི་ཡོངས་ཁྱབ་ཚད་ལེན་དང་བསྡུར་ན། ལོ་ཕྱེད་ཀྱི་རིང་དུ་རྒྱང་སྒྲིབ་ཚད་11.7%འཕར་ཡོད་ལ། དེའི་ཁྲོད་དུ་སློབ་ཆུང་སློབ་མའི་རྒྱང་སྒྲིབ་ཚད་15.2%འཕར་བ་དང་། དམའ་རིམ་སློབ་འབྲིང་གི་སློབ་མ་8.2%འཕར་ཡོད་ཅིང་། མཐོ་འབྲིང་གི་སློབ་མ་3.8%འཕར་ཡོད། ཟླ་7པར་སི་ཁྲོན་གྱིས་ཀྱང་ས་ཁུལ་ཁག་གཅིག་ཏུ་སློབ་མའི་རྒྱང་སྒྲིབ་ལ་ཆེད་དོན་ལྟ་ཞིབ་ཚད་ལེན་བྱས་པ་ན། དེའི་རྒྱང་སྒྲིབ་ཕོག་ཚད་དེ་རིམས་ནད་མ་ཐོན་གོང་ལས་20%ཙམ་མཐོ་རུ་ཕྱིན་ཡོད་པ་རེད། སློབ་འགོ་ཚུགས་པ་དང་ཆབས་ཅིག་སློབ་གྲོགས་ཚོས་རང་ཉིད་ཀྱི་མིག་ལ་ཇི་ལྟར་སྲུང་སྐྱོབ་བྱེད་དགོས་སམ། འདིའི་ཐད་ལ་སི་ཁྲོན་ཞིང་ཆེན་ནད་ཡམས་ཚོད་འཛིན་ལྟེ་གནས་ཀྱི་འབྲེལ་ཡོད་ཆེད་མཁས་པས་ལན་བཏབ་ཡོད །
ཆེད་མཁས་པས་བལྟས་ན་རང་ཉིད་ཀྱི་མིག་ལ་སྲུང་སྐྱོབ་ཡག་པོ་བྱེད་དགོས་ན། ཉིན་མོར་ཕྱི་རོལ་དུ་འགུལ་སྐྱོད་བྱ་རྒྱུ་རྒྱུན་འཁྱོངས་བྱེད་དགོས་པ་དང་། ཉིན་ལྟར་ཆུ་ཚོད་གཉིས་ཀྱི་རིང་ལ་ཕྱི་རོལ་དུ་འགུལ་སྐྱོད་བྱ་རྒྱུ་རྒྱུན་འཁྱོངས་བྱེད་དགོས།
དཔེ་དེབ་ཀློག་པ་དང་ཡི་གེ་འབྲི་སྐབས་ཀྱི་འདུག་སྟངས་ཡང་དག་པ་ཡིན་དགོས། “གཅིག་ཅན་གསུམ”གྱི་འདུག་སྟངས་ཡང་དག་པ་རྒྱུན་འཁྱོངས་བྱེད་པ་སྟེ། དཔེ་དེབ་དང་བར་ཐག་ཁྲེ་ཙེ་གཅིག་དང་། བྲང་ཁ་ཅོག་ཙེ་དང་བར་ཐག་ཁུ་ཚུར་གཅིག་ཙམ་ཡོད་པ། སྨྱུ་གུ་འཛིན་སྐབས་མཛུབ་མོ་སྨྱུག་རྩེ་དང་བར་ཐག་ཚུན་གཅིག་ཡོད་པ་བཅས་བྱས་ཏེ། ནན་ཏན་གྱིས་མིག་སྲུང་ལུས་སྦྱོང་ཡག་པོ་བྱེད་དགོས།
དཔེ་དེབ་ཀློག་སྟངས་དང་ཡི་གེ་འབྲི་སྟངས་མི་ལེགས་པའི་གོམས་གཤིས་ངན་པ་ཆགས་སུ་འཇུག་མི་རུང་བ་སྟེ། དཔེར་ན་ལམ་དུ་འགྲོ་བ་དང་། ཟ་མ་ཟ་བ། མལ་དུ་ཉལ་བ། འགུལ་བའི་འཁོར་སྒྲོམ་ནང་དང་། འོད་མི་གསལ་བའམ་ཉི་འོད་ཐད་འཕྲོ་བྱེད་པ་སོགས་ཀྱི་གནས་ཚུལ་འོག་དཔེ་ཆར་ལྟ་བ་དང་། ཡི་གེ་འབྲི་བ། གློག་རྡུལ་ཐོན་རྫས་སྤྱོད་པ་བཅས་བྱེད་མི་རུང་།
གཉིད་དང་འཚོ་བཅུད་འདང་ངེས་ཡོང་བར་འགན་ལེན་བྱེད་དགོས་པ་སྟེ། སློབ་ཆུང་སློབ་མ་དང་། སློབ་འབྲིང་སློབ་མ། སློབ་ཆེན་སློབ་མ་བཅས་ཀྱི་ཉིན་རེའི་གཉིད་ཡུན་ སོ་སོ་ནི་ཆུ་ཚོད་10དང་། ཆུ་ཚོད་9དང་། ཆུ་ཚོད་8བཅས་འདང་དགོས། དུས་རྒྱུན་འཚོ་བཅུད་དོ་མཉམ་ཡོང་བར་བྱེད་དགོས་པ་དང་། རྒྱུན་པར་ཟ་མ་སྣ་རྐྱང་མི་ཟ་བ་དང་། ཧམ་ཟ་ཧམ་འཐུང་མི་བྱེད་པ། མངར་ཆ་ཉུང་ཙམ་ཟ་བ། སྔོ་ཚལ་དང་ཤིང་ཏོག་སོས་པ་མང་ཙམ་ཟ་དགོས།
གློག་རྡུལ་ཐོན་རྫས་བཀོལ་སྤྱོད་བྱེད་པའི་དུས་ཚོད་ཚོད་འཛིན་བྱེད་དགོས། སློབ་གསེང་གི་སྐབས་སུ་གློག་རྡུལ་ཐོན་རྫས་སྤྱད་དེ་སྐར་མ་30ནས་40བར་སློབ་སྦྱོང་བྱས་རྗེས། དུས་ཡུན་སྐར་མ་10ངལ་གསོ་དང་བཅས་མིག་གི་རྒྱང་རིང་ལ་ལྟ་དགོས། སློབ་སྦྱོང་མ་ཡིན་པའི་གློག་རྡུལ་ཐོན་རྫས་བེད་སྤྱོད་གཏོང་ཐེངས་རེར་སྐར་མ་15ལས་བརྒལ་མི་རུང་བ་དང་། ཉིན་ཧྲིལ་པོར་རིམ་རྩིས་བྱས་ན་ཆུ་ཚོད་1ལས་བརྒལ་མི་རུང་།
སྒོ་སམ་དང་རྒྱང་རིང་གི་དངོས་པོ་མི་མཐོང་ཚེ་རྒྱབ་སྒྲིབ་ཕོག་ཡོད་སྲིད་པས་དུས་ཐོག་ཏུ་དགེ་རྒན་དང་ཁྱིམ་བདག་ལ་བཤད་དགོས།
གལ་ཏེ་སྨན་པས་རྒྱང་སྒྲིབ་ཡིན་པ་ངོས་བཟུང་ཚེ། སྨན་པའི་མཛུབ་སྟོན་འོག་མིག་ཤེལ་གྱོན་དགོས་པ་མ་ཟད། དུས་བཀག་ལྟར་ཡང་བསྐྱར་བརྟག་དཔྱད་བྱེད་དགོས། མིག་སྔའི་བར་གསོ་རིག་ཐད་ད་དུང་རྒྱང་སྒྲིབ་མིག་བཅོས་ཐབས་མེད་པས། ཚན་རིག་དང་མཐུན་པའི་ཡོ་བསྲང་བྱེད་པ་དང་། མིག་གི་གོམས་གཤིས་ལེགས་བཅོས་བྱེད་པ་སོགས་ལ་བརྟེན་ནས་རྒྱང་སྒྲིབ་ཇེ་སྡུག་ཏུ་འགྲོ་བ་སྔོན་འགོག་བྱེད་དགོས།
